المريخ بدون رئيس وبدون مدرب وبدون تمارين وبدون ملعب وبهاجم في شداد

صابنها
محمد عبد الماجد
المريخ بدون رئيس وبدون مدرب وبدون تمارين وبدون ملعب وبهاجم في شداد

· المريخاب على مدى اكثر من اربع سنوات ظلوا يطعنوا ويحاربوا في رئيس نادي المريخ آدم سودكال.
· ذهبوا للمحاكم ووصلوا للفيفا ليؤكدوا عدم شرعيته ..مع ذلك كان سوداكال رئيسا للمريخ حتى وهو في السجن.
· من السجن ادار سوداكال المريخ بمن تنكر له الآن علي اسد والكندو.
· ادم سوداكال بقى رئيسا للمريخ حتى بعد ان انتهت فترة رئاسته في المريخ.
· مثلما فشل معظم المريخاب في ابعاد سوداكال من رئاسة المريخ وتأكيد عدم شرعيته..سوف يفشل نفس المريخاب في تأكيد شرعية حازم مصطفى كرئيس لنادي المريخ.
· مثلما فشل المريخاب في ابطال شرعية سوداكال سوف يفشلوا كذلك في تأكيد شرعية حازم مصطفى.
· الايام بيننا سوف يثبت لكم ذلك.
· ظل اهل المريخ تتمحور كل انتقاداتهم وهجومهم على الدكتور كمال شداد في (سنه) وفي تقدم عمره.
· هذا كل ما هاجموا به الدكتور كمال شداد – لم يجدوا في مسيرة الرجل في الوسط الرياضي التى قاربت من السبعين عاما سوى ان يهاجموه على كبره.
· قالوا ان الدكتور كمال شداد اصابه (الخرف) – وبلغ بهم السوء ان قالوا عنه (مخرف) – وبرة الشبكة.
· هذا الرجل الذي وصفوه بالخرف – قالوا انه وراء كل ازمة يمر بها المريخ – رجل (مخرف) هل يمتلك كل هذه القدرات لكي يجعل المريخ يعيش في كل هذه الازمات؟
· رجل تجاوز الثمانين – وصفوه بعدم القدرة والإدراك يسألونه هو عندما يخسر المنتخب ..ويحاسبوه هو في عدم امتلاك السودان لملاعب مؤهلة لاستقبال المباريات الدولية.
· رجل فوق الثمانين – اذا فقد المريخ قضية في (كاس) او لم يمتلك مجلسه شرعية ردوا كل ذلك اليه.
· اذا كان الدكتور كمال شداد بهذه القوة والجبروت ، كيف لكم ان تطلقوا عليه اسم (المخرف)؟
· هل المريخ بهذا الضعف والهوان الذي يجعل (مخرف) يفعل فيه كل ذلك؟
· عندما كان الدكتور كمال شداد رئيسا للاتحاد – كانوا يردوا له كل مشكلة تحدث في المريخ.
· لو وقعت صاقعة في سدني يقولوا ليك كمال شداد.
· عندهم وهم اسمو شداد.
· لم يستطعوا ان يتجاوزا هذا الاسم – الذي ظل يشكل لهم بعبعا مخفيا في منامهم وفي صحيانهم.
· هم لم يتحرروا من تلك العقدة والوهم الذي ظلوا يعيشوا فيه.
· الآن الدكتور كمال شداد بعيد عن الاتحاد – مع ذلك عندما يصدر قرار من الفيفا او كاس او لجنة الاخلاقيات في الاتحاد فان المسؤول عن ذلك هو الدكتور كمال شداد.
· في المريخ هناك (فوبيا) اسمها الدكتور كمال شداد.
· كمال شداد هو الذي جعل جمال الوالي يغادر البلاد بعد سقوط النظام البائد.
· يعني النظام البائد اسقطوا الدكتور كمال شداد.
· كمال شداد هو الذي جعل ادم سوداكال رئيسا للمريخ بعد ان فاز بالتزكية بعد عزوف كل المريخاب من الترشح في منصب الرئيس.
· كمال شداد هو الذي حرم حازم مصطفى من الدخول للسودان لأنه متهم في قضايا فساد…وهو الذي جعل الفيفا تلاحقه من اجل ان تبعد امواله من مجتمع الرياضة.
· كمال شداد هو الذي جعل الهلال في الموسم الماضي يفوز ببطولة الدوري الممتاز وهو الذي سجل هدف الغربال في مرمى المريخ وهو نفسه الذي سجل هدف الهلال الثاني في مرمى المريخ وليس ياسر مزمل.
· اقول ليكم شيء – الدكتور هو الشال الكورة وليس منتصر الزاكي زيكو.
· الدكتور كمال شداد هو الذي تعاقد مع محمد مختار بشه ودفع له (18) مليارا ثم شطبه من كشوفات المريخ بعد ذلك.
· ما تكلموا زول.
· ما تقولوا الكلام دا لي زول غريب.
· الدكتور كمال شداد هو الذي تعاقد مع زرقة وكولينا وابقى عليهما خارج كشف المريخ.
· كمال شداد هو الذي باع لاعبي الشباب من اجل ابقاء بشه وزرقة وكولينا برة الكشف.
· مجلس المريخ (حديقة الموردة) فيه الجاكومي وود الجزيرة وتابيتا بطرس وبهاجموا في شداد.
· فريق المريخ فيه طبنجة وبخيت خميس وسيف الدمازين وبهاجموا في (التحكيم).
· الدكتور كمال شداد هو الذي اصاب التش للمرة الثانية بالرباط الصليبي وهو الذي تسبب في اصابة عمار طيفور وكردمان وعماد الصيني وصلاح نمر وسيف الدمازين.
· شداد هو السبب في انتقال ابوعشرين للهلال.
· اقول ليكم شيء – كمال شداد هو الذي سجل محمد موسى الضي في المريخ – لا بد ان تقولوا ذلك بعد اول ظهور لمحمد موسى مع المريخ.
· اصبروا بس.
· المغصة قدام.
· كمال شداد هو الذي اوصل استاد المريخ الى تلك الحالة التى جعلته غير صالح حتى للمشي.
· كمال شداد هو الذي قام بانقلاب 25 نوفمبر وليس البرهان.
· شداد هو الذي قتل اكثر من 40 شهيدا في الاحتجاجات الرافضة لانقلاب 25 نوفمبر.
· وهو الذي رفع الدولار ليصل الى 455 جنيه.
· كمال شداد هو السبب في الفيضان القادم ..وفي ظهور المتحور الجديد للكورونا اوميكرون.
· عليكم الله ما بتخجلوا رجل قارب من التسعين عاما – يفعل كل هذه الاشياء.
· الجاكومي لمن يكون عاوز يظهر وعندما تغيب عنه الاضواء بقوم يهاجم كمال شداد.
· اصلو الحكاية واضحة.
· الجاكومي ما بدفع.
· ولا بقدر يسجل ليكم لاعب او يدفع ليكم تكلفة معسكر او تكلفة وجبة.
· الجاكومي ما عندو ليكم قرش.
· عشان كدا اكتر حاجة يمكن ان يقدمها ليكم الجاكومي هو ان يهاجم الدكتور كمال شداد.
· ما عندو ليكم اكتر من كدا.
· وهو اصلا جابوه عشان الموضوع دا.
· الجاكومي بهاجم في الدكتور كمال شداد منذ ان كان الجاكومي رئيسا لاتحاد الحصاحيصا ..في حاجة نقصت من الدكتور؟
· في حاجة زادت في الجاكومي؟
· ناس الحرية والتغيير ذاتهم بقى عندهم رأي في محمد سيد احمد.
· لذلك احسن يا ناس المريخ تسفيدوا من زمنكم.
· شداد دا منذ ان كان لاعبا في ود نوباوي وهو متعود على الشتائم دي.
· ما بتعمل ليه أي حاجة.
· احسن يا ناس المريخ ما يغشوكم ساكت.
· صلحوا ملعبكم.
· اعملوا معسكركم.
· جيبوا مدربكم.
· استفيدوا من وقتكم.
· الهجوم على الدكتور كمال شداد ما بجيب ليكم بطولة.
· ولا بعمل ليكم انجاز.
· ما أي زول عاوز يظهر بقوم يهاجم الدكتور كمال شداد.
· زول بتقولوا كبير ومخرف وفوق الثمانين ..هل يستحق منكم هذه المعاملة؟
· ابقوا (كبار) شوية.
· الكبر ما عيب.
· ولا بنقص ليه من زول حاجة.
· ……………
متاريس
· اركزوا.
· الولولة ما بتحل ليها مشكلة.
· اكبروا شوية.
· المريخ الذي كان في البتسوى والما بتسوي بجري (كاس)..ليه (كاس) بقت غريبة عليه الآن.
· لجنة الاخلاقيات ليه قراراتها بقت غريبة عليكم الآن.
· شداد سوف يعود من تاني.
· زول رجع من المقابر ..هل يمكن ان تبقى الرجعة غريبة عليه الآن.
· كاس ماشي عليكم.
· اترقبوها بس.
· المنتخب ان شاءالله يعمل حاجة امام المنتخب المصري.
· ما تبقوا بعدين اسيادو.
· مع المنتخب السوداني في قطر طه الفكي ومحمد جلال والفاتح باني ومبارك تكتيك ورئيس الحسابات والسكرتير ..وبهاجموا في الدكتور كمال شداد الموجود في الخرطوم.
· عليكم الله انتوا ما بتخجلوا.
· القال ليكم منو (السوناتا) حقتكم عشان تستردوها.
· انتوا البغشكم منو؟
· من الذي جعلكم تعيشوا في هذا الوهم.
· وهم.
· وهم.
· لكن أي حاجة في ليها علاج.
· اصبروا بس.
· وافتحوا القوس.
· ….
· ترس اخير : غريبة الليلة ما قطعت.