عمليه بتاع نفسيات بس…!!!
سوبر هاتريك
طارق محمد عبد الله
عمليه بتاع نفسيات بس…!!!
& في النكته الشهيرة سئل أحد الإخوة الأشقاء من الجنوب الحبيب والذي مازال انفصاله عنا غصة في الحلق خلونا في النكته هسه المهم.. ياجون بحكم تخصصك في الكهربه وكده احكي لينا مراحل التيار الكهربائي لمن اللمبة تولع.. أجاب شوفوا كهربه ده بمشي في سلك، بمشي في سلك، بمشي في سلك بخش جوه البيت برضو بي سلك طوالي لمبه بقوم بولع…!! طيب ياجون اللمبه بتولع ليه…؟؟؟ عمليه بتاع نفسيات بس…!!
& واستنادا على المذكور اعلاه أخبروا فلوران ود ام فلوران وقبل مواجهة المدفور بأن القمة عندنا غير ممكن تشوف مبارة عالمية أو غالبا أداء فطير فقير وعليه أن يضع فوارق الحرفنة والمهارة على جنبه لأن المريخ وكما قلنا سيجوط الأمور ويحاول خطف هدف بأي طريقة صدفه بالركبه بالضهر بالحظ بالدفر وبعدها يتخندق ويشتت الكرات كيفماء اتفق لذلك فإن الأعداد النفسي لها أي القمة لايقل عن الأعداد الفني بل يزيد، واي زول يامعلم حسيتو هارش منها مايورينا الوش ومايلعب كلو كلو مهما كان حجمو أو وزنو وياجماعة الخير القمة الغير عملية بتاع نفسيات بس…!!
& ومن هسه تواجد الشعب الأزرق في الاستاد بكثافة غير عادية ويكون واضح انو أغلبية مسألة في غاية الأهمية وفيها حته سايكلوجية تجاه حكام الممتاز الأسوأ على وجه الكرة الأرضية، ومن قولة تيت دايرين اهازيج مدوية وهتاف، يخلي دفاع المريخ الأساسا خواف يردم البلنتيات والقلشات جبل رجاف وده اول مدخل للانتصار المرتقب لهلال الملايين بإذن رب العالمين سامعني ياناس قيقم وابو صفارة والصحاف…؟؟ وشفتوا كيف عملية بتاعت نفسيات كاملة الأوصاف.
& والمدخل الثاني الحوافز وفي الحته دي لابد لمجلسنا الهمام يرفع التمام وفي تناغم وانسجام يلعن وفي كل وسائل الإعلام عن حوافز كااااااربه ما اي كلام، وكما هو معلوم وقادي اضان الكل وفي هذا الزمن الصعب الضحاكات عز الطلب وطعمها عسل وبتحل المشاكل وبتخلي النفسيات فل وقصة انو التحفيز بيدفع للاجادة والإبداع أيضا يندرج تحت بند عملية بتاع نفسيات بس.
اهداف سريعة.. اهداف سريعة
& وعلى المعلم أن يخبر فلوران الحكاية لازم الغربال والشعلة من البداية ومزمل لا بديل قبل النهاية وبذلك تكتمل فصول الرواية.
& ولو سألك يامعلم الكلام ده كيف ياود الجريف…؟؟؟ قول ليهو الحقيقة بدون تزييف عملية بتاع نفسيات بس.
&ولأن المخالفات على مشارف منطقة الجزاء حتكون بالكوم مشاركة إبراهيما ايمورو مهمة جدا ياقوم.
& وفي موضوع تاني مخاطبة الأسد للاعبين ضرورة والتصريح بأنها قمة الحريق يسد على الجماعة الطريق وبرضو عملية بتاع نفسيات بس…!!
&دائما في القمة من يلعب للتعادل وصاحب الهدف الاول غالبا يكسب عملية بتاع نفسيات بس.
& اصلا المريخ حيلعب مدافع والسؤال فلوران ينفتح ويهاجم ليه، اتريث وبي سرعة الغربال، مزمل لا ومكابي اضرب سعادة البيه.
& واراهن إذا الهلال لعب مباراة تكتيكية كما لعب أمام الشباب التنزاني بامدرمان بإذن الكريم سيفوز وبعدد من الاقوان.
& اما اذا انفتح وفي ذهن لاعبيه فوارق الحرفنةوالمهارة وترك من الفراغات العديد يمكن لاقدر الله الشر بره وبعيد يحدث مالانريد.
& ويظل الهلال الرقم الصحيح وغيره الكسور والبواقي.
& نتطلع لهلال قيافة فايت العرب والافارقة مسافة.
& ازرق وابيض لون الفل هلال القمة حبيب الكل.
& واخيرا احمد الله كثيرا انني حي ازرق.