مرحبا بكم في وطنكم الثاني السودان!!

صابنها
محمد عبد الماجد
مرحبا بكم في وطنكم الثاني السودان!!

تصريحات رئيس نادي المريخ (جمعية حديقة الموردة) حازم مصطفى في الفضائيات المصرية جعلتني احس ان السودان اصبح هو الوطن الثاني للمريخ وليس هو الوطن الاول الذي ينتسب اليه نادي المريخ.
المريخ الذي خرج من تراب هذه البلد …من ناسها ومن ملامحهم السودانية الجميلة.
حازم عارف الكلام دا.
حديث حازم مصطفى عن مصر وملاعبها وعن الاجواء في القاهرة حديث لم يتفوه به حتى محمود الخطيب رئيس نادي الاهلي المصري.
اعتقد ان (انبراشة) حازم مصطفى زايدة شوية ..وهي قد لا تتوافق حتى مع اعضاء مجلسه ومع الغالبية العظمي من جماهير نادي المريخ الكبير.
ناس الجاكومي عندهم رأي واضح في هذه الحتة …واجزم ان الاخ هيثم كابو برضو عندو رأي في الحتة دي.
يا زول ناس المريخ كلهم عندهم رأي.
ما في زول قاعد يقبل بالكلام دا.
حازم دا هو صاحب الخطاب الى الكاف والذي اشار فيه الى عدم استقرار الاوضاع في السودان …عشان كدا الاتحاد الافريقي بقى كل مباريات الهلال في السودان يشترط ان تكون بدون جماهير.
قالوا البلد غير مستقرة.
السودان غير مستقر.
زول يتحدث عن مصر بهذه الفخامة ويقول ان والدته مصرية ويتحدث عن السودان ويقول ان الاوضاع الامنية فيه غير مستقرة من الطبيعي ان يجد منّا هذه الانتقادات. وقد وجهت له تلك الانتقادات حتى من اهل المريخ انفسهم …وهم غير راضيين عن هذا الوضع.
لكن في النهاية العاطفة الرياضية في النهاية بتكون غالبة. وهذا امر طبيعي لا نستطيع ان نلوم المريخاب عليه.
لكن نحن ح نتكلم …ونقول ليكم الكلام الما بتقدروا انتوا تقوله.
اهلا بيكم في وطنكم الثاني السودان …(حازم مصطفى هو الذي وضعكم في هذه الحتة).
ناس كلارك وتوني والكاميروني …واسلام جمال ..احسن ليهم يلعبوا برة السودان.
ونحن مضطرين نقول ليهم مرحب بيكم في وطنكم الثاني السوداني.
وابوجريشة ذاتو داخل في الحسبة.
ابوجريشة ما عاوز يرجع.
فريق معسكر في مصر اكثر من (90) يوما ..دي الاهلي المصري النادي الذي ينتمى لجمهورية مصر العربية ما بعملها.
عملوها المريخاب.
قالوا ليك بعثة فريق المريخ عندما وصلت للسودان شكت من حرارة الجو.
عاد نبقى لي دي؟
وطالبوا بقوة امنية اضافية.
يا جماعة الموضوع ما بيستاهل كل هذه الاشياء.
انتوا في بلدكم.
ما تنسوا انفسكم.
مصر دي معسكر وبنفض.
قالوا ليك ناس كرشوم وعماد الصيني طالبوا ان تصل بعثة المريخ للسودان قبل 48 ساعة من المباراة …عشان ما متعودين على هذه الاجواء.
حازم مصطفى قال الاوضاع في السودان غير مستقرة.
والله كمان الايامات دي في (بمبان) جنسو براه.
بمبان يظل عالق في الشوارع لمدة اسبوع.
البمبان دا جابوه من وين؟
والله دي (الكيزان) ما حصلوكم فيها.
ناس المريخ عشان البلد يمكن تكون بقت غريبة عليهم ..نقول ليهم شارع الاربعين (مترّس).
ما تمشوا فيه.
احسن نقول ليكم أي شيء.
الحالة بينا وبينكم واحدة.
في النهاية انتوا مننا وفينا.
شارع البلدية بقى اتجاهين.
شارع القصر بقى اتجاهين.
وقاعة الصداقة البوابة الجنوبية مقفولة.
وحمدوك قدم استقالتو.
يا ربي عارفين المعلومة دي.
وعشان الامور تبقى ليكم واضحة …بنقول ليكم : عليكم الله يا ناس رمضان عجب استحملونا شوية.
كلها 28 ساعة وترجعوا مصر عشان تلعبوا مباراتكم هناك مع الاهلي المصري.
المريخ والاهلي المصري في مصر ..والملعب ملعب المريخ.
كلام زي دا – قبل كدا نحن ما سمعنا بيه.
الايامات دي قطوعات الكهرباء رجعت بصورة اكبر.
ما تستغربوا.
استحملونا شوية.
الرغيفة بقت بـ 50.
الرغيفة 50.
نحن عارفين وقت طلعتوا من البلد دي …الخمسين كان شائب الاسود.
هسع الرغيفة ذاتها خمسين.
الدولار طار السماء.
ما تمشوا تصرفوا دولاراتكم ساكت في مصر.
يمكن المعسكر في القاهرة لمدة (90) يوم خرب طبعكم.
احسن نقول ليكم كل شيء.
لو كبري الحديد مقفول ..كبري الفتيحاب فاتح.
اسمو (الفتيحاب) يعني ح يكون قافل.
العسكر دا ممكن يعملوا أي شيء.
الحاويات الفي كبري المك نمر …ما حاويات بتاعة (ادوية) او (قمح)..دي حاويات قافلة الكبري.
يا زول البلد بقت صعبة.
انتوا ما تستغربوا من كلامي وتقوموا تزعلوا في الفاضي ..شوفوا ادم سوداكال قال في اخر بيان اصدره شنو؟
(لقد ظللنا نتابع الحالة العبثية التي يمر بها نادي المريخ من قبل مجموعة الموردة غير الشرعية والتي بسببها بات تأهل المريخ للمرحلة المقبلة من دوري أبطال أفريقيا في كف عفريت بعد ان تبارت هذه المجموعة غير الشرعية في إراقة ماء وجه نادي المريخ بصورة مخجلة يندى لها الجبين بعد الإتفاق الكارثي الذي عقده حازم مصطفى غير الشرعي والذي لا يملك اي صفة شرعية تعطيه حق عقد أي إتفاق أو إبرام اي نوع من الإتفاقيات أو التعاقدات بإسم نادي المريخ، هو ومجموعته غير الشرعية، والتي مارست إستهتار وإستخفاف مقيت بقيم ومكانة نادي المريخ ونؤكد ان ما طال النادي وجماهيريه من إسفاف وتعليقات مؤسفة من جماهير النادي الأهلي المصري سيما حديثهم المتعلق بتكفل النادي الأهلي بإستضافة الفريق وضيوفه، و حديثهم حول أنهم (يتكفلون بأكل وشرب النادي وتسكينه لمثل هذا اليوم المهين بالنسبة لنا في تاريخ المريخ) وعليه فإننا نعلن اننا على إستعداد كامل في مجلس إدارة نادي المريخ برئاسة السيد آدم سوداكال لسداد جميع الأموال التي قام النادي الأهلي المصري بإنفاقها على المريخ بموجب الإتفاق المخزي والمهدر لكرامة النادي وكبريائه الذي تم إبرامه من حازم مصطفى غير الشرعي).
دا كلام سوداكال رئيس نادي المريخ…عشان ما تقعدوا تستغربوا لي ساكت.
المريخ عندو ناس يسدو عين الشمس.
ما بقبلوا المسخرة دي.
سوداكال قال في البيان : (نؤكد ان ما طال المريخ من إسفاف ولغو في الأسافير من جماهير الأهلي المصري أمر محزن ومؤسف لكل سوداني ولكل مريخي وهو يضع السودان ونادي المريخ في إطار ساخن لحفظ الهيبة و الكرامة من العبث والتلاعب والإسفاف اللفظي الذي جلبته مجموعة عاجزة فاشلة فاقدة للشرعية سقطت تماماً في إختبار حفظ هيبة وسمعة ومكانة نادي المريخ العريق، فما فعلته هذه المجموعة غير الشرعية بإسم نادي المريخ سيظل وصمة عار لا تنمحي ولا يمكننا الإستمرار في الفرجة على هؤلاء العابثين بأرث وتاريخ نادي المريخ العريق).
معقولة الامور تصل في المريخ لدرجة الشكوى من درجة الحرارة في السودان.
طبعا مباراة القمة سوف تلعب عند الثالثة عصرا – وجماعتنا ديل القاهرة خربت ليهم طبعهم.
بي طريقتهم.
لكن بيني وبينكم ناس توني والسماني الصاوي ديل ..في (قلاية) بن ما عندهم مشكلة.
احسن الامور تبقى ليكم واضحة يا ناس الهلال.
وما تلعبوا على درجة الحرارة.
ناس الصيني ديل بياكلوا (الزلط).
بس ناي حازم يمكن يكونوا خربوا ليهم طبعهم.
………………
متاريس
الشنط التى رجعوا بيها لاعبي المريخ من مصر ..ِشنط زول غريب من البلد.
الناس ديل قالوا اكلهم جايبنو معاهم.
بقوا ما متعودين على الاكل السوداني.
الشيء الغريب…ناس محمد الرشيد يتلفتوا في مطار القاهرة زي كأنهم في مطار جوهانسبرج.
البلد زي الغريبة عليهم.
……
• ترس اخير : مبرووك للسندريلا …ممكن نرجع للموضوع دا لاحقا ان كان في العمر بقية.