النجم للرجم

في السلك

بابكر سلك

النجم للرجم

بسم الله الرحمن الرحيم
*تستمر المبادرات المريخية لرأب الصدع وايجاد حل لاشكالية استقالة الاخ ايمن
*اتمني ان لايكون الحل علي طريقة باركوها
*ود ايدك صافحو
*اتمني ان تكون الحلول
*واقول الحلول
*لان الاشكالية ليست واحدة بل اشكاليات تشيب لها حتي الصلعات التي فقدت الشعر من هول الحال المريخي
*مشكلة المريخ ليست في استقالة ايمن
*مشكلة المريخ الاولي في اننا لازلنا نبحث عن الرئيس العندو قروش
*والرئيس العندو قروش طبعا كتر خيرو مهما كانت قروشو كتيرة
*حايسير النادي في فترتو وبس
*ماحايعمل علي اخراج النادي من جيوب الافراد الي رحاب الاعتماد علي الذات
*ورحاب الاعتماد علي الذات تأشيرة الدخول اليها ليست الاستثمارات فحسب
*ولكن تكمن الموافقة الامنية فيها في تفعيل واستدعاء المقدرة المالية للروابط وللاعضاء وتفعيل العضوية
*وده رافد مالي ضخم يمكنه دعم الكيان في عهد الرئيس العندو قروش حتي تتفرغ اموال الرئيس العندو قروش وافكاره للبدء في انشاء موارد استثمارية سريعة العائد ومتوسطة المدي وبعيدة الأكل
*وقديما قالوا
*لاتعطني سمكة ولكن علمني كيف اصطاد
*لانك لو جبت لي الحوت بكمل وبتفوت انت وبكون انا محتاج لقرموط مالاقيهو
*ومن كبري الاشكاليات تسييس المريخ
*فنحن ناد رياضي ثقافي اجتماعي
*لسنا بالنادي السياسي
*فحتي الرئيس العندو قروش البنبحث عنو يجب ان يكون مقتنعا بانه حر في انتمائه السياسي
*لكن علية ان يربط حماره الحزبي خارج اسوار نادينا ويخش لينا بصفته مريخابي وبس
*ولما يطلع من سوار النادي يركب حزبو ويعرد
*ومايقال عن تسييس النادي يشمل بالطبع الانتماء او الولاء الحكومي
*لانه لو تعارضت مصلحة الكيان مع صالح الحكومة فان الرئيس القائد حقنا سيغلب صالح الحكومة التي بالطبع تشكل رافدا هاما لدعم الرئيس العندو قروش اثناء تسييره لامور النادي
*فالحكومات دوما تحب استقرار الموسم الرياضي
*واستقرار الموسم الرياضي بالطبع يكمن في هدوء النادي وعدم اتخاذ المواقف الرافضة والمنتفضة والثائرة علي الظلم
*ونذكر كيف ان الكاف اقصانا ونحن بتونس نستعد للقاء النجم بالرجم
*وقتها كنا الاقرب للتأهل
*فاتخذ اهل الصراع حول الاتحاد موقفا لم نفهم منه غير الاضرار بالمريخ
*لانهم اخروا اتخاذ موقفهم الي مابعد مباراتنا الافريقية ضد الزبون
*وانتصرنا فيها
*فماكان من اهل الصراع الا ان يجازوا المريخ باتخاذ موقف مخالف يجمد النشاط ويبعد المريخ
*وقد كان
*ووقتها كنا سنرجم النجم بعقر داره
*وقتها ماكان حاينفعهم سيدي بيه ولا بن شوته شديدة باشا
*ووقتها لم يكن لنا اي موقف تجاه الظلم الذي حاق بنا
*سكتنا لانهم ارادوا لنا اجماعا سكوتيا
*ومضي الامر وكأن المظلوم فريق من فرق الروابط
*المهم
*اشكاليات المريخ كتيرة اهمها وجوب اخراج كل ماهو غير رياضي وغير ثقافي وغير اجتماعي عننا
*فغير ذلك هو ماحزبنا ووزعنا كيمان لاتطيق بعضها البعض
*والاعتماد علي الرئيس الحكومي من مشاكلو ان عدم الاستقرار الحكومي يكون بعبعا مخيفا نضع بسببه ايدينا علي قلوبنا خوفا من قلب الحكومة اثناء الموسم
*كما ان جميع حكوماتنا ولو استقرت لاتستقر علي رأي
*ودي نقطة اتمني الوقوف عندها
*ومن اشكاليات المريخ السوء الذي عشعش في نفوس بعضنا والذي خلق خصومات بيننا و فجورا فيها
*المهم
*تحية كبيرة واحترام لكل المجتمع المريخي
*وتحية خاصة للقائمين علي المبادرات
*وخاصة جدا نرفع معها القبعة لما تظهر الصلعة
*لمجلس الوزراء الاخوة برابطة قطر
*وللكبير محمد الياس
*ودعائنا بالتوفيق
*المهم
* تمر علينا ذكري مانديلا
*ففي مثل هذا التوقيت سنة تسعة وتمنين
*كانت البلد ترقص قمحا ووعدا مع اوركسترا النجوم جيل مانديلا وهم يحملون البطولة القارية الوحيدة التي حققها ناد سوداني من يوم خلقوا الدنيا وحتي ذلك اليوم بل حتي يومنا هذا
*بطولة ميزتنا وجعلت كل اندية السودان قبل الانفصال وبعد الانفصال والي يومنا هذا وااااااحد
*تساوت اندية الممتاز وفرق الروابط كلها في صفرية مثل هيك انجاز
*هذا التفرد جعل منا مميزين واقعا وغيرنا يتميز في خيالو
*والاحتفال بذكري مانديلا يجب ان يكون عيدا قوميا ووطنيا
*يأجزوا لينا فيهو ويلقي فيه رئيس البلد خطابا والشوارع تزدان باعلام السودان والمريخ
*ده يوم لايقل عظمة عن الاستقلال ولاعن تحرير الخرطوم
*مبروك لكل الرياضيين هذا الانجاز المريخي
*ولا عزاء لاهل بيت البكا
*داير اكتب بكا كتبت بوقبا
*هو بوقبا مالو؟؟؟
*سامع الجماعة كلهم بوقبا بوقبا
*الحصل شنو؟؟؟؟؟
*الحبيب محمد عبدالماجد
*بوقبا هين
*تعالوا احتفلوا معنا بمانديلا بيه
*الحصة وطن
*ايها الناس
*ان تنصروا الله ينصركم
*عارفين؟
*طيب ماتنصروهو عشان نتفكفك
*اها
*نجي لي شمارات والي الخرتوم
*كان شفت ياوالينا
*مرقنا ولسه ماجينا
*يجيبنا الله يا والينا
*ووطنا يرجع لينا
*نستمتع بعودة الناس برغم انينا
*ونرش السخينة
*ونرسم البسمات فرايحيه
*برغم الدموع الدفينه
*التي استوطنت فينا
*اعلانا بانتصار وطن ونهاية الحرب اللعينة
سلك كهربا
ننساك كيف والكلب قال الحمد لله عرفنا قيمة الوطن كوييييييييس وبطلنا قولة ملعون ابوك بلد….. ويابلد بحبك حب… احبك حب ماحباهو جن لي شيطان ولاحباهو بشر لانسان
والي لقاء
سلك