تشاهد غدا (استقالة كلارك) و(أي دمعة حزن لا لا) و(نهواه في كل الظروف)

صابنها
محمد عبد الماجد
تشاهد غدا (استقالة كلارك) و(أي دمعة حزن لا لا) و(نهواه في كل الظروف)

• صلاح نمر اعتذر.
• قال الركبة.
• والنظر.
• والخدمة العامة.
• الخدمة العامة دخلها شنو بالموضوع؟
• والله (الكيزان) ديل خربوا أي حاجة.
• بكري المدينة اعتذر.
• قال العشرة القديمة.
• والسن ليها احكام.
• والبرد.
• والمطر.
• والعسكر.
• العسكر دخلهم شنو بالموضوع؟
• ابراهومة هدد بتقديم استقالتو.
• قبل المباراة ما تبدأ.
• قال ما بقعد.
• امير كاريكا استقال عديل كدا.
• رجع من مصر.
• حازم مصطفى صرف المرتبات والحوافز ودفع 200 الف دولار.
• شفتوا الجهجهة.
• عالم ما بتجي إلّا بالغربال.
• اقول ليكم حاجة …شايف كرشوم رهاب ..رهاب …جاري بكل ما اوتى من قوة عشان يلحق (الغربال).
• شيء تشوف.
• وشيء ما تشوف.
• لا اقول ليكم دا كرشوم لا اقول ليكم طبنجة.
• غايتو الحاجة المتأكد منها منجد النيل اشتبك مع عماد الصيني.
• الاتنين بدخلوا في بعض.
• مرات يبقى لي الزول عماد الصيني.
• ومرات كمان يبقى محمد الرشيد.
• ومرات كمان يبقى لي زول عم شبشة.
• عم شبشة يا زول الدخلو شنو في الموضوع.
• عم شبشة زول مبروك بس.
• انتوا اسكتوا.
• الحكم جاري على نص الملعب.
• والدقيقة الرابعة.
• والهدف الاول للهلال.
• قولوا ان شاءالله.
• لا اقول ليكم الغربال.
• لا اقول ليكم اجاجون.
• مرات يبقى لي الرقم 33.
• ومرات يبقى لي 36.
• الشيء شنو؟
• الشيء بيبقى لي رهاب رهاب.
• لا اقول ليكم ارنب.
• لا اقول ليكم غزال.
• لا عارفو فك دو.
• لا عارفو سبعة هارتي.
• لكن خمسين.
• ومرات كمان اللاعب بظهر لي بدون رقم.
• قلت ليهم دا منو؟
• مالكم انتوا عاوزين تعملوا لي زغزغة في العيون.
• قالوا لي دا ياسر مزمل …من السرعة الرقم ما بتشاف.
• بظهر بدون رقم.
• ما شاءالله.
• موش مرات في اتصالات بتجيك بدون رقم.
• دا ياسر مزمل.
• الكلام دا كلو بكرة بقع ليكم.
• بوقعوا ليكم.
• عاوز اقول ليكم ما تخافوا من مباراة القمة.
• اتونسوا بيها.
• خلوا قلبكم قوي.
• ما تسألوا في زول.
• نحن عملناها في الدوحة.
• وعملناها في ابوظبي.
• والمريخ شلاقة منو ساكت وداها القاهرة.
• وقعتوا وما سميتوا.
• نحن القاهرة دي بنفتش ليها فتيش.
• ان شاء الله نعملها في القاهرة.
• تاريخية ان شاءالله.
• انتوا عارفين نحن في القاهرة هزمنا الهلال السعودي بهدف والي الدين رحمة الله عليه.
• وفي القاهرة هزمنا الاهلي المصري بهدف ريتشارد.
• وفي القاهرة ان شاءالله نهزم المريخ بالغربال.
• المريخاب ديل في زمن جمال الوالي كانوا مكملين الرشاقة.
• تغلبهم يقولوا ليك (أي دمعة حزن لا لا).
• روح رياضية جد.
• منتهى الرومانسية.
• يطلعوا من البطولة يقولوا ليك ( نهواه في كل الظروف).
• ما خلوا شيء لجميل بثينة .
• ايام جمال الوالي عادي المريخ كان في الاسبوع الواحد ينظم ليه بطولتين (سيكافا).
• في فترة من الفترات البلد دي كلها بقت محلات مديدة دخن ولبن ابل …وتنظيم بطولة سيكافا.
• غايتو المريخاب ديل مع جمال الوالي ما خلوا شيء للظرافة.
• ظرافة شديدة.
• الغريبة في فترة سوداكال المريخاب ما بيستحملو الهبشة.
• قبل مباراة الهلال والمريخ بـ (24) ساعة ممكن تلقى ليك في ناس كتيرة قاعدين يتفاصحوا.
• ويتحدوا.
• ويتكلموا.
• الواحد تلقاه بارم شنبو ..وضامن النتيجة في ايدو.
• يوم المباراة – نفس الزول الكان بتفاصح بالأمس ..بتلقاه بقى مسكين …وحيلو ميت …وزي العندو ملاريا.
• بدون مناسبة يقول ليك : والله انا شاعر زي الجاتني ملاريا …وهو امس كان زي الحصان.
• نفس الزول الكان ممكن ينسف ليه (13) رغيفة في الفطور ..يوم المباراة ممكن يقول ليك يوم المباراة ما عندي نفس.
• وما قادر اكل حاجة.
• ونفسي مارقة.
• يا زول مالك؟
• الحاصل عليك شنو؟
• يقول ليك لا بأكل الفول لا العدس لا البامية المفروكة ولا الفسيخ يوم المباراة.
• تقول عاوز يلعب هو؟
• مباراة القمة مباراة ما ساهلة.
• مباراة صعبة.
• مباراة ما عادية.
• كل هذا الكلام لا خلاف لنا فيه.
• لكن عشان تكسب هذه المباراة لا بد ان تلعب المباراة على انها مباراة عادية.
• ما تخاف منها.
• ما تشيل همها.
• بشعر في الكثير من الاحيان …مشكلتنا نحن بتكون في احساسنا.
• في شعورنا.
• في خوفنا.
• انسى كل هذه الاشياء ..وتعال للمباراة بثقة.
• مباراة القمة تكسب بالثقة.
• لو ما عندك ثقة في فريقك ..ما بتكسب.
• واللاعبون لو ما عندهم ثقة في انفسهم ما بكسبوا نتيجة المباراة.
• متعوا روحكم.
• العبوا كورتكم.
• النتيجة دي بتتحدد بعد (90) دقيقة.
• ألعبوا لأخر لحظة.
• وخلوا في كل لحظة …مهما كانت النتيجة عندك ثقة في الانتصار.
• يقول الأديب نجيب محفوظ : «الخوف لا يمنع الموت، ولكنه يمنع الحياة».
• اكعب شيء في الكورة (الخوف).
• فريق الاهلي المصري عندي رأي في لعيبتو.
• وعندي رأي في مقدراتهم الفنية.
• انا شايف ان لاعبي الزمالك عبر التاريخ افضل وامهر من لاعبي الاهلي.
• لكن مع ذلك الاهلي هو الذي ينتصر على الزمالك.
• عارفين ليه؟
• عشان ناس الاهلي عندهم ثقة في نفسهم.
• وفريق الاهلي مهما كان مستواه بدخل مباراة الزمالك عشان يكسب.
• نحن عاوزين نكسب.
• ونحن عندنا المهارات.
• وعندنا القدرات.
• وعندنا الاسم الاكبر.
• والشعبية الاضخم.
• لذلك الاحساس بالانتصار يجب ان يكون طبيعي.
• لازم ننتصر.
• نغلب.
• نفوز.
• الكورة مرات فيها (حظ).
• ومرات فيها (توفيق).
• ومرات فيها (تحكيم).
• كل هذه الاشياء لو كانت في ارادة قوية وعزيمة اكيدة وعطاء مستمر ممكن ان تتغلب عليهم.
• العبوا كورتكم.
• متعوا نفسكم.
• نحن ما عندنا مشكلة.
• عندنا الشجاعة والقدرة التى تجعلنا نقول للفائز مبروك.
• وللفريق الذي خسر هاردلك.
• ايوا ح نسخر شوية.
• نضحك.
• نفرح.
• لكن الامور بترجع عادية.
• قدموا لينا صورة مشرفة للكورة السودانية.
• العبوا لينا كورة.
• تعالوا نتفق من هسع ..الفريق الفائز نقول ليه مبروك.
• اصلو ما عندنا مشكلة.
• بنقبل بالنتيجة.
• وبنرحب بيها.
• وان شاء الله ..النتيجة تكون في صالحنا.
• معظم المريخاب الذين التقيت بهم …عشمهم في الانتصار يتمثل في قولهم ..ان الفريق الجاهز دائما ما يخسر في مباراة القمة.
• عندهم اعتقاد ان مباراة القمة ..لا تكسب في الملعب.
• او خلينا اقول لا تكسب عن طريق التنظيم والمهارات.
• عشان كدا بتلقى في مريخاب كُتار بيراهنوا على انتصار فريقهم ..باعتبار ان الفريق الاضعف هو الذي يكسب في مباراة القمة.
• القاعدة دي ما صحيحة.
• دا اعتقاد خاطئ.
• نحن مرات بنصنع لينا اعتقادات برانا وبنصدقها.
• الفريق الجاهز هو الذي يجب ان يكسب.
• الفريق الذي يلعب يجب ان ينتصر ..حتى لو كان ذلك الفريق هو المريخ.
• ما عاوزين انتصار (صدفة).
• ولا انتصار يأتي عن طريق الفوضى او التحكيم.
• عاوزين كورة.
• وبعدين من يلعب يجب ان يكسب.
• العلم دا في أي حاجة سمح.
• حتى في الكورة.
• الكورة بقت علم.
• الكورة المقنعة …بتخليك تبارك للفائز ..وتقول انو كان بيستحق.
• ما عاوزين نتغالط.
• ونتجادل في الفاضي.
• …………
متاريس
• القمة زرقاء ان شاءالله.
• قولوا يا رب.
• اعتقد ان فريق الهلال اجتهد وعمل من اجل الانتصار.
• وهو يستحق الانتصار.
• مع ذلك يبقى الفيصل في الميدان.
• من يجتهد خلال الـ 90 دقيقة هو الذي يجب ان يكسب.
• ما تشيلوا هم للمباراة.
• حاولوا استمتعوا بيها.
• وما تعاينوا للنتيجة…عاينوا لمن يستحقها.
• …..
• ترس اخير : بكرة القاهرة زرقاء ان شاءالله