سيستم المريخ مقفول بـ (الحاويات)!!

صابنها

محمد عبد الماجد

سيستم المريخ مقفول بـ (الحاويات)!!

· في المريخ الحاجات ما واضحة – ما في زول عارف حاجة.

· المجلس الشغال مجلس منو الآن؟

· عاوزين نعرف بس.

· حازم مصطفى ام ادم سوداكال؟

· ومجلس حازم نفسو المسيطر فيه منو؟

· الرئيس حازم مصطفى ام الرئيس المناوب محمد سيد احمد الجاكومي؟

· اول مرة اكتشف ان الرئيس المناوب عندو صلاحيات اكتر من الرئيس.

· استاد المريخ حصل فيه شنو؟

· عاوزين نعرف بس.

· شركات الدعم السريع شغالة فيه ؟ ام ان الشغل وقف في الصيانة ؟

· بشه لاعب الهلال السابق ..موقعو شنو من الاعراب؟

· الزول دا في كشوفات المريخ ام برة الكشف؟

· في زول عارف حاجة.

· عاوزين نعرف بس.

· كشف المريخ قالوا عدد اللاعبين فيه وصل (47) لاعبا.

· الناس ديل بيسجلوا من السنة الفاتت ..لغاية الآن ما في لاعب واحد طلع من كشف المريخ.

· الحاصل شنو؟

· الهلال من غير تسجيلات شطب ليه (5) لاعبين ..وهناك خانة عبداللطيف بويا خالية وخانة وليد الشعلة خالية.

· عاوزين نفهم بس.

· قرار الفيفا الاخير بحرمان المريخ من التسجيلات واضح…حسب كلام ادم سوداكال.

· أصدرت لجنة الانضباط بالفيفا قرارا بحرمان نادي المريخ من إبرام التعاقدات المحلية والدولية. دا كلام موقع كوووة عربية – في اوضح من كدا.

· في زول عندو سؤال؟

· عاوزين شنو انتوا؟

· وقال سوداكال في بيانه “إلى جماهير نادي المريخ وجميع المهتمين بالشأن الرياضي والمريخي على وجه الخصوص، لقد تسلمنا اليوم الجمعة (امس) الموافق 8 أبريل/ نيسان 2022، قرارا صادرا عن لجنة انضباط الفيفا التي أصدرت أمس الخميس عقوبات بحق نادي المريخ”. وأوضح أن العقوبات “تتمثل في الحرمان من التعاقدات على المستوى المحلي والدولي على خلفية غرامات مالية قيمتها نحو 54 ألف فرنك سويسري”. وأضاف البيان “نحن في مجلس المريخ المنتخب برئاسة سوداكال شرعنا آنذاك أي عند إمهال النادي 30 يوما في عملية دفع هذه الغرامة إلا أننا تفاجأنا بالحديث عن سدادها من قبل المجموعة غير الشرعية التي يقودها حازم مصطفى الفاقد للشرعية والموقوف من محكمة (كاس)”.

· هسع الكلام دا فيه مهلة؟

· الكلام دا لا فيه مهلة ولا رهينة.

· كلام واضح.

· ما فيه حتى ريحة مهلة.

· وكيف تكون في مهلة؟ ..والقرار دا صادر من الفيفا بعد انتهاء المهلة السابقة.

· يعني انتوا فاكرين الفيفا دا ما عندها شغلة غيركم؟

· الفيفا شغالة مهلات للمريخ.

· ما عندها أي شغلة غير انها تعطي المريخ (مهلة).

· سواكال جابها ليكم واضحة ..وقال ليكم في بيانه : (العقوبات التأديبية الصادرة بحق نادي المريخ تكشف عن حقيقة مهمة تتمثل في عجز المجموعة غير الشرعية عن سداد 54 ألف فرنك وهي من تسلمت وبددت أموال المريخ ولم تقم بتجنيب النادي لهذه العقوبة التي بموجبها أصبحت تعاقدات نادي المريخ باطلة وفي مهب الريح).

· معني الكلام دا صديق كوة يشوف ليه فريق يتخزن فيه من بدري.

· انا من البداية قلت ليكم احمد بيتر دا كراعو حارة.

· التسجيلات الماضية طلع منها ..وفي هذه التسجيلات ..المريخ كلو طلع.

· السيستم قفلوه بالحاويات.

· السيستم ترسوه.

· كديسة ما بتمر.

· انتوا عاوزين تمرروا ليكم (47) لاعبا.

· ناس موقع باج نيوز قالوا شنو؟ ردا على هذه العقوبات : ( نفى الاتحاد العام لكرة القدم صدور قرار من لجنة الانضباط بالاتحاد الدولي لكرة القدم بحرمان المريخ من التعاقد مع لاعبين جدد. و أوضح أسامة عطا المنان ؛ النائب الأول لرئيس الاتحاد في تصريح لـ”باج نيوز ” أن اللجنة قامت بإمهال المريخ فترة ثلاثين يوماً لسداد مبلغ (54) ألف فرانك سويسري مضيفاً أنه في حال لم يسدد المريخ المبلغ فسيتم حرمانه من التعاقدات.و أشار إلى وجود مهلة مماثلة لناديي النيل شندي و الهلال ، مشدداً على ضرورة أن تتعامل الأندية بجدية مع الأمر).

· طبعا لازم ينفوا.

· ولازم يدخلوا الهلال عشان الموضوع يتصلح معاهم.

· الهلال دخلو شنو؟

· مهلة تانية.

· ناس الاتحاد العام عاوزين يتحايلوا على العقوبة ..الموضوع دا فيه (سيستم) ما (بونية) يا اسامة عطا المنان.

· سوداكال وضح ذلك في بيانه وقال : (نحن في مجلس المريخ المنتخب برئاسة سوداكال نملك قرار يتعلق بالتدابير المؤقتة، تفنن الاتحاد السوداني لكرة القدم في الالتفاف عليه وعدم تنفيذه مما قاد النادي لهذا الوضع المشوه في ظل المجموعة غير الشرعية التي نعتبر أن كل ما يصدر عنها أو ما تقوم به غير شرعي وباطل بموجب قرار التدابير المؤقتة الصادر لصالحنا).

· الاتحاد العام عاوز يلتف على القرار.

· يبدو ان الامور اختلطت على اسامة عطا المنان.

· تشابهت على اسامة عطا المنان (المهلات).

· الاتحاد الدولى اعطي المريخ (مهلة) لو ما سدد الغرامة يمكن بعدها ان يتم معاقبة المريخ بخصم نقاط من رصيده او بهبوط المريخ لدرجة ادنى.

· شوفوا بيان سوداكال في الحتة دي قال شنو : (العقوبات الحالية ألحقت بها عقوبات أخرى وغرامة جديدة تقدر بـ 7500 ألف فرنك مما يعني أن إجمالي غرامات الفيفا واجبة السداد بلغت 61.5 ألف فرنك سويسري، وحال العجز عن السداد خلال (30) يوما ستسري عقوبات إضافية على النادي تتمثل في خصم النقاط والهبوط لدرجة أدنى).

· ما في مهلة بيلحق بيها عقوبة اخرى.

· الكلام واضح وصريح ..وما عندو علاقة بمهلة التسجيلات … القرار بقول : (حال العجز عن السداد خلال (30) يوما ستسري عقوبات إضافية على النادي تتمثل في خصم النقاط والهبوط لدرجة أدنى).

· ما قالوا حرمان من التسجيلات يا اسامة عطا المنان.

· سوداكال فهم عقوبة الفيفا صاح.

· حازم مصطفى بالطريقة دي بنزل المريخ للتانية.

· ألحقوا روحكم.

· حازم علق على هذه العقوبة في خبر باج نيوز : ( اعلن رئيس نادي المريخ السوداني حازم مصطفى عن سداد الغرامة التي فرضتها لجنة الانضباط بالاتحاد الدولي لكرة القدم”فيفا” على النادي في وقتٍ سابقٍ. وقال مصطفى بحسب مقرّبين، إنّ القرار الأخير للجنة الانضباط لا معنى له. وأشار إلى أنّه سدّد المبلغ المالي كاملاً للاتحاد الدولي لكرة القدم، بعدما أرسل”فيفا” أرقام حساباتٍ خاطئة. وأوضح حازم أنّه حوّل المبالغ المالية من حسابه في سويسرا، وأنّه يملك الأدّلة. والجمعة، كشفت تقارير صحافية، عن أنّ لجنة الانضباط بالاتحاد الدولي لكرة القدم”فيفا”، خاطبت نادي المريخ بشأن قضية فشل النادي في سداد الرسوم والغرامات المقرّرة لصالح الاتحاد الدولي لكرة القدم”فيفا” في قضايا سابقة متعلّقة بكلٍّ من وارغو، كوفي وسومانا).

· الفيفا ارسلت ارقام خاطئة للمريخ …انا خلوني ..انتوا بتصدقوا الكلام دا يا مريخاب؟

· و يا ناس باج نيوز ما قلتوا في (مهلة) جديدة ..مالكم رجعتوا وقلتوا المريخ سدد الغرامة.

· يعني ناس الفيفا بكضبوا.

· بالمناسية ناس الفيفا ذاتو ما محترفين بمجلس حازم مصطفى.

· الموضوع عند (كاس).

· عشان كدا احسن تلموا قروشكم عليكم وما تضيعوها في التسجلات ساكت.

· لا جرس.

· ولا كوة.

· والله انت يا طيفور الله شافك.

· اكتر زول مستفيد من هذا القرار هو عمار طيفور ..والجزولي نوح والتش.

· غايتو في تسجيلات المريخ الاخيرة دي في زول كراعو حارة.

· زول قفل السيستم.

· لا عارفو جرس.

· لا عارفو كوة.

· يمكن زي ما قلت ليكم يكون احمد بيتر.

· ويمكن سمؤال ميرغني.

· ويمكن دا حظ عمار طيفور.

· الله شافو.

· الفيفا رسلت قرارها هذا في (5) ورقات .. هل تحتاج (المهلة) لكل هذا الاسهاب والتوضيح؟

· ما تقعدوا تلونوا الاخبار.

· سوداكال صاح.

· وحازم غلط.

· وبكرة نشوف.

· ………………..

متاريس

· سوف اعود واكتب عن نزار حامد وعن السمؤال ميرغني ..فقط بعد ان تتضح الرؤية.

· عشان يمكن زول يمشي المريخ.

· نشوف الحكاية سوف ترسى على ايه.

· وبعدين نكتب.

· عشان الامور تبقى واضحة.

· وظاهرة.

· لكن في كل الاحوال نتمنى للخلوق نزار حامد وللمقاتل السمؤال ميرغني التوفيق في رحلتهما القادمة.

· سيستم المريخ مقفول.

· مترس.

· الهلال يلعب اليوم امام الشرطة.

· الممتاز يا هلال.

· الدوري يا هلال.

· هل يمكن ان نشاهد بعض العناصر المنضمة حديثا للهلال امثال خالد الحسين وحسن خميس في مباراة اليوم؟

· طبعا احمد يحي ومحمد منذر القوانين تمنع مشاركتهما في المباريات المؤجلة.

· الله ينصر الهلال.

· خطوة الى الامام ان شاءالله.

· ….

· ترس اخير : بكرة ان شاءالله كلام تاني.