الهلال يلعب في مدينة (الراحة) وعاصمة (البلاتين) في العالم
صابنها
محمد عبد الماجد
الهلال يلعب في مدينة (الراحة) وعاصمة (البلاتين) في العالم
من كيب تاون الى روستنبرج.
جاءت كدا براها.
اجواء كيب تاون قريبة من اجواء روستنبيرج.
او هكذا يخيّل لي.
المهم مدينة روستنبيرج فيها امطار والهلال يخوض معسكره في كيب تاون في اجواء ماطرة.
شفتوا كيف؟
دي (صدفة) دي؟
تتخيلوا فريق صن دوانز بكل هذا الاسم والإمكانيات ملعبه غير جاهز لاستقبال مباراته امام الهلال كما ان مدنية (بريتوريا) بأكملها لا يوجد فيها ملعب معتمد من قبل الكاف – وإلّا ما اجبر فريق صن دوانز على ان يلعب مباراته مع الهلال في مدينة روستنبرج.
الجابركم شنو على التلتلة دي؟
الجابركم شنو على البرد دا؟
نحن ساكت شايلين حال المريخ.
الموضوع عادي.
ناس صن دوانز ديل برضو عندهم (سوداكال).
برضو صدفة؟
يحصل ذلك على مستوى صن دوانز وفي جنوب افريقيا وفي مدينة بريتوريا. المدينة الكبيرة جدا في جنوب افريقيا.
اذا كان هذا يحدث في دولة في امكانيات جنوب افريقيا وعندها قدرات وبنيات تحتية عظمية نحن نقول شنو؟
نحن نعمل شنو؟
اخير نسكت.
وما نقول حاجة.
تاني ما بنلوم لينا زول.
نقل المباراة الى ملعب رويال بافوكنج في مدينة روستنبرج لا شك من انه امر سوف يكون مرهق لفريق صن دوانز – على الاقل فان الفريق الجنوب افريقي لن يلعب في معقله ووسط جمهوره وهذا امر يمكن ان يكون في صالح الهلال.
الامور ظابطة مع الهلال.
أي حاجة ماشة تمام.
دي بشائر خير ان شاءالله.
كمان جابت ليها عاصمة للبلاتين.
كمان جابت ليها مدينة للراحة.
وتقولوا صدفة!!
السيرة التعريفية للمدينة التى سوف يلعب فيها الهلال امام صن دوانز بتقول :
(تعتبر روستنبرج الواقعة في قلب سافانا بوشفيلد مدينة هادئة تقع في المقاطعة الشمالية الغربية عند سفح جبال ماجالسبيرج الأخاذة والتي يصل ارتفاع أعلى نقطة فيها إلى 1,852 متر فوق سطح البحر وكانت منطقة تكتيكية لكثير من المعارك للسيطرة على الأراضي في أوائل القرن الثامن عشر).
المدينة تعتبر منطقة تكتيكية للكثير من المعارك الحربية في القرن الـ 18.
ومدينة هادئة كاتب.
لو رجعت ليكم من هناك شاعر – ما ستغربوا.
حاجة عادية.
عشان كدا موتا شغال اجتماعات ومحاضرات وفيديوهات من اجل شرح وتحديد (التكتيك) الذي سوف يلعب به امام صن دوانز.
الهلال سوف يلعب في ارض التكتيكات ذاتها.
طبعا انا اصلا ما بقتنع بالصدفة.
ما في حاجة اسمها صدفة.
الحاجات مرتبة كدا.
ونحن حسب فهمنا بنقول جاءت كدا.
لا الحكاية مقصودة.
الحكاية اصلا ما صدفة.
(تُعد مدينة روستنبرج غنية بالثروات المعدنية حيث تفتخر بامتلاكها لأكبر مناجم البلاتين في العالم وتعتبر بذلك عاصمة البلاتين في العالم وبالتالي توفر هذه المناجم معظم فرص العمل بالمنطقة. وتعتبر المنطقة موطناً لأغنى قبائل البلاد وهو شعب بافوكينج).
كمان جابت ليها بلاتين.
الموضوع مرتب.
صدفة؟؟؟
ناس الهلال ان شاءالله ما ح يخذلوكم في عاصمة البلاتين.
قولوا واحد روستنبرج عاصمة البلاتين في العالم.
جغرافياً تقع مدينة روستنبرج عند سفح سلسلة جبال Magalies في المقاطعة الشمالية الغربية بجنوب إفريقيا.
روستنبرج “مدينة الراحة” أو “مكان الراحة”.
كمان جابت ليها راحة.
Rustenburg هو اسم هولندي يعني “بلدة (في الأصل قلعة) من الراحة”. الراحة جاءت من هنا.
قلت ليكم ما في حاجة ساكت.
كلها مرتبة.
اصلو ما في شيء صدفة ساكت.
تقع مدينة روستنبرج على بعد 112 كم شمال غرب ، وتسعين دقيقة بالسيارة من كل من جوهانسبرج وبريتوريا.
عليكم الله دي صدفة؟
اقول شيء.
الهلال سوف يغادر عبر الطيران الى جوهانسبرج ان شاءالله يوم الاربعاء القادم في رحلة تستغرق ساعتين من كيب تاون.
ومن جوهانسبرج سوف يستغل الهلال البص الى مدينة روستنبرج في نفس اليوم ليصل اليها ان شاءالله في مساء الاربعاء.
الصدفة ان الهلال سوف يحتاج من جوهانسبرج الى 90 دقيقة حتى يصل الى روستنبيرج وهي نفس المدة التى يحتاجها فريق صن دوانز ليصل الى نفس المدينة من بريتوريا.
شوفوا الحكاية دي جاءت كيف؟
معقولة كل هذه الحاجات (صدفة).
معقولة بس.
الهلال سوف يصل للمدينة التى سوف يلعب على ملعبها مباراته يوم الجمعة في يوم الاربعاء .. صن دوانز يمكن ان يصل الى نفس المدينة يوم الخميس.
وربما يوم الجمعة.
يعني الارهاق والتعب سوف يشعر به صن دوانز اكثر من الهلال الذي يعسكر في مدينة كيب تاون منذ الجمعة قبل الماضية.
خاصة ان صن دوانز مرتبط ببعض المباريات المحلية – وقد خاض الفريق امس مباراة تنافسية في جنوب افريقيا.
نخش على المدينة حسابيا – روستنبرج هي البلدية الأسرع نموًا في جنوب إفريقيا ، حيث ارتفع عدد سكانها من 387،096 في عام 2001 وإلى 449،776 في عام 2007. وهي البلدية الأكثر اكتظاظًا بالسكان في المقاطعة الشمالية الغربية.
يعتبر نادي بلاتينيوم ستارز ، والذي تملكه شركة عقارات رويال بافوكينج ، الفريق الوحيد المحترف من روستبرج.
يعني ناس بلاتينيوم يمكن يشجعوا الهلال.
ما قلت ليكم الحاجات ظابطة مع الهلال.
اصلو ما صدفة.
كفي ان الهلال سوف يلعب في مدينة (الراحة) في راحة اكتر من كدا.
في عاصمة (البلاتين) تاني عاوزين اكتر من كدا شنو؟
طبعا ناس المريخ وناس الاهلي بجتهدوا عشان ينقلوا مباريات الهلال خارج السودان.
ناس المريخ قالوا ح يلعبوا مبارياتهم في مرحلة المجموعات في القاهرة.
الهلال انتصر على المريخ في الدوحة.
الهلال انتصر على المريخ في ابوظبي.
الهلال سوف ينتصر ان شاءلله على المريخ بالقاهرة.
تفتكروا كل هذه الاشياء صدفة.
ابدا والله.
الحاجات دي مرتبة كدا.
عاوزين لينا مباراة قمة في القاهرة.
قاهرة المعز.
الهلال في القاهرة انتصر على الاهلي يعني ما ح ينتصر على المريخ.
قمة القاهرة سوف تكون تاريخية.
قمة القاهرة سوف تكون قمة رسمية وعلى المستوى التاريخي ومستوى المجموعات كمان.
عشان كدا لازم الهلال يحقق الانتصار على المريخ في القاهرة.
الانتصار على المريخ في القاهرة سوف يكون انتصار تاريخي.
اهم لينا من الانتصار على المريخ في الجوهرة الزرقاء.
نلعب في مدينة الراحة.
في عاصمة البلاتين.
نلعب امام صن دوانز.
وسوف نلعب مع الاهلي والمريخ في القاهرة.
فلكيا الهلال سوف يتأهل من المجموعات.
اصلو ما في حاجة بتخلينا نتأخر.
ابقوا جاهزين.
وامرقوا لي برة.
……
متاريس
شينة من ناس المريخ يقولوا البلد غير آمنة.
اذا ناس المريخ بقولوا كدا – ناس الاهلي يقولوا شنو؟
اركزوا ساي.
وانستروا.
وابقوا قدر المسؤولية.
المريخ اصلا ما كان ح يعمل شيء امام الاهلي في ام درمان.
والمريخ ما ح يعمل شيء امام صن دوانز في ام درمان.
والمريخ ما يعمل شيء امام الهلال في القاهرة.
يعني نحن ما خسرانين شيء.
ولا عندنا مشكلة.
القال ليكم خسرانين شيء كضب عليكم.
والله الوقت راح.
بكتب في وقت متأخر.
كفاية كدا.
…..
ترس اخير : تاني ما عاوز اسمع زول يقول لي صدفة.