دايرين شنو…؟؟؟

سوبر هاتريك
طارق محمد عبد الله
دايرين شنو…؟؟؟
& البعض لايعجبهم العجب ولاكرشوم ولانمر نجد لهم الع ذر ونصفهم بعشاق ومحبي كرة الهلال الجميلة بعيدا عن كبع ولبع ودفس ورفس ناس التكت والذي لايقسم معهم ومابينفع معاهم خالص خالص وده كده معلوم لكن الغير مفهوم وملغوم كمان ان الهلال حقق (حداشر) انتصار متوالي في الممتاز وهو رقم جدير بالاحتفاء جهرا مع العمل سرا َمن اجل تجاوز بعض الاخطاء هكذا تتعامل الاندية واصحاب الهمَ ناطحة السحاب ومابين الفرح الصاخب والصمت علي جزء من الاخفاق بادب ديل َماعاجبهم المدرب ولا اللاعبين انتوا ديل عاقلين ولا مجانين واساسا هم دايرين شنو؟؟؟
& ولانهم قلة قليلة في مجتمع هلالي عريض طول في عرض في ارتفاع فان سباحتهم عكس تيار العولمة الكروية الزرقاء الورقة الاخيرة لانقاذ كرة القدم ببلادنا الحبيبة الي مصير محتوم هو الزوال والتلاشي والعدم وعض بنان الحسرة والندم وكلب الجيران هسه كلب الجيران الدخلو هنا شنو؟؟؟ وباذن الكريم ستمضي مسيرة الهلال الجمال والجمال الهلال نحو غاياتها برغم انف الحاقدين ومخططات الظلاميين اعضاء رابطة مشجعي المريخ بالاتحاد الاحمر العام في تيار الانحياز وغرق حتي اذنيه من اجل المريخ الفتي المدلل برمجوا مباريات الاندية التي تواجه مع المريخ قبل الاسياد والغرض مكشوف تجهيزها من خلال رفع وتيرة الاعداد ولكنهم ظلوا يقدمون خدمة العمر لفلوران لانه يكتشف مواطن الضعف في الاثنين المريخ والنادي المنافس ومن ثم يستغلها صااااح شفتوا كيف..؟؟؟
& وللاجابة علي السؤال الفوق المذكورين اعلاه جت دايرين شنو والاجابة ذات شقين فبعض اصحاب المصالح الذاتية وبعد ماتقفل بلف الارتزاق من التسبيح بحمد الافراد عند الاسياد وقدر مايلف ويدور يطلع بيش عشان كده ماقادر يتصالح مع نفسو ويعيش ولو عليهو عولمة شنو الهلال ده في اي حته مايتقدم يطلع الطيش انه داء المصالح الذاتية والذي انتشر في الوسط الرياضي ومن زمان كما السرطان وده واحد من جملة اسباب تراجع وتدهور كرةالقدم قاعدة في السودان.
& والفئة الثانية كدي عندها شوية نقيف وديل بدلا من التنافس الشريف شغالين اعلام علي بطال زيف وتحريف ومخططاتهم الظلامية طوالي مدورة والحقد الدفين علي هلال الملايين علي الرصيف، وضعوا امام الضرغام الازرق كل انواع واشكال المتاريس والغرض المسيرة تقيف لكن سيد البلد رجل صالح بالنية السليمة والقلب الصافي النضيف طوالي ماشي قدام وشغلو نضيف شفتوا كيف..؟؟؟
اهداف سريعة.. اهداف سريعة
& موتوا بغيظكم ياحاقدين انه هلال العزة والكرامة حبيب الملايين وصاحب الاغلبية الغالبة من السودانيين.
& وكما قال استاذنا الراحل المقيم محي الدين تيتاوي تسعين في المية من السودانيين يعشقون هلال الملايين والنسبة الباقية هلالاب زعلانين.
& والزعلان كلموه ان الامر مابيخص بس الهلال والمعني بيهو كل السودان في المدن والوديان.
& والهلال ابن السودان البار السنة دي داير يقاتل بحماس يصل مناطق المنافس باحساس.
& يجاهد هجمات ركنية رميات تماس صابت مكسب خابت يلتقط الانفاس وفي الجايات يجيب الكاس.
& وعشان ماتشعب الحكاية المختصر المفيد من الرواية نحن اصلا دايرين شنو؟.؟
& دايرين هلال غلاب مهاب قاعد في خانة الايجاب وبالعمل الاجتهاد للانجازات والبطولات الخارجية جياب اذا علينا ناخد بالاسباب.
& اول حاجة من هسه الحقيقة ماتندسه المطلوب الصبر الجميل علي المجلس و المدرب واللاعبين مهما كانت مالات الامور.
& ولازم نعرف انو قوتنا في وحدتنا ونتكاتف نتلاحم نتعاضد ونستفيد من اغلبيتنا الطاغية في الارض.
&ويظل الهلال الرقم الصحيح في الكرة السودانية وغيره الكسور والبواقي.
& ازرق وابيض لون الفل هلال القمة حبيب الكل.
& واخيرااحمد الله كثيرا انني حي ازرق