(كأس عالم) ما عندك فيه (لاعب) ما تتفرج عليه..!!

· زمان (كأس العالم) دا كان بعيد شديد .. الواحد كان بيشعر ان (كأس العالم) بيجي في العمر مرة.

· وكان (كأس العالم) بيترخوا بيه.

· يعني ممكن يقولوا ليك الزول دا مات في كأس العالم بتاع (بيبتو).

· او الزول دا عرس في كأس العالم بتاع (اوليفر كان) .. لمن قعد بعد نهاية المباراة في الواطة واتسند على القائم.

· المشهد دا لسه في ذاكرتي… قاعد زي قعاد اوليفر كان بعد نهاية المباراة.

· ممكن يقولوا ليك الزول دا اغترب مع هدف سعيد العويران.

· طلع مع الهدف.

· وفي حاجات كتيرة بنربطها بنطحة (زيدان) وضربة الجزاء (الترجيحية) التى اضاعها (روبرتو باجو) امام البرازيل ،وصلعة (كولينا) ورقصة (روجيه ميلا) وهوبة (هيجيتا) الحارس الكولمبي.

· صلعة كولينا دا نحن بقينا نقشر بيها في الحفلات.

· طبعا ضربة الجزاء (الترجيحية) التى اهدرها باجو جاءت ضربة جزاء ضائعة اخرى خطفت منها الشهرة وهي تعتبر الاشهر الآن.

· حيث أهدر منتخب غانا فرصة تاريخية لبلوغ المربع الذهبي لنهائيات كأس العالم “جنوب أفريقيا 2010″، بعدما قدم مباراة قوية أمام منتخب أوروغواي و كان الأقرب لحسمها لصالحه في اللحظات الأخيرة، وشهدت المباراة ركلة جزاء ضائعة أهدرها النجم أسامواه جيان، في الدقيقة الأخيرة من الشوط الإضافي الثاني، كانت كفيلة بحسم المواجهة دون اللجوء إلى ركلات الترجيح، التي شهدت أيضاً إهدار ركلتين للاعبي غانا.

· طبعا ضربة الجزاء دا تسبب فيها لويس سواريز انقذ من خلالها هدف من مرماه بعد ان اوقف الكرة وهى على خط المرمي بيده ليطرد بعدها ويتسبب بعد ذلك في تأهل منتخب بلاده.

· شوفوا الدنيا دي غريبة دي .. اللاعب الذي تسبب في ضربة الجزاء وهو يقع في هذا الخطأ تسبب في تأهل منتخبه .. واللاعب الذي منح هذه الضربة لتنفيذها اضاعها وتسبب في خروج منتخبه.

· (وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ).

· فعلا نحن ما بنعلم ولا بنعرف أي حاجة.

· سواريز برضو عندو (العضة) الشهيرة للمدافع الايطالي كليني.

· الشيء الغريب ان الامور الغريبة معظمها حدثت من لاعبي منتخب ايطاليا او حدثت عليهم .. المؤسف ان ايطاليا لا تشارك في نهائيات كأس العالم في قطر.

· في علامات بارزة في كأس العالم لا نستطيع ان ننساها… زي رقصة بيبو او هدف رونالدينو من ضربة ثابتة بعيدة في مرمى انجلترا.

· برضو لا نستطيع ان ننسى خروج فرنسا من الدور الاول وإبداع اموكاشي ومن بعده الحاج ضيوف وايتو.

· نحن مع هذه الاسماء كان مفروض نضع صديق منزول وجكسا ومصطفى النقر وسامي عزالدين وسكسك وزيكو ووالي الدين وهيثم مصطفى.

· زمان الزول الكبير و (القديم) يقولوا ليك دا حضر كأس العالم الفات – هسع في لاعبين ممكن يكونوا شاركوا في (كأس العالم) ست مرات.

· عادي.

· الغريبة ما في زول كان بحضر كأس العالم اكتر من مرة.

· هسع ما عارف الحاصل شنو؟

· كأس العالم بقى يلف ويجي سريع زي (صرفة الصندوق).

· الغريبة صرفة الصندوق لمن تكون عليك .. بتتأخر وما بتجي سريع.

· والشهر يبقى ليك مسلسل تركي.

· ذكرياتنا وحاجاتنا كلها بنربطها بـ (كأس العالم) – كان عندنا معاه ذكريات جميلة وأيام رائعة.

· المباريات العالمية اصلا كان ما بنشاهدها إلّا في كأس العالم …ما كان في دوريات اوربية منقولة.

· كنا بنتعامل معاهم بالصور.

· نتيجة المباراة تعرفها في اليوم التاني.

· عشان كدا (كأس العالم) كان طاعم وكان نادر وعندو قيمة.

· زمان مباريات كأس العالم كانت بتجي متأخرة شديد .. المباراة وقت يكون فيها اشواط اضافية .. ما بنكملها … ننوم في الكرسي.

· السهر ذاتو زمان كان حاجة ما طبيعية .. لمن تساهر ان شاءالله للساعة 12 بتقوم في اليوم التالي ما فاهم أي حاجة.

· رأسك بكون مشطوب.

· واي زول يسألك بتقول ليه : والله امس ما نمت .. كنت مساهر .. للساعة 11 انا صاحي.

· الزول البتقول ليه الكلام دا بقول ليك يا زول مالك؟ الخاصل عليك شنو؟

· الله يسألني زمان الواحد لو عندو (ضرس) ما بساهر.

· السهر دا كان حاجة نادرة.

· عشان كدا كنا بنوم في (الحفلة).

· والسهرة في التلفزيون الله يسألني ما بنكملها.

· ونشرة تسعة لو ما عاوزين اخبار الرياضة ما بنقعد ليها.

· النشرة الجوية دي كانت بعيد شديد.

· تعال شوف الزمن دا – السهر بقى حاجة طبيعية .. في ناس لو ما اشرقت ما بنوموا.

· من الواتس للفيس .. ومن قناة لي قناة.

· لمن تصبح.

· ومرات يقعدوا تحت العمود.

· ليدو.

· وكوتشينة.

· عادي.

· لقيت نفسي فجأة بتكلم عن (السهر) والموضوع اصلا ما عندو علاقة بالسهر .. انا عاوز اتكلم عن (كأس العالم).

· في ناس كدا .. وقت يفتحوا ليهم موضوع ما فاهمين فيه حاجة بنتظروا اول موضوع فرعي من الموضوع الرئيسي عشان يمسكوه ويقعدوا يتكلموا عنو.

· وفي ناس وقت يمسكوا ليهم موضوع .. لمن تعمل ليك (جلحات) ما يفكوه ليك.

· خاصة اذا كان الموضوع موضوع فرعي .. وما عندو قيمة.

· كأس العالم المرة دي سوف يكون مختلف .. واظن ان قطر استعدت لبطولة كأس العالم بشكل مذهل .. ويمكن ان تكون بطولة كأس العالم هذه المرة هي البطولة الاروع – على الاقل من ناحية التنظيم.

· ما في مواهب جديدة يمكن ان تكون مدهشة في البطولة – الادهاش هذه المرة سوف يكون في (التنظيم).

· كما ان التغطية الاعلامية للبطولة سوف تكون رائعة .. وسوف تنقل قوات بي ان سبورت البطولة بالتفاصيل الدقيقة.

· أي حاجة ح يجيبوها ليك قدامك.

· كأس العالم هذه المرة يمكن ان نشاهد فيه مبارياته لاعب الهلال الغاني ابراهيما ايمورو – لاعب الطرف الشمال.

· اذا شاهدنا ايمورو في النهائيات فذلك يعني ان مشروع الهلال (نجح) وجاب (الدولار) وليس (العنب والتين والزيتون) وحدهم.

· شوفوا الاستثمار في الكورة يمكن يوديك وين؟

· يعني أي حاجة بتدفعها في الكورة بترجع ليك.

· الهلال لو عندو مثلا (10) لاعبين سوف يظهروا مع منتخاباتهم في نهائيات كأس العالم كان سوف يعوض كل (دولار) دفعه فيهم.

· اتخيلوا منتخب السودان يصل الى النهائيات – طبعا المنتخب السوداني اذا وصل للنهائيات سوف يكون اقل حاجة فيه (12) لاعبا من الهلال غير ناس ايمورو.

· على كدا كنا غنينا.

· لهذا يجب ان يكون التعاقد مع أي محترف مبني على هذه النظرة.

· جيبوا لاعبين منتخب .. او تعاقدوا مع مواهب حقيقية عندها القدرة على الظهور مع منتخباتها في المستقبل مثل جارجو وفوفانا وايمورو – اضافة الى ليليبو مع منتخب الكنغو.

· فكتور ذاتو ممكن يلعب في المنتخب الانجولي .. وسنغوني مع ساحل العاج.

· الخطة القادمة .. الهلال مفروض قبل كأس العالم القادم ان شاءالله يتعاقد مع مواهب منتخباتها تلعب في نهائيات كأس العالم.

· في الغالب المنتخبات التى تلعب في نهائيات كأس العالم من افريقيا هي الجزائر وتونس والمغرب ونيجيريا وساحل العاج وغانا والكاميرون وممكن مصر بعد رفع عدد المنتخبات الافريقية في النهائيات في البطولة القادمة.

· بمناسبة الكاميرون ورغم اني لم اكن مقتنع بمستوى محترف المريخ السابق وطرفه اليمين الكاميروني توماس باواك.. إلّا ان اختيار هذا اللاعب لمنتخب بلاده يعني ان اللاعب يمتلك امكانيات فنية كبيرة .. لم نحسن تقديرها في السودان.

· توماس باواك ليس فقط لم يحسن تقدير موهبته ناس المريخ وحدهم .. ناس الهلال ايضا اضاعوا هذا اللاعب اذ كان يمكن للهلال ان يتعاقد مع هذا اللاعب بعد استغناء المريخ عنه خاصة ان المريخ تعاقد معه بثمن بخس واللاعب لم يكن سيكلف الهلال كثيرا – خاصة ان الهلال يعاني في الطرف اليمين.

· اتخيلوا في نهائيات كأس العالم يكون عندنا ايمورو الطرف الشمال في منتخب غانا .. وتوماس باواك الطرف اليمين لمنتخب الكاميرون.

· والله لو الكلام دا حصل .. كان ما بنخلي لينا مريخابي قاعد في البلد دي .. اطرافنا بتلعب في نهائيات كأس العالم.

· تاني عاوزين شنو؟

· غير العائدات التى سوف تعود للهلال من مشاركتهما مع منتخبي بلادهما.

· …………

متاريس

· بطولة ناس حسن تسريحة وأية افرو .. ما عاوزين نكتب عنها حاجة.

· قبل كدا كانت لوشي.

· ولا تعليق.

· هدف ولاء الدين في المريخ صحيح.

· ناس المريخ سكتوا.

· طيب زي ما اتكلمتوا عن هدف شلش في الهلال اتكلموا عن هدف ولاءالدين.

· نحن حقنا ما بروح ساكت.

· بنرد في الملعب.

· وبالثابتة كمان.

· حي العرب في الصدارة .. ما شاءالله.

· والامل والفلاح ديربي كان متعة.

· سوف نعود ونكتب لاحقا عن جمهور عطبرة الروعة.

· ………

· ترس اخير : نقوم نشوف كورتنا.