الصبه المايله !!

لهيب النار
=======
الصبه المايله !!
___________
كتب : هاشم الطيب
______________
& أدهشني حديث البروفسور كمال حامد شداد عالم الفلسفة بتوجيه نقاداِ شديداً لإتحاد التغيير الذي هزم النهضة قيادة وقاعدة !! & صرح البروف في مؤتمر من مؤتمرات نائبه زمان حسن برقو بأن إتحاد د. معتصم سيدمر الكوره !!
& ضحكت حتى بانت نواجزي علي عبارة يدمر هذه فعلا صدق المثل القائل (الإختشوا ماتوا) !! & أول مره نشوف ونسمع صوت زول دمر كل حاجه ومسح بيها الأرض يا بروف انت فضلت فيها شنو عشان يدمروه !!؟
& فريق السودان في تسعه مباريات هُزم في سبعة وتعادل في إثنتين ودخلت مرماه أكثر من ١٦ ولم يفتح الله على رماته إلا بهدفين !!
& يا أستاذ محمد كل ما عرضته عاليه هو الموروث من عهد البروف الذي لا يعرف أن يعيش خارج الفوكس ومن أجل ذلك يحارب كل من يقف ضد طموحاته التي عاشت ٦٥ عاما والنتيجة أصفار وكمان على الشمال !!
& و.. قال شنو ح يدمروا كرة القدم في البلاد !!
& هو يا بروف فضلت فيها حاجه يدمروها في زمن لعبك في ابوعنجه نزل التانيه وحتي اليوم ما قال أحي بالعافيه !!
& يا أستاذ محمد روق المنقه أن ماشي عليك إنتظرني جوار الصبه !!
& مش قلت المؤتمر الوطني عاد عبر إتحاد د. معتصم طيب زمان كنتوا وين لما شباب المؤتمر الوطني رجعوا البروف وسلموه الاتحاد ليه ما قلتوا حاجه !؟
& عزيزي استاذ محمد عبد الماجد ما ندفن راسنا في الرمله ونقول خلاص المؤتمر الوطني مات أبداً والله المؤتمر عايش في كل حاجه الجامعات الكوره وحتي الولايات والمحليات واللجان الشعبيه صناعة صافيه مؤتمر وطني المؤتمر مش هم القاعدين في كوبر بس حايمين معانا بياكلوا ويشربوا معانا وفينا ما تتعبوا نفسكم تصبوا في صباتكم ساكت !!
& طيب تحدثتم عن التحديت وهاجمتوا تعيين شيخ المدربين برهان مديراً فنياً للفريق الأول وأمثالكم متأصله فيكم زولن ما عنده كبير يشتري ليه كبير والشدر الكُبار فيه السمغ “ص”
& بس عيب لي برهان مش ياهو نفس برهان تيه ومعاه ولده محسن فوزوا المريخ بكأس سيكافا؟؟
& باقي كلامي بكمله ليكم باكر بس عندي كلمتين حارقاتني لازم أقولهم ..
الكلمتين شنو؟
__________
بس طه فكي شيخ طه هو الذي سيلحق الكوره أمات طه لأنه حسب كلامكم ماعنده خبره أظنكم ما سمعتوا بأن فكي هو رئيس السوكرتا شوكة حوت القرش في حلق هلال مريخ خبره أكتر من كدا العاوزنها شنو ؟ قوموا لصلاتكم يرحمكم الله……