اقوان الهلال في ود نوباوي زي (الونسة الدقاق) في الرملة..!!

صابنها
محمد عبد الماجد
اقوان الهلال في ود نوباوي زي (الونسة الدقاق) في الرملة..!!

• بعرف الشاي باللبن.. وبعرف (سواقة الخلا) .. ودك الحصة الاخيرة وبعرف السمنة بالعسل… وقهوة الساعة 12… وبعرف تلفون من زول عزيز .. يضرب ليك (فجأة) ويذكرك بعد فترة.
• الشاي باللبن الفوق داك … لو معاه (زلابية) يبقى حاجة ما بتخلص.
• وبعرف وقت تكون مستعجل شديد وتقوم تخرم بي شارع (تحفة)… تقوم (تفكها) في نفسك.. وتحس بي (فرحة) خاصة كدا .. كأنك اكتشفت (الذرة).
• بعرف فرحة (صرفة الصندوق) وقت تجيك في (ضيقة) .. وشنطة المغترب وقت يستفها عشان ح يرجع البلد في (الاجازة).
• يمشي ويجيها راجع.
• ويضرب في الموبايلات .. ويشتري في (الهدايا).
• وكل مرة يفتح الشنطة عشان بيشعر بأنو ناسي ليه حاجة.
• وهو ما خلى شيء.
• بعرف (اجازة) نص السنة… والقشرة بي (نضارة) الشمس .. والمرقة في (المغربية) … والحفلة وقت تكون بي فنانك المفضل.
• بعرف الحاجات دي كلها.
• وبقدرها.
• وما بقدر اقول فيها حاجة.
• ولا كلمة.
• العودة للبلد .. والمشي في نفس الشارع الزمان .. ما فيه حاجة اتغيرت .. حتى (علبة اللبن) البتلقاها واقعة في نص الشارع وبتعتر ليك في كل مرة بتلاقيك في نفس المكان.
• علب اللبن عندهن وفاء غريب… يتغير اي زول .. علب اللبن ما بتتغير.
• لكن (اقوان) الهلال في فريق ود نوباوي امس .. جنسن براه.. حاجة كدا زي (هدوم العيد). انا لو بعرف لغة روسية .. كان كتبت ليكم عمود الليلة بي الروسي .. عشان ناس المريخ ما يفهموا اي حاجة.
• ناس المريخ المباريات الشغالة بين الرئيس (مشترك) حازم مصطفى والرئيس (مشترك) ايمن مبارك ابوجيبين والرئيس (مشترك) آدم سوداكال اسخن من المباريات البيلعب فيها المريخ في البطولة الافريقية.
• مريخابي قلت ليه مباراة المريخ القادمة في الدوري مع منو؟
• قال لي المباراة القادمة مع حازم مصطفى.
• انا مالي.
• مفروض ما ادخل نفسي في المواضيع دي.
• بي طريقتهم.
• دي حاجات ما بتخصنا.
• لكن ايدي بتأكلني وما قادر امسك نفسي.
• زمان مزمل ابوالقاسم .. كان ما عندو شغلة غير الهلال.
• مرة يقول ليك مهند (ولدنا).
• ومرة يقول ليك والي الدين.
• ومرة سادومبا.
• ومرة قابيتو.
• ومرة اكرم الصلوي.
• اخر حاجة بتذكرها ليه كان قال فيها عبدالرؤوف تسجيله ما صحيح.
• مزمل يا حليلو .. هسع انشغل بي مريخو.
• الكلام البعمل فيه مزمل ابوالقاسم زمان في الهلال كله بقى عليهم.
• حقنا ما بروح.
• زمان مزمل بكلمنا عن عدم صحة (تسجيل) بعض المحترفين .. كان بتكلم عن (لاعبين).
• هسع الموضوع دخل على (الرؤساء).
• الرؤساء في المريخ كلهم تسجيلهم طلع غير صحيح.
• كلهم غير شرعيين.
• البعملوه في اكرم الصلوي وقابيتو وكلتشي وسادومبا بقى عليهم في حازم مصطفى وايمن مبارك وادم سوداكال.
• نحن بنضرب فوق.
• بنضرب في (الرئيس).
• رئيس يجيبو الاتحاد العام تشيله (كأس).
• ورئيس تجيبو لجنة الانتخابات في المريخ تشيله لجنة الاستئنافات في المريخ.
• من المريخ للمريخ.
• كل هذا يحدث في بيتهم .. من مريخابي على مريخابي.
• الهلالاب ما عندهم اي دخل بالموضوع .. غير انهم شالوها بـ (البركة).
• الهلال رجل صالح.
• ما علينا.
• نحن مالنا.
• والله نحن كنا فاكرين في البداية ان المشكلة في المريخ مشكلة (نجيلة)… اتاريهو الموضوع طلع اكبر من (نجيلة).
• المشكلة طلعت في (الرؤساء).
• اقول ليكم حاجة – بس ما تطلع من العمود دا.
• بيني وبينكم.
• الجاكومي سافر الى تركيا عشان يجيب ليه (رئيس) تركي وييجب ليه (نجيلة) تركية.
• الجاكومي وقع عقد استيراد (النجيلة التركية).. لكنه فشل في اقناع التركي (اوكتاي شعبان).
• يا الجاكومي امسك قوي في (النجيلة).. عشان النجيلة مع ظروفكم دي يمكن برضو تطير.
• ظروفهم زي (النجيلة).
• مالكم عاوزين تخلوني انسى مباراة الهلال ؟.. وانا راجع منها في انصاص الليالي.
• الهلال فاز على ود نوباوي باربعة اهداف… على طريقة (نحن كل حاجة عندنا بي نظام).
• بي نظام.
• عشان ما تقعدوا تتغالطوا لينا .. وتعملوا لينا الموضوع قضية .. هدفين في مباراة الامس سجلهما من (الوطنيين) ياسر مويس ووليد الشعلة .. وهدفين سجلهما من (الاجانب) المحترفين في الهلال ليليبو وجارجو.
• اتنين كدا.
• واتنين كدا.
• اصلو في الهلال في ناس بحاولوا يعملوا فتنة .. يسجلوا الاهداف (الوطنيون) يقولوا ليك وين (المحترفين)؟
• يسجلوا (المحترفون) يقولوا ليك وين (الوطنين)؟
• عشان الكلام دا .. في مباراة ود نوباوي … الاهداف الاربعة اتسجلت (مناصفة) بين الوطنيين والاجانب.
• اتنين بالوطني.
• واتنين بالاجنبي.
• عشان ما في زول تاني يتكلم.
• اصلو نحن ما بندور (النقة) الكتيرة.
• اجمل ما في مباراة الامس .. ان الهلال لعب امام فريق (محترم) ورغم انه في بداية الدوري لكن قدم للهلال تجربة مفيدة.
• (الامراء) عندهم كلام في الدوري.
• مع (التقفيل) الذي لعب به الكوتش ابوعبيدة سليمان .. واللعب الضغاط الذي تميز به فريق ود نوباوي سجل الهلال اربعة اهداف لياسر مزمل ووليد الشعلة في الشوط الاول وليليبو وجارجو في الشوط التاني.
• شفتوا النظام دا كيف؟
• اتنين في الشوط الاول بالعملة الوطنية.
• واتنين في الشوط الثاني بالعملة الاجنبية.
• الجميل ان الاهداف جاءت زي (شراب الموية) ..وكانت الاقوان متل (الونسة الدقاق)… اصلو كل الطرق لمرمى ود نوباوي فشلت .. لذلك استعمل مدرب الهلال فلوران اسلوب (الونسة الدقاق).
• (جلستنا مكتملة ننزل هناك جملة نتمشي في الرملة) .. غايتو لامين جارجو دا بالذات كأنه بتمشي في الرملة.
• الزول دا ما عاوز اكتب عنه الآن.. لكن ما قادر امسك نفسي .. جارجو دا بعمل في حاجات زي (المقدمات الموسيقية) لاغنيات محمد وردي.
• حاجة زي المقدمة الموسيقية لاغنية (الود) و(الحزن القديم) و (بناديها).
• اهداف جارجو تقول كتبها عمر الطيب الدوش .. (كبرت كراعي من الفرح).
• هدف جارجو لا يسجله إلّا جارجو.
• وهدف ليليبو لا يسجله إلّا ليليبو.
• وهدف وليد الشعلة لا يسجله إلّا الشعلة.
• وهدف ياسر مويس لا يسجله إلّا مويس.
• كل زول بي طريقتو.
• جارجو بمثل المهارة والفن وليليبو بمثل القوة والحماس.
• اتخيلوا مباراة امس كان فيها الغربال برة التشكيلة .. وصلاح عادل وابراهيم ايمورو وسنغوني.
• في المواسم الماضية لو غاب الغربال من تشكيلة الهلال .. الهدف نفتش ليه تفتيش.
• هسع اي تشكيلة في الهلال بتغلب.
• ولا بنعاين ليها.
• المباراة لمن تنتهي ما بنعرف فيها منو.
• كلهم تمام.
• كلهم مية المية.
• ما في اي مشكلة.
• فلوران بعمل في حاجات عجيبة.
• ناس المريخ لو لقوا (فلوران) دا .. كان جابوه (رئيس).
• انت مالك تاني عاوز ترجع للمريخ؟
• خلينا مع ناس جارجو.
• …………..
متاريس
• كلامي دا ما عندو علاقة بمباراة الاياب امام الشباب.
• عشان مباراة الشباب عاوزة شغل تاني.
• امس برشلونة دخلت في (فتيل) وهي بتلعب امام انتر ميلان في الكامب نو.
• والشباب التنزاني لن يكون صيدا سهلا في ام درمان.
• الناس ديل جايين يلعبوا امام الهلال في الجوهرة الزرقاء بفهم.
• لكن نحن عندنا مدرب بقدر يتعامل في كل الظروف.
• امام ود نوباوي قدم بوجبا مستوى رائع .. وواضح ان فلوران يضع عليه آمال كبيرة.
• امام الشباب مهم ابوعشرين ما يتقدم من المرمى.
• ومهم ما نلعب كرة غلط .. وما نسلم الكرة للخصم.
• خاصة في ملعب الهلال.
• هناك اخطاء من هذا النوع.
• المدرب بعمل من اجل التخلص من هذه الاخطاء.
• وان شاءالله تكتمل.
• والله يديم الافراح.
• انتوا ناس المريخ ديل مالهم؟
• على رأي العزيز الفاضلابي (هو مالووووو)؟
• ….
• ترس اخير : المريخ دا ما عندو حل غير يشوف ليهم (مجلس عسكري).. المدنية ما بتفع معاهم.