صحيفة كورة سودانية الإلكترونية

دبابيس ود الشريف

2٬492

دبابيس
٠٠٠٠٠٠٠٠٠٠٠٠٠
ودالشريف
************

** والله الاخ الاستاذ ادم الضي وزير الشباب والرياضة الاتحادي حيرنا وهو يتأني ويتباطأ في اتخاذ قرار حاسم يضع حدا للازمة الادارية في نادي المريخ.

** اسبوع كامل مره بعد لقائه ببروف كمال شداد ولقائه باعضاء الاتحاد العام وايضا اطلاعه علي ما سطره الاستاذ محمد الشيخ مدني عن الازمة …. اسبوع بحاله والسيد الوزير صامت وعاجز عن اصدار قرار وامام المريخ تحديات كبيرة والتسجيلات مدورة ويلعب يوم السبت المقبل امام زناكو الزامبي في دوري ابطال افريقيا

** صحيح ان مجلس حازم يدير المريخ الان ولكن هذا لا يكفي ولا بد من اصدار قرار رسمي يخول له استلام الاستاد والنادي والمكتب التنفيذي وكل الاصول… قرار يسمح له بممارسة مهامه بحرية والسيد الوزير كان قد وعد السادة اعضاء مجلس ادارة الاتحاد العام بحل المشكلة في بحر هذا الاسبوع والاسبوع في نهايته الان…

** سيدي الوزير جماهير المريخ في انتظارك وامامك فرص تاريخية لتكسب الملايين من هذه الجماهير والمسألة واضحة وما عايزة مطاولات… واذا اردت الانحياز للمعسكر الاخر معسكر سوداكال دون وجه حق برضو خليك واضح… بس اتحمل النتائج … وده ما تهديد ولكن رغبة الاغلبية الساحقة من جماهير المريخ مع تنصيب مجلس حازم المنتخب شرعا وقانونا.

** كمال شداد اكد في تصريحات امس الاول لقناة الجزيرة.. ان حل ازمة المريخ في يد وزير الرياضة الاتحادي

** تكللت مساعي جمال الوالي وعادل ابو جريشة بالنجاح في نقل مباراة المريخ وزناكو الزامبي من السويس الي القاهرة لتسهيل مهمة الجمهور السوداني اذا سمحوا له بالدخول ونشيد بالوالي و كابيلا ونرجو ان يكون في نقل المباراة دافع للاعبي الاحمر لتقديم كل ما عندهم واحراز انتصار كبير يسهل من مهمتهم في المباراة الثانية…. وان شاء الله الاتحاد الافريقي والسلطات المصرية تسمحان بحضور الجمهور

** بدات اجراءات سفر الي القاهرة اوقفتها امس بعد سماعي خبر وفاة الصديق العزيز ابوهريرة فقد كنت انوي زيارته لحظة وصولي الي هناك

** تجميد التسجيلات قرار موفق من مجلس حازم.. وخلونا في المهم وهو تجاوز عقبة الفريق الزامبي… بعدين الضمان.شنو حازم يدفع في التسجيلات ويفاجئه السيد وزير الشباب والرياضة بقرار غير متوقع

** الاخت الاستاذه هنادي الصديق الامين العام للمجلس الاعلي للشباب والرياضة تعلم جيدا ان مجتمع المريخ مجتمع عريض فيهو المتعلم وفيهو الجاهل وفيهو الفاهم والمافاهم لذلك لا اظنها ستتاثر برسائل الاساءات والشتائم وستتعامل مع ازمة المريخ بالقانون اذا كانت تملك حق التدخل

** جماهير المريخ لن تقبل بلجنة تطبيع.. وهذا لعلم السيد الوزير والسيدة هنادي

** لجنة الاخلاقيات تقول رايها اليوم في كل المرشحين للمناصب القيادية وعضوية الاتحاد العام

** لن نندهش اذا اطاحت لجنة الاخلاقيات بالثنائي معتصم جعفر واسامة عطا المنان من السباق الانتخابي فالسوابق دليل وبرهان

** حاولوا وبشتي الطرق تشويه سمعة حسن برقو… نشروا الاخبار الكاذبة.. دبجو المقالات السمجة ووضح ان كل ما نشر وقيل في حق الرجل مجرد ترهات واكاذيب

** لماذا اختار مجلس الهلال القاهرة معسكرا للفريق… والفريق يلعب في نيجيريا ولماذا لم يختار مدينة قريبة من المناخ في نيجيربا مثل اديس ابابا او نيروبي.

** الهلال خرج بالتعادل السلبي مع فريق مصري ما معروف بلعب في ياتو درجة

** الحمد لله ان ابوعاقلة جدد مع الهلال… كان دايرين تبتلونا بيهو

** مباراة ودية او مبارتين للمريخ قبل لقاء زناكو كانت مسألة مهمة جدا ولكن غارزيتو ما فاضي من النقة والكلام الفارغ وما قاله امس الاول عن الشرط الجزائي يدخل في خانة الابتزاز

** دخل علي في مكتبي بصحيفة الوان وتحدث معي طويلا عن ضرورة الزواج والاستقرار ودس في جيبي مبلغا محترما..من المال وقال لي لازم تبدأ.. كان ذلك قبل حوالي ١٧ سنة…. انه الاخ العزيز ابوهريرة حسين الذي رحل عن دنيانا الفانية صباح امس… ابوهريرة اخو الاخوان صاحب المواقف النبيلة… ابوهريرة الانسان…. بكيت بحرقه عندما طالعت الخبر الاليم فالفقيد اضافة الي مواقفه الانسانية… كان نشطا وحيويا واستطاع ان يحقق النجاح كرئيس لاتحاد الناشئين… شيد عشرات الملاعب بالعاصمة… نظم المنافسات… خدم قطاع الناشئين والشباب وقدم ما لم يقدمه اي رجل اخر وعمل كذلك عضوا بدائرة الكرة بنادي المريخ وكان مميزا وتعرض لحرب قذرة علي ايام الانقاذ وشرد ودخل السجن ولحظة ان بدأ في استعادة امجاده هبت ثورة ديسمبر وتعرض للاعتقال والبهدلة وسمحوا له بالسفر الي القاهرة بعد مجابدات وبغد ان ساءت حالته وكان المرض اقوي منه ورحل وترك جرحا غائرا لن يندمل ولا نملك الا وان ندعوه سبحانه وتعالي ان يتغمده بواسع رحمته ويسكنه فسيح جناته مع الصديقين والشهداء

** بلوم الغرب عبد الرحمن عبدالله.. قدم لنا غناء جميلا سيظل محفورا في وجداننا واحببته لان صوته قريب من صوت المعلم محمد وردي وبلوم الغرب زرته في منزله بحي النسيم بالعاصمة السعودية الرياض قبل حوالي ١٨ سنة وكان برفقتي الزميل عبده قابل والزميل مفتي محمد سعيد ولم يكن يستطيع الكلام وتمنينا له الشفاء وودعناه والتقيناه في الخرطوم بعدها سالما معافي ولكن المرض اللعين عاوده ورحل…. له الرحمة والمغفرة

** ناري بعدك والحنان والجنة قربك

** اخر دبوس

** الاخ ادم الضي انحيازك للاغلبية وانحيازك للقانون يدخلك التاريخ من اوسع ابوابه..

قد يعجبك أيضا
8 تعليقات
  1. الشعب يقول يقول

    شوف يا استاذ الضي لو عاوز يحلها كان حلاها وبالمنطق كد اسال نفسك شداد طول عمره بيبعد الدوله عنه وعن الاتحاد وفجاه كده يسلم قضية للوزير وهو عارف حلها او عارف انه هو المشكله فيها .. المنطق بقول لشيء ما بين شداد والوزير والوزيره طبخو الموضوع وبقي كل يوم ياخر فيه باوامر من الداهيه ابو الهول والوزير يا للهول والوزيره البتشتكي من كلام الجمهور
    السؤال ليه الوزير حسب كلامه اقتنع بحل الازمه ثم ارجأأأ الحل ؟؟؟
    والله كرهنا حاجه اسمها كورة بسبب ناس ماهمهم الا المصالح والمجامله وشايفين الغلط ويتابعو فيه مجاملة
    والله لو عندنا حكومه بتعرف وقانون بحاسب كان صدر قرارا باقالة الاتحاد بالكامل والفيفا عاوزه تجمد خليها تجمد علي الاقل نهتم داخليا
    هي وينها كورتنا الجارين بيها بره …..اول محاسبة تعال يا ابو الهول اهمال الملاعب العامه ليه اهمال المنتخب اهمال المناشط الاخري في الرياضه
    وبعد ده جاري ترشح نفسك وتدبر المؤامرات والمكايد هو كرسي الاتحاد ده فيه شنو بخلي الناس جاريه عليه كده الا الفايده الكبيرة جدا جدا
    يا زول اقنع من وزير ووزيره كله بس البيضه والحجر وكله تبع كله
    اللهم احمي السودان من السودانين

  2. خليل عباس يقول

    ي زول نيجيريا علاقتها شنو بي أديس وكيميا كدا قول باسم الله دي أقصي عرب أفريقيا وتلك شرق أفريقيا انت خليك مع سوداكال وحازم وغارزيتو وجموع الدلاقين ريح بالك من اولاد السوباط

  3. صلاح يقول

    ههههه والله يا مرخرخين عليكم قوة عين وعدم حياء بصورة ما عادية، تهددوا الوزيرة ذات نفسها وبعد ده كلو تجوا تقولوا ليها ما تاخدي في خاطرك؟ ما بنستغرب من منسوبي نويدي الفلول هذا النوع من التفلت والجرأة على تهديد وزراء حكومة الثورة، لأنه الحكومة إتساهلت معاكم وما بلت كاهنكم الأعظم أليخماو !!
    دفاعك الليلة عن شداد أبزرد وبرقو بجيب ليك اللوم مع البعام المستعار 😆😆😆
    أنا متأكد مية المية إنه البعام المستعار بكون واحد من الفئة المتفلتة الهددت الوزيرة !!

  4. ابو اسر يقول

    قلت متهكما الهلال لعب مباراه وديه مع فريق مصري مامعروف درجه كم. طيب فريقك المشرد المتسول قاعد في القاهره مالاقي حتي حق التمرين والفريق المامعروف درجه كم ده اللعب ضد الهلال انت ماقادر تلعب امامه من الفلس الشديد. صحيح الاختشو ا ماتو وشبعو موووت

  5. انت فريق الكداسه ده بلعب في درجة كم يكون في الدوري الانجليزي يا مرسي

  6. Hajjam يقول

    اها ياود الشريف. السكة حديد معروفة. الكرداسة دي تطلع شنو؟؟؟؟ شايف حتي ملعب ماعندهم. لقطوهم من الشوارع وجوا لعبوا معاكم في الفندق؟. فعلا الجمل مابشوف عوجة رقبتو.

  7. Hajjam يقول

    اها ياود الشريف. السكة حديد معروفة. الكرداسة دي تطلع شنو؟؟؟؟ شايف حتي ملعب ماعندهم. لقطوهم من الشوارع وجوا لعبوا معاكم في الفندق؟. فعلا الجمل مابشوف عوجة رقبتو. مصيبتكم تفتشوا علي عيوب الهلال وانتو كلكم عيوب.

    1. صلاح يقول

      ديل ماعندهم مانع يلعبوا حتي مع كركاسة يا هجام، لسانهم طويل بس في الفارغة والمقدودة…….
      فريق كركاسة 😆😆😆

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد