حيـــــــــــــــــــــــــــــــــــــــــــــــــ (روب) !!

صابنها
محمد عبد الماجد
حيـــــــــــــــــــــــــــــــــــــــــــــــــ (روب) !!

• ناس المريخ ديل اغرب ناس.
• أنا اصلو ما شفت زي دا.
• ينتصروا في (الولايات) ويفوزوا على الشرطة القضارف في القضارف .. يفرحوا ويهيصوا ويقولوا حققنا الانتصار الثالث تواليا في الدوري الممتاز.
• والمريخ رجع.
• يتكلموا عن عودة المصابين وشطارة المدرب البرازيلي ريكاردو.
• يرجعوا يتعادلوا مع حيدوب في (الخرطوم).
• في (كوبر).
• اول مرة اعرف (كوبر) صعبة كدا.
• ناس البشير وعلي عثمان محمد طه ونافع علي نافع وعبدالرحيم محمد حسين قاعدين كيف في (كوبر).
• الجماعة ديل بفتشوا يطلعوا من (كوبر) وبشيلوا دفتر العيادة عشان يطلعوا منها .. وناس المريخ قالوا عاوزين يلعبوا في (كوبر).
• في زول عاقل الايام دي بجيب سيرة (كوبر).
• ديل يقولوا عليهم شنو؟
• زمان كان عندنا استاذ .. بقول لينا الدرس افهموه ما تحفظوه.
• ناس المريخ ديل هسع قاعدين يحفظوا .. ما بفهموا.
• كلمناهم الف مرة.
• قلنا ليهم ما تكسروا (الطبلة).
• ما سمعوا الكلام.
• هسع علاقة (الطبلة) بالكلام البتقول فيه دا شنو ؟ .. لو ما بتفتش ليك في سبب.
• الجاكومي شايل (شاكوشو) وصلاح نمر شايل ليه (كوريك).
• في واحد متابع جيد للمريخ .. بعد تعادل امس امام حيدوب .. قال لي ناس المريخ ديل ح يشيلوا المدرب!!
• ح يشيلوا ريكاردو!!
• قلت ليه انت من زمن بشيلوا المدرب.
• الناس ديل تتطوروا.
• الناس ديل اتقدموا.
• بقوا يشتغلوا (فوق).
• بقوا يضربوا في (المليان).
• المريخاب بقوا بعد الخسارة او التعادل بشيلوا (الرئيس).
• الرئيس عديل كدا.
• عارفين ليه؟
• عشان الرئيس هو الذي يضع التشكيلة .. وهو الذي يضع الخطة.
• بشيلوا (الرئيس) عشان هم البجيبوا (الرئيس).
• الرئيس يشيلوه بي عمود .. ويجبوه بي عمود.
• زي (الالفة).. الاستاذ وقت يلقى الفصل كله مهرجل بقوم يغيّر (الالفة).
• ابوجيبين باقى ليه تعادل واحد .. ويشيلوه برة.
• ما اكتر من كدا.
• كلموه يسلم (المفتاح) ويجهز (شاكوشو).
• والله انا هسع حاسد حازم مصطفى (زرّاف الدموع) و عادل ابوجريشة وغازي الغرايري .. الجماعة ديل ارتاحوا.
• واضانهم بردت.
• الجماعة ديل لو كانوا لغاية الآن قاعدين .. كانوا سمعوا كلام فارغ كتير من ناس مزمل ابوالقاسم ومعاوية الجاك بعد تعادل حيدوب.
• يا ربي هسع مزمل بعد التعادل دا ح يقول شنو؟
• ح ينتقد سوداكال؟
• لا ما اظن .. ما في منطق في الكلام دا.
• سواداكال يتقطع.
• ح ينتقد حازم مصطفى .. ويقول هو السبب؟
• لا ما معقول.
• حازم ذنبو شنو؟
• الجاكومي؟
• الجاكومي كسر (الطبلة).. وحقيقة تفليس (الطبلة) ما للدرجة دي .. يعني الموضوع ما بصل لمرحلة التعادل.
• طيب مزمل ح يكتب شنو؟
• كمال شداد؟
• شداد عمل شنو؟ .. قلع ليكم نجيلتكم.
• زمن شداد .. المريخ يتعادل يقولوا (شداد) .. المريخ يتأخر في السفر يقولوا (شداد).. المريخ تحدث فيه اصابة لبعض اللاعبين يقولوا (شداد)… تصب مطرة يقولوا (شداد).. تقطع الكهرباء يقولوا (شداد).. يشيلوا حمدوك يقولوا (شداد).. يرجعوا حمدوك يقولوا (شداد).
• انا قلت (حمدوك) !! مالي زي العاوز ألخبط.
• حمدوك علاقتو شنو بالموضوع؟
• طيب مزمل ح يكتب شنو؟
• على ما اعتقد .. مزمل ح يرشح ليهم رئيس جديد.
• في رئيس جاهز .. عندو مزرعة .. ومصنع طحنية و (4) بقالات.
• اول حاجة ح يسلموه مفتاح (الطبلة) … وملف (النجيلة).
• وح يكتبوا فيه شعر.
• غايتو اعلام المريخ دا انا اصلو ما شفت زيو.
• اعلام المريخ وقت كان حازم مصطفى هو رئيس المريخ كان بنتقد في المحترفين .. وكان بقول عنهم محترفين دون المستوى وفاشلين .. وما فيهم رجاء.
• اول ما شالوا حازم مصطفى .. وجابوا ابوجيبين قعدوا يشكروا في المحترفين ويتغزلوا فيهم ويرفعوا في روحهم المعنوية.
• نفس المحترفين.
• وصلوهم السماء .. وقالوا ريكاردو اشاد بيهم.
• نفس المحترفين.
• المهم يا جماعة .. عشان ما اطلع من الموضوع.
• فريق حيدوب الذي تعادل مع المريخ في ملعبه سوف يلعب امام الهلال يوم السبت في استاد الهلال.
• المباراة صعبة.
• وما عاوز زول يقول لي كأس العالم.
• كأس العالم يطير.
• تعالوا المباراة.
• الهلال حقق (9) انتصارات تواليا في دوري هذا العام.
• ما شاءالله .. ربنا يزيد ويبارك.
• الهلال اخر نتيجة سلبية له في الدوري الممتاز كانت في الموسم الماضي عندما تعادل الهلال امام هلال الساحل 2 / 2 في يوم 12 يوليو.
• بعد هذا التعادل لعب الهلال اربع مباريات في دوري الموسم الماضي.
• لعب الهلال امام الخرطوم الوطني في يوم 15 يوليو… وانتصر الهلال.
• ولعب الهلال امام حي الوادي يوم 19 يوليو وانتصر الهلال.
• ولعب الهلال امام ود نوباوي في يوم 22 يوليو وايضا انتصر الهلال.
• ثم لعب الهلال المباراة الاخيرة في الدوري امام توتي يوم 26 يوليو وفاز الهلال وتوج ببطولة الدوري الممتاز.
• هذا يعني ان الهلال حقق (13) انتصارا على التوالي في الدوري الممتاز.
• تلك الانتصارات وهذا الرقم يفرض على الهلال المزيد من الجهد والمسؤولية كما يستوجب على جماهير الهلال الحضور والمساندة.
• الهلال يحقق في ارقام ينافس بها نفسه.
• ميسي ورونالدو .. كانوا بكسروا في الارقام القياسية .. لهذا كان تألقهما وإبداعهما وتنافسهما.
• الهلال يجب ان ينافس الهلال.
• الدوري الممتاز الفوز بلقبه .. امر جميل .. لكن هذا شيء اعتاد عليه الهلال بفضل الله وتوفيقه.
• عاوزين في هذا الموسم نلعب من اجل تحقيق ارقام قياسية جديدة للهلال.
• الارقام القياسية سوف تجعل الاثارة والمتعة اكبر في مباريات الهلال – التحدي سوف يكون عظيم.
• ما في استهتار.
• وما في تراخي.
• وما في غرور.
• شفنا كلنا المستوى الذي اصبحت اندية الممتاز تقدمه في الدوري.
• هنالك معاناة ومشقة حقيقية في تحقيق الانتصارات.
• لهذا للانتصار قيمة كبيرة في الدوري.. خاصة اذا كنا بنحقق من خلاله رقم جديد.
• (13) انتصار للهلال تواليا (ما شاءالله) .. ما عاوزين نقيف عندها كثيرا .. عشان ما تشكل ضغوط اضافية على الهلال.
• ولا عاوزين نمنح من خلالها (الخصم) دوافع زيادة عشان يضاعف من جهده من اجل ايقاف تلك الارقام.
• بس كان لا بد ونحن في هذا اليوم ان نقف عند هذه (الارقام).. وان ندعو كل القطاعات في الهلال على العمل والمحافظة على هذه الارقام.
• عاوزين نحقق المزيد.
• جمهور الهلال ينتظره دور كبير.
• جمهور الهلال عليه (التكل) الاكبر.
• نحن عندما انتصر الهلال على توتي بمشقة .. ما رضينا .. وكنا زعلانين بعد المباراة.
• وقت شفنا تعادل المريخ امام حيدوب .. قلنا الهلال في نعمة.
• بنا يحفظ تلك النعمة.
• مباراة حيدوب .. هنالك عناصر كانت غائبة عن المباريات الماضية سوف تعود باذن الله مثل الغربال وصلاح عادل.
• وسوف نكون في انتظار ليليبو بعد مباراة حيدوب ليشارك امام هلال الفاشر.
• الجميل ان المباراة سوف تلعب في استاد الهلال.
• بس علينا ان نعرف ان اللعب في استاد الخرطوم او استاد كوبر لا يعني ان يخسر الهلال.
• انتصر الهلال في عطبرة مرتين.
• وانتصر الهلال في بربر.
• وانتصر الهلال في القضارف.
• وانتصر في استاد الخرطوم.
• وكان الهلال في الموسم الماضي في ستاد كوبر قد حقق اكبر انتصار في الدوري على الامل.
• يعني ما عندنا مشكلة.
• ننتظر دعم وحضور جماهيري كبير في مباريات الهلال القادمة .. خاصة ان الهلال سوف يلعب امام حيدوب ثم هلال الفاشر في ملعبه ثم يلعب امام الاهلي الخرطوم وكوبر في ستاد الخرطوم ثم يواجه المريخ يوم 30 ديسمبر في استاد الهلال.
• بعد هذه المباريات وحسب اعلان اللجنة المنظمة سوف يتم برمجة المباريات المؤجلة في الفترة ما بين 3 الى 12 يناير.
• الهلال عنده ثلاث مؤجلات امام الاهلي في مروى وامام الزومة وحي الوادي في استاد الهلال.
• ما عاوزين نفقد.
• عاوزين نركز.
• ونقدم المزيد من العطاء والجهد.
• كل ما نمشي لي قدام في الدوري .. مطلوب مننا ان نضاعف الجهد والعطاء.
• بالتوفيق دائما للهلال.
• ……………………
متاريس
• الكورة عطاء.
• ما كلام.
• والأرقام عاوزة جهد اضافي… وعمل كبير.
• الدورة الثانية سوف يكون الضغط على الهلال كبيرا بسبب مباريات مرحلة المجموعات.
• الهلال الآن يلعب بدون ضغط وبدون ارهاق.
• لكن في الدورة الثانية نتوقع ان تكون هنالك اضافات قوية تسد الثغرات التى يعاني منها الهلال.
• الارقام القياسية عاوز فريق مختلف.
• عاوزة عناصر فريدة ونادرة.
• …..
• ترس اخير : زي كأني شفت صهيب الثعلب مع منتخب البرازيل امس… لا عارفو شبه .. لا عارفو نفس الزول.