إلا تشيل الاحتياط معاهم

نبض الصفوة
أمير عوض
إلا تشيل الاحتياط معاهم

بسم الله الرحمن الرحيم..
الهلالاب ديل مالهم هسع؟!
الناس ديل تقول قشطتهم كهرباء!!
حمطة رمضان دي اصلو ما كنت قايل انها بتعمل كده..
قولة شممممطك دي.. و كل حرف في (الهلال) طار علي حته..
في صحف أسمت الادارة (بالعواليق)..
و كتاب اعمدة اطلقوا علي لعيبتهم لقب (السحاسيح) و الشنو ما عارف!!
بسم الله الرحمن الرحيم..
اللهم ان كان هذا سحراً فأبطله.!
الهلالاب..
العيوطاب..
بعد ما سجلوا جمال سالم..
اتحول عندهم لملوص الاول، في الوقت الاصبح فيه حارس السودان الاول هو ابو عشرين..
لكن العيوطاب ما سكتوا..
اجتمعوا..
و اتنفشوا..
و بتقاعس من سوداكال سجلوا ابو عشرين..
استلموه حارس السودان الاول..
بعد شهرين اتحول لصفاية البطولة العربية، و مرمطون أفريقيا، و ملوص السودان الثاني..
اللهم ان كان هذا سحراً فأبطله..
مريخاب صعبين..
تصدق يا مؤمن..
المريخاب حولوا الحارس الرابع في كشفهم (محمد المصطفي) لحارس السودان الأول!
ترتيب حراس المريخ كان (جمال سالم، ابو عشرين، منجد النيل، محمد المصطفي)..
مريخاب عجيبين..
حيروا العليقي..
اللخو ده طبعاً خالي (كلتش) قصدي خالي خبرة..
عنده كم مليون كده قال ليهم انا عندي بيها مشروع..
و اتنفش بيها عليهم..
العليقي – عديم الخبرة – فارض علي هلال الوطنية الماسورة موتا..
يا حليلو..
قايل القبة تحتها فكي..
شن عرفوا المسكين..
بحسب خبرته – المعدومة – متخيل اي خواجة عيونه خدر بصنع فريق المستقبل..
المهم..
موتا قاااعد.. و زول في هلال الوطنية ما قادر يقول بغم..
يتكلموا كيف و العليقي و معاه ولدنا السوباط قالوا ليهم نحن حندفع (15) مليون دولار علشان نمسح الصفر الازلي..
مسكوهم من يدهم البتوجعهم..
الهلالاب ديل داير تسكتهم..
جيب سيرة الصفر القرني..
طوالي بفوزوك بالتزكية..
نرجع للعليقي..
جكمنه اتصل عليهو و قال ليه تعال نعمل اتفاقية جنتلمان بين النديدين..
العليقي – الما ناقش الرّصة – قال لجكمنة اعذرني شهر سبعة ده!

تقول الولد خاشي صرفة صندوق في شهر سبعة..
يعذروك ليه طيب..
يعذروه علشان ناوي يخطف لعيبة أساسيين من كشف المريخ..

جكمنة زول صعب..
الهلالاب كلهم بكرهوه علشان بخبتهم من طرف..
جكمنة كلم الغرايري..
التونسي قال لجكمنة موش (توني و طيفور و الصيني) ديل الفرحان بمفاوضاتهم زولك؟
ليك علي ما يلعبوا و انا احمط ليك الهلال ده من عصراً بدري..
هلال شنو؟
موش الانا شايفو بعيوني ده واللا واحد تاني؟
جكمنة قال ليه (يا كوتش هنا عندنا هلالين، واحد في الصحف زي ليفربول.. و التاني في الميدان زي موية الفول)..

و بدات المباراة..
العليقي خالف رجله و منتظر الغربال و ياسر مزمل و وليد الشعلة..
العليقي متوقعها حتنتهي خمسة صفر للهلال لانه المريخ لاعب خالي ارتكازات!!
و بسم الله الرحمن الرحيم..
اللهم ان كان سحراً فأبطله..
و ان كانت عقدة فزيدها تربيطاً..
و 23 سنة الهلال ما حصل فاز في استاد الخرطوم علي زعيمه..
و بالأمس..
أولادنا اضافوا سنة جديدة للاحصائية..
بالتيم التالت..
المريخ يجندل النادي الثاني في البلاد..
و أثبت الغرايري بأنه خبير..
و أثبت النفطي بأنه سينقل المريخ برفقة مواطنيه نحو منصات التتويج القارية قريباً..
فشكراً لمدرب الحراس مراد السليمي الذي أعاد صياغة المصطفي لواجهة التألق ليصبح الأفضل محلياً..
شكراً للمعد البدني الذي بدأت العافية تدب علي يديه في جسد المريخ..
و شكراً للغرايري، التقني التونسي الأميز.. و شكراً لرفيقه لاعبنا الأسبق النفطي..
و الشكر كل الشكر لسعادة القنصل حازم الذي تعاقد مع هذا الطاقم و منحه كافة الصلاحيات الفنية و اللوجستية لقيادة المارد الأحمر.