تسجيلات المريخ.. الشبه دا ما غريب علىّ..!!

صابنها
محمد عبد الماجد
تسجيلات المريخ.. الشبه دا ما غريب علىّ..!!

· تسجيلات المريخ الحالية ذكرتني تسجيلات الدورات الرمضانية – لمن كل (كابتن) يشيل ليه ورقة وقلم ويبدأ يسجل في الاشخاص الذين سوف يمثلون فريقه في دورة رمضان.
· البيلاقيه كلو بيسجلو معاه.
· أي كابتن عاوز يلم ليه (18) لاعب عشان يشارك فيهم في الدورة الرمضانية.
· في كثير من الاحيان هذه القوائم بتكتمل بلاعبين ما عندهم علاقة بكرة القدم.
· ناس بتفرجوا ساكت.
· المشجع العادي في رمضان بيبقى لاعب كورة.
· زي ما بحصل في المريخ الآن.
· الدورات الرمضانية لا تشترط في اللاعبين الموهبة او الاجادة او الخبرة.
· ممكن تلقى لاعب عمرو (55) سنة بشارك في الدورات الرمضانية.
· وممكن الزول دا مع سنو دي يطلع هداف الدورة.
· ويعمل ليكم فيها ميسي.
· اصلو ما في حاجة بعيدة.
· الصلعة تلقاها اكبر من صيوان المناسبة …وصاحبها ممكن يكون هداف الدورة.
· طبعا أي واحد يتسجل في هذه الدورة بقولوا ليه لازم تدفع الرسوم – وفي احيان كتيرة بكتشفوا ان هناك عنصار مسجلة في كل اكثر من فريق.
· في ناس بسجلو من طرف زي حازم مصطفى.
· الزول دا تقول بسجل من السوق الشعبي.
· بسجل بالكوتة.
· ذكرني ايام كشات الخدمة الالزامية.
· الزول ممكن عادي ينزلوه من الدفار ويدخلوه معسكر الخدمة الالزامية.
· غايتو الكيزان عملو عمائل في البلد دي.
· وناس حازم مصطفى من بقاياهم.
· من اثارهم.
· طبعا أي كابتن في الدورات الرمضانية بختار اصحابه معاه عشان يلعبوا معه في الفريق – وغالبا ما تطلق اسماء على هذه الفرق على ذلك النحو : فريق الصداقة او فريق الاخوة او فريق الصفوة ..زي ما بحدث في المريخ الآن.
· تسجيلات المريخ دخلت العضم.
· يعني رمضان عجب ذاتو بقى مجهجه.
· قالوا بكري المدينة وامير كمال عاوزين يخلوهم (معلقين) في السيستم.
· وصلوا سن المعاش.
· ح يعلقوهم في السيستم.
· تستهال يا بكري المدينة.
· حقنا اصلو ما بروح.
· بكري المدنية عمرو كلو معلق.
· بعد السن دي تعلقوه.
· انتوا يا ناس المريخ ما قلتوا بكري المدينة قدم خطاب يطالب فيه بإخلاء خانته.
· ليه عاوزين (تعلقوه)؟
· انا عارف ناس المريخ ديل بتكلموا ساكت.
· وما بدوك الحقيقة.
· بيشتلوا.
· طبعا اكرم الهادي سليم اتخلصوا منه بسبب عامل السن.
· منجد النيل ودع – والموضوع لو استمر بهذه الطريقة يمكن ان يصل في الساعات الاخيرة الى صلاح نمر.
· الجاكومي اختفى.
· حجموه.
· وبقى ما عندو دور.
· ما سمحوا ليه يظهر مع أي لاعب.
· تسجيلات المريخ برضو بتذكرني وقت تكون في قطر او في حافلة او بص وتركب ليك جوار زول كبير في السن.
· اول شيء بعملها عمك دا بقول ليك انت بتشبه لي ناس عوتيم.
· لو قلت ليه ما بعرف ناس عوتيم ..بنقر ليك تاني اسم.
· عشان كدا احسن تختصرو وتقول ليه : ايو الزول دا عمنا باللفة.
· وانت عمرك كلو ما سمعت بيه.
· اول ما تقول ليه عمنا باللفة بقومك من جنب الشباك وبقعد هو.
· وبقول ليك جيب لي موية عليك الله.
· تسجيلات المريخ شغالة (شبه) ساكت.
· الناس ديل بسجلوا بالشبه.
· زي ما بحصل في المناسبات..اي (شافع) بغسل لي عمو في المناسبة ..عمو بيسألو : يا ولد انت ولد منو؟
· ابوك منو؟
· وجيت الكم؟
· الاسئلة دي طفشت (الشفع) من المناسبات.
· هسع ناس المريخ بسجلوا بنفس الطريقة.
· يا ود انت ولد منو؟
· والشبه دا ما غريب عليّ.
· وانا شفتك وين؟
· البتألق الايامات دي في دورة رمضانية بلقى نفسو في كشف المريخ.
· اللاعبون في كشف المريخ السنة دي قربوا يبقوا اكتر من جماهير المريخ.
· شيء جرس.
· وشيء كوة.
· وشيء زيزو.
· وشيء كسرى.
· وشيء كنو.
· وشيء كابتن بشير.
· ديل كابتن ماجد فاوضوه.
· خلوا عمار طيفور …وسجلوا (الكوتة) دي كلها.
· غاتيو نحن الجماعة ديل كلهم بنعتبرهم في خدمة الزامية.
· أي واحد بنجح فيهم بنسجلوا في الهلال.
· رغم ان معدل الاعمار ما اظن يسمح لينا بذلك في الهلال.
· الملاحظة العامة في التسجيلات هذا العام …انها (بطيخة مقفولة).
· يمكن عشان الدوري الممتاز السنة دي (صامت).
· ما في زول شاف ليه لاعب.
· المريخ سجل باعتبار ما كان.
· سجل من التاريخ.
· يعني كابتن بشير قبل كم موسم ما كان فيه أي كلمة …وهو لاعب موهوب ليس في ذلك شك.
· ولكن هل مازال كابتن بشير يحتفظ بألقه؟
· كابتن بشير في هذا الموسم كان احتياطي لي سليم برشاوي.
· مع ذلك نقول ان كابتن بشير يمكن ان يكون نجم التسجيلات الاول في المريخ.
· في مواسم سابقة تمنيت كابتن بشير في الهلال.
· لكن مهما يحصل ..لن يستطيع المريخ ان يعوض الاسماء التى سوف يفقدها في هذه التسجيلات.
· يعني المريخ ما ح يلقي ليه لاعب في قيمة امير كمال ولا يمكن ان يسجل ليه لاعب في امكانيات بكري المدينة.
· حتى عزام عادل اذا شطبه المريخ او اعاره فلن يكون الذي سوف يحل بدلا عنه افضل منه.
· عموما السنة دي التسجيلات ما فيها لاعب كان حوله صراع بين الهلال والمريخ.
· ما في نجم تسجيلات اتصارعوا عليه في القمة السودانية.
· لهذا يمكن غابت الاثارة من التسجيلات.
· مع ذلك فان الاسماء (الشابة) والصغيرة في السن في الهلال مبشرة.
· لمن نتحدث كثيرا عن بعض اللاعبين حتى لا نتسبب في وضع ضغوط عالية عليهم.
· لذلك يمكن ان يكون النجاح كبيرا لنجوم الهلال في التسجيلات هذا العام لأنهم تم تسجيلهم في هدوء ولم يشكل عليهم ضغوط.
· طبعا الهلال في تسجيلاته هذا العام راع عامل السن.
· أي شهادة مضروبة او شهادة تسنين الهلال لم يتعامل معها.
· الكثير من اللاعبين الذين سجلهم المريخ في هذه الفترة ابعدهم من الهلال عامل السن.
· لاعب عمرو فوق الثلاثين عاما ..ماذا تتقوقعوا ان يعطي لكم.
· لا نريد ان نتحدث بالأسماء.
· لكن معظم العناصر المطروحة في الساحة الآن مسجلين بشهادة (تسنين).
· واي شهادة تسنين بكون فيها خصم على الاقل (5) سنوات.
· لهذا اتجه الهلال الى العناصر الشابة في الدرجات الدنيا.
· في عناصر اتسجلت بيلعبوا الدوري الممتاز منذ اكثر من 7 سنوات.
· 7 سنوات في الدوري الممتاز ..يتنقلوا من نادي الى اخر ..هل يمكن ان تكون (سنهم) صغيرة؟
· ديل بشهادة التسنين بلغوا من العمر عتيا.
· …….
متاريس
· تظل التسجيلات التى اتت للهلال بالغربال وياسر مزمل وابوعشرين وارنق وصلاح عادل هي انجح تسجيلات للهلال في السنوات الاخيرة.
· تتخيلوا مع هذه الاسماء في ناس بتحدثوا عن بعض الذين فشلوا من تلك التسجيلات ويصفوها بالفشل.
· طبيعي ان تفشل بعض العناصر.
· ما في تسجيلات بتنجح كلها.
· الكلام دا في ليفربول ما بحصل.
· ولا برشلونة.
· عامل (التوفيق) دا ما في يد زول.
· لذلك لا احد يمكن ان يضمن نجاح لاعب.
· الهلال والامل اليوم مباراة مهمة.
· نتمنى التوفيق للهلال اليوم.
· فريق الشباب في الهلال اضاف عناصر مدهشة.
· سوف نعود لهذا الامر لاحقا.
· فريق شباب الهلال اضاف عناصر من عطبرة وعناصر من النهود وعناصر من بورتسودان وعناصر من ام بدة وعنصر مدهش من الخرطوم الوطني.
· انتظروا وشوفوا.
· ….
· ترس اخير : في انتظار بطيخة اليوم الاخير.