بطيخ العمدة ما احمر وما حلو.. لكن طاعم!!

صابنها
محمد عبد الماجد
بطيخ العمدة ما احمر وما حلو.. لكن طاعم!!

· الاوضاع في المريخ لا تختلف عن الانقلاب الذي حدث في 25 اكتوبر.
· نفس الاوضاع.
· حازم اتقلب على سوداكال.
· سوداكال مشى (كاس).
· كاس رجعت سوداكال.
· الغريب ناس المريخ قالوا ما بعترفوا بـ (كاس).
· وقالوا ما بيشتغلوا بقرار (كاس).
· وكاس دي رجعت معتصم جعفر واسامة عطا المنان للانتخابات.
· وكاس دي اعطت المريخ بطولة حققها الهلال من الملعب.
· خلاص بقت ليكم (كاس) كعبة الآن.
· زمان ما كنتوا بتحتفلوا بقرارات (كاس).
· نحن عارفين (كاس) لابدة ليكم بي رأي.
· ولسه.
· كاس في قرارات جديدة سوف تصدرها في الايام القادمة.
· خلوا صدركم واسع.
· الحمدلله – ربنا يحفظ لينا الهلال.
· الهلال بدأ الاعداد بصورة علمية.
· عندنا (12) لاعب من الهلال في المنتخب سوف نشاهدهم في بطولة العرب وسوف نشاهدهم بعد ذلك في بطولة الامم الافريقية.
· ما شاءالله .. وتبارك الله.
· وبعد ذلك سوف نشاهدهم في مرحلة المجموعات.
· عندنا (4) محترفين ..وصل منهم تلاتة ..والرابع يتوقع ان يكون وصل فجر اليوم.
· يعني ما عندنا زول غائب.
· نجوم التسجيلات انضموا كلهم لتمارين – عدا اسحاق آدم الذي يتواجد مع المنتخب الوطني في الدوحة.
· جمعة قلق ظهر في تمارين الهلال.
· وبنترقب في نزار حامد.
· حسن متوكل موجود.
· مبارك عبدالله شارك من بداية الاعداد.
· مبارك عبدالله لمن تجيب سيرتو لي امير كمال وحمزة داؤود ما بنوموا الليل.
· نحن في انتظار امجد قلق ياسر عطبرة.
· دا قلق براه كمان.
· تاني ما عندنا زول ناقص.
· الجهاز الفني للهلال اكتمل.
· شيء برتغالي وشيء برازيلي.
· جهاز بتكلم لغة واحدة.
· واظن ان لغة الهلال في الموسم الجديد سوف تكون هي لغة الابداع.
· تباشير اكتمال صيانة استاد الهلال وفك حظر ملعب استاد الهلال من قبل الكاف حلت بشائرها.
· الله يكفينا بس من (الكورونا).
· قالوا ليك في كورونا جديدة متحورة ظهرت في جنوب افريقيا- لا بتعرف صغير ولا كبير.
· الاعمار كلها عندها واحد.
. الله يستر من اغلاق المطارات.
· ومن المباريات الصامتة.
· نفسنا الحياة ترجع عادية.
· نشوف الجماهير في المدرجات .. ونتابع مباريات الهلال من الملعب.
· ما في احلى من الجمهور.
· الاوضاع المستقرة في الهلال تقابلها اوضاع صعبة في المريخ.
· لغاية الآن ما معروف كشف المريخ فيه منو؟
· بشه برة الكشف.
· زرقة برة ام جوة؟
· كولينا.
· قالوا ليك المحترف النيجيري المدافع برة الكشف؟
· انتوا طيب سجلتوا منو؟
· انتوا عارفين تسجيل مبارك عبدالله سيل الوادي المنحدر في الهلال لخبط حسابات المريخ.
· الهلال ضم اكثر من عنصر متميز في كشوفات الشباب.
· يعني الهلال ما خسر خانة عندما سجل مبارك عبدالله وامجد قلق في كشوفات الشباب.
· كشف شباب الهلال اصلا موجود فيه الموهبة اباذر ميسي.
· يعني كشف الهلال كدا فيه 33 لاعبا..ويمكن ضم عناصر اخرى من فريق الشباب مثل محمد صلاح ولاعب منتخب ج والمهاجم ابياه.
· مستقبل الهلال في الشباب مبشر.
· ما عندنا أي مشكلة.
· المشكلة في المريخ.
· بشه دفعوا ليه (18) مليار عشان يقعد برة الكشف.
· كولينا.
· زرقة.
· وبعد دا كلو فرحانين بي محمد موسى.
· محمد موسى خريج كنبة الهلال – وهو من دون شك افضل من كل الاساسيين في المريخ.
· احتياطي في الهلال ولا اساسي في المريخ.
· المريخ الآن بدون مجلس ادارة.
· ما معروف من الذي يدير المريخ؟
· المريخ بدون قطاع رياضي.
· المريخ بدون مدرب.
· المريخ بدون محترفين.
· المريخ بدون استاد.
· المريخ بدون فترة اعداد.
· الاوضاع في المريخ لا تختلف كثيرا عن انقلاب 25 اكتوبر.
· أي حاجة ملخبطة.
· خلوا معتصم جعفر يبقى ليكم رئيس نادي.
· ان شاءالله اسامة عطا المنان يبقى ليكم امين خزينة.
· الشيء العجيب قالوا ليك الصراعات في مجلس حديقة الموردة مدورة زي رام الله.
· أي واحد شغال براهو.
· حازم شغال بالريموت كنترول.
· وبدرالدين شغال بالدعم السريع.
· الدعم السريع استلم المريخ.
· قلت ليكم الموضوع فيه (انقلاب) ما صدقتوني.
· حازم سوف يفرتك المريخ….زول لا عندو خبرة ولا عندو قدرات.
· ناس المريخ بعد ادم سوداكال اكتسب الخبرات وبقى خطير في الادارة شالوه.
· لمن كان سوداكال في السجن .. كان بدير في المريخ.. وما في زول كان بقدر يقول ليه حاجة.
· انتوا وين الكندو؟
· وين علي اسد؟
· ديل اختفوا من الصورة نهائي.
· زمان سوداكال كان عامل ليهم حس.
· هسع بقوا لا صوت لا صورة.
· الحمدلله الامور في الهلال ظابطة.
· حتى الشعار الذي فقدناه (12) عاما ..عاد الى صدور وجباه الاهلة.
· ما عندنا أي مشكلة.
· وبعد كل هذا منتظرين (كاس).
· الغريق قدام.
· بلوا رأسكم.
· القرارات القادمة ما بتمرقوا منها.
· ما بتطلعوا.
· لو عندكم اصلاحات احسن تعملوها في دار الرياضة ام درمان.
· ما تتعبوا وتعملوها في استاد المريخ.
· احسن ليكم المضمون.
· في كلام كدا ..ما قادر امسكو.
· كلام عاوز اقولوا ليكم.
· اصلي ما قادر انوم بيه.
· شوفوا الدنيا دي ضيقة كيف؟
· مدير الشرطة الذي اعتقل رئيس الوزراء – لفت الايام ومرت وجاء نفس رئيس الوزراء ليعفي مدير الشرطة.
· وعشان الايام دول حمدوك شال مع مدير الشرطة نائبه.
· انتوا بتعتقلوا ساكت.
· في زول بعتقل رئيس الوزراء.
· اتخيلوا مدير الشرطة يعتقل وزير الداخلية وهو اعلى منه في الرتبة وفي الخبرة وفي الشرطة وفي المنصب.
· وزير الداخلية السوداني سجل موقف للتاريخ..رفض اعتقال زملاء له في مجلس الوزراء ..ودخل هو المعتقل.
· عليكم الله دي بتحصل في حتة؟
· كنا نتمنى ان يقوم مدير الشرطة ونائبه بمثل ما قام به وزير الداخلية الذي رفض اعتقال مسؤولين من غير وجه حق.
· مدير الشرطة جابوه في التلفزيون يتحدث عن مقتل شهيد واحد في مواكب 17 نوفمبر.
· مدير الشرطة (السابق) اعترف بمقتل شهيد واحد – في الوقت الذي كان فيه عدد الشهداء في نفس الموكب قد وصل الى (15) شهيد.
· عشان كدا عجبنا قرار الاطاحة بمدير الشرطة.
· وعجبنا قرار الاطاحة بنائبه.
· لو دامت ليكم ..لما آلت اليكم.
· ما عاوزين يفهموا.
· عاوزين يمشوا في نفس السيرة.
· ذكرتوني زمان ..كان عندنا عمدة زارع ليه بطيخ في ارضو.
· الله يسألني أي زول يأكل بطيخ العمدة دا يقول ليك بطيخ العمدة طاعم.
· وبطيخ العمدة ما احمر.
· وبطيخ العمدة ما حلو.
· لكن ما في زول بقدر يقول حاجة.
· أي زول كان بقول البطيخ طاعم.
· طاعم وين ما عارف؟
· زي بتاعين الانقلاب لمن ظهروا في الفضائيات بتحدثوا عن شرعية الانقلاب.
· كلهم ما قدروا يقولوا حاجة.
· هسع رجعوا تاني ركبوا قطار الثورة.
· الناس ديل مع منو؟
· الناس ديل جنسهم شنو؟
· والله كمان في زول اسمو التوم هجو يمكن ان نقول عليه _(باك) الانقلاب.
· زول كورتو في السما.
· واقل مخالفة عندو كرت احمر.
· الله يحفظ السودان من ناس التوم هجو.
· ….
متاريس
· المعسكر الخارجي امر لا بد منه.
· الهلال في حاجة لمعسكر خارجي.
· الاعداد لن يكتمل بالداخل.
· خاصة ان هناك 12 لاعب من الهلال مع المنتخب بالخارج.
· ….
· ترس اخير : الانقلاب القادم متين؟