(اليزار ايرا تابي) اسمه زي (شركات الطيران)!!

صابنها
محمد عبد الماجد

(اليزار ايرا تابي) اسمه زي (شركات الطيران)!!

محمد عبدالماجد
• يحمل الهلالاب محبة ومعزة خاصة للحارس علي عبدالله ابوعشرين بسبب الطريقة التى انتقل بها ابوعشرين للهلال والموقف الذي سجله للتاريخ وهو يتمسك بكلمته وينتقل للهلال بعد ان تعرض لضغوط كبيرة من اجل ان يبقى في المريخ.
• الدنيا قامت وقعدت والدعم السريع تدخل .. ولم يتراجع ابوعشرين من كلمته التى اعطاها الهلال.
• ابوعشرين هو اللاعب الوحيد في الدوري الممتاز الآن الذي حقق بطولة الدوري الممتاز خمس مرات على التوالي ، اذ حققها ابوعشرين ثلاث مرات مع المريخ (تواليا) ثم جاء وحققها مع الهلال في اخر مومسين وينتظر ان يحتفظ ابوعشرين بلقب الممتاز مع الهلال (الى الابد) – ان شاءالله الى ان يعلن ابوعشرين اعتزاله.
• هذا يعني ان ابوعشرين لاعب (موفق) ، وهو قبل ذلك لاعب (كبير) وعنده (شخصية).
• عكس جمال سالم .. لعب في المريخ ولم يحقق الممتاز .. وانتقل الى الهلال ولم يحقق ايضا الممتاز .. رغم ان الهلال فاز به في الملعب.
• لكن هذا لا ينفي ان جمال سالم لاعب كبير.. وما فيه كلمة.
• يهمنا في اللاعب الذي يلعب للهلال (الشخصية) قبل كل شيء ، وابوعشرين صاحب شخصية وهيبة في المرمى.
• الخبطة (الادارية) في احيان كثيرة تبقى اجدى وانفع وأفضل من الخبطة (الفنية) فكيف ان جمع ابوعشرين بين الخبطة الادارية والخبطة الفنية عندما انتقل للهلال؟ واحدث نقلة كبيرة في الهلال برفقة الغربال وصلاح عادل وبوجبا وارنق وياسر مزمل.
• اضر بالحارس ابوعشرين في الهلال انه لم يجد منافسة قوية ، لذلك تأثر مستواه بعض الشيء ، رغم ان ابوعشرين ظل يقدم تضحيات كبيرة مع الهلال من اجل المشاركة معه حتى وانفه يتعرض للكسر.
• ابوعشرين لاعب (فدائي) وهذه اهم خصلة في حارس المرمى الى جانب الهيبة التى يمتلكها ابوعشرين بقوامه الممتاز ومواصفاته الفنية والبدنية الرائعة.
• التعاقد مع العاجي (اليزار ايرا تابي) لا يعني عدم الثقة في ابوعشرين او اهماله بقدر ما يعني ذلك رفع التنافس في هذه الخانة ليشارك الحارس الاكثر جاهزية.
• اثق في قدرة ابوعشرين على منافسة الحارس اليزار ايرا تابي ، كما اثق في الحارس الجديد وأدرك ان كل ذلك سوف يكون في مصلحة الهلال.
• غايتو الموسم الجديد أي زول عندو مشكلة في القلب من ناس (الوصيف) ما يشوف مباريات الهلال.
• أي زول عندو مشكلة في المصران.. ما نشوفوا في استاد الهلال.
• أي زول نفسو بقوم عليه … الملعب الرديف للهلال ما يقرب منو.
• اقول ليكم العندو مشكلة مع (نسابتو) في الموسم الجديد .. يبعد عن الهلال.
• الكلام دا طبعا لناس الوصيف.
• المريخ سجل ليه عشرين حارس …ابوعشرين القضارف وزياد في الشباب .. وجنس احمد بيتر وعاوز يرجع منجد النيل وعندو محمد المصطفى وجرس كافي.
• الحكاية شنو؟
• معسكر دفاع شعبي بتاع (حراس).
• كتيبة حراس.
• غايتو نحن حراسكم ديل كلهم عملناهم في حارس واحد اسمو (اليزار ايرا تابي).
• يا صلاة النبي.
• انا بفتكر المفاجأة الحقيقية للهلال في هذه التسجيلات سوف تكون في هذا الحارس العملاق.
• حارس (ما شاءالله عليه) سبعة ضلف.
• الهلال بعد ابوعشرين تعاقد مع ابومترين … حارس (جهامة) يبلغ طوله 196 سنتمتر أي مترين إلّا (4) سنتمترات … وهو فرق سوف يأتي مع البياض … (كدائس) الكدارة بتجيبو.
• لو (شبّه) ساكت بعمل (3) امتار.
• لو قفز بدق في (الكشافات).
• قولوا ما شاءلله.
• عندما يتم الاعلان عن محترف او يبدو تحرك الهلال نحوه للتعاقد معه ، فان اول ما انظر اليه هو (الاسم).
• السنة دي الهلال جاب محترفين عندهم (اسماء) مخيفة.
• الله يستر على صلاح نمر وكرشوم ما يطلبوا (الفسخ) على طريقة عماد الصيني الذي لم يطب له المقام في المريخ.
• سوف اكتب لكم لاحقا عن اسماء المحترفين الذين تعاقد معهم الهلال وندخل في تفاصيل تلك الاسماء (المخيفة).
• نبقى الآن مع الحارس العاجي اليزار ايرا تابي.
• نطلع فاصل (ندردق في النجيلة) ونرجع تاني.
• ما شاءالله وتبارك الله.
• الحارس العاجي (اليزار ايرا تابي) اسمو متل (شركات الطيران).
• قولوا ما شاءالله.
• الحارس الطائر.
• العاجي اليزار ايرا تابي واضح عليه طويل من اسمو.
• اليزار ايرا تابي بالسوداني بتعني (الفنجري).
• الزول الصعب .. الشفت .. حسب تفسيراتي.
• ما عندي ليها تفسير تاني.
• غاتيو تاني ناس الرشيد بدوي عبيد والنذير بابكر ومحمد فضل الله وسيف بركة لمن يعلقوا على مباريات الهلال بكونوا في حاجة يطلعوا فاصل اعلاني قبل ان ينطقوا باسم اللاعب.
• شوف الزول دا اسمو كيف؟
• العاجي اليزار ايرا تابي.
• اسم (سلبة) بس.
• دا لمن تقول اسمو بتكون محتاج تشرب ليك (جردل) موية.
• نفسك يتقطع.
• دا ناس المريخ لو لقوه بشطبوا ليه (10).
• حارس طولو (مترين).. أي مهاجم بحوم في منطقة جزاء الهلال اقنعوا منو.
• بكون في عداد المفقودين.
• أي مهاجم.
• دا جبتوه لينا من وين يا العليقي؟
• الشيء شنو؟
• الشيء (قطر).
• عليكم الله قولوا ما شاءالله.
• ناس مزمل ابوالقاسم وناس الخرطوم الوطني من هسع بكونوا بفتشوا في (الشكاوي).
• مزمل عموده كله بقى (جرسة).
• اركز يا زول.
• جرستك ظاهرة في كلماتك.
• اثبت.
• جمال الوالي قطع رأسكم.
• بقيتوا تكتبوا عن المريخ (مرثيات).
• بيت بكاء بس.
• يا مزمل ارجع اهلي شندي.
• احسن ليك من الجهجة دي.
• ناس مزمل ممكن يشتكوا الهلال عندما يشارك العاجي اليزار ايرا تابي مع الهلال .. ممكن يقولوا الهلال بشارك بي اربعة حراس.
• عليكم الله قولوا ما شاءالله.
• وتبارك الله.
• انتوا فاكرين الملعب الرديف الهلال عملو ليه.
• عملوا عشان العاجي اليزار ايرا تابي.
• الزول دا قالوا ليك كراع ح تكون في الملعب الرئيسي وكراع ح تكون في الملعب الرديف.
• قطر بس.
• ناس صديق كوة تاني في (الكنبة) ما بظهرو.
• المريخ طبعا سجل مشطوب الهلال اسكندر.
• اها اسكندر دا بالتحديد مع العاجي اليزار ايرا تابي ح يكون تحت الركبة.
• الله حقق لينا مرادنا.
• اتمنينا لاعبين طوال القامة وأصحاب بنية جسمانية ممتازة فتحقق لنا ذلك.
• ح تشوفوا راجمات.
• نتمنى ان يتم تسجيل احمد سلمان طقه.
• الزول دا كمان حكاية تاني.
• انتوا ما سألوتني.
• ولا جبتوا لي سيرة عن الاضاءة.
• بعد تسجيل العاجي اليزار ايرا تابي في الهلال بإذن الله وتوفيقه ممكن اقول ليكم (الكشافات) وصلت.
• وصلت عديل.
• الحارس العاجي لاعب صغير في السن فهو من مواليد 30 اغسطس 1997.
• وفوق هذا يمتلك سيرة مبشرة وممتازة فهو خريج أكاديمية اسباير القطرية وحارس مرمى نادي سان بيدرو العاجي، ومنتخب ساحل العاج للمحليين والحارس الثاني للمنتخب الأول.
• اتخيلوا ان هذا الحارس مع صغر سنه هو الحارس الثاني لمنتخب ساحل العاج .. وان شاءالله مع الهلال يصبح هذا الحارس هو الحارس الاول لمنتخب بلاده.
• يعني الموضوع ما اسم بس.
• ولا طول ولا خلاص.
• الحكاية ظاهرة وواضحة من السيرة.
• الزول دا ضربة الجزاء عندو اسهل من الضربة الركنية.
• حارس ما شاءالله عليه.
• الكورة في ايدو ليمونة بس.
• اعتقد ان هذا الحارس هو خبطة التسجيلات الحقيقية .. وسوف يحدث نقلة كبيرة في الهلال على المستوى الافريقي.
• بهذا الحارس ممكن نعشم في البطولة.
• عادي بعد كدا.
• ربنا ينصر الهلال.
• ويحفظ لاعبيه .. ويغطي عليهم.
• ربنا يحفظ الجميع.
• المريخ زي ما قلت ليكم سجل ليه (فكة) حراس.
• قال الجاكومي في تصريح صحفي : (المريخ يملك الحارس محمد المصطفى وهو حارس جيد وأثبت نفسه ومكانته بالإضافة الى جرس كافي الذي يعتبر من الخامات التي ينتظرها مستقبل كبير، إلى جانب الحارس أحمد بيتر الذي نعول عليه كثيراً في المرحلة المقبلة، كما تم مؤخراً في التسجيلات التعاقد مع الحارس أبو عشرين من الشرطة القضارف، وكذلك تم التعاقد مع حارس جيد في الفريق الرديف اسمه زياد).
• وهناك منجد النيل مازال (معلق).
• معقولة بس يا الجاكومي.
• الفريق بقى كلو (حرّاس مرمى).
• كلو (حواشات).
• بي طريقتكم.
• نحن مالنا.
• وابوعشرين (لون الدم).
• ….
متاريس
• ولسه منتظرين مهاجم صاقعة.
• لسه بنحلم.
• والله يحقق لينا احلامنا.
• بكرة قرعة التمهيدي.
• والهلال مفروض يكمل تسيجلاته قبل يوم 10 اغسطس .. عشان الكشف الافريقي.
• ما تهملوا التسجيلات (المحلية).
• الهلال يحتاج لعناصر (وطنية).
• ما شفنا حاجة في (المحلي) لغاية الآن.
• نحن مستعجلين.
• والسيستم قرب يقفل.
• والكشف الافريقي اخرو 10 اغسطس.
• ….
• ترس اخير : لمن تقول لمريخابي الهلال سجل (محترف) جديد زي الجبت ليه خبر وفاة ابوه.