التش عندو (رباط) في الشمال و(رباط) في اليمين و(مفكوك) من المريخ!!
صابنها
محمد عبد الماجد
التش عندو (رباط) في الشمال و(رباط) في اليمين و(مفكوك) من المريخ!!
• حكمة الله … التش عندو (رباط) صليبي في الركبة (اليمين) ، و(رباط) صليبي في الركبة (الشمال) .. مع ذلك التش (مفكوك) في التسجيلات القادمة التى سوف تنطلق في الاسبوع الاول من ديسمبر القادم.
• عقد التش مع المريخ سوف ينتهي من منتصف نوفمبر.
• يعني مع (الرباط) في اليمين و (الرباط) في الشمال .. التش (حر) في نوفمبر القادم.
• مفكوك مع الرباط شمال .. ويمين.
• اتنين (رباط) و(مفكوك) من المريخ.
• المريخاب قاعدين ليه عن اليمين وعن الشمال .. واللاعب مفكوك في التسجيلات القادمة.
• عن شمالو وعن يمينو … مالو مالو الحبيب دا مالو؟
• في (الوست) المربوطة ما بتسقط.. لكن التش مع (المربوطة) الحطب سوف يسقط عند المريخاب.
• بتسقط بتسقط زي الحكومة.
• ناس المريخ اول حاجة جابوا ادم سوداكال … سوداكال ضيّع ليهم سيف تيري.
• شالوا سوداكال .. جابوا حازم مصطفى .. البنقول عليه (زارف مصطفى) عشان الموضوع يبقى ليكم واضح .. حازم مصطفى ضيّع على المريخاب عمار طيفور.
• هاجم عمار.
• وهاجم طيفور.
• ما خلى حاجة.
• ناس المريخ قالوا يلحقوا التش بـ (ايمن مبارك).
• المرشح الجديد للرئاسة في المريخ اسمو (ايمن مبارك ابوجيبين).
• المريخاب عارفين زول بي جيب واحد ما بقدر يعيد تسجيل التش .. عشان كدا مشوا على ابوجيبين.
• الجماعة ما عارفين العليقي عندو (99) جيب.
• يعني ابوجيبين ما بحلكم.
• الجاكومي قالوا ملف اعادة قيد التش وطيفور عند ابوجيبين.
• الجاكومي عاوز يمرق منها.
• الجاكومي جاب (قلاب الرملة) واكتفى بذلك.
• انت يا الجاكومي موضوع (التش) دا ما تشوف فيه ناس الدعم السريع.
• الموضوع دا ما بطلعكم منو إلّا حميدتي.
• الناس ديل بغيروا (الرئيس) عشان اللاعب.
• كل اسبوع عندهم رئيس .. غير الجاكومي العامل فيها الرئيس المناوب.
• نحن عندنا البرير شطب (البرنس).
• عادي.
• وعندنا الكاردينال خلى بكري المدينة والغربال ورفض يجدد لمهند الطاهر.
• عادي.
• في النهاية بمشي اللاعب ويقعد الرئيس.
• الرئيس (المنتخب) يقعد في رأسنا دا.
• غايتو عشان اكون واضح معاكم زي (السبيل) الفي الشارع .. لو مشى التش مع الصيني وطيفور .. الناس المريخ في الدورة الثانية (التكت) إلّا يلعب ليهم طرف يمين وقلب دفاع و وارتكاز ورأس حربة… ويكتب ليهم كمان (كبدة الحقيقة) و(في السلك).
• عشان لا مزمل لا سلك بتلقوهم تاني.
• التكت يتقطع ليكم.
• إلّا تستنسخوا (10) صور من التكت.. عشان تشكيلة المريخ كلها تبقى (التكت).
• من قون لرأس الحربة.
• زمان كان معانا لاعب .. ما عندو أي علاقة بالكورة غير اللبس.
• الزول دا كان وقت يقسموها بقولوا ليه بتلعب شنو؟ بقول ليهم بلعب (رأس حربة).
• في رؤوس حربة ما عندهم أي علاقة بالكورة .. والغريبة بكون عندهم (شنكار).
• ما عارف علاقة الشنكار بعدم معرفة الكورة شنو؟
• اى زول بتلقاه لابس ليه (شنكار) في الدافوري … اعرف طوالي ما عندو كورة.
• نرجع لموضوع التش.
• مالكم عاوزين تغيروا الموضوع؟
• عندنا واحد مشى يقلع ضرسو.
• اتجرس من ضرسو جرسة شديدة.
• مشى على الدكتور يصرخ.
• دفع الكشف ودخل العيادة.
• الدكتور قال ليه : انت اول حاجة انسى موضوع الضرس دا… عشان تنسى الوجع.
• زولنا قال ليه يا دكتور انا لو نسيت (الوجع) البخليني انسى القروش الدفعتها عشان ادخل عليك شنو؟
• الدكتور عاوز يغيّر الموضوع … قال ليه نقلع ليك الضرس وإلّا نحشيه ليك؟
• صاحبنا قال ليه احشيه يا دكتور …القلع كفاية عليّ القروش القلعتوها مني قبل ما ادخل عليك.
• قلع الضرس في عيادة متواضعة بقى بـ (10) مليون .. تقول عاوزين يقلعوه بـ (سلام جوبا).
• يعني الواحد عشان يقلع ضرسو إلّا يكون شغال في المعادن او شغال في الكهرباء.
• غير كدا شوف ليك (قرنفل) ساكت!!
• نرجع للتش .. عشان (الخلع) دا المريخاب جربوه مع الصيني .. والقلع للتش (تشاهد غدا).
• انا من وجهة نظري شايف الهلال محتاج شديد للاعب عماد الصيني في الوسط وفي الدفاع وفي أي حاجة.
• لو قعد لينا (كنبة) بعمل لينا فرق.
• حاجة الهلال للتش وطيفور اقل من حاجته للصيني .. اذا تكلمنا فنيا .. لكن كمان لو التش جاء الهلال ح يعمل شغل مع جاجو.
• بي صراحة.
• الاضاءة الجديدة دي عاوزة التش.
• الغربال مع التش يمكن يحسم هداف الدوري من الاسبوع التاني في الدوري.
• غير كدا .. ومن ناحية ادارية .. انتقال التش للهلال سوف يفرتك المريخ.
• النار ح تولع.
• والتسريبات الصوتية ح تشتغل.
• قالوا ليك حازم مصطفى طلع من كل القروبات .. اوعكم تصدقوا.
• يكون دخل باسم (حركي).
• اسم تاني.
• اقول ليكم لو في زول (زرف الدموع) اعرفوه طوالي.
• دا (زارف مصطفى).
• الحصل على (نجيلة) استاد المريخ ممكن يحصل على المجلس.
• ليس في ذلك شك.
• وجماهير المريخ (الراقية) ممكن نفتح ليها فصول بالمساء للالتحاق بالهلال.
• عمار طيفور كورتو راقية .. وممكن يعمل اضافة للهلال .. وعمار طيفور (مؤسس) صاح.
• قلت ليكم (مؤسس) دي مخصوص .. عشان (زارف مصطفى) معترض عليها.
• قال شنو ؟ لاعب موريتانيا سائقو لمن دخل بيه جوة .. وهو يقصد انه دخل بيه منطقة جزاء المنتخب.
• عشان كدا برهان ابعد طيفور من المنتخب.
• واضح ان نظرة برهان زي نظرة حازم.
• يا حازم انت قالوا ليك عمار دا (مرتبة).. عشان يسوقو ويدخل بيه جوة.
• الزول دا الظاهر عليه (المطرة) اثرت معاه.
• اصلا نحن وقت (تزرف) اقصد وقت تصب بندخل جوة من الحوش.
• المطرة تعجبك وقت تشوفك دخلت جوة تقيف .. تطلع تصب تاني .. تمرق تقيف.
• لمن تصبح.
• عاوز اقول اخر حاجة .. لو المريخ نجح في اعادة قيد التش وطيفور .. مبروك عليهم.
• لو نجحوا في ذلك .. والله ما ح نغضب.
• من حقهم.
• انتوا يا الهلالاب كمان ما تبقوا صعبين.
• الموضوع عادي.
• يمكن التش يعيد تسجيلو.
• ويمكن يزرفوا الدموع.
• ويحصل اعتذار.
• وطيفور يقبل.
• ويرجع تاني.
• ما عندنا أي مشكلة.
• كفاية علينا الصيني.
• سوف نقبل بعد ذلك بي أي نتيجة.
• موضوع التش اقفلوه.
• وموضوع طيفور اقفلوه.
• بي طريقتهم.
• خلونا هسع في دور الـ 32.
• التسجيلات لسه.
• الكلام دا بدري عليه.
• ما عاوزين نعشم الهلالاب.
• وما عاوزين نحطم معنويات المريخاب.
• التش ولدكم.
• وطيفور ولدكم.
• ونحن البينا عامرة.
• اصلو ما في مشكلة.
• بس نحن بنعاين لي بعيد.
• بنعاين للسوبر الافريقي.
• افهمونا (بقأ)!!
• ………….
متاريس
• المريخاب وعدوا التش بان يشغلوه في (الكهرباء) لو اعاد تسجيله في كشوفات المريخ.
• وقالوا التش عاوز يعمل ليه بيت في لندن.
• كدا اظن الامور بقت واضحة.
• قالوا الفيفا امهل الاتحاد السوداني 48 ساعة وإلّا سوف يتم تجميد النشاط الرياضي في السودان.
• ناس المريخ بكونوا مع (التجميد).
• الجاكومي قال العمل في استاد المريخ سوف يكتمل في (3) اشهر.
• الجاكومي اكيد عاوز يشيل الصرفة الاولي.
• الزول وقت يكون عاوز يشيل الصرفة الاولى بقول للجماعة المعاه في الصندوق عندي سماية .. عشان كدا لازم تتنازلوا لي من الصرفة الاولى.
• الهلال يلعب مباراة مهمة اليوم امام هلال الفاشر.
• لكن للأمانة بقينا ما بنخاف على الهلال حتى لو كان الهلال يفتقد لـ (15) لاعب.
• اسامة عطا المنان قال طول ما هو في الاتحاد ما في مدرب اجنبي بمسك المنتخب.
• يعني املنا بقى فقط في ان يصبح برهان ومحسن سيد (اجانب) عشان يبعدوا لينا من المنتخب.
• …………
• ترس اخير : كدا يا الجاكومي حاول ناس الهلال باللعب في الملعب الرديف.. يمكن يوافقوا ..بس اوعك تجيب سيرة (الدعم السريع) عشان ما تخربها على روحكم.
اضرب الكاهن ياود عبدالماجد حتي يتوجع الصبيان المخدرين😹😹😹
لقد اجراها الله على لسانك ( دايرين تفرتكو المريخ )
لكن خاب فالكم .. الرجل الصالح لاخوف عليه
قبل ما انسى.
لوجاكم مسي ورونالدو برضو …… خشمي وعندي
اسع انا جبت سيرة الصفر الدولي
اصلكم يا اعلام الفول انتم لو
كنتم وجدتوا اي فرصه دمرتوا
المريخ وتسعون الي ذلك
ولكن هيهات جماهير الصفوه
بالمرصاد..
الهلال لو سجل التش تشوف
اصانك يا استاذ.. اما طيفور
لسنا بحوجه ماسه له وان شاء
فليذهب ونحن المريخاب هذا
قرارنا وهو قايل نفسه منو
والمريخ ملئ بلاعبين احسن
منه..
الجاكومي جاب قلاب رمل ويا
زبي الوالي جاب ليكم كام يا
نكاري الجميل.. الهلال لعب
بالقلعه مباريات كتيره والان
تنكروا غدا جوهرتكم حتكون
زريبة عيش ويومها فتشوا
العليقي.
قلت بتعاين وين.. السوبر
الافريقي.. ههههاي هههاي
نسبة لحقدكم ما حتنفكوا َ
الصفر….وابقوا في صفركم
الي ان يرث الله الارض..
وابقوا في صفركم
الي ان يرث الله الارض..
اها يا ابو مصعب دخلت في الغيبيات وفي حق ربنا؟ عيب يا راجل. الهلال وصل النهائي مرتين وقارع عتاولة القارة ولم ينل الكاس لاسباب معروفة وبشهادة من اهلها ودة انجاز انت فريقك لن يحققه على الاقل في المستقبل المنظور حتى يدخل الجمل في سم الخياط. ثانيا: حلفتك بالله يحقدوا عليكم في شنو؟ انتوا حالتكم تصعب على الكافر. فريقين برئيسين ومجلسين وادارتين وجمهورين وما عنده استاد ويتقدم الى الخلف بشكل راتب وبدلا من ان تلتفتوا لفريقكم ولوضعكم المائل ما عندكم غير الهلال والعليقي. وانا سبق تحديتك وتحديت غيرك من ناس “مسكت خشمي” واتحداك للمرة المليون ترد على سؤالي: هل بيضة الديك الفالقننا بيها فزتوا بيها على الاهلى او الزمالك المصري او الترجي او النجم الساحلي او الافريقي التونسي؟ او على شباب بلوزداد او المولودية الجزائري؟ او على الوداد او الرجاء المغربي؟ او على مازيمبي الكنغولي؟ او على اى من فرق جنوب افريقيا؟ او على انيييمبا النيجيري او الاشانتي كوتكو الغاني او كانون ياوندي الكاميروني – ايام عزهم – ارجو الرد يا ابو مصعب. انتوا مع الاسف بقيتوا زي الجماعة القاعدين في حفرة يعاينوا للسماء وشايفين هلال جميل يشع نور في كل الارجاء وهم النار ماكلها جوفهم حقدا وحسدا. قلتها واقولها برضو للمرة المليون والله يا ابو مصعب مافي شىء حينفع الهلال غير “نواياكم الطيبة” وسؤال ارجو برضو الرد عليه: اذا سبق للهلال ان بلغ نهائي كأس افريقيا مرتين ما الذي يمنعه من تكرار نفس الامر؟ ما المانع؟ وختاما ارجو ان تكون لاحظت اننا لم نعلق على خروج المريخ من كاس السودان امام اهلي الخرطوم. لو كنتوا انتوا في مكاننا لمارستوا الشماتة على اصولها لكننا نرى بأنكم في حالة تحتاج مننا للتضامن معكم في مصابكم الجلل. كان الله في عون المريخ.
ما تميت المقال والله لأنه باااايخ جدا
و مابعرف كيف رئيس التحرير يجيز مثل هذا وكيف مجلس المطبوعات توافق على نشر.. والحقد والغل ويقولك حركات مسلحة وهو يدمر في البلاد ويفرق بين الناس اكثر من الحركات
المنطق يقول 1 + 1 = 2 و لكن 1 + 1 = 3 صنع خصيصاً ف السودان فهمتوا حاجة ! ! !
هذا زمانك ي مهازل فأمرحي و كفى ! ! !
هاااااانت الزلابية لآكليها ! ! !
أصحى يااااااا برييييييييييش ! ! !