درباً سرتو معاك بقلبي منو بلاك ما بتبقى الجية !!

* (الأمان) هو من (أركان الحب المعافى) .

* وبالحسابات البلدية .. (الأمان) هو (حجر أساس) في أى بنيان عاطفى .

* أى علاقة عاطفية ما فيها (أمان) تجدها قابلة للسقوط وفي ذلك هى أشبه بـ(الراكوبة في الخريف) .

* والخوف يهدم الحب مهما كانت قوته .

* قصص الريد في العادة بتكون محفوفة بالخوف .

* في ناس ما بيخافوا لانو اصلاً الريد عندهم حاجة (ثانوية) .

* وحاة الله في ناس الريد عندهم (بريستيج) ساكت .

* وزي ديل لو حبيتهم بتتعب تعب الموت .

* اسوأ حاجة في الدنيا دى تحب ليك واحدة (جاهلة) .

* جاهلة مش يعنى ما متعلمة .

* لا لا في ناس متعلمين لكن مع ذلك (جهلاء) جداً .

* ريد البت الجاهلة ممكن يوديك في أحسن الاحوال (تجانى الماحى) .

* لأنو الجاهل بيتصرف تصرفات (سخيفة) تجعلك (26) ساعة في اليوم عايش على أعصابك .

* بتكون مليان خوف .

* اليوم أود الحديث عن واحدة من اجمل وأقوى الأغنيات السودانية .

* وقوة هذه الأغنية تكمن في كونها خرجت من (قلب حنين) وصدحت بها (حنجرة عتيقة) .

* تخيل كلام طالع من قلب عزمى أحمد خليل ويغنيهو الهادى الجبل .

* يعنى (قلب عزمى) لاقى (حنجرة الهادى الجبل) .

* وهذا لعمري (بزار وترف) .

* عزمى شاعر (كامل الدسم والفرح) .

* كفة (الفرح) عند عزمى توازى كفة (الحزن) ولذلك هو زول عبارة عن (قوس قزح) .

* يطيب لي أن أقف اليوم عند أغنية (ما اتعودت اخاف من قبلك) .

* إستهل عزمى النص قائلاً :

مـا اتـعــودتــا أخاف مــن قـبـلـك إلا معاك حسيت بالخوف

أعـمــل آيـه ما القسمه اختارت وكل الناس حاكماها ظروف

عــارف ويــن خطواتك ماشة وآخري معاك ما معروف

* في هذا الكوبليه يستطيع المتلقى أن (يفهم القصة) لحد ما .

* الريد بيعلم الخوف .

* لو كنت رجل (شجاع القلب) يستطيع الحب ان (يكسر قلبك) .

* في هذا الكوبليه هنالك توكل كبير من عزمى يظهر في قوله : (أعمل آيه ما القسمة اختارت) .

* التسليم والاستسلام للقسمة هو (عقيدة وايمان وتوكل) ..

* يقول عزمى : (عارف وين خطواتك ماشة واخري معاك ما معروف) ، هذه الفتاة الملهمة تعلم الى أين تذهب خطواتها المستقبلية بينما عزمى يؤكد أنه لا يعلم الى أين تسير خطواته ..

* أنا من خلال هذه النص فهمت أن الفتاة التى ألهمت عزمى تغيرت دون أسباب واضحة .

* كانت بينهما (قصة ريد) ولكن الإحساس من جانب هذه الفتاة قد أصابه الخمول ولم تعد كما كانت وهذا ما يظهر في الكوبليه القادم :

يـامــا كـتـيــر فـكــرت اصــارحــك واستـنـيـتك تبدأ السيرة

لا أتكـلــمــتــا ولا لـمــحــتــا ولا بـيـنـتــه الـريـــدة مصيرة

والحـنــيــة الكـنــت بـديــتــهــا هـســه بـقــيت بتشوفها كتيرة

وزي خليتنى أشك فى ريدتى وخفت تكون مشغول بى غيره

أنـا مـن قـبـلـك مـا اتـحـيرت جيت وريتنى دروب للحيرة

*كحال كثير من البنات ، زولة تكون معاك في أمان الله فجأة دون أسباب تتغير .

* اسوأ من هذا في بنات الواحدة لما تتغير ما بتوريك سبب (الجفا) ولا بتكوريك مصير الريدة .

* وعزمى لعله عثر على واحدة من هذا الصنف عشان كده قال (لا أتكلمته ولا لمحته ولا وريتنا الريد مصيره) .

* من خلال النص وضح ان هذه الفتاة كانت (مندمجة) مع عزمى بل هى التى بدأت (الحنية) وهسه بقت تشوفها كتيرة .

* الإهمال الذى وجده عزمى جعله يشك في (الريدة) ، وأى ريدة يدخل عليها (الشك) مباشرة اقنع من خيرا فيها .

* قال : (خليتنى اشك في ريدتى وخفته تكون مشغول بغيرها) .

* على المستوى الشخصى لا أستبعد أن تكون هذه الفتاة قد (إنشغلت بقصة ريدة اخرى) ، ولأن صاحب بالين كضاب فكان لابد أن يحس عزمى بالإهمال .

* ونحنا ناس ما بنحب بفوق الحب .

* يعنى أنت عايش قصة حب المفروض ما تحب فوق حبك القديم .

* المهم .. يواصل عزمى :

والله عـشــانـك يـامــا صـبـرتـا لـمـا الصبر فتر من صبري

ولـمـا نـسـيــت الـدنــيـــا وحاتك من أعمارنا سنينها بتجرى

لا اتـلـومـت مـعـاك لا لـمـتـك وقلته براك بتحـس بى قدرى

وقـلــتــا عـلـيـك بـكـرة بتتغير وألقى فى ريدك فرحـة عمرى

إلا لــقـــيــــتـــك لـســع تـايــه فـى دنـيـــاك ومـتـــوه أمـرى

* في هذا الكوبليه تدفق عزمى من شدة الشجن وشرح حاله ما بين (الصبر الذى فتر من صبره وما بين أنه نسى الدنيا حتى سرقت الأيام عمره) .

* كان يتمنى ان تحس هذه الفتاة بقدره العالى ولكن كل الذى حصل هى (تايه وبالتالى هو ذاتو تاه) .

* ويواصل :

كـم حــاولــتـــا أعــانــد زيـــك واقـســى عـلـيـك بكـلمة شوية

إلا وحــاتــك غـصـــبـــاً عـنــي قـبـــل عـنــادى تجـى الحنية

ودربـــاً سـرتــو مـعــاك بـى قـلــبى منو بلاك ما بتبقي الجية

مــا فــارقـتــه فـى يــوم ذكــراك وأنـا ذكــراي عـندك منسية

أنــا مـجــبـــور أسـتـنــى رضــاك وانت أريتك ترضى علىّ

*قال (غصبا عنى قبل عنادى تجى الحنية) .. منتهى الرقة والشعور الجميل .

* زولة تكون (24) ساعة في اليوم بتتذكر فيها وذكراك انت عندها هى منسية .

* ما بتجيب سيرتك ولا بالغلط .

* الجميل قوله : (انا مجبور استنى رضاك وانت اريتك ترضى علي) .

* مجبور بأمر الحب .

* اغنية فاخرة تستحق الإستماع.

* و..و..

* وإلا معاك حسيت ب………… وجع حلق .