دكتوراه في الهدف الثاني..!!

صابنها
محمد عبد الماجد
دكتوراه في الهدف الثاني..!!

• عندما اشاهد مباريات الهلال من الملعب او من التلفاز او الاذاعة بكون في حالة ترقب وتوجس للهدف الاول.
• بنتظر الهدف الاول متل (هلال العيد).. وكلما يتأخر الهلال في تسجيل الهدف الاول .. القعدة بتغلبنا.
• نمرق وندخل متل مباحث الجمارك.
• لمن ترسل ليك (شافع) وما يجيك راجع .. الحالة دي هي نفس حالة انتظار الهدف الاول للهلال.
• قبل ما امشى ليكم على الهدف التاني .. اقول ليكم شكل الهلال في المباريات الاخيرة .. امام الزومة وأمام حي الوادي تحديدا يبعث للاطمئنان .. بتشعر من خلال الاداء ان الهدف سوف يأتي .. حتى وان تأخر.
• الهلال ح يسجل ح يسجل.
• الهلال اصبح يشكل ضغطا كبيرا على منافسه .. وأصبح لاعبو الهلال يلعبون بإيقاع سريع .. عشان كدا ما بتكون خائف.
• الهلال اصلا فريق (هجومي) .. ما نحب نشوف الهلال في وضع الدفاع .. الهلال يجب ان يشغل (وضع الهجوم) حتى وان كان يلعب امام برشلونة او ريال مدريد.
• الهلال امام الزومة احتسب له اكثر من (18) ضربة ركنية .. من احدى هذه الضربات سجل صلاح عادل هدف الهلال الاول.
• الضربات الركنية الكثيرة دليل هجوم.
• الضربات الركنية الكثيرة (قولة خير) للهدف.
• وفد مقدمة.
• امام حي الوادي امس ايضا احتسب للهلال عدد كبير من الضربات الركنية.
• وكان فريق حي الوادي تحت نيران الهلال طوال زمن المباراة.
• المطلوب من لاعبي الهلال ان يعرفوا كيف يستفيدوا من الضربات الركنية الكثيرة التى تحتسب لصالح الهلال.
• الجميل في مباريات الهلال الاخيرة .. ان الهلال بعد ان يسجل الهدف لا يتراجع .. وإنما يواصل في ضغطه وهجومه الكاسح .. وهو المطلوب.
• عندما يسجل الهلال الهدف الاول .. بننظر للساعة وتشوف الزمن.
• يمكن تقوم.
• ويمكن تقعد.
• لكن بعد الهدف الاول بتخش في حالة اصعب من الحالة التى كنت تنتظر فيها الهدف الاول.
• في اعتقادي ان الهدف الثاني اهم من الهدف الاول.
• عشان كدا عندما يسجل الهلال الهدف الاول بتخش في حالة تانية .. انتظارا للهدف التاني.
• هدف (البطانية) كما يطلق عليه.
• الهدف الاول غير (البهدلة) والقومة والقعدة ما بتشوف منو حاجة.
• أي هجمة على الهلال بتكون شفقان.
• أي ضربة ركنية او مخالفة على الهلال .. بتقول في نفسك الكورة ما مضمونة.
• خاصة في اخر (10) دقائق.
• اصعب عشر دقائق في المباراة هي الدقائق العشرة الاخيرة والهلال متقدم بهدف وحيد.
• لهذا نؤكد اهمية الهدف الثاني.
• نتيجة 1 ـ صفر نتيجة (مقلقة) وغير مريحة ..وغير انها بتحرق ليك اعصابك ما بتشوف منها حاجة.
• وقت النتيجة تكون 1 / صفر بكون عندك احساس ان التعادل ممكن يحدث في أي لحظة.
• خاصة في الدقائق الاخيرة من عمر المباراة.
• كورة طاشة .. حكم ما عندو ضمير ممكن يقلب النتيجة.
• غير هذا عندما تكون النتيجة 1 / صفر الفريق المهزوم بيلعب بقوة ودافع اكبر عشان يتعادل.
• نتيجة 1 / صفر محفزة ومحرضة للفريق المهزوم.
• فارق الهدف بخليك تحت الضغط وبعرض اللاعبين للإصابات .. والحكم نفسه بكون ليس في حاجة الى مجهود كبير عشان يعادل النتيجة.
• اللاعب الذي يسجل الهدف الثاني عندنا اهم من اللاعب الذي يسجل الهدف الاول.
• الهدف الاول سوف يأتي مهما تأخر … المشكلة في الهدف الثاني.
• الهدف الثاني بخليك تفتح التلفون.
• وتعاين في الواتس.
• وتضحك.
• وتتكلم.
• وترسل رسائل.
• وتشرب شاي.
• وقهوة.
• هدف الهلال الاول امس سجله الفنان جارجو .. (مطرب الجماهير).
• جارجو دا من الليلة اسمو (مطرب الجماهير).
• الزول دا – ما شاءالله عليه.
• أي كورة بمسكها عندو ليها فهم براهو.
• جارجو وقت يمسك الكورة .. الباكات قدامو بكونوا زي القاعدين في (كراسي النص).
• يقوموا ويقعدوا في أي محطة.
• في أي كسرة.
• يقعوا ويقوموا تقول في عنبر الحوادث.
• والجماهير في المدرجات .. والكورة عند جارجو زي كأنها بتسمع في كمال ترباس.
• ترباس بغني بهدوء .. ما بتعب .. ولا بجر نفس طويل ..وجارجو كذلك.
• جارجو بطلع من مدافع مدافع .. زي الشعرة من العجين.
• ما شاءالله عليه.
• ربنا يحفظه .. ويغطيه من عيون السماسرة.
• الهدف الاول في حي الوادي سجلو جارجو.
• الهدف التاني .. هدف (البطانية) سجلو جون مانو.
• والبطانية انتوا عارفين قيمتها في البرد دا.
• اهم شيء.
• جارجو عاد بعد الهدف التاني وسجل الهدف الثالث.
• ناس قناة النيلين .. اجهزتهم ما قدرت على الكلام كدا.
• اجهزتهم طشت.
• مرقت من الشبكة .. عشان كدا ما شفنا هدف جارجو الثالث في الشبكة.
• قناة النيلين .. او قناة السودان نيوز .. ما عارف اسمها شنو ؟ كل مرة يطلعوا لينا باسم جديد.
• تقول ناس القمر الصناعي عاوزين منهم قروش.
• مرة يقولوا ليك النيلين سبورت.
• ومرة السودان منوعات.
• ومرة السودان دراما.
• ومن السودان نيوز.
• زي القاعدين في بيت ايجار.
• كل مرة يطلعوا من بيت ويمشوا بيت تاني.
• اي قناة من القنوات الفوق دي ما شغالة.
• القناة وقت تنقل ليك مباراة تجيب ليك (فلايت).. تقعد تتاوق للكورة مع كل هجمة.
• الله يسألني قاعدين (نشب) مع أي هجمة.
• معقولة يا ناس قناة النيلين … تنقلوا لينا مباراة الهلال من اتجاه واحد.
• كاميرا القناة حدها النص.
• ما بتمشي ابعد من كدا.
• تخلف غريب في نقل المباريات .. واستوديوهات عقيمة.
• تتخيلوا ديل الهدف وقت يسجلوا الهلال ما بعيدوه.
• والهدف عندما يسجل في شباك الهلال يعيدوا ليك الف مرة.
• ناس قناة النيلين قاصدين يطفشوا الجمهور من مباريات الدوري الممتاز.
• نحن ما عارفين نلقاها من منو؟
• قناة الملاعب بالنسبة لقناة النيلين بن سبورت.
• يا حليل قناة الملاعب.
• نعود للمباراة ونقول ان حي الوادي فريق ما ساهل .. ونحن بينا وبين نفسنا كنا متخوفين من هذه المباراة.
• لكن الهلال قدر يحسم المباراة بكل سهولة.
• سجل الهلال ثلاثة اهداف (مزيكا).
• أي هدف اجمل من التاني.
• الاجمل من الاهداف ان الهلال كان في وضعية الهجوم والضغط على الخصم.
• واعتقد ان هذا هو الامر المهم.
• اضغط على طول.
• هاجم دائما.
• حتى وان سجلت عشرة اهداف.
• بس تبقى هنالك ملاحظة مهمة يجب ان يتخلص منها الهلال وهي التمرير الخاطئ.
• واسوأ حاجة في الهلال ارجاع الكورة بصورة مستمرة ومكررة لحارس المرمى.
• واي كورة ترجع من المدافع للحارس بتعمل مشكلة للهلال.
• مع ذلك الطيب وارنق وابوعاقلة وحتى اجاجون بصروا يرجعوا الكورة للحارس.
• وفي كل مرة بعملوا لينا ازمة.
• عليكم الله ما ترجعوا الكورة للخلف.
• الواحد اذا رأسه ضرب .. احسن يطلع الكورة برة الملعب.
• ما عارف العاجبكم في ارجاع الكورة للحارس شنو؟
• الكلام دا في المجموعات ما بنفع.
• واي حاجة ما بتعلموها في الدوري الممتاز ما بتقدروا تعملوها في المجموعات.
• اتعلموا في الدوري الممتاز تلعبوا الكورة الى الامام.
• عشان الكلام دا في المجموعات ما بنفع.
• أي كورة ترجع للحارس في المجموعات قون.
• نحن قدام حي الوادي والزومة اتجهجهنا قدام صن داونز والاهلي المصري نعمل شنو؟
• …………..
متاريس
• نصيحة لجارجو ان يعمل ليه دكتوراه في الهدف الثاني.
• الهدف الثاني (مريح).
• زي قالب الحلو.
• وجارجو (مطرب الجماهير) ممكن يعمل فيه (دكتوراه).
• صلاح عادل عندو تصويبات الايامات دي احلى من الاهداف.
• لو في (فار).. كان حسبوها ليه اهداف.
• ولا كلمة.
• في أي مباراة للهلال بنشعر ان الهلال في حاجة لعماد الصيني.
• وسط الهلال مع الصيني ح يبقى مية المية.
• الهلال يحتاج لمراجعات عامة قبل مباريات المجموعات.
• لا بد من اضافات قوية.
• عاوزين مدافع.
• وعاوزين الصيني.
• ومهاجم.
• وطرف يمين.
• يبقى الهلال حاجة ما تخلص.
• المهم أي لاعب يضمه الهلال يشكل اضافة.
• عاوزين عناصر جاهزة.
• ……….
• ترس اخير : نقوم نشوف باقي المباريات … امس اليوم كله مباريات.