تجيبها كده تجيبها كده.. هي كدة..!!

كرات عكسية
محمد كامل سعيد
تجيبها كده تجيبها كده.. هي كدة..!!

*مدخل أول:*
# تقول الطرفة ان مجموعة من (المساطيل) وبعد ما وصلوا الي مرحلة (ملل متأخرة) من الونسات وتداولهم النكات.. قرروا – ومن باب كسر الروتين – ان يضعوا لكل نكتة رقم محدد.. اختصارا للوقت وتقليلا للكلام..!!
# وحددوا يوما محددا لبداية ذلك النظام الجديد.. وعمليا شرعوا في تنفيذ ذلك الاتفاق المجنون.. وفي اليوم الموعود.. وبعد ما (انسطلوا) قرروا بداية النظام الجديد وصار كل واحد منهم يقول في كل مرة (رقم ما).. فيضحك الجميع..!!
# وفي مرة.. قرر المساطيل الذهاب في رحلة ومعهم مجموعة من شباب وشابات الحي.. وعندما وصلوا مكان الرحلة وانزلوا حاجياتهم.. واكلوا وشربوا.. بدأوا البرنامج المصاحب.. فشرع احدهم ودخل في دائرة النكات..!!
# المساطيل اختاروا فيما بينهم التعامل بذات الطريقة التي اتفقوا عليها.. وصار كل واحد منهم يقول النكتة الخاصة به عن طريق الرقم.. فيضحك المساطيل فقط دون سواهم.. وفي مرة قال احدهم (ثلاثة).. فضحك المساطيل كثيرا جدا.. الا ان احدهم قام وضرب الشخص الذي حكي تلك النكتة وقال له: (ما بتخجل.. دي نكتة تقولها قدام البنات ديل)..؟!!
*مدخل مباشر:*
# لعب المريخ مباراة ودية امام فريق مجهول كدة (ما معروف) ولا اسم له بين اندية بنغازي الليبية.. وعلى الرغم من انه فريق مجهول ولا الاهلي الليبي ولا الاخضر ولا الاتحاد ولا السويحلي ولا النصر ولا احد سمع به من قبل.. الا ان المريخ تعرض للخسارة بهدف دون مقابل..!!
# وهنا (كدي نلقي لي زول يقول بغم) – بكسر الباء – عشان أهب فيهو واقعدوا في علبو.. واقول ليهو دي مباراة اعدادية يا وهم.. والنتيجة دي ما ليها اي علاقة بالقصة الاساسية المتعلقة (بالبناء والتشيد) الذي شرع فيه نادي المريخ منذ سنوات..!!
# وأوعي زول يقول لي دي المباراة الخامسة والا السادسة.. لاني ح اقول ليهو خامسة وسادسة في عينك يا حاقد يا هلالابي.. يا اللي ما عندك غير تكسر المجاديف اللي بتعملها لجنة تسييرنا الناجحة.. والتي اتت باعمال خارقة للعادة (للعادة دي مني شخصيا).. بعدين انت منو عشان تقعد تنظر لينا وتشرع لينا.. وتعمل لينا فيها ابو عرام.. (عرام التنزاني اللي بعتو ليهو النمير ود مصطفي.. صاااح)..؟!!
# طبعا لو فكرت مجرد تفكير اني اسأل لي واحد مريخابي “ارزقي او طبال او احد المشجعين” الذين يؤمنون ويستسلمون ليساسة القطيع – (طبعا ليس كل عشاق الاحمر يسيرون خلف سياسة القطيع لان هنالك مجموعة نيرة تفهم وتعلم الي اين تمضي الامواج الحالية) – لو فكرت اسال عن (هل شاهد احدكم اي مباراة للمريخ ولماذا)..؟!!
# فان القيامة ح تقوم عديييل.. واحتمال الرد يجيني في شكل كرسي طائر.. (قلت كرسي طاير ما بلة جابر).. لان اي سؤال في هذه الاثناء والمريخ مغلوب يمكن ان تفسر علي انه تريقة او استخفاف او شماتة وتقليل من قيمة ومكانة الزعيم الذي اذا سالنا عن: متي يا تري هو التاريخ الذي فاز فيه ببطولة محلية..؟! فان الاجابة ستتحول الي اشتباكات عديييل.. واحتمال يجيبو لي البوليس..!!
# وبمناسبة (البوليس) دي فان المريخ لعب حتي الان ست مباريات ما بين الرسمي والوادي (كتبت هذه الزاوية قبل لقاء النصر الليبي).. لم يتمكن فيها جميعا الا من الفوز علي البوليس الرواندي بتلك الثلاثية الخارقة التي كوت قلوب الهلالاب بعد ما غسلتها ونشفتها.. ولدرجة إننا صرنا نردد مع ذلك الغسيل والمكواة: (فستان نفسية.. نشف)..!!
# فستان نفيسة مالك ومالو هسة.. في زول جاب سيرة الرئيس الطوالي الذي هتف الجماهير ضده عندما تعاقد مع كمية من المحترفين الذين اثبتت الايام فشلهم.. واكدت انهم عبارة عن مواسير.. لانهم جاءوا عن طريق السماسرة حيث هتفت مجموعة من المحبين: (ضيع مالو.. مال ومالو)..!!
# يا حبيب ما تبطل حركاتك دي.. انت عايز تقول شنووو..؟! ساهرت بينا..!! ياخ والله انا ما عايز اقول اي حاجة.. بس والله مستغرب من الحالة التي وصل اليها مريخ (في اخر الزمان).. وان يشرع في التباري مع فرق لا اسم ولا تاريخ ولا مكانة لها في بلدانها.. ليحمل ذلك اشارة اكدت ان مكانة الكيان قد وصلت الى اقل مستوياتها لدي البعض..!!
# اقول ذلك الحديث بعد ما وصلت الامور الي مراحل متاخرة في التعامل مع كل شئ.. التعاقدات مع المحترفين والمدربين وحتي اللاعبين الوطنيين.. والتجارب الودية الاعدادية التي لا تحمل معها الا الاهانة والاساءة لتاريخ هذا الكيان الكبير.. الذي ثبت ان قادته الان لا يقدرون ذلك التاريخ ولا يحرصون علي حفظ تلك المكانة..!!
# مباريات المريخ في اخر الزمان صارت تتشابه في التواضع والخيبات.. ولدرحة اننا وصلنا معها الي مرحلة الملل.. حيث لعب الفرق حتى الان ست مباريات لم يري الجمهور منها ولا مباراة واحدة.. في اشارة عملية الي ان قادة الادارة – وبجانب انهم لا يقدرون قيمة الزعيم – فانهم كذلك لا يهمهم الجمهور الذي يعتبر هو المحرك الاول والاوحد الذي يعتمد عليه الاندية الكبيرة في مواصلة المسيرة..(يعني تجيبها كدة.. نجيبها كدة.. هي ح تفضل كده).. وربما تكون لنا عودة قريبة لهذه القصة المهمة باذن الله.
# *تخريمة أولي:* مباريات المريخ الاخيرة ذكرتني الطريقة التي اتخذها المساطيل لرواية النكات.. يعني بدل ما الاعلام السالب يجهد نفسه يفترض ان يتفق علي طريقة جديدة ليبلغ بهاعشاق الزعيم بنتائج التجارب الاعدادية.. فمثلا حال الخسارة يقول لهم (تلاتة).. اما حال التعادل يقول للجماهير (ستة)..!!
# *تخريمة ثانية:* الان وبعد ما لعب المريخ ست مباريات بالتمام والكمال ما بين الودي والرسمي فان اجابات الارزقية لا ولن تخرج عن (التلاتة والستة).. وفي كل مرة وبعد اجابات المطبلاتية نتابع عشاق الاحمر وهم يضحكون ويمارسون الفرحة الكبيرة.. (يعني تجيبها كده.. او تجيبها كده.. هي كدة)..!!
# *تخريمة ثالثة:* يقوم يجي في مرة من المرات واحد من الارزقية يقول للجماهير (تسعة).. فيخرج عليه احد الحقانيين ويقول ليه: (ما بتختشي.. دي نكتة تتقال قدام مريخاب أخر الزمن)..؟!!
# *همسة:* طبعا (القطيع) وصل الي مرحلة الملل.. وصار يقف على اطراف اصابعه ترقبا لاي فوز حتى ولو كان على (ام صفقا عراض) عشان يكاوي بيهم الناس التانيين..!!