الوصيف لاعب ببطنو!!

العمود الحر
عبدالعزيز المازري
الوصيف لاعب ببطنو!!
*والناس ما تزعل من الوصيف!!من حقو! غايتو البلاقي اتفاقية فندق السلام كايرو زي دي وما يوافق عليها ببقي وهمان ساي
*حازم سيد الرصة والمنصة عمل زيارة للأهلي وقعد في جلسة واحدة قدم مطالبو لبيبو
*أولاد بمبا ديل ناس (مفتحين) ضرب الشغلانية كده كويس ومصاريف الذهاب للسودان لمقابلة المريخ وقال كده أفضل خلينا نعمل اتفاق مع حازم واساسا حازم مننا وفينا
*جاء نص الاتفاقية وخطاب الأهلي للاتحاد والمريخ على ان يتكفل الأهلي بالمنصرفات كاملة من ملعب وتمارين وشركة افريقية للبث واستضافة للفرق على ان يتكفل المريخ فقط بدفع مصاريف الحكام!
*الوصيف اصلو ما خسران (وبكائيات) الجكومي ماليها داعي ! يعني كتابة جواب للسوباط لا تغني ولا تسمن من جوع طالما الرئيس قرر كده وكتب خطاب قبل خطاب الجكومي
*اتفاقية فندق السلام كايرو في مجملها بالنسبة للمريخ من النواحي المالية (مغطية) وزيادة زي الزول الشغال ببطنوا يعني ما بتكلف أي حاجة وما في احلي من كده
*بصراحة انا مع حازم قرار موفق واساسا الفريق في القاهرة ومع الفلس دا يعني يجي السودان ويرجع تاني القاهرة !! دا كلام انصرافي ساي
*اتفاقية السلام نسخة من اتفاقية سلام جوبا واهو جبريل شغال ببطنو ومن دقنو وافتلو!
*ما علينا نرجع بالفوائد للوصيف تتمثل في النواحي المادية والراحة للفريق كون انه متواجد حاليا بقاهرة المعز اما النواحي الخافية فهي خاصة بمقابلة الأهلي والمريخ اين تجري !
*المريخ حسب التصريحات انه سيلاعب الأهلي بجنوب افريقيا وكمان صنداونزسيتكفل بالمصاريف!! الوصيف بقي زي توتي عندما يذهب لمقابلة أي فريق علي الفريق الاخر ان يتكفل بالمصاريف
*إذا صدق المريخاب ان مباراة الأهلي ستقام بجنوب افريقيا هذا يعني ببساطة انو المريخ شغال ببطنو وزيادة فمن غير المقبول ان يوافق الأهلي علي ذلك وماهي مصلحته
*الخوف كل الخوف ان يكون للاتفاقية نصوص اخري (تحت الطربيزة) ما بين حازم وبيبو وربنا يكضب الشينة
*المجموعة الاولي التي تضم سيد البلد وزعيمها الهلال والأهلي وصنداونز والمريخ يتصدرها صنداونز بعد ان كسب نقاط مباراته امام الهلال بمساعدة الحكم الذي لم يحتسب هدف صحيح للهلال وهذا حال افريقيا التي نعاني منها حتي الان
*مشكلة الاتحاد الافريقي هو محاربته لتقنية (الفارVAR( والتي يجب ان تكون حاضرة في دوري المجموعات فقد بدأ الظلم مع الهلال ولن يتوقف
*الهلال امام الأهلي القاهري في نفس المجموعة يوم الجمعة القادم بعد ان قدم أداء متميز بعد فترة توقف نال احترام الجميع وعلي الجميع الان التكاتف لتجاوز مباراة الفريق امام الأهلي لأنها ببساطة مفتاح استمرارية الهلال في البطولة
*اخر كلمة حرة …محاصصات وسلام
كلمات حرة
*لا تقسوا ياهلالاب علي لاعبي الهلال والجهاز الفني! قدموا مباراة مقبولة لفريق لم يؤدي مباريات تنافسية لأكثر من ثلاثة أشهر
*تحاول بعض الأقلام المريخية الحمراء المتعصبة التقليل من محترفي الهلال مع ان القيمة الفنية لهم كبيرة وسيظهروا مع مقبل الأيام! فلا تنجرفوا خلف الأقلام المدمرة
*شكل الهلال مع موتا اختلف كثيرا حيث أصبح فريق يفرض شخصيته ويهاجم الفرق في ديارها ويجبرها علي التراجع ويتفوق عليها في الاحصائيات
*من الصعب جدا الحكم علي موتا قبل انتهاء المجموعات وانطلاق التنافس في الممتاز وما يلاحظ عليه هو ان يحسن اختيار العناصر مع إيجاد حلول لمشاكل الفريق مع العقم الهجومي ومشكلة لاعب الارتكاز والطرف الأيمن
*سوار الكعب عفوا سوار الذهب الثرثار كما يقول دكتور احمد البشير وما ظهر في الميديا من هجوم مستحق عليه قليل من رفع الضغط الذي سببه لمن شاهد مباراة الفريق امام صنداونز
*اهل الوصيف قالوا عندهم فريقين!! معناها الهلال عندو ثلاثة فرق !! رؤوفا وصحبه الذين يقبعون في كنبة الاحتياط ديل براهم ثلاثة فرق
*كلمة حرة قبل الأخيرة. هوي يا هلالاب ادعموا الهلال! هزيمة خارج الديار ليست نهاية المطاف
*اخر كلمة حرة…الهلال يفتقد الغربال في اهم نزال
حكاية
الصبر مفتاح الفرج ما كلام (ساي) اصبروا!!