قزاز ورذاذ
محمد الطيب الأمين
أبو عاقلة طبيب نفسو !!
* ما من عمل أضر بالكاردينال خلال سنوات حكمه للهلال أكثر من (ظلمه لأهل البيت).
* كانت للكاردينال موهبة كبيرة في رسم سيناريوهات التخلص من (أولاد الهلال).
* خطير في التأليف.
* كان مثل أسامة أنور عكاشة يقدم لك بكري المدينة فيقنعك بأنه مجرم حرب.
* يحدثك عن محمد عبد الرحمن فتظن أن الغربال لن يستطيع السير على أقدامه بعد الآن .
* الطريقة التي تحدث بها الكاردينال عن إصابة الغربال تحسسك بأن محمد عبد الرحمن يحتاج (لكرسي) حتى يعينه على الحركة.
* قال إصابته مزمنة ولا شفاء منها.
* تخلص الكاردينال من مساوي وكاريكا وعمر بخيت والمعز محجوب وبشة ومحمد عبد الرحمن وبكري المدينة ومهند الطاهر.
* تخلص منهم لأسباب لا تقنع أحد.
* الكاردينال يجلس معك للتفاوض وإذا تعثرت المفاوضات (يردمك) ويحرقك مع الجمهور ثم يشطبك.
* لا حكمة ولا دراية.
* تخلص حتى من عزيز شيبولا.
* ولما قالوا ليهو ليه ما جددت لشيبولا قال : (شيبولا جاني وقال زوجتو عندها مشاكل في الإنجاب والولادة).
* في عهد الكاردينال أصبح اللاعب في الهلال يخاف من بلوغ مرحلة (الكابتنية).
* ولعل هذا قد هز ثقة اللاعبين واضعف محبتهم للهلال.
* ولذلك بالأمس كانت سعادتي كبيرة وأنا أشاهد النجم أبو عاقلة يوقع علي تجديد عقده أمام رئيس بعثة القاهرة نزار عوض مالك.
* سعدت مثل غيري بهذه الخطوة المهمة ليس لأن أبو عاقلة لاعب متمكن فحسب، بل لأن المحافظة على أبناء الفريق عمل أكثر من رائع.
* إعادة الثقة لمن اجزل العطاء أمر مهم.
* التمسك (بعضم الفريق) يعني الإستقرار.
* استخدمت لجنة تطبيع الهلال الحكمة والصبر في ملف أبو عاقلة.
* ما سمعنا زول منهم قال إنو أبو عاقلة ساوم النادي.
* ولا فيهم زول حاول يقلل من القيمة الفنية لأبو عاقلة.
* عرضو عليه مبلغ ورفض وضع مبلغ كبير ومع ذلك تكتم المجلس على التفاصيل وجرب كل السبل في سبيل أن يستمر أبو عاقلة .
* تعاملوا مع الملف بحكمة وصبر وأدب وفي النهاية جدد أبو عاقلة في هدوء.
* لا أعرف من هو مهندس عملية أبو عاقلة ولكن في كل الأحوال استحقت لجنة التطبيع الإشادة.
* أبو عاقلة (وزنها بالعقل) وعِرف أن لا بديل للهلال إلا الهلال.
* تغلبت هلالية أبو عاقلة ووافق على التجديد.
* والجماعة بهناك منتظرين.
* قالوا دايرين يردوا الصاع صاعين.
* صاع منو؟
* صاع أبو عشرين الشهير ب(لون الدم).
* صاع محمد عبد الرحمن الشهير ب(لو رجعت السودان ما بلعب إلا للهلال).
* ناس المريخ من (الشفقة) حتى رقم فانلة أبو عاقلة جهزوا.
* جهزوا رقم أبو عاقلة.
* وهم في الحقيقة نجيلة ما عندهم.
* ما في لاعب بمشي ليهو لفريق ما عندو نجيلة.
* أبو عاقلة لو داير يجيكم عشان نجيلتكم دي ما ح يجي.
* ده غير بلاغات سوداكال المنتظراكم.
* قالوا لحدي الآن سوداكال مجهز ليهو (١٤٤) بلاغ ضد المريخ.
* شي مديونية .
* وشي مستحقات أجانب.
* وشي فواتير فنادق وصالات.
* الزول ده ح ينشف ريقكم.
* زي سوداكال ده عشان ترتاح منو تخليهو يكون قاعد رئيس بس.
* لأنو لو أشتغل معارضة التش ده ما ح تلموا فيهو.
* حازم لو عرف حجم مديونية سوداكال بستقيل الليلة قبل بكرة.
* وتبكوا بس .. عين قطرة وعين مس.
* و.. و..
*والعاقل طبيب نفسو.
إدعاء أول: عرضو عليه مبلغ ورفض وضع مبلغ كبير ومع ذلك تكتم المجلس على التفاصيل وجرب كل السبل في سبيل أن يستمر أبو عاقلة .
إدعاء ثاني: تغلبت هلالية أبو عاقلة ووافق على التجديد.
احترام عقل القارئ واجب كل مشجع أمسكله القدر قلماً وأصبح صحفياً.