خسارة بطعم الموز!!

على صفيح ساخن

خسارة بطعم الموز!!
• إضاءة: التأريخ يعيد نفسو، و الرياضيات برضو:
• ( لو غلبنا، لو داك إتعادل، لو لو لو)!
• تسخينة : إنتهت دولة أقصد (جولة).. بسم الله!
• أجمل ما في أمر القرعة لفريقي القمة
• (قمة علينا هنا بس شان ما نتفاصح ساي)
• أجمل ما في الأمر إنو كل واحد منهم (في مجموعة)
• بعد أن وقعا في مجموعة واحدة السنة الفاتت
• بس بدل المريخ جابوا القطن (عملتو شنو يعني؟)
• كان إهتمام كل فريق ليس كسب مباراتي نديمه
• بل خسارة مباريات غريمه
• و في نهاية المطاف صار التنافس في (الطيش منو؟)
• و مثل تلاميذ الأساس ( والله دا ما أنا)
• وظلوا يحسبوا ليتخارجوا من الطيش
• لا لينافسوا على الكأس …
• لذلك خسارة (كليهما) هي خسارة بطعم الفوز
• أها دا عنوان جديد شان نوريكم إنو نحن بنتطور و نكتشف
• شنو تعادل بطعم الفوز، و كورة أرضية زاحفة أعلى المرمى؟؟
1/1
• و الأجمل (الخلَّي الكتوف إتلاحقت)
• و الخلاَّ ما فيش حد أحسن من حد
• إنو الهزيمة بي نفس القيمة يعني بي شرف
• أقصد بي هدف
• العقلاء قالوا دا شي طبيعي في ظل الظروف
• الظروف المابية تتغير منذ تأسيسنا للأتحاد الافريقي دي!
المشكلة !!
• إنو كل واحد بعاين في ورقة التاني
• و مهتم بي غلطات التاني و إنكسارات و هزائم التاني
• بفكرة : (التاني) هو الجحيم
• و لو أنَّ كل منهما ركَّز (في ورقو) لكان خيراً لهما!
• و للكرة السودانية و … للظروف!
لقاءت (مصيرية)
• مباريات قمَّتنا القادمة هي مع مباراة قمة جيراننا
• إخواتنا المصريين.. المريخ مع الزمالك و الهلال مع الأهلي
• الحمد لله إرتحنا من الأهلي و من عقليات اداريينا:
• أغلبو لينا و بننغلب ليكم، و نأهلكم و نتأهَّل بيكم!!
• بالنسبة لمجموعة المريخ فرق شمال افريقيا ح تلاقي ناس وادي النيل
• (يبدولي زي الما برضوا بالتعريف بتاع شمال أفريقيا دا).. مع إنو تعريف و توصيف جغرافي بس ما أكتر..
• زي شرق النيل و شرق الجزيرة و غرب كردفان و شمال الوادي و جنوب الحزام.
• المريخ و الزمالك مضروبين من الترجي و بلوزداد
• يعني بالكلام القديم جق الجرايد (لقاء الجريحين)
• و بالواقع (الطيشين)
• لذلك سوف يسعى الزمالك للفوز و سوف (نحن برضو)
• ما أخشى على الزعيم إنو في كتابات بتحفِّز في اللعيبة و تشكِّر
• و كأنَّهم غلبوا الترجي (نصصة نهار و الدنيا سحائي)!
• اللقاء الآخر (الأبطال) في (الأبطال)
• كل نتائجه حلوة مع المريخ (لو فارز) لو فاااز .. و لووو
• الله عليك لو جيت!
• يعني أِّي واحد يغلب التاني بمشي فوق بي ستَّة و بخلِّي التاني معانا و الزمالك طيشنا
• إتعادلوا حِلو هم الاتنين بكونوا فايتننا بي نقطة و كلنا فايتين الزمالك بي زمن!
• فوز المريخ بحفظ حقوقو في التأهل و لو ركز اللاعبين ممكن تحصل عادي!
• ما قصَّرتو!
• عدد من الأصدقاء الأعزاء أبدوا تخوفهم قبل لقاء الترجي
• الترجي حقيقة بخوف و المثل قال كان أخوك حلقوا ليو بل راسك
• و أخوك حلقوا ليو بالخمسات و الستات و في شوط وأحدات
• مع إنها حلاقة جديدة و تقليدية
• لكن مع ذلك قلت لهم شخضيا متفائل
• المريخ عودنا (إلا تكون في حاجة ما طبيعية) أن يلعب بقوة مع فرق قوية
• و القصة دي فطرية .. الفنان المسرحو مليان بأدِّي كويس
• و الطالب الشاطر بجعل المعلم يجتهد أكثر و أكثر
• لم يخيب المريخ ظنَّنا و حقق نتيجة (إيجابية) مقارنة بالظروف البيئية (المحبطة)
تدوير!
• أحياناً و أنت في 2023م
• يُخيَّل إليك إنك لسه في تسعينيات و ألفينيات القرن الماضي
• تقرأ و تتابع نفس الأحداث :
• الغربال مشي من الهلال الغربال رجع الهلال
• الصيني مشى المريخ الصيني مشى من المريخ
• ابراهومة مدرب الابيض ابراهومة مساعد المريخ
• إبراهومة مدرب المريخ ابراهومة مساعد مدرب المريخ
• ابراهومة أقالو من المريخ ابراهومة رجع المريخ
• الكاتب الفلاني يهاجم إتحاد كرة القدم السوداني لي نفس السبب (الزماني)
• ريكاردو مدرب الهلال الكان بدرب أهلي شندي بعد ما مشى المريخ
• رجع تاني المريخ
• صن داونز الغلب الهلال السنة الفاتت غلبوا (تاني) أقصد (تالت)
• لأنَّو الفاتت كانت بنظام (الذهاب و الاياب)
• إستاد الهلال كعب.. استاد المريخ سمح
• الجوهرة ظابطة المريخ مُعدَّاتو ح تصل من تركيا
• و تركيا فيها زلزال.. الله يسترهم و يتقبَّل ضحاياهم
• كلو من الكيزان اللابدين هناك ديل
• ما ذهبوا لبلاد إلاَّ و خرَّبوها و دمَّروها
• (زي العرب الورا) مع قلب المحبوب في الأغنية الهابطة
• أعني الصاعدة هذه الايام
• المهم.. المرتبات جات المرتبات زادت
• فلان مرشح لرئيس وزراء
• فلان قلبها
• فلان تاني مرشح
• حركة البتاع تهدد
• حركة الما بتاع تقاطع
• الاتفاق (القطاري) محطَّتو فاتت
• الكتلة الشنو ما بعرف ما وقَّعت
• و هكذا و هكذا …………………. الى ما لا نهاية!
• خلُّونا في الكورة أحسن
• تجميع لاعبي الهلال و المريخ (الطايرين) من البطولة الافريقة للمنتخب الوطني
• طيران (كتلة و كتيبة) المنتخب الوطني زي ما طارت الاندية (متفرتقة)
• كونفدرالية و أبطال
• لن أقول لكم فكِّروا خارج الصندوق
• بل فكِّروا في صناديق جديدة
• الحاجة دي مُملَّة اتخيل زي الانت في القرن دا و تقول ولدك ألعب بي (ترتار)
• مع انو ممتع و بعلموا (السواقة)
• يعني الناس تواكب و تجدِّد، و بلاش تجريب (المِجَرِّب)
• و تفتح أيِّ قناة تلقى المذيعة الزمان مستضيفة الخبير الزمان
• أو الصحفي الاستضافتو الأسبوع الفات.. ياخ معقول؟
• المياه إذا لم تتحرك ركدت و أصبحت (آسنة)
• و في هذه الحالة (البعوض بلقى يدينو و كرعينو و خشمو، ما يدو بس)
• أقسم بالله التقول سمعتني هسَّه في واحدة طايرة جنبي؟
• بعوض بالصباح؟
• أهو البعوض بقى أحسن مننا و بدأ يفكر في صناديق جديدة
• خليكم من تهميش وتهشيم
• و فترة إنتقالية و فترة أولى و إضراب
• و نفس الزول و نفس الناس.. جدِّدوا يا رعاكم الله!
و …. كفى !!!
• تكريم أستاذنا إسماعيل حسن عصر اليوم
• تشكر عليه مجموعة (إخوان الجنيد بدعم الكيان) التي قامت به
• و لو أن (و كفى) يستحق أن يكرم من الدولة
• شخصياً مدين لأستاذ إسماعيل بأشياء قد لا يعرفها
• هو أول من نشر لي صفحة كاملة في جريدة المريخ و أنا لا أزال طالبا في الجامعة
• صفحة (روح رياضية)
• و هو أول صحفي يُقيمني (ماديَّاً) لا أنسي جلستي معه
• و ثالثنا أخي الأكبر الحبيب أستاذنا جعفر سليمان في عالم النجوم حيث كان يرأس تحريرها
• لا أنسى كلماته :
• – أمسك لينا المريخ و مبدئياً كدا بنديك 200 جنيه
• و رغم انو مبدئياً كدا دي إستمرت حتى تركي عالم النجوم (مستقيلاً) بعد ذهاب استاذ إسماعيل
• إلاَّ أنَّه أول مبلغ أتقاضاه من صحيفة (رياضية)
• و لما قرَّر أن يُصدر (وهج الصفوة) كنت معه منذ التخطيط و (صوغ) الإعلانات
• و جعل لي راتباً 700 جنيه في عام 2009
• إسماعيل حسن قدوة في كتاباته تكفيه : في فرق بين (الصحفي و السخفي)
• و الصحافة و السخافة
• هسَّه يا أستاذنا بقى في (سخافة إلكترونية) كمان!
• قدوة في تعامله و تواضعه
• ذات مرة نبهَّني بشدة: شكلك عجبتك روحك و الناس بقروا ليك، دا بخصم منك!
• من طرائفه: مرة صديقنا و اخونا ايهاب مصطفي الشقيق الأكبر لبرنس عطبرة قال لي :
• – المريخ داير يسجل محمد و أنا عايزو يقرأ
• قلت ليو: – جداً بتكلَّم معاو!
• قال لي : – ما تتكلم معاو انت كلِّم أستاذ إسماعيل
• مشيت لي إسماعيل حسن قلت ليو :
• – البرنس دا عندو أخوهو دايروا يقرأ عليك الله إتحاور معاو
• – قال لي ما يقرأ
• – ؟؟؟؟؟؟؟؟؟؟
• – المريخ بديو 500 مليون يقرأ لي شنو تاني؟؟
• أستاذنا اسماعيل قدَّم كثير للمريخ و للرياضة و للصحافة و يستحق التكريم
• شخصياً شاكر جداً و ممتن لك أستاذنا الغالي
• مُتمنياً لك أن تنعدل عليك (وين ما تقبل)
• و أن يمتعك الله بالصحة و السعادة
• و أن يبارك لك الله في الذُريَّة.. الذين عاشرناهم (أباذر و أحمد) و البقية
• و …………… كفي
فرفشة
• تطبيق بنكك تطبيق شغل الناس بقى موضة تياب و صديريات
• و بقى طريقة للإحتيال كان ما عملت حسابك
• في اعلان البنك تدفع للكشف بنكك عادي
• لكين الجديد : ناس بكتبوا رقم الحساب في الكَّرِت حق العِرِس!!!
• يعني كان ما جايي ريحَّت.. رسل قدحك بس#
• و الأجدَّ من كدا، قالوا الحمَّامات بتاعة الخرطوم بقت (يوجد بنكك) فيها
• المشكلة لو الشبكة كعبة أمورك بتجوط
• غايتو العالم متطوِّر إلاَّ كُورتنا و سياستنا و رياضتنا وفنَّنا و (كُلَّنا)!
• و عالمنا نحن دا!
• و يظل المريخ الحاضر و المستقبل و التاريخ
• و ما يضيرُ البحرَ أمسى زاخراً إن رمي فيه غلامٌ بحجر؟؟
• المُخدِّرات خطر داهم مكافحته مسؤولية الجميع
• خلوا بالكم من عيالكم
• (بكتب في الروشتة دي لي أكتر من 7 سنسن) زول جايب خبر ماف
• و هسه أيِّ حتى تفتحها تلقاها آيس بس#
• التوعية مُهمة لكين ما لدرجة أيِّ زول داير يكتب شعر و يعمل مسرحية
• و غُنا و خدمة و ندوة و (شنو ما عارف)!
• كدا أثرها بكون عكسي .. الله يستر منكم!
• بمناسبة ال(آيس) المواصلات بقت فاااااااضية!
• دايرين نصيحتي؟؟ ركِّزوا في الكورة، الشكية لغير الله مذلَّة، شان ما تتشتَّتوا
• و تنشغلوا و تتحرَّنوا!
• تخريمة: المرتبات جات؟
• تخريمة تانية: فيها زيادة؟؟؟؟
• تدوينة: يقولوا ليكم ماف مرتبات تقولوا عيد الحب و محمد منير؟
• تغريدة: سوف لن نشتري في هذا العيد (أيِّ حاجة)
• نشتري كيف و الماهية إتدينَّا قدرها عشرة مرات؟ دا لو جات.. و لووو!
• أيقونة: الرغيف راااااقد الأيام دي ( أيقونة الثورة) و في حلتنا فقط فتحوا 33 فرن جديدا
• و 3 مخابز!
• شاكر لكل من سأل عن (الصفيح الساخن) و ممتن!
• و مرَّة مرَّة بنكتب ليكم، و لو دايرين كل مُرَّة (عندي بنكك)!
• كلام نادر: الناس ما تيأس زي ما القون بجي في الزمن المُبدَّد و الضائع.. الأمور بتظبَّط إن شاء الله
• (ما تقولوا خير)!
• و في النهاية (لا يصح إلا الصحيح)!
• اللَّهم صلِّ و سلِّم و بارك على سيِّدنا مُحمَّدٍ و على آلِهِ و صحبِهِ بقَدرِ عَظَمَةِ ذَاتِكَ يَا أحَد!
و هذه بصمتي