امير ابو نجوم الليلة ما بنوم
صابنها
امير ابو نجوم الليلة ما بنوم
محمد عبدالماجد
• طبعا ما عاوز اقول امير (ابوجضوم) الليلة ما بنوم .. كما يردد في الشعار المعروف الذي ظهر ابان الحراك الثوري وذلك احتراما للاعب امير كمال ، وابتعادا عن (الوصف) الحسي الذي يمكن ان يكون فيه تنمرا؟
• وعشان الموضوع يبقى (لائق) تعبيرا وصحفيا استبدلنا كلمة (الجضوم) بـ (النجوم) . بعدين نحن كلنا عندنا جضوم – لكن بنوم من سبعة.
• ما عندنا أي مشكلة.. عشان نساهر.
• عشان الامور تبقى ليكم واضحة.
• افتح الشباك يا ولد.
• انا قلت (الشباك)..وإلّا بتهيأ لي.
• مرات الزول بتخيل ليه الشباك فاتح ..والغرفة اصلا ما فيها شباك.
• امس في عملية اطلق عليها (تشرب ما تروى) اعاد الهلال الى حظيرة الوطن – موش بقولوا كدا في (الغزوات) و(في ساحات الفداء) قبل ما تسقط، اعاد الهلال اللاعب مبارك عبدالله (سيل الوادي المنحدر) ، بعد ان كان الهلال هو من فاوضه اولا، واتفق معه.
• ناس المريخ بختوا روحهم في حتة بائخة.
• انتوا (الشوبير) ليكم شنو؟
• بتشوبروا في كم؟
• والله يا حليل سوداكال.
• في الحتة دي لا بد لنا من الاشادة بإسامة عطا المنان الذي احترم كلمته التى التزم بها مع ناس الهلال.
• اللاعب دخل غرفة تسجيلات المريخ وطلع منها زي (الشعرة من العجين).
• ناس هيثم كابو خشمهم بقى ملح ..ملح.
• لاموا سوداكال في التساهل مع سيف تيري وعدم المحافظة عليه وجاءوا وفعلوا نفس الشيء مع مبارك عبدالله (سيل الوادي المنحدر).
• عليكم الله في زول بمسك في مبارك بفكو تاني؟
• انتوا ما عندكم رأس؟
• مجلسين.
• ورئيسين.
• وجمعيتين.
• وعضويتين.
• ونظاميين اساسيين.
• وبعد دا تفكوا مبارك عبدالله.
• انتوا الكلام دا ما ادوكم ليه في (النظام الاساسي)؟
• ما شفتوه في (اللائحة)؟
• مبارك (سيل الوادي المنحدر) عمل فيكم السبعة وذمتها ..طلع بي امير كمال ونزل بي حمزة داؤود ..وتجوا بعد دا تفرطوا فيه.
• مبارك شال الجلد والرأس عندما واجه حي الوادي فريق المريخ.
• شيل ((الكوز) يا ولد.
• انا قلت الكوز.
• وإلّا قاعد يتخيل لي.
• قالوا ليك حازم بعد ما شاف صور (مبارك سيل الوادي المنحدر) مع الفاضل التوم ومهيار ..عمل اجتماع عبر الفيديو كونغرس مع اعضاء مجلس (حديقة الموردة) …القنصل حازم لام اعضاء مجلسه وعاتب (البودي قارد) الذي كان مكلفا بحراسة اللاعب في غرفة تسجيلات المريخ..وقال ليهم كيف فكيتوا مراقبة (مبارك سيل الوادي المنحدر)؟ كيف تفرطوا في هذا اللاعب وتسيببوه يهرب ويرجع للهلال؟
• ناس امير كمال تاني ما بقعدوا لينا.
• تاني ما بنوموا.
• حمزة داؤود بهاجر.
• وطبنجة بطالب بشطبو.
• الكلام دا قالوا حازم.
• قالوا ليك اعضاء المجلس وحرّاس الغرفة قالوا ليه يا سيادة القنصل هو الزول دا ناس امير كمال وحمزة داؤود ما قدروا يثبتوه ..وما عرفوا يراقبوه …عاوزنا نحن نراقبو ليك.
• الزول دا (طبنجة) ما قدر عليه.
• نحن شن قدرنا عليه؟
• غايتو مبارك عبدالله دا لعب بالمريخ لعب.
• مرة لعب بي ناس امير كمال وحمزة داؤود وضياء الدين وطبنجة.
• ومرة لعب بي ناس حازم والجاكومي ومنير وكابو وود الجزيرة.
• والله يا الجاكومي طلعت أي كلام.
• لو استمريتوا بالطريقة دي الله يستر على الجزولي نوح.
• امسكوا قوى.
• الدوري طار.
• مبارك.
• سيف تيري.
• كراعكم مكوة بس.
• الجاكومي عملها كلها صور ولايفات.
• الجاكومي بقى طمعان في (المنصب).
• عملها مؤتمرات صحفية.
• وحرية وتغيير.
• لكن يا ناس المريخ ما تستغربوا…مثل هذه التصرفات والإخفاقات سوف تشاهدوها كثيرا اذا مسك المريخ حازم ومجلسه.
• ح تشبعوا (لايافات) من هذا النوع.
• ح تبكوا على ايام سوداكال.
• ح تقولوا يا حليل سوداكال.
• انتوا راجيين شنو يعني من مجلس جاءت به (حديقة الموردة)؟
• ما تتوقعوا اكتر من كدا.
• المريخ بقى قاعد في (الصقيعة).
• سيف تيري (طار).
• مبارك عبدالله (طار).
• والدوري (طار).
• ومعتصم جعفر.
• ولسه.
• والحسابة بتحسب.
• راجيكم كتير.
• صبّروا نفسكم؟؟.
• واستحملوا.
• الموضوع دا ما عندكم غير (الصبر) حل للتعامل معاه.
• ابقوا كبار.
• الدنيا اصلها كدا.
• ابقوا واعيين.
• العنوا الشيطان.
• واقعدوا في الواطة.
• البعمل فيه مبارك عبدالله (سيل الوادي المنحدر) في دفاع المريخ نحن للأمانة في بن سبورت ما شفناه.
• بتابع في الدوري الانجليزي دا من زمن بجيبوه (ملخص)..زمن بجيبوه (اهداف) يوم الجمعة ..جنس دا انا اصلو ما شفت.
• امير كمال عندو (ضلعة) مفقودة.
• وحمزة داؤود خرج ولم يعد.
• وبكرى المدنية عمل ليه (صلعة) من النقة الكتيرة والجري.
• وطبنجة جاء ياسر مزمل ولقى البلد بقت شوارع بعد اهداف مبارك سيل الوادي المنحدر في المريخ.
• انتوا يا ناس المريخ مفروض تفرشوا.
• مفروض تعملوا ليكم كشف.
• ح تشوفوا كتير مع القنصل حازم.
• الزول دا 72 ساعة ما قدر يستحمل جمهور المريخ.
• القنصل حازم طلع يشكو في رسالة صوتية.
• سوداكال يشتموا فيه.
• ويهاجموا.
• ما خلوا ليه ناس الفاضلابي ومزمل ابوالقاسم صفحة يتقلب عليها.
• مع ذلك مستحمل ..وثاتب وراكز.
• سوداكال عملوا ضدو وقفات احتجاجية.
• وشرطة.
• ومظاهرات.
• سوداكال من سجن لي سجن.
• وفوق دا سوداكال يدفع في الدولارات.
• اصلو ما قصر.
• تسجيلات.
• معسكرات.
• مرتبات.
• حوافز.
• واصلو ما سمعنا منو كلمة.
• والله يا جماعة ادم سوداكال يستحق الثناء والتقدير في الحتة دي.
• حازم في 72 ساعة طلع يشكو.
• يا زول انت شفت حاجة؟
• التازي اختفى.
• التازي كتر عليه.
• وجمال الوالي طلع برة البلد.
• وسوداكال ..وهو في السجن ما قصر مع المريخ.
• تتخيلوا زول في السجن وبصرف على المريخ.
• والله يا مريخاب الزول دا يستحق تعملوا ليه (مهرجان).
• تقولوا ليه على الاقل شكرا.
• اصلو ما قصر.
• ح تشوفوا فرقتو في الايام القادمة.
• فرقتو ظهرت في هذه التسجيلات.
• ولسه الغريق قدام.
• انتوا لغاية الآن ما شفتوا حاجة.
• اصبروا بس.ي
متاريس
• اكتر حاجة اسعدتني امس ..ليس اعادة مبارك عبدالله (سيل الوادي المنحدر)..وانما اسعدني اني رأيت عبدالصمد منن في تمرين الهلال.
• عودة منن هي اكبر مكسب.
• هذا اللاعب انتظروا منو الكتير.
• بالمناسبة بكرة بكتب ليكم عن ميسي الاخر.
• في ميسي جديد.
• اصبروا بس.
• المتعة حاضرة مع (الميسيات).
• الهلال في أي خط بقى عندو (ميسي).
• الهلال بقى كلو (ميسي).
• بكرة بذكركم بهذا الكلام.
• محمد ابراهيم العليقي …شغال شغل صاح.
• زول ما شاءالله عليه.
• كورة واستاد.
• واسماعيل عثمان مرابط اليوم كلو في الاستاد.
• الاستاد بقى لوحة.
• مية المية.
• بتعرفوا جيم ثري.
• في حاجة جديدة اسمها ميسي ثري.
• بكرة برجع ليكم.
• خلونا الليلة مع مبارك عبدالله.
• واسحاق ادم ..خبطة مزدوجة.
• وجمعة قلق.
• اعادة قيد ابوعاقلة يجب ان تتم مهما كلفت خزينة الهلال.
• وعبدالصمد منن – هو المكسب الاول في التسجيلات.
• منن.
• منن.
• مدد.
• احسن حاجة عملتوها شفنا منن في تمرين الهلال.
• وين شيخو؟
• اوعكم تفرطوا في هذه المواهب.
• المواهب دا مكانها كشف الهلال.
• …..
• ترس اخير : بكرة جيبوا ليكم معاكم (كرتونة) للفرح.
بالمناسبة المهاجم الإنت بتتكلم عنو وفرحان بيه سجل في الدوري كله 3 أهداف منها 2 في المريخ عن أي مهاجم تتحدث
هههه دي حالتو الإتحاد سنة ونص يماطل في حل مشكلة المجلس وسوداكال اهداكم الغربال وابوعشرين وفي الطريق سيف تيري ولسه الفاسخ الأزرق الماسخ يفكر في فسخ عقود لاعبي المريخ وكمان يغري في مرفعين والشايقي…بالله انتو بتعملوا عشان البطولة الإفريقية ولا ضغوط فوبيا المريخ وطبعا مبارك عبدالله ليس باللاعب الذي يندم عليه أهل المريخ فهو لاعب عادي واهدافه في المريخ صدفة والأيام كل مرة تكشف لعب الهلال في عمود ود عبدالماجد وكل ستة شهور تسجلوا وتشطبوا اما القنصل حازم فهو صاحب رؤية ثاقبة وإن شاء الله تشوف المريخ قوي ينافس افريقيا وعربيا ومحليا رغم ضربات الجزاء ال١٧ وتسلل الغربال والفرحة بالتتويج ورقصة تعليم العروس هههههه فعلا رايحة ليكم فرحة المريخ حرمكم منها لأكثر من ٣ سنة… كلام جرائد زي ما بقولوا وحدو باب زريبة العيش وكلها ايام وتظهر الحقيقة بإذن الله.
صحافة بائسة تكتب بطريقة واي غلبناكم…..المهاجم ده احرز تلاته اهداف في الدوري وانت تبيع الوهم للجمهور يعني حيحرز ليكم ابطال افريقيا؟ اكتب ف المفيد….فشل شداد ومنع إقامة المباريات ف ملاعبنا حتي الزريبة التي اطلقتو عليها الجوهرة !!!!
المرخرخين يا ود عبد الماجد دعوات المساكين مسكت فيهم وحا توديهم التوج ذي ما ودت بشة وجماعته، وكونه ربنا يشيل منهم سدوكل المحتال البدفع ويرميهم في جماعة حزومي والجاكومي فده شكله غضب إلهي، والظاهر عليها دي نهاية اللفة……
الجماعة جايين مسخنين وعاوزين يلهطوا، وحزومي من أسي قام يتنتر فيهم، أما الكاهن الأعظم أليخماو فشكله حا يمسك الماسورة، وشوية كدة هو وجماعته بقوموا عليهم وينتفوا ريشهم ويشتموهم، صبرك بس شوية وجهز ثيرموس الجبنة وأقعد إتفرج 😆😆😆
حوالينا ولا علينا يا رب !!
ههههه وانت من زمن الجبنة يا بلوله؟ عادات قديمة انت تقريبا دفعة الديناصور من زمن الجبنة هههه ياخي والله انت تحفة يا بلبل ههههاااي انت حايجي يوم تلاقي روبوت واقف في راسك يخمك انت وجبنتك oh my God! What’s more. خليك في العادات والتقاليد البالية وحقيقة انت اكبر مرخرخ والدليل العطالة والجبنة والعالم ماشي بسرعة البرق وانت لسه العصر الحجري وكمان تتكلم وتفتي في المريخ اححييييا متين اشوف الخرطوم والخرطوم اصبحت حضارات سادت ثم بادت وانجلغوا يا ناس عصر الجليد.