كلارك مالو؟ .. خشمي وعندي!!

صابنها
محمد عبد الماجد
كلارك مالو؟ .. خشمي وعندي!!

قبل (48) ساعة من مباراة القمة بين الهلال والمريخ اشتعلت النيران في (الوصيف).
قاعدين ليهم في معسكر مقفول في القاهرة منذ اكثر من (70) يوما …اول ما وصل الهلال للقاهرة النار اشتعلت في الوصيف.
انا مالي؟
خشمي وعندي!!
ما عاوز اقول أي حاجة.
بتروحوا مننا وين؟
انتوا فاكرين القاهرة بتحلكم مننا.
الاهلي ما بمرقكم.
شوفوا السفير المصري يشوف ليكم (حلل).
يمكن يلقى ليكم مخرج.
الاخبار القادمة من القاهرة ذكرت ان ابراهومة يلوح بالاستقالة بسبب رفض المدرب كلارك اخذ استشارته في الجهاز الفني.
ابراهومة مدرب (مفتح) عرف ليك الموضوع ما ماشي لي قدام.
وفي الاخبار ايضا : (إنفجرت الأوضاع في نادي المريخ قبيل للقاء الهلال في قمة مباريات الجولة الثالثة من رابطة الأبطال مرحلة المجموعات، على ملعب المريخ البديل بالقاهرة، وبحسب المصادر فإن المدرب العام للفريق الأحمر غاب عن التدريب ، مشترطاً عودته بعقد جلسة مواجهة بينه والمدير الفني الإنجليزي “لي كلارك”، وكانت انباء رجحت في وقت سابق تضجر “إبراهومة” من العمل نسبة لظروف معينة).
عشان تعرفوا الهلال دا ما منو مفر.
لو مرقتوا الى القاهرة …الهلال وراكم وراكم.
ويا ريت لو الموضوع وقف عند ابراهومة …موضوع الاستقالات دا مدور في القاهرة زي (الاسكريم).
عليك الله علاقة الاستقالات بالاسكريم شنو؟
انا مالي.
خشمي وعندي.
ما تسألوني كتير.
(دفع الكابتن أمير كاريكا، باستقالته من منصبه في دائرة الكرة بنادي المريخ. وأفادت مصادر لـ”باج نيوز”، أنّ الخطوة تجئ على خلفية اختيار أمير كاريكا مدربًا عامًا للمنتخب الأولمبي. ومن المقرّر أنّ يعود كاريكا إلى الخرطوم، بعيد مباراة القمّة الهلال والمريخ في الجولة الثالثة من دور المجموعات لأبطال إفريقيا، الجمعة).
نوع دا يقولوا عليه شنو؟
استقالات مدورة في معسكر المريخ زي (الكورونا).
انا متأكد لو كرشوم لقى ليه طريقة بقدم استقالتو ويرجع.
مالو ومال التلتلة دي.
الموضوع دا صعب.
كرشوم في انتظارو الغربال..احسن ليه يستقيل.
احسن ليه يتخارج من بدري.
الغربال الايامات دي ما بتفاهم.
خاصة بعد ان تم ايقافه في المباراة السابقة.
ناس ابراهومة وكاريكا خبرات كبيرة ..اصلو ما بيستقيلوا ولا بهددوا بالاستقالة من فراغ.
لو ما لقوا الحكاية بايظة ما بيستقيلوا.
انا مالي.
خشمي وعندي.
قلت بس اقول ليكم الكلام دا من هسع.
الاخبار دي كلها كنت ما بشتغل بيها …كنت بقول دا شغل (هلالاب) حاقدين ساكت.
رغم اني عارف انو ما في هلالابي حاقد.
الهلالابي يحقد على شنو؟
الشيء الفي الهلال ما في حتة تانية.
انتوا ما شفتوا الغربال قال انا سعيد باني جزء من اسرة الهلال.
انت كابتن الفريق يا الغربال.
انت حاجة كبيرة في الهلال.
والكابتن عندو قيمتو.
الموضوع بتاع الاستقالات والمشاكل التى ظهرت في معسكر الهلال بتاع المريخ …ما كنت سوف اعلق عليها …دي حاجات خاصة ..نحن بنلعب بعيد عنها.
لولا ان الموضوع طلع …وريحتو فاحت ..ما كنت اتكلمت عنو.
د. مزمل ابوالقاسم ذاتو كتب عن هذا الموضوع.
يعني الموضوع كبر اوى.
والأخ الصديق معاوية الجاك بصراحته المعهودة كتب حلقتين عن كلارك.
حقيقية وقت انا لقيت معاوية الجاك معلق عن هذا الموضوع عرفت ليكم رمضان دخل العضم.
اقصد الاستقالات.
معاوية الجاك ما بكتب في الحاجة إلّا اذا كانت كبيرة.
ود الجاك زولي …انا بعرفو كويس.
انا خشمي وعندي.
شوفوا معاوية الجاك كتب شنو :
(ما صاحب مباراة المريخ وصن داونز على مستوى شكل الفريق وتغيير التشكيل وعدم دخول الجمهور للمباراة من بدايتها يجب ان يجد الوقفة والاهتمام والبحث والتناول من كل المريخاب خاصة على مستوى مجلس الادارة لأنه كشف عن خلل كبير جداً يعاني منه المريخ على المستويين الاداري والفني).
ويا ريت الموضوع لو وقف هنا.
معاوية قال : (على مستوى المباراة مطلوب الوقوف على ما صاحبها من تغيير التشكيل في آخر لحظة فالمعلومة التي لا يعلمها كثير من المريخاب أن المدير الفني للفريق الانجليزي لي كلارك اعلن تشكيلته قبل المباراة بيوم وعرضها على رئيس مجلس الادارة في حضور الطاقم الفني داخل فندق راديسون بالقاهرة).
الموضوع لغاية هنا ما بتسكت عليه.
مدير فني يعرض تشكيلة الفريق لرئيس مجلس الادارة قبل يوم من المباراة .. بيبقى البعمل فيه المدير الفني دا (كارثة) بمعنى الكلمة.
حازم مصطفى شن خبرو ؟ بالكورة عشان يعرضوا ليه تشكيلة الفريق.
والله دي مدرب وطني ما بعملها.
حقيقة انا كنت بعتقد ان كلارك دا مدرب شاطر ..وكنت عامل ليه حساب..لكن بعد كلام معاوية الجاك وخلاف ابراهومة معه ، سقط في نظرى هذا المدرب.
انا بعرف معاوية وابراهومة كويس.
تشكيلة المريخ امام صن دوانز حسب كلام معاوية الجاك (كانت تتكون من منجد النيل في المرمى وثلاثي دفاع (بخيت خميس ومصطفى كرشوم وحمزة داؤود) وفي الوسط الرباعي (بيبو على الشمال وتوماس على اليمين بجانب محمد الرشيد وعمار طيفور في عمق الوسط) وفي الهجوم الثلاثي (توني اودجو على الشمال والجزولي في قلب الهجوم ورمضان عجب في اليمين).
ومعاوية يقول : (قبل المباراة بساعتين علمنا بابعاد حمزة داؤود والدفع بالصيني مكانه وابعاد الكاميروني توماس والدفع بضياء الدين في عمق الوسط مع وضع طيفور على الناحية اليمنى).
خشمي وعندي.
انا مالي ومالهم.
بي طريقتهم.
ما تدخل نفسك في المواضيع دي.
المفاجأة ان هذه التغييرات احدثها مدرب الاحمال والكلام لمعاوية الجاك (بعد تقصٍ وملاحقة علمنا أن (مدرب اللياقة) المصري اسلام جمال هو من تدخل وعدَل التشكيل بمزاجه).
انا مالي.
يا معاوية الشغل دا ما بيستركم قدام الهلال.
انا عارف المعسكرات وقت تفوت التلاتين يوم بتحصل فيها مثل هذه المشاكل.
اسلام جمال سيطر على المريخ ومعاوية يكتب : (الخطورة في الذي حدث من تدخل مدرب اللياقة في تعديل التشكيل وابعاد توماس بحجة عدم جاهزيته البدنية يكشف أن المدرب الانجليزي ضعيف الشخصية بل لا يملك شخصية من الاساس وأن مدرب اللياقة البدنية اسلام جمال هو من يتحكم فيه وفرض عليه تشكيلته وهو ليس المختص فنياً. كارثة كبرى أن يكون المدرب الانجليزي كلارك بهذا الوصف القبيح ويقبل بتسييره (يمين شمال) بواسطة مدرب اللياقة وهو لا يملك أي كلمة في مواجهته. ما اعلمه تماماً أن ابراهومة لديه رؤية مخالفة تماماً في الطريقة التي لعب بها كلارك بجانب رؤيته المخالفة للتشكيل الذي تم وهذه الحقيقة للتأريخ حتى نبرئ ساحة ابراهومة من أي تهمة).
اها دا موضوع بتسكت عليه؟
خشمي وعندي.
غالبا الاوضاع تنفجر بعد مباراة القمة.
النار ولعت.
كلارك باقى ليه 48 ساعة في المريخ ويغادر.
خلاص الزول دا ايامو تمت في المريخ.
الموضوع يا ريت لو وقف هنا …ود الجاك قال : (الان المريخ تحت سيطرة اسلام جمال مدرب اللياقة البدنية بينما يتواجد لي كلارك صورة فقط وهو مدرب الفريق شكلياً ولكن فعلياً المدرب هو اسلام جمال).
يا معاوية يمكن اسلام جمال دا جزء من اتفاقية الاهلي المصري مع المريخ.
يمكن الاهلي مشترط كدا.
غايتو انا اول مرة اشوف لي انجليزي ما عندو شخصية.
(مطلوب من المجلس محاسبة هذا المدرب الجبان والرعديد واخطاره بضرورة اتاحة الفرصة لمعاونه في التشاور لانه المختص مع ضرورة الزامه بوضع حد لتدخلات مدرب اللياقة والزامه بالتركيز على عمله فقط).
الكلام الفوق دا كلام معاوية ما كلامي انا.
انا خشمي وعندي.
ما تقولوني كلام ما قلتوا.
انا مالي.
الغريب ان كلارك مع انه (جبان) حسب كلام معاوية الجاك كمان (رعديد).
لا دي كتيرة.
موضوع زي دا الغربال ما بسكت عليه.
كمان جابت ليها (رعدده).
نحن كرامتنا ما بتسمح للوصيف بهذا الوضع.
كلو ولا حكاية (رعديد) دي.
انت يا معاوية (رعديد) دي جبتها من وين؟
دي جديدة في الوسط الرياضي …بنحفظ ليك حقوق الطبع.
الموضوع ما بيستاهل كلام كبير كدا يا معاوية.
رعديد دي اخر مرة سمعت بيها في مسلسل ( الطريق الى سمرقند).
رعديد دي دحين ما كتيرة على كلارك يا معاوية؟
………
متاريس
بعثة نادي المريخ برئاسة هيثم كابو كانت في استقبال الهلال في المطار.
لفتة جميلة من المريخ ومن كابو.
شوفوا …نحن ممكن نصل في التنافس ابعد حتة …لكن في النهاية ما في هلال بدون مريخ ..وما في مريخ بدون هلال.
عليكم الله هسع نحن زي الاستقالات دي كنا نلقاها وين؟
ان شاءالله الجماعة ما يطلعوا ويقولوا الاستقالة اشاعة؟
خشمي وعندي.
…..
ترس اخير : مباراة القمة قربت …عندنا قريبنا مريخابي لمن مباراة القمة تقرب … بخت الشافع في الشاحن ..والتلفون في الحضّانة