كأس العالم دخل (العضم)..!!

• جرسة البعض من الصيام بتخليهم من تاني يوم في شهر رمضان الكريم يقولوا ليك رمضان دخل في العضم.

• الواحد فيهم يبقى ضعيف وعيونو صغار وحيلو ميت وقاعد في التلفزيون .. من مسلسل لي مسلسل.

• متل دعاية المعجون.

• وقت تدخل (غوغل) تلقى الزول المتجرس من رمضان ما صائم من الاساس .. عشان الزول البصوم ما بتجرس من رمضان .. وبكون فرحان بيه .. وبتظهر على ملامحه البركة واليقين والإيمان .. وليس الضعف والفتر والقلق.

• رمضان قوة .. رمضان ما ضعف.

• دي مفهومة.

• وإلّا ندخل (غوغل)؟

• السنة دي عاوز اقول ليكم كأس العالم من مباراة الافتتاح دخل في العضم.

• قولوا لي كيف؟

• ح اقول ليكم برسوم الاشتراك في القناة.

• معقولة قيمة أي مباراة تشاهدها في التلفزيون بتساوي مليون جنيه (1000) جنيه.

• طيب الناس البدخلوا الاستاد بدفعوا كم؟

• في التلفزيون بتساوي مليون جنيه.

• في واحد قال لي ناس قطر ديل عملوا أي حاجة عشان قطر تنجح في تنظيم كأس العالم… طبعا ما قلت عشان قطر تنجح في كأس العالم .. لأن (كأس العالم) اصلا ناجح ، قطر تريد ان تنجح هي في نفسها .. كأس العالم بطولة ناجحة حتى لو السودان بظروفه الحالية كان هو الذي نظم كأس العالم.

• اتخيلوا السودان ينظم بطولة كأس العالم بوضعه الحالي.

• الكهربة قطعت.

• الكبري مقفول.

• اللجنة المنظمة عاملة وقفة احتجاجية بسبب ضعف الحافز.

• حسن تسريحة عامل لايف عن فانلة المنتخب الالماني.

• واسامة عطا المنان بقول ح نؤجل مباريات نصف النهائي 48 ساعة.

• يعني كأس العالم اذا بتلعب برة في شهر في السودان كأس العالم بكون (6) شهور.

• والنهائي ذاتو يمكن ما يلعبوه.

• زي كأس السودان!!

• غايتو السودان لو نظم بطولة كأس العالم – العسكر كان لقوا ليهم مخرج.

• حميدتي بشاشات المشاهدة بفتش ليه عن مخرج – طيب لو نظمنا البطولة كان عمل شنو؟

• ديل الشاشات ما ريّحونا فيها.

• احترم قدرات قطر في تنظيم بطولة (كأس العالم) واعتقد ان قطر لم تكن في حاجة الى ان تفعل كل ذلك من اجل ينجحوا في التنظيم.

• كانوا يمكن ان ينجحوا في ذلك من غير ان يكلفوا انفسهم كل هذا الجهد والصرف المالي الكبير.

• يتخيل لي اذا قطر صرفت هذه الاموال في امور اخرى .. كان يمكن ان تنجح اكثر.

• من حق قطر ان تجتهد في عكس ثقافاتنا العربية .. ومن حقهم ان يقصدوا من ذلك ايصال (رسالة) معينة للآخرين.

• في واحد قال لي ناس قطر ديل ما فضل ليهم إلّا يقولوا حللوا (الهدف) بي (بلحة).

• بين الشوطين قالوا في تقرير (اخباري) بنزل في الجزيرة لفوزي بشرى.

• الفأر في قطر قالوا شغال بما يرضى الله – رغم اني لغاية الآن ما قادر افهم لماذا تم الغاء هدف الاكوادور الاول في مرمى المنتخب القطري؟

• اكيد ناس قطر فاكرين منتخب الاكوادور لن يسجل غيره.

• اجمل حاجة في قنوات بي ان سبورت اننا شفنا نابغ نصرالدين فيها – وهو يستحق هذا الظهور المشرف.

• أي زول بجتهد وبخلص في عمله .. بصل في النهاية.

• ونابغ نابغ.

• وكفى.

• قطر اهدتنا بطولة لكأس العالم في هذه المرة (بتلمع).

• بطولة جديدة لنج.

• بطولة بتحس فيها ان كل شيء جديد.

• الناس ديل قربوا يقولوا للمشاهدين للمباريات بعد المباراة انزلوا الغداء.

• قالوا ليك الشاورما في قطر من لحم الغزلان.

• شية الجمر من لحمة الارانب.

• وكله بما يرضى الله.

• لكن عشان الحكاية تكتمل .. كان منتخب الدولة العباسية يصل الى النهائيات عشان الحضارات حقتنا تتعكس صاح.

• والله لو شعراء العصر العباسي دا لقوا كأس العالم دا كانوا عملوا فيه جنس شعر.

• ما كانوا خلوا ليهم شيء في الغزل.

• كانوا عملوا لينا كأس العالم كله (شعر).

• قالوا ليك زمان (ضربة الجزاء) ما بحسبوها إلّا اذا المهاجم وقع من الحصان.

• وما في (كرت احمر) بطلع إلّا اذا (السيف) شال رقبة اللاعب الذي ارتكبت ضده المخالفة.

• زمان في حاجة اسمها (الفار)؟

• هسع الفار لو (عفصت) ليك لاعب يجيبوك مجنزر تقول كاتل ليك رقبة.

• يجيبوك مصور من الشمال .. ومن اليمين .. ومن فوق .. ومن الاتجاه المعاكس.

• الناس ديل قربوا يدخلوا (الانتربول) في تقنية الفيديو.

• ممكن النهائي يظهر فيه قاضي محكمة استئناف في غرفة الفار.

• المهم وعشان ما اكتر ليكم الكلام .. عاوز اقوم اشوف مباراة السنغال وهولندا .. قطر استطاعت ان تضع بصمتها في كأس العالم.

• في التنظيم.

• المنتخب القطري في مباراة الافتتاح مشى على نسق الكرم العربي الذي يقول فيه الشاعر العربي (يا ضيفنا لو زرتنا لوجدتنا نحن الضيوف وأنت رب المنزل).

• منتخب الاكوادور لعب في استاد البيت بإحساس البيت بيتهم.

• في كورة القدم بتحصل مثل هذه الاشياء.

• يا الرشيد المهدية الموضوع عادي.

• قطر دي عملت أي شيء .. معسكرات ومشاركة في بطولات قارات تانية وتجنيس وصرف اكثر من 200 مليار دولار وفي النهاية هزمت في ارضها من منتخب الاكوادور.

• نحن زعلانين على سيكافا .. الاتحاد ما صرف فيها (10) الف دولار.. لا على المنتخب ولا على الملاعب.

• قبل كدا البرازيل خسرت برقم قياسي في اراضيها من منتخب المانيا.

• عادي الحاجات دي تحصل.

• في حاجات بتصل فيها لنتائج بعد تراكمات.

• وتجارب.

• وخبرات.

• التراكمات والتجارب والخبرات .. كل هذه الاشياء بتحتاج لعامل الزمن.

• ما في حاجة بتبقى بين يوم وليلة.

• رغم ان قطر كانت ترتب لهذا البطولة قبل اكثر من (10) سنوات.

• لكن برضو ما كفاية.

• القروش ما بتشتري أي حاجة.

• القروش ما بتصنع كل شيْ.

• لكن للأمانة قطر في الحاجات العاوزة قروش ما قصروا.

• عملوا أي شيء.

• ونتمنى ان تكون الروعة حاضرة في المباريات القادمة.

• نتوقع ذلك.

• قطر اتعرضت لمكايدات وحفر ومضايقات كتيرة وقدرت تتجاوز كل العقبات.

• قلوبنا معها.

• وبالتوفيق لقطر الشقيقة.

متاريس

• مباراة السنغال وهولندا شغالة.

• وعاوز اقوم عليها.

• الليلة الهلال عندو مباراة ولا بتسأل في (كأس العالم).

• الهلال وحي العرب بورتسودان… مباراة اخرى نحو اللقب.

• امتحان جديد لفلوران.

• بقينا دائما بنكون في شوق .. عاوزين نعرف فلوران بتصرف كيف وبعمل شنو؟

• فلوران دائما ناجح ان شاءالله.

• رؤوف خليف دا بقول في شنو؟

• كل مرة اقول جاء قون .. اقوم القي ما في حاجة.

• الواحد ذاتو ما قادر يكتب.

• ربنا ينصر الهلال اليوم.

• قولوا ان شاءالله.

• حي العرب لم يخسر ولم يفقد إلّا نقطتين.

• حي العرب ممكن يكون بطل المنافسة.

• الكلام دا من غير الهلال طبعا.

• فريق لغاية الآن بقدم في مستوى مذهل.

• يا ناس شندي ألحقوا الاهلي شندي.

• غياب.

• وهزائم.

• وتعادلات.

• وتمرد.

• وحاجات ما مفهومة.

• الدورة الثانية في وجود هذه الاندية .. الانتصار فيها بالنسبة للأهلي شندي سوف يكون امر في غاية الصعوبة.

• الاهلي شندي يجب ان يؤمن موقفه من الدورة الاولى.

• الدورة الثانية ممكن تكون ضرب نار.

• اول حاجة مفروض ناس شندي يجهزوا استاد شندي عشان الاهلي يلعب في شندي.

• الاهلي شندي وحي الوادي هما فقط من يلعبا خارج ملاعبهما.

• ليه الاهلي شندي يلعب برة شندي؟

• هي حصلت!!

• ألقحوا الاهلي شندي.

• ألقحوا النمور.

• ….

• ترس اخير : الليلة بنفرح (دبل) ان شاءالله.