بداية الحفلة (تمريرة) من جيرالد فيري

صابنها
محمد عبد الماجد
بداية الحفلة (تمريرة) من جيرالد فيري

• دائما مرات بقول امسك نفسي وما انداح في الكتابة – ما عاوز (اعشّم) الناس ساكت والكورة ما بتعرف (العشم).
• في ناس في الدنيا دي مهمتهم كلها بس يقولوا ليك انتوا ما قلتوا… وانتوا عشمتوا الناس.
• كمان عاوزين تحرمونا من العشم.
• ينتظروا (المحترف) يفشل عشان يقولوا ليك انتوا كتبتوا عنو ..وانتوا نفختوا فيه.
• لكن تاني (امشي واجيه راجع ) ..بلقى نفسي ماشي في نفس الدرب الذي قلت لن امشي فيه – على الاقل ونحن بنكتب عن معسكر اعدادي الامور فيه بتكون ما واضحة.
• يا زول اكتب – والعاوز يحصل اليحصل – هي الدنيا دي فيها شنو غير (الكتابة) ؟- ما في اجمل من الكتابة والاستماع لمحمد وردي وعثمان حسين وصلاح بن البادية.
• نمسك روحنا من القهوة والشاي والموية – لكن ما بنقدر نمسك روحنا من (الكتابة).
• ادخل ليكم في تفاصيل صغيرة عن المعسكر واقيف في بعض الاشياء.
• تتفقوا – تختلفوا دي ما القضية.
• المهم نقول كلمتني ونمشي.
• نحن ما قاعدين ليكم.
• حقيقة معسكر الهلال فيه (شغل) – الاجواء لطيفة – وما في أي مشكلة – والناس كلها على قلب رجل واحد.
• الجهاز الفني يعمل بصورة علمية – فوق مما تتخيلون – ما عاوز اقول ليكم ان الهلال كان محظوظ يوم ان رحل ريكاردو وخلفه المدرب موتا.
• الزول دا واضح انو ما ساهل.
• انا من انصار ريكاردو وشايف ان البرتغالي ريكاردو مدرب كبير واسم عالمي وقدم الكثير للهلال.
• لكن كمان وقت شفت خلفه (موتا) – تراجعت في كلامي – واقتنعت مليون في المية بان الهلال محظوظ.
• حتى عبداللطيف بويا قائد الهلال والذي حاورته امس بعد المباراة قال ان موتا شغال معهم شغل كبير (الحوار ينشر بكرة ان شاءالله ) – بويا قال ان هناك اهتمام بالجانب التنظيمي للفريق هجوما ودفاعا.
• المهم يا جماعة عشان ما اقعد انظر ليكم ساكت في الحتة دي بصمة موتا ظهرت في الهلال – البرتغالي مدرب (ميداني) – بيشتغل بالورقة والقلم وبنفذ الشيء الفي الكتاب… الحاجات دي نحن شفناها في التمرين وتطبقت قدامنا في المباريات.
• موتا ما بخلي حاجة تفوت.
• اهم من دا كله ان موتا متفائل وأعلن بأنه قادر يعمل حاجة في البطولة الافريقية.
• زول ما بخاف ..وعاوز يلعب امام الاندية الكبيرة وما بهتم بالخسائر حسب كلامه في المباريات الودية – في نفس الوقت قال لن اقبل بالخسارة في المباريات الرسمية.
• اطلع من حتة المدرب واتكلم ليكم عن المحترفين – اقول ليكم من الآن الثلاثة ما فيهم كلمة.
• حتى المتابعين لمباراة الامس امام البنك الاهلي أي واحد طالع من المباراة وهو مبسوط من محترف معين.
• البقول جيرالد.
• والبقول ديفيد.
• والبقول ابراهيم مصطفى.
• وما في زول قال كلمة كعبة في محترف – حسب رصدي لكل ردود الافعال في الحضور الذي شاهد المباراة في ملعب الشرطة في العباسية.
• المباراة لعبت في جو امني عالي – تفتيش ومتابعات وأسئلة وعساكر – مما اعطي المباراة طابعا رسميا.
• في مباراة الهلال امام البنك المصري تحققت اشياء – لم تتحقق بهذا الشكل من قبل.
• في حاجة غريبة حصلت.
• تتخيلوا المحترف التنزاني ديفيد ريتشارد نال في هذه المباراة اشادة الجميع حصل على الثناء من ثلاثة شخصيات مختلفة.
• سألت الرشيد بدوي عبيد الذي شاهد المباراة من المقصورة فقال ان المحترف الذي يلعب في الصائد اليمين ديفيد ريتشارد لاعب خطير – الى جانب اشادة الرشيد بالمحترفين الاخرين.
• نزلت من المقصورة لقيت المهاجم محمد هلال وهو هداف الفريق ووصيف هداف الدوري المصري وكان مرشح للانتقال للزمالك لولا ان الزمالك كان محروم من القيد… سألت هلال قال لي اللاعب دا جبتوه من فين؟
• وهو يقصد ديفيد.
• مشيت على خالد جلال فكانت اشادته بالمحترف ديفيد ريتشارد الى جانب الطرف اليمين.
• طبعا موفق صديق قدم مباراة العمر – وكان نجم المباراة ثقة ومهارات وقوة وتقدم وارتداد.
• تتخيلوا موفق صديق لعب امام اخطر الاطراف في البنك الاهلي مع ذلك اجبر خالد جلال على تبديل المحترف موسي والمهاجم محمد هلال.
• موفق صديق (الضوء) بتاع الكشافة ما بمر منو.
• لاعب اخر اتفاجأ به في كل يوم وهو المعلم الجديد في الهلال حسن متوكل والذي منحه المدرب الثقة لدرجة انه اصبح يلعب في كل الخانات التى يجد فيها المدرب مشكلة.
• لعب حسن متوكل في الوسط وقدم مباراة كبيرة وعندما ارهق عمر المصري واستبدل لعب حسن متوكل طرف شمال – واجاد فيها بصورة مدهشة.
• اما اللاعب الذي استمتع بمشاهدته وبشوف في كورتو احلامنا هو المحترف الملاوي جيرالد ديفيد.
• الزول دا زي ما بقول عصام السنوسي (حكاية).
• حايم في كل الملعب مع اجادته للتمريرات وتحويل اللعب – بنزل وبتلقاه عندما ترتد الهجمة على الهلال في خط 18.
• الهلال كسب لاعب (مبدع) بلعب السهل الممتنع – ما عندو كورة أي كلام – تقول جراح.
• التمريرة بعمل فيها (بنج)..بتمشي وتطلع منو بكل يسر وسهولة.
• الزول دا ما لقيت ليه غير ان نطلق عليه لقب (الجراح).
• جيرالد دا (جراح) عديل كدا.
• الفانلة رقم (10) رجعت تنور من تاني في وسط الهلال.
• لاعب حقيقة يستحق ان يلبس رقم (10).
• امشي ليكم على قدام شوية – واقول ليكم محمد عبدالرحمن وياسر مزمل ووليد الشعلة ح يرتاحوا راحة مبالغ فيها.
• الهلال كسب ليه (دبابة) ممكن نحرر بيها الاراضي المحتلة.
• النيجيري ابراهيم مصطفى مهاجم زي البنشوفهم في الدوريات الاوربية والافريقية الكبيرة.
• ضغط وحركة ونشاط …ومهارات.
• يعني أي حاجة في المهاجم الممتاز موجودة في ابراهيم مصطفى.
• والله انا شايل هم للمدافعين بتاعين الدوري السوداني.
• غايتو كرشوم إلا يغير اسمو.
• وصلاح نمر تاني مفروض اصلو ما يجيب سيرة النمر.
• الزول دا مفترس.
• الزول دا قطر عديل كدا.
• اقول ليكم حاجة مدافعين الاهلي المصري والترجي كلموهم يشوفوا ليهم بلد.
• افتكر كدا الرسالة وصلت.
• في مباراة الامس عاد وليد الشعلة زي الشعلة – قدم وليد الشعلة ايضا اجمل مبارياته مع الهلال وكاد ان يسجل من كرة مرت جوار القائم.
• موفق صديق بعد الكلام الفوق داك كلو – بقول ليكم بما هو (متفق عليه) كان نجم المباراة الاول.
• خالد جلال قال الجهة اليمين في الهلال عملت له مشاكل ..واشاد بكل من لعبوا فيها.
• عيد مقدم ايضا كان ممتاز.
• ارجع بيكم وراء شوية.
• ابوجا طلع ليه ثلاث اهدف مضمونة – طلعت كيف لغاية كتابة هذا العمود والله انا ماعارف.
• المفاجأة كديابا دخل في الشوط الثاني وطلّع ليه كورة اصعب من الكورات التى اخرجها ابوجا.
• لمن انا ذاتي استغربت وقعدت اقول بيني وبين نفسي دا شنو البحصل دا.
• معقولة بس.
• الهلال معاه ابوجا وكديابا بهذا المستوى والمنتخب معاه ابوعشرين واسحاق ادم.
• الهلال مفروض يعمل ليه شركة تأمين حراسة.
• عندو اربعة حراس يلعبوا في الدوريات الاوربية.
• ارجع تاني واقول نزار حامد كان ممتاز وكذلك اوتارا رغم انه اعاد كرة قصيرة للحارس عملت مشكلة.
• كذلك كان الطيب عبدالرازق جيد ..اخطأ في بعض الكرات لكنه افسد هجمات خطيرة جدا على الهلال.
• فريق البنك المصري قدم تجربة مفيدة للهلال – ومن هسع اقول ليكم اذا لعب المريخ امام هذا الفريق سوف يخسر كثيرا – احسن ليكم يا ناس المريخ تبتعدوا من هذا الفريق.
• دا انتوا شغل ما بتقدروا عليه ..شعر ما عندكم ليه رقبة.
• ………
متاريس
• سعدنا برؤية الهلالابي المصري ابن السودان (عراف الجماهير) صاحب الصفحة الشهيرة على الفيس بوك والعاشق الولهان للهلال الذي قطع مسافة طويلة من اجل مشاهدة مباراة الهلال وتصويرها وهو موشح بعلم الهلال الأزرق.
• بالمناسبة نحن بنتكلم عن البرد في القاهرة لكن الاجواء جميلة.
• بنتكلم مجازا ساكت.
• ….
• ترس اخير : نخلي لينا حاجة لي بكرة.