ليلة للتاريخ.. السماني كمان وكمان.. الزعيم ملك عموم حضارة وادي النيل
كبد الحقيقة
مزمل ابو القاسم
ليلة للتاريخ.. السماني كمان وكمان.. الزعيم ملك عموم حضارة وادي النيل
يا نهار أبيض: المريخ يجندل الهلال في القاهرة بطريقة (اتقل ع الرز يستوي)!
كل عقدة وليها حلاّل.. كل فولة وليها كيال.. وكل سيما وليهو هلال
* الحمد لله بُكرةً وعشية.
* الحمد لله آناء الليل وأطراف النهار.
* الحمد لله كما ينبغي لجلال وجهه وعظيم سلطانه.
* الحمد لله الذي منّ علينا بنصره المؤزر، ومنحنا الفرح أطناناً.
* الحمد لله الذي أنعم علينا بليلة عظيمة، ستبقى للتاريخ.
* التاريخ قرين السيد المريخ.
* مريخ حازم وصارم.. مريخ بديع ورفيع.
* مريخ سيما والزين الشفيع.
* مريخ جميل.. وشارب موية النيل.
* في البقعة زعيم.. وفي المحروسة باشا.
* تفاءلنا قبل لقاء الأمس وحق لنا أن نتفاءل، لأن المباراة تاريخية.
* ألم نقل لكم إن القمم التاريخية دائماً ما تنتهي مريخية؟
* حمراء بلون الدم.
* وصفراء فاقع لونها تسر الصفوة.
* صوِّر يا مُصوِّر.. وأكتبي يا صحافة.. المريخ فووووق والباقين بلاطة.
* بالطول.. بالعرض.. مريخنا يهز الأرض.
* مرة أخرى تكررت احتفالات الزعيم بانتصار مؤزر، بطله شيخ الطريقة السمانية المريخية.
* سيما.. اللمسة وسيمة.
* الدبل حصل.. والفرح اكتمل.
* (حازم) وصلي مالك؟
* مبروك للقنصل حازم الذي وفر كل متطلبات النجاح للفرسان.
* مليار مبروك للجهاز الفني والإداري واللاعبين وأعضاء المجلس فرداً فرداً.
* مبروك لحزومي والجكومي.
* مبروك للحبيب كبكبة والصغير اللطيف منير نبيل.
* مبروك لكل صفوة ينبض قلبه بحب الزعيم.
* السماني قائد الحملة.. انتقل من القطاعي إلى الجملة.
* الصاوي الحاوي.. صرف ليهم البركاوي!
* الحاضر يكلم الغائب.. والمغلوب يحدث الغالب.
* مع كل رش.. سيما يعوِّض غياب التش!
* هزمناهم في سوق القش.. وهزمناهم في إستاد السلام.
* هزمناهم جنب جامع الخليفة.. وضربناهم جنب مسجد السيدة زينب!
* غلبناهم بجوار القبة المقابلة النيل.. وغلبنهم جنب (الحسين)!
* أمال أيه يا بيه؟
* نحن كمان بنلعب؟
* طقطقتنا.. خالية نقنقة!
* السماني نار الضلع!!
* زمان ضربناهم في جوبا.. وهسه غلبانهم في القاهرة.
* في المرتين.. فسحناهم.. ورشيناهم!
* في الضربتين.. سافروا بالطيارة ورجعوا بالخسارة.
* أمس ضربناهم بالصواريخ الباليسيتية.. من الراجمة السمانية.
* صواريخ في كييف.. وصواريخ سمانية تتم الكيف.
* في مصر مريخ.. وفي السودان تاريخ.
* تيمان أخوان أخوان.. في القاهرة وأم درمان.
* بحمد الله انتقلت أوراد الطريقة السمانية من أرض الكنداكات.. إلى أرض الفراعنة.
* هزيمة في شمال الوادي.. وهزيمة في جنوب الوادي.
*غلبناهم هنا.. وغلبناهم بي غادي.
* غلبناهم في دولة المنبع والممر.. وغلبناهم في دولة المصب.
* يا مستر كلارك.. الجوزما كفاك؟
* بطولة إفريقيا كوم.. وانتصار أمس ده كوم تاني.
* سجل سجل يا تاريخ.
* الزعيم ملك عموم حضارة وادي النيل.
* السماني طبق شعار (أسكت كِب)!
* المريخ في الصدارة بجدارة.. والصفر في الذيلية بمهارة!
* متذيل لا تكلمني!
* أبو عشرين تم تخفيض رتبته إلى أبو اثنين!
* سيما الولدة الناجحة.. والضربة الراجحة.
* الضربة المقبلة في قلب الجوهرة الزرقاء.
* الحاضر يكلم الغائب.. الصيني يحدث كرشوم.
* البقعة برضها أرضنا.
* البلد بلدنا ونحن أسيادها!
* أمس امتزجت الحضارة الفرعونية بالحضارة المريخية.
* قلدنا المصريين كثيراً ولم يقلدونا إلا في المريخ.
* أنشأوا مريخهم السعيد.. في بورسعيد.
* نهدي لأحبابنا الهلالاب أغنية أبو العلا وأحمد المصطفى الشهيرة (فيك يا مصر أسباب أذايا)!
* صابر ولم أعلم شقايا!
* مصر يا أخت بلادي يا شقيقة
* يا بلاداً عذبة النبع وريقة.. يا حقيقة.
* هزمناهم بالموسيقى التصويرية!
* مرة جوبا مالك عليا.. (ومرة فيك يا مصر أسباب أذايا).
* سفري السبب لي أذايا.. فُرقة وفقدان هنايا!!
* أبكي على تهديم بنايا.. ليت السماني عليَّ لان!
* السماني طلع باشا ونحن ما عارفين!
* الهلالاب عندهم (عيد) وزعلانين!
* ونحن ما عندناش عيد ومبسوطين.
* الليلة نحن قالبين لسانا مصريين عديل كدة!!
* بي حقنا.. وبي سببنا!!
* يا نهار أبيض.. ويا مساء الفل!
* أمال أيه يا بيه؟
* سيما كمان وكمان.
* السماني في الجامعة الأمريكية!
* سيما (اتنين) غيغا!
* في البقعة فنان.. وفي المحروسة فتَّان!
* مباراة البقعة بدون جمهور!
* والتاريخ علمنا أن المريخ يتفوق دوماً في قمم (القراءة الصامتة)!
* من هسة كلمناكم.. عشان ما تقولوا رشيناكم وغشيناكم:
* الدبل وارد بشدة.
* وطبقة الحنة مطلوبة ومرغوبة!
* أمس فقدنا العقرب والأمير والرشيد والتش.. وبرضو حصل الرش!
* أمس قالوا المريخاب متبخترين في قلب شارع السودان بالمهندسين!
* متصدر لا تكلمني.
* ألم نقل لكم في ملعب السلام عندنا كلام؟
* أهو يا بيه.. رفعنا التمام.. ومريخنا تمام.
* نتيجة لقاء الرش.. نفس نتيجة مباراة سوق القش!
* أوجه الشبه موجودة.. بين الزين الشفيع والسماني الصاوي.
* من جكسا ولي هسة!
* أول كورة تيمان.. وآخر كورة تيمان.
* نفس الملامح والشبه يا مان!
* من زمناً قديم: المريخ زعيم.
* والهلال وصيف.. خفيف وظريف ولفيف.
* الزبون أخد المعلوم.. بالختم المعتمد.
* هلال السماني.. يعاني!
* قالوا سيطروا.. قلنا غلبنا!
* السماني مزق شباكهم في الدقيقة الثالثة!
* الولد الشقي بلاهم قبل ما يعرقوا!
* شوف عيني لا شهدهم.. ولا خلاهم قالوا بسم الله!
* كع لقوها تنطط جوة شباك أبو عشرين!
* سماني الزين.. فعلو شين!
* أمال أيه يا بيه؟
* يشهد الله بنحبو.
* وعلي قول المصريين: اللي يحبه ربه.. يحبب فيه خلقو!!
* انطبقت على محترفي الوصيف المثل المصري: (جبت الاقرع يونسني، قلع الطاقية وخوفني)!!
* وسرت على إعلام الهلال مقولة (خدوهم بالصوت لا يغلبوكم)!
* أهو غلبناكم.. وبالجوز رشيناكم!
* اشتغلنا معاكم بطريقة: (اتقل ع الرُز.. يستوي)!
* (القفة اللي ليها ودنين.. يشيلوها اتنين)!!
* حكمة الله.. قفتكم أمس شالها سيما براااااهو!!
* كل عقدة وليها حلاّل.. كل فولة وليها كيال.. وكل سيما وليهو هلال!
* السماني يكتل الأتيل.. ويمشي في جنازتو!!
* يا السماني عليك الله.. قوم جيب التاني!
* انتصرنا للتاريخ.. وفرحنا بالمريخ.
* الأيام دي أي حاجة في السودان ماشة زايدة!
* إلا الوصيف الخفيف، كاشي.. وكل عام متلاشي!
* مضمحل وشاحب.. ولونو قالب!
* يا هلال أقيف لسع.. أقيف و(أخضع)!
* آخر خبر: رِجل السماني تدِب.. محل ما يحب!!
اليخماو باين قبض المكرمه وفرحاااان موعدنا الجوهره وحنفهمك كتاب بفريقك البشبه استادك ده. وتحياتي لود العمده
هههههههههه لا حول ولا قوة الا بالله. وكأنك شاهدت مباراة في استاد كنت انت المشجع الوحيد فيه. الملايين شاهدت المباراة والكل عرف انه اليوم لم يكن يوم الهلال ودة حال كرة القدم. من حقك ان تفرح ولكن محاولة تصوير الامر وكأن المريخ عمل الاعجاز فالحكاية لا فيها اعجاز ولا يحزنون. المريخ عرف كيف يستغل عيوب الهلال – الواااااضحة – والهلال دخل مدربه للمباراة بدون رؤية واضحة. ما تكتر الفرح لسة الغريق قدام.
معقول ياابو جاكومة انت مافاهم اليخماو. ؟؟. ده تخصص في النفخ والتطبيل والتاليف لبيع الوهم والتخدير لصبيانه المغيبين. ان شاء الله نسمع من ابو صلاح عشان يوريك المزيد. 😹😹😹😁
صنداونز يهزم الأهلي في عقر داره ويضع حلمبوش المدفور في موقف لا يحسد عليه في مواجهة الأهلي، وبكدة ستة نقاط الأهلي المصري مافيها طريقة، و صنداونز في جنوب أفريقيا لا بينفع معاه ضنب حمار ولا ضبايح، البل الكبير في الجوهرة متحمدكم يا مرخرخين بإذن الواحد الأحد…….
إن شاء طيش المجموعة حا يكون عنده أربعة نقاط زي الضل الوقف مازاد 😆😆😆
يا خسارة المعسكر أبو سبعين يا أليخماو 😝😝😝
انفخ وخدر والتنفيث قادم لامحالة.
الكوزة اقوات علي راي كابتن لطيف مافي فريق ذكروه بانه قدم عرضا فنيا واستحوذعلي الكرة
فعلا الفهم قسم يا معلقي الغفلة
اعتذر رئيس بعثة الهلال المتواجدة حاليا بالقاهرة عبد الله العاقب بلطف لمدير جهاز المخابرات الاسبق صلاح قوش عن تسجيل زيارة لطاقم البعثة في مقر اقامته، مماثلة للتى قام بها لبعثة المريخ واخبر العاقب مندوب (قوش)ان مثل هذه الزيارات تتطلب قرار من مجلس ادارة النادي واتخاذ قرار بشأنها وكانت (xxxx)قد انفردت بخبر رفض بعثة الهلال لهذه الزيارة ..وكان قوش قد زار بعثة المريخ وامضي معها وقتا طويلا ومع اسرة محلس المريخ
منقووووول.
عشان كده سمينا بنادي الحركة الوطنية.
👆 لو في بس شوية احترام لدماء الشهداء التي سالت بأيدي السفاح قوش في ثورة عظيمة ثورة جات بالدم والدموع كثورة ديسمبر مفترض يتم إقالة كل من رتب ونسق واستقبل السفاح قوش في ادارة نادي عظيم وكبير زي نادي المريخ.
بعثة المريخ لاعبيين وفنيين واداريين لوفيهم زول مؤمن بثورة ديسمبر وشهدائها وقلبو حار علي الوطن مفترض قوش يطرد منذ لحظة وصوله مقر البعثة لانو ايديه ملطخة بدم الشهيد عبدالرحمن الصادق سمل ودم الشهيد دكتور بابكر عبد الحميد ودم الشهيد الفاتح عمر النمير ودم الشهيد استاذ احمد الخير ودم الشهيد صالح عبدالوهاب ودم الشهيد محجوب ودم كل شهداء ثورة ديسمبر.
شي مؤسف ومؤلم جدا البحصل ده وسقطة اخلاقية لايغطيها حتي لو المريخ فاز بكاس العالم للاندية وتم تصنيفة النادي رقم واحد في العالم يظل هذا العار يلاحقه ان لم يعاقب من فعل هذا الجرم. *حازم والجاكومي لا يمثلون الصفوة*
منقووووول
لو ماقوش ماكان ثورة ديسمبر نجحت ياروش ياهلا وقول جايكم انتظر ااجايكم يارساشات