معليش .. بكري المدينة..!!
صابنها
محمد عبد الماجد
معليش .. بكري المدينة..!!
· في الوقت الذي قام فيه المريخ بالاستغناء عن اللاعب بكري المدينة بصورة وصفها المريخاب انفسهم انها لم تكن كريمة .. قام المريخ بتسجيل اللاعب جوزيف (معليش) .. الموهبة القادمة من دولة جنوب السودان حسب تقارير اعلام المريخ.
· الناس ديل عندهم مشكلة في (الكراسي).
· جوزيف (معليش) ام بكري المدينة (معليش)؟
· زمان كان عندنا استاذ بقول لينا دخلوا كلمة (الربيع) في جملة مفيدة .. قدر ما نفتش لينا جملة مفيدة ندخل فيها (الربيع) ما نلقى.
· هو نحن (الربيع) شفناه وين ؟ عشان ندخلو في جملة مفيدة.
· هسه ناس المريخ لخبطوا (الكيمان) .. بدل ما يقولوا لبكري المدينة (معليش).. قالوها لي (جوزيف).
· في شندي في حي اسمه (معليش) .. قالوا زمان الواحد وقت تقع ليه قطعة ارض في هذا الحي بقولوا ليه (معليش)… كناية عن البعد.
· هسه حي معليش .. بقى في السوق !! … بقى قريب شديد من السوق .. والحي نفسه بقى فيه سوق.
· ما عارف الحصل في المساحات شنو؟
· لكن حي (معليش) الذي كان يعتبر بعيدا .. هسه قريب من محطة السكة الحديد وقريب من السوق وقريب من القيادة العامة .. وقريب من استاد شندي… وقريب من جامعة شندي.
· حي معليش بقع في المركز .. بين كل هذه الاشياء التى كان بعيدا عنها.
· فركة كراع من أي حتة.
· كشوفات المريخ التى خرج منها بكري المدينة دخل لها اللاعب الجنوب سوداني (معليش). هذا اللاعب الذي سجله المريخ كان مجلس ادارة نادي المريخ احوج ان يردد اسمه للاعبه السابق بكري المدينة بعد العطاء الكبير الذي قدمه اللاعب للمريخ على امتداد (
سنوات كان فيها بكري المدينة في المريخ مع الخروج لفترات قصيرة في بعض الاعارات في دول الخليج.
سنوات كان فيها بكري المدينة في المريخ مع الخروج لفترات قصيرة في بعض الاعارات في دول الخليج.· الطريقة التى خرج بها بكري المدينة من الهلال – جاء وخرج بها من المريخ .. البداية عندما تكون بصورة غير سليمة .. تأتي النهاية بنفس الشاكلة.
· نحن لن نشمت في اللاعب بكري المدنية .. لأن مجلس ادارة نادي الهلال وقتها برئاسة اشرف الكاردينال هو الذي فرط في اللاعب وقصر معه بعد الاختلاف (ماديا) في مبلغ بسيط لم يكن يفرق كثيرا عند الكاردينال.
· كذلك نشهد ان اللاعب بكري المدينة طوال تواجده في المريخ انه لم يسئ للهلال .. وان ظهرت منه بعض التفلتات والسلوك المرفوض في حق اللاعب الخلوق فارس عبدالله .. وقبل ذلك في حق المنتخب الوطني.
· على العموم نهاية بكري المدينة او طريقة خروجه من المريخ لم تكن جميلة .. وقد كنا نعتقد ان يخرج اللاعب بصورة افضل في وجود ايمن مبارك ابوجيبين الذي ظهر في المريخ مسالما ومسامحا .. وبدأ ادارة المريخ بشيء من (الدبلوماسية).
· انهاء التعاقد مع بكري المدينة كان يفترض ان يكون بدبلوماسية .. وكان على الاقل تقولوا ليه (معليش) .. او ترددوا ليه اسم اللاعب الذي وقع في كشوفات المريخ اخيرا.
· على ما يبدو ان مجلس ادارة نادي المريخ اختزل تسجيلاته في (معليش) وهي اسم او كلمة تعبر عن حال المريخ الآن.
· قلت كثيرا ان للأشياء دلالات يجب ان نقف عندها.
· معليش قالها مجلس الهلال للمريخ .. والنادي الاحمر مازال ينتظر ويحاول مع الهلال من اجل الموافقة على ان يلعب المريخ مبارياته في مرحلة المجموعات في استاد الهلال.
· معليش!!
· المريخ ترك خانة الملعب (خالية) ومنح الاتحاد الافريقي فريق المريخ مهلة اخرى لتحديد الملعب الذي سوف يلعب فيه المريخ مبارياته الافريقية في مرحلة المجموعات.
· معليش!!
· معليش نقولها للمريخ ايضا .. وأفضل لاعبي المريخ عماد الصيني ينتقل للهلال بعد ان قام الصيني بفسخ عقده مع المريخ.
· معليش!!
· الطريف في الامر ان اعلام المريخ قال ان رئيس نادي المريخ ايمن ابوجيبين رفض اعتذار الصيني للعودة للمريخ.
· رفضوا اعتذار الصيني وسجلوا (معليش).
· دي تبقى كيف؟
· معليش!!
· معليش لجماهير المريخ بعد تسجيل محترفيين برازيليين سوف يجعلوا المريخاب يندموا على محترفين حازم مصطفى (زرّاف الدموع).
· غايتو بريان دا امسكوا فيه قوي .. يا هو الفضل ليكم.
· معقولة مسجلين ليكم محترفين من المتحف البرازيلي.
· انتوا البرازيليين عندهم فراعنة؟
· ديل جبتوهم من وين؟
· المريخ تاني ح يكون عندو مشكلة في الشوط التاني.
· معدل الاعمار ارتفع بصورة واضحة في المريخ.
· الهلال بسجل في عناصر اعمارها 22 سنة .. والمريخ بسجل فوق التلاتين.
· نحن كنا فاكرين المريخ مشكلته في (الملعب) .. الآن اتضح لينا ان مشكلة المريخ الحقيقية في (العمر).
· المريخ سوف يعاني كثيرا في الشوط الثاني.
· كان افضل للمريخ ان يصطحب معه سليمان زكريا وضياء الدين ولوكا الى معسكر القاهرة بدلا من البرازيليين ديل.
· …………………..
متاريس
· بطء التسجيلات في الهلال هل هي دليل جودة … (الغالي بي غلاته يضوقك حلاتو) .. ام هي سوء تخطيط ؟
· ام هي سرية زيادة؟
· العليقي ممكن يفاوض (مهاجم) عشان يسجل ليه (مدافع).
· وممكن يدخل في مفاوضات (ارتكاز) تمويه .. عشان يسجل ليه (طرف يمين).
· دي حاجة اسألوني منها.
· لكن في كل الاحوال ملف التسجيلات كان يفترض ان ينتهى قبل ان يبدأ الهلال مرحلة الاعداد لمباريات مرحلة المجموعات.
· ليس ملف التسجيلات وحده .. ملف الاضاءة ايضا يبدو عليه انه ملف سري.
· السرية التى قتلت (الكديسة).
· معسكر جنوب افريقيا يتم الترتيب ليه بصورة (سرية).
· الغريبة مجلس الهلال اطاح بالمدير العام لنادي الهلال البروفيسور محمود (السر)!!
· تسجيلات المريخ لم ينجح احد.
· لا محترفين ولا وطنيين.
· المريخ عشمه كله في (مشاطيب) الهلال.
· مشطوب من الهلال ولا محترف من البرازيل.
· عشان كدا الهلال مفروض في ملف المشاطيب يكون حذر ومفتح.
· الاعارات والتخزين هي الحل.
· الهلال سجل لاعبين صغار في السن .. واتجه بصورة واضحة الى الكنغو لتسجيل مواهب من هناك صغيرة في السن.
· بنفس المفهم .. المواهب السودانية الصغيرة في السن ما تهملوها.
· امجد قلق وياسر جوباك .. وقبلهم عثمان ميسي.
· هذه المواهب لا تقل عن أي موهبة (اجنبية).
· عشان الامور تبقى واضحة.
· وما تقعدوا تتغالطوا فينا ساكت.
· المريخ استغنى عن بكري المدينة عشان (العمر) .. واعادوا امير كمال.
· عملتوا شنو يعني؟
· تمارين الهلال بدأت من غير الازياء الجديدة ودي مشكلة !!
· وربما يسافر الهلال الى جنوب افريقيا ويلعب امام صن داونز قبل ان تصل الازياء الجديدة.
· في قصور في ادارة الهلال.
· في خلل.
· وفي مشاكل.
· لازم يكون في ترتيب ونظام اكتر من كدا.
· الاشياء الايجابية لن تغطي السلبيات.
· المريخ بقى يقعد في القاهرة اكتر من الخرطوم.
· والهلال بقى يلعب في جنوب افريقيا امام صن داونز اكتر من الاهلي الخرطوم.
· صن داونز تقول بيلعب في الدوري السوداني الممتاز.
· لاعبو الهلال يفترض ان يكونوا تعودوا على ذلك.
· مفروض صن داونز يكون بقى ليكم زي توتي.
· الامل عطبرة شغال تسجيلات صاح.
· وكذلك الشرطة القضارف.
· اين بقية اندية الممتاز؟
· اين الاهلي شندي تحديدا؟
· الرحالة شيبوب ابن بطوطة الملاعب السودانية.
· ابن بطوطة حل في العراق.
· بالتوفيق للاعب المجتهد شيبوب.
· محترف حقيقي.
· بكرة نشوف ناس الصيني عملوا شنو؟
· ………….
· ترس اخير : المطرة بتجيكم ما تستعجلوا عليها.
معليش وستين معليش، الحيكومة شكله شنكلت الجماعة في القريشات وقالت ليهم معليش يا ود عبد الماجد، وأخونا أبو جرابين بقي قاعد في السهلة هو والسمسار دااااك، وقضوها مبادرات ورعايات يلقطوا منها قريشات، وفي نهاية المطاف فطروا الحلامبشة على جوز مومياوات برازيلية 😆😆😆
قلنا ليكم السنة دي حا تكون سنة إسهالات يا مرخرخين وما صدقتونا وعشتوا مع المخدر بتاع الكاهن الأعظم أليخماو……..بالجد معليش….!!
الليلة العمود بتاع الكاهن الأعظم أليخماو المخدر بتاعه بقول ياليل 😝😝😝