القون لا عرفناه جابو الغربال لا عرفناه جابو المضمار

صابنها
محمد عبد الماجد
القون لا عرفناه جابو الغربال لا عرفناه جابو المضمار

في مباراة الهلال الودية امس امام الارسنال حقق الهلال الفوز بصعوبة على ضيفه الاهلي شندي بثلاثة اهداف مقابل هدفين.
اثناء سير المباراة التى تابعناها من ملعب الهلال دخلت (الدفارات) لاستاد الهلال وهي محملة بالبنش والمضمار قادمة من مطار الخرطوم بعد وصولها من تركيا…جهحهت تركيزنا ..وشتت تفكيرنا.
شوف عيني (الكراتين) بتضحك لي هنا من الفرحة.
هناك حوالي (6) دفارات دخلت لملعب الهلال محملة بالطرود والكراتين.
عندما كان العمال بنزلوا في (المضمار) من الدفارات احتفلت الجماهير التى تابعت اللقاء بهذا الحدث بعد ان كانوا يترقبوا ذلك وقد كان الجمهور سعيد بالحالة التى وصل اليها ملعب الهلال ليسجل في هذه الاثناء اللاعب محمد عبدالرحمن الغربال الهدف الثاني للهلال بطريقة (حلزوينة) جميلة.
نحن في المدرجات ما عرفنا الهدف الجابو منو؟
الغربال ام المضمار؟
بالمناسبة هدف الغربال كان هدف مضماري مضماري.
المضمار لو استمر بهذه الصورة بطلع هداف البطولة.
يونس الطيب حارس مرمى الاهلي شندي سألوه من الهدف بعد المباراة قال ليهم انا اقفل الغربال ام اقفل المضمار؟
غايتو الزول وقت يكون عندو (مضمار) عاجبو ..بتعب معاه ناس المريخ.
ناس المريخ قالوا ح يلعبوا في استاد الهلال…اهلا بيكم ..الجوهرة ترحب بكم.
لكن لو ما عندكم (لوتري) ما بتدخلوا استاد الهلال.
نحن شروطنا كدا.
زمان المريخ كان فيه حارس مرمى معروف اسمه شنان.
وكان في مدافع صنديد اسمه شناق.
وفي مدافع قوى اخر اسمه شروط.
ديل وقت يتلموا الثلاثة في مباراة واحدة الحكم بتحصل ليه ازمة في (الكروت الحمراء).
مرة شناق شنق شنان – ناس الهلال كان عندهم حاجات فنانة كدا – اليوم التاني لقينا ناس المريخ شايلين القون وماشيين على محكمة الاستئناف.
قلنا ليهم الموضوع ما بيستاهل.
والي الدين محمد عبدالله رحمة الله عليه كان قبل ما يسجل الهدف بعمل للمدافع تحليل للدم …وبعمل موجات صوتية لحارس المرمى ..ولاعب الارتكاز بخضع للرنين المغنطيسي.
والي الدين كان صعب.
ولا بتفاهم في الحاجات دي.
المهم عشان ما اطول ليكم الكلام …مباراة الهلال امس كان الشيء الممتع فيها (الملعب).
نحن بنتفرج في الاستاد (الخلعة) للاضنين.
انا ما عارف ناس المريخ وقت يلعبوا في استاد الهلال يعملوا شنو؟
احسن اول حاجة تسجلوا زيارة قبل ما تلعبوا فيه.
عشان ما تتغلبوا (خلعة) ساكت.
استاد الهلال ..استاد السرور.
اضاءة من اسبانيا.
مضمار من تركيا.
وباك يمين من برشلونة.
المضمار والباك (كرت كرتونة).
موش بقولوا الباك صديق اللاين.
لازم نعمل نقلة في المضمار وقت باكاتنا بقت من برشلونة.
باك برشلونة طبعا لغاية الآن ما طلع من علبو.
في الانتظار.
ما شفنا حاجة لغاية الآن.
غايتو التسخينة تسخينة برشلونة. لكن الكورة لسه فى فروقات.
الطبق لسه ما ظبط.
انتوا لو بتصبروا ما بتجيكم عوجة.
عيبكم يا جماهير الهلال انتوا بتضيقوا.
الزول دا لسه بنزّل في (البرمجة).
بيظبط في (الطبق).
لكن الجمهور لو صبر ..نحن ذاتو ما بنصبر.
طبعنا كعب.
غايتو شفنا لينا لمحة لمحتين كدا من برشلونة.
ما اكتر من كدا.
لكن اصبروا.
الزول دا بيظهر مع (المضمار).
بيظهر قدام؟
الزول دا بيشتغل مع (الاضاءة).
الترتوار دا ما بجيب ليكم موجة (برشلونة).
وقت البنش يركب.
والكشافات (الاسبانية) تولع ..الفرق بيظهر.
الزول دا بيجي مع الاضاءة.
انتوا قايلين نحن جايبين الاضاءة من (اسابنيا) ليه؟
عشان الشغل دا.
عشان (الولف).
نحن ما عندنا حاجة ساكت.
أي حاجة مرتبة.
ومنظمة.
اصلو ما في شيء ساي.
نرجع الى المباراة ونقول ان الاهلي شندي قدم تجربة مفيدة للهلال – طبعا الجماعة من يقولوا ليك المباراة كانت تجربة مفيدة للفريق اعرف طوالي ان الفريق لم يقدم العرض المنتظر في المباراة.
نكشف ليكم اللعب.
عموما المباراة كانت تجربة مفيدة للهلال – نتمنى ان يكون فريق الهلال قد استفاد منها.
قبل ان نشرح اداء الهلال لا بد من الاشادة بفريق الاهلي شندي وهو يمتلك عناصر شابة سوف يكون عندها شأن كبير في هذا الموسم وسوف تظهر بصورة افضل في الموسم القادم.
الاهلي شندي قاده فنيا المدرب الخبير عبده الطويل ابن مدينة شندي وشكلت عودة عبدالمهيمن اضافة كبيرة للفريق في ظل الدعم الذي قدمه الارباب صلاح ادريس في الفترة الاخيرة.
فريق الهلال يبدو ان الراحة السلبية وعدم دخول اللاعبون في معسكر مقفول قبل السفر الى جنوب افريقيا اثر في اداء الهلال كثيرا.
الهلال في القاهرة وصل لمستوى رفيع وقدم مباريات كبيرة – ليتراجع مستوى الفريق والأداء بصورة كبيرة بعد العودة من الراحة السلبية.
مستوى الهلال امام الخرطوم الوطني لم يكن جيد ..الهلال خسر التجربة 0 ـ 1 وامام الاهلي شندي مع ارتفاع الاداء بعض الشيء لكن برضو المستوى لم يكن بالصورة المنتظرة.
لسه.
يبدو ان الجهاز الفني للهلال ارتكب خطأ كبير عندما منح اللاعبين راحة سلبية امتدت لأكثر من (10) ايام.
واضح ان عناصر الهلال التى عادت من الكاميرون هى الاكثر جاهزية من خلال مباراة الامس وقد وضح ان هناك تفاوت كبير بين المستوى البدني للعناصر التى كانت تشارك مع المنتخب في نهائيات الامم الافريقية والعناصر التى كانت مع الهلال.
نتمنى ان يعيد معسكر الهلال في جنوب افريقيا قبل مباراة الفريق امام صن دوانز مستوى الهلال الذي كان قد وصل اليه في القاهرة.
الهلال سوف يلعب في جنوب افريقيا ان شاءالله ثلاث تجارب ودية ..نتوقع ان تجعل الهلال يصل الى مباراة صن دوانز بحالة جيدة.
بالمناسبة الهلال اصبح يلعب خارج ملعبه بصورة ممتازة.
لهذا نتوقع ان يقدم الهلال مباراة كبيرة امام صن دوانز في جنوب افريقيا وان يحقق نتيجة ايجابية.
الرهان على ذلك قائم.
فقط ننتظر ان يعيد معسكر جنوب افريقيا الهلال الى المستوى الذي وصل اليه الفريق في معسكر القاهرة وقبل الراحة السلبية.
امام الاهلي شندي كانت هناك ثغرات واضحة في دفاع الهلال – كان يمكن للاهلي ان يسجل في الهلال هدفين اخرين.
هناك فرص مضمونة للأهلي ضاعت على لاعبيه في الشوط الاول. ويمكن ان نقول ان فرص الاهلي كانت اضمن من فرص الهلال.
مع ذلك لا نستطيع ان نجهل اللمسات الفنية وشغل المدرب في الهلال.
هناك عمل كبير من الجهاز الفني – لكن يبدو عدم التجانس والتفاهم بين لاعبي الهلال مازال غائبا.
هناك عناصر جديدة انضمت للهلال بعد التسجيلات السابقة والأخيرة. كذلك مجموعة الهلال في المنتخب في حاجة الى ان تلعب مع الذين تم اضافتهم لكشوفات الهلال في الفترة الاخيرة.
الجماعة ديل اول مرة يلعبوا.
لا في دوري ولا في مباريات رسمية شغالة.
لهذا ندعو جماهير الهلال ان تصبر ولن يطول انتظارها ان شاءالله.
الغربال عاد بالصورة التى نريد.
عبدالرؤوف قدم مباراة كبيرة.
جمعة قلق مكسب كبير.
صلاح عادل مازلت احذره من التدخلات العنيفة التى يمكن ان تعرضه للإصابات. وقد تعرض للإصابة في مباراة الامس.
كذلك على ياسر مزمل ان يكون حذرا حتى لا يعرض نفسه للإصابة.
دفاع الهلال فيه مشاكل.
………………
متاريس
الحاجات دي كلها بتجي مع البياض.
بجيبها معسكر جنوب افريقيا ان شاءالله.
الهلال سوف يحقق نتيجة ايجابية في جنوب افريقيا.
اسألوني من الكلام دا.
الاستاد اسبوعين تاني ح يبقى حاجة تانية.
لسه في كلام تاني.
نخليه لي بكرة ان شاءالله.
….
• ترس اخير : الكاتلوني عندو كلام في رأسو.