عندهم مجلسين و (51) لاعبا ومعسكرين في القاهرة (99) يوما ومنتظرين الاهلي يغلب ليهم

صابنها
محمد عبدالماجد
عندهم مجلسين و(51) لاعبا ومعسكرين في القاهرة (99) يوما ومنتظرين الاهلي يغلب ليهم

· بعد أي مباراة للمريخ في الدوري الممتاز نقرأ عن تصريحات للمدير الفني للمريخ ابراهيم حسين (ابراهومة) يشكو فيها من الارهاق ومن ضغط المباريات ومن الظروف الصعبة التى يمر بها المريخ والمتمثلة في عدد الاصابات الكثيرة التى يعان منها نجوم المريخ.
· ظروف شنو؟ المريخ في كل مباراة يقوم الحكم بمنحه ضربة جزاء او اثنين كما حدث في بعض المباريات.
· انتوا يا ابراهومة عاوزين الاهلي المصري يلحقكم كمان في عطبرة.
· الهلال امام ود نوباوي لعب بعشرة لاعبين منذ منتصف الشوط الاول – وما في زول تحدث عن ظروف المباراة او عن التحكيم.
· في الهلال ما بنقبل أي عذر.
· تغلب بس.
· هذه التصريحات (التبريرية) اصبحت ثابتة من ابراهومة يقولها بعد أي مباراة للمريخ في الدوري الممتاز بغض النظر عن النتيجة التى انتهت عليها المباراة.
· اسطوانة ثابتة نسمعها من اعلام المريخ.
· وفي ناس بتصدق الكلام دا.
· اذا اخفق المريخ ارجع المدير الفني للمريخ ذلك الى الارهاق وضغط المباريات والظروف الصعبة التى يعيش فيها المريخ ، وإذا انتصر المريخ قام المدير الفني بالثناء على لاعبين وتقديم الشكر لهم لأنهم انتصروا رغم النقص والإرهاق وضغط المباريات.
· ارجعوا الى أي مباراة للمريخ سوف تجدوا هذه التصريحات الثابتة للمدير الفني للمريخ.
· في اعتقادي ان الاندية التى تلعب امام الهلال والمريخ مبارياتهم المؤجلة في شهر رمضان هي الاكثر تضررا من الهلال والمريخ.
· الهلال والمريخ يلعبا امام اندية توقف نشاطها وتم تجميع عناصرها الاساسية من بيوتهم من اجل خوض مبارياتهم المؤجلة امام الهلال والمريخ.
· لهذا لا يوجد أي عذر للهلال والمريخ وما في أي داع لكل هذه الشكاوي والمبررات.
· البكاء في شنو؟
· اندية الممتاز الاخرى تمر بظروف قاسية وأصعب كثيرا من ظروف الهلال والمريخ ، ولا تملك اموال للإقامة ولا تقديم وجبات غذائية للاعبي الفريق بصورة مثالية اة حتى صحية ونحن في شهر رمضان وهم يتنقلون في الشهر الفضيل بين الابيض وبروتسودان وعطبرة بينما يرتكز الهلال والمريخ في تلك المدن ليلعب في المدينة الواحدة ثلاث مباريات متتالية.
· وين الارهاق هنا؟
· الهلال بيسافر الى بورتسودان بالطائرة والآخرين بيسافروا في الهجيرة دي بالبص.
· الهلال بنزل في هيلتون والآخرين بنزلوا في بيوت العذابة.
· فريق المريخ دون كل الاندية الاخرى يجب ان لا يشكو من الارهاق وضغط المباريات ، لأن كشف المريخ الحالي فيه (51) لاعبا . غير (الحكام) و(متصعب) عبدالسلام …صحيح هناك عناصر لا يحق لها المشاركة بسبب مشاركتها السابقة مع انديتها في مباريات الممتاز لكن حصيلة المريخ من اللاعبين الجدد القادمون من اندية لا تلعب في الدوري الممتاز كبيرا ، الى جانب المحترفين والعناصر الشابة التى تلعب لفريق شباب المريخ ويستعين بها ابراهومة في الفريق الاول.
· كل هذا العدد متاح للمدير الفني للمريخ ، مع ذلك يشكو المدير الفني للمريخ ابراهيم حسين من (النقص).
· مشاطيب المريخ بيشاركوا معه في مبارياته.
· في الهلال وفي المريخ اذا لم نتجاوز محطة (المبررات) دي فلن نحقق شيئا في البطولات الخارجية.
· ليس هناك ارهاقا كبيرا على اللاعبين اذا لعبوا مباراة كل 72 ساعة ، في كل البطولات الكبرى تلعب المباريات في خلال 72 ساعة ، بل ان هناك اندية كثيرة تلعب بهذه الفواصل الزمنية في بطولات مختلفة.
· انتوا يا ناس الهلال والمريخ امام الاهلي مروى وهلال الفاشر والأهلي الخرطوم بتشكوا من الارهاق وضغط المباريات ..وفريق الهلال والمريخ بنزلوا في افخم الفنادق وبتقدم لهم وجبات غذائية ومشروبات بوصفات طبية عكس لاعبي الاندية الاخرى الذين ينزلوا في فنادق درجة ثانية ويجدوا معاناة حتى في الوجبات التى تقدم لهم.
· طيب اذا بتشكوا وانتوا بتلعبوا امام الاهلي مروى وكوبر وود نوباوي ح تعملوا شنو وقت تلعبوا امام الترجي والوداد ومازيمبي ؟
· نحن اعذار زي دا ما عاوزين نسمعها.
· لا نريد ان نسمع شكوى او عذر من الاجهزة الفنية في الهلال والمريخ.
· بتقبضوا بالدولار والعملات الصعبة وكمان بتشكوا؟
· انتوا مفروض تحمدوا الله على هذه الظروف التى تلعبوا فيها والتى يقدم لكم فيها افضل خدمة من مجالس الادارات ومن الاتحاد العام ومن الجمهور والإعلام الذي ينتمى للهلال والمريخ.
· الاندية الاخرى تلعب بدون جمهور ولا تملك اعلام يدافع عنها ، مع ذلك تقدم هذه الاندية اقصى ما عندها وتحرج الهلال والمريخ.
· ناس المريخ طبعا اتعودوا على (الباردة).
· ما عاوزين يتعبوا.
· عندهم مجلسين …وعاوزين الدعم السريع يصين ليهم الاستاد!!
· عندهم (51) لاعبا في الكشف وبشكوا من النقص العددي!!
· نقص عددي شنو يا ابراهومة البتشكوا منو والفريق في كشفه يوجد كل هذا العدد من اللاعبين؟
· في المريخ اللاعب المشطوب يمكن ان يشارك ..واللاعب المعلق في السيستم بشارك ..وعناصر فريق الشباب في المريخ بتشارك.
· عاوزين شنو اكتر من كدا؟
· والحكام تحت الخدمة ضربة جزاء في كل مباراة.
· المريخ عسكر في القاهرة (99) يوما وعاوز الاهلي المصري يغلب ليه الهلال وصن دوانز ذهابا وإيابا.
· فالحين والله.
· ناس التاج يعقوب ديل بعملوا في شنو؟
· الناس ديل ما عاوزين يعملوا أي حاجة.
· عاوزنها باردة!!
· الجاكومي اتفرغ لتسجيلات مقاطع الفيديو والخروج في (لايف) ..هذا كل الذي يستطيع ان يقدمه للمريخ.
· اها يا الجاكومي (اللايفات) عملتها فيك.
· انت فاكر الهلال دا (الحرية والتغيير) يمكن تطعنو في ظهرو وتمشى عديل ..وما في زول يجيب ليك خبر.
· الهلال لحمه مر.
· وحق الهلال ما بروح.
· الظروف والأيام براها بتكشفكم وبتظهر حقيقتكم.
· بعد مباراة المريخ الاخيرة امام هلال الابيض خرج ابراهومة عقب اللقاء وأشاد باللاعب الشاب موسي حسين (كانتي)..وتغزل فيه ..واعتبر ابراهومة ان هذا الامر (معجزة).
· ابراهومة ما عارف في الهلال بشارك طرف شمال جاء من اركويت اسمه (حسن سنار)…ولا في زول جايب خبرو ..رغم انه يشارك بعد ان جاء من منافسة متوقفة في الخرطوم وظهر بشكل مدهش.
· في الهلال يشارك الامريكي عيسي رمضان وهو لاعب جاء من الولايات المتحدة وقال عنه اعلام المريخ انه كان (لاجئ) في امريكا.
· حسن سنار وعيسي رمضان الاثنين مواليد عام 2000
· الهلال لم يستعمل حيلة المريخ وابعد العناصر التى استغني عنها في الستجيلات الاخيرة.
· يعني الهلال كان يمكن يستفيد من السمؤال ونزار حامد وعمر المصري وكديابا كما فعل المريخ الذي يشرك في مبارياته عناصر خارج كشفه بسبب لائحة (متعصب) عبدالسلام.
· نحن امورنا واضحة.
· اللاعبون الذين استغنى عنهم الهلال اعلن عنهم مجلس ادارة الهلال مبكرا عشان يمشوا يشوفوا مستقبلهم.
· تتخيلوا في المريخ محمد موسى الضي (المشطوب) يشارك مع المريخ في مباريات الدوري.
· بشه (المعلق) بيشارك.
· واحمد بيتر عندو (جنسيتين) وبرضو قاعد يشارك مع المريخ.
· عادي بتحصل في المريخ.
· المباراة القادمة للمريخ يمكن نشوف كمال عبدالغني وعاطف القوز.
· ويمكن فيصل سيحة ذاتو يظهر.
· ……
متاريس
· الهلال وكوبر عودة الى ايام زمان.
· من جديد الهلال يلاقى كوبر.
· ومسرح اللقاء هذه المرة سوف يكون ملعب استاد عطبرة …الملعب العتيق وأقدم استاد في السودان.
· بالتوفيق ان شاءالله للهلال.
· الجاكومي في مصر بقى اشهر من رامز جلال.
· هل سوف يعود الهلال من عطبرة للعيد ويرجع تاني؟ وهو سوف يلعب في عطبرة امام الخرطوم الوطني رابع يوم في العيد وربما ثالث يوم في العيد اذا كان العيد يوم الاحد.
· الافضل تعيدوا في عطبرة.
· وعطبرة براها عيد.
· معلوم ان الهلال سوف يلعب يوم السبت في عطبرة مباراة امام هلال بورتسودان ..وهي مباراة يمكن ان تكون قبل العيد بـ 24 ساعة او 48 ساعة اذا كان العيد يوم الاثنين.
· يعني ما في طريقة للرجعة.
· على العموم كل سنة وانتم بخير.
· واختموا لينا هذه الايام بالفرح ومواصلات الانتصارات.
· ما تخربوا لينا العيد.
· …..
· ترس اخير : ان شاء الله السودان كله بخير وبدون حكم عسكري يا رب.