أخيراً (فيفا) إفتتحت مكتب خاص بالمريخ يعمل طوال اليوم !!
شارعين وناصية
محمد الطيب الأمين
أخيراً (فيفا) إفتتحت مكتب خاص بالمريخ يعمل طوال اليوم !!
* مرات بحس إنو ثنائي العاصمة لما غنوا (دنيا الريد غريبة وسر ما بنفهموا ناس أفراحها زايدة وناس بتألموا).
* مرات بحس الجماعة دیل قاصدين المريخ.
* والله صحي.
* في الهلال الأفراح زايدة.
* وناس المريخ بتألموا.
* في الهلال (ناس من كلمة عابرة كل الريد بهون).
* وفي المريخ شکاوی وبلاوي.
* وما عندهم ملعب كمان.
* النجيلة البتقوم تحت (زیر السبيل) أبت تقوم في ملعب المريخ.
* مرة يقولوا الأرضية فيها (دیدان).
* ومرة يقولوا (الموية مالحة).
* وفي عز غلاطهم ده توني مشى الفيفا.
* وأداهم مهلة 15 يوم.
* دایر 140 ألف دولار.
* دولار ينطح دولار.
* المريخ بقي يمشي الفيفا أكتر مما بمشي الملعب.
* كل أسبوعين عندهم قضية في الفيفا.
* لا بقولوا الفيفا مشغولة بكأس العالم ولا بقولوا الناس ديل مشغولين بالدوري الانجليزي.
* فیفا عملت مكتب صغير إسمو مکتب شكاوى المريخ.
* من تجي داخل بوصفوا ليك المكتب.
* لو عرفوك أفريقي طوالي بوصفوا ليك مكتب المريخ داخل مباني الإتحاد الدولي لكرة القدم فيفا.
* حالة صعبة.
* المهم.
* في الوقت الذي يبحث فيه المريخ عن (ملعب).
* قام الهلال جاب (مكنة) قاذفة للكورة.
* تستخدم هذه (المكنة) في عملية تدريب حراس المرمى.
* وهي الأولى في السودان.
* ده شغال مغارز عدیل.
* ناس الهلال بالغوا فيها.
* ناس ما لاقية نجيلة وناس تستجلب مدرب حراس آلي.
* دي حركات من ناس الهلال.
* بمناسبة الحركات.
* قالوا في المريخ في واحد من المحترفين طلع ليهو باص صاح في آخر مباراة أمام الأهلي شندي.
* طلع باص صاح طوالي الميديا المريخية قالت ندیهو فرصة.
* قالوا عندهم احساس انو المحترف ده لعاب.
* أول مرة في حياتي اشوف لي محترف بقيموهو بالإحساس.
* احساسهم بقول ليهم إنو الزول ده لعاب.
* هاك الإحساس ده.
* احساس لكن.
* مسكين أبوجيبين.
* جا عشان يبقى رئيس لقي نفسو بقی بنكك.
* يدفع للفيفا ويدفع للاقطاب ويدفع للوطنيين ويدفع للاجانب ويدفع للنجيلة.
* مسكين إتعصر والله.
* الشغل ده ما دایر جيبين.
* ده دایر جيوب عديل.
* غايتو جنس غايتو.
* و.. و..
* وناس بتألموا.
ههههه يا استاذ محمد القصه ما احساس لكن شطبو ا صعب لانه بلحق توني عشان كده قالوا لعب باض صاح نديهو فرصه مجبر الوصيف لابطل بعدين ديل 9 اجانب لو لحقوا اخوهم توني ببقوا عشره والاصيفر بهبط درجه ثانيه
اسي عليك الله شوف زنقه اهلي مروي اليوم اولاد فواد نقه نقطوا في مروي اتزنقوا زنقه كلب في طاحونه باقيلك اولاد فواد نقه ديل بنستروا في المجموعات فريق بتعادل مع ارتا سولار وبترشه من الاهلي الليبي واهلي الخرتوم والرابطه كوستي وبتعادل مع اهلي مروي ده مستوي فريق الخرتوم قبل ما يمشي الخور بعد الوصيف سجل مواسيروا
الاصيفر اولاد فواد نقه نقطوا في مروي اللقب مضمون ياذن الله فريق بيتعادل مع ارتا سولار وبتغلب من الاهلي الليبي واهلي الخرطوم و بترشه من الراطه كوستي وبتعادل مع اهلي مروي شغال سقوط امام اي اهلي اولاد فواد نقه ناس بيبو بودوا الاصيفر نفس خور الخرتوم. المشكله الفضايح اللي حاتكون في دوري الابطال السنه دي حاتكون مرمطه من امها
عايز قطعه ناصيه في
المدائن او الوادي اللخضر
.. ولازم القطعه
تكون جنب الجامع والمدارس..
.. تسلم كتير..