تحت شعار (الخبرة ليها أثر) مبارك شرب قهوتنا !!

قزاز ورذاذ
محمد الطيب الأمين
تحت شعار (الخبرة ليها أثر) مبارك شرب قهوتنا !!

* في عملية أطلقنا عليها إسم (الخبرة ليها أثر) خطف الهلال مهاجم حي الوادي نيالا مبارك من داخل غرفة المريخ.
* مبارك شرب (شاي الصباح) في غرفة المريخ وشرب (قهوة الضهر) في غرفة الهلال.
* الخبرة ليها أثر والله.
* طبعاً (الخبرة ليها أثر) هي أغنية جديدة كتب كلماتها أمجد حمزة وغناها دويتو (عصمت بكري ومروة الدولية).
* الأغنية رغم إنها خفيفة وبسيطة إلا أنها جميلة ومهضومة.
* يقول الكوبليه الأول من الأغنية :
خانوني أنا ناس كتار وأنا قلبي ما إنكسر يا ناس الخبرة ليها أثر.
* صوت عصمت بكري لا خلاف حوله فهو من أجمل الأصوات الشابة.
* الأغنية أظهرت جمال صوت الفنانة مروة الدولية.
* والله الواحد يحس بحزن عميق لما يسمع مروة الدولية بتغني في غناء الشوارع وهي تملك كل هذه الإمكانيات الصوتية الكبيرة.
* أتمنى أن تشكل أغنية (الخبرة ليها أثر) نقلة في حياة مروة الدولية.
* المهم.
* الجميل في تسجيل مبارك أنه سيلعب في خانة السنية.
* ح يساعد اباذر ميسي الذي تعرض لحالة إرهاق كبير وهو يشارك في جميع مباريات الدوري بأمر تعسفي من شداد.
* لما كان سوداكال رئيس للمريخ شلنا أبو عشرين الشهير ب(لون الدم) من داخل كشف المريخ.
* ولما جاء حازم شلنا مبارك من الغرفة.
* الكاش ليهو أثر.
* بنيان فريق الهلال ماشي صاح.
* هنالك تنوع كبير في فريق الهلال.
* تنوع في العناصر وهذا من شأنه أن يخلق فرقة قوية لا تشبع من الإنتصارات والعروض الجميلة.
* لما تشوف وسط الهلال بتعرف إنو في إختلاف في المواهب.
* بوغبا ما بشبه صلاح عادل والشغيل ما زي مجاهد فاروق وأبو عاقلة مختلف عن نزار ونزار ما بشبه روفا.
* وجاي عليهم (الأستاذ منن والدكتور شيخو).
* ماشاء الله تبارك الله وسط الهلال بقى زي (عقد الجلاد).
* طرب جد.
* بالأمس إنضم لتدريبات الهلال الثنائي منن واسكندر ويفترض أن ينضم شيخو كذلك.
* حسب ما علمت أن مدرب الفريق ريكاردو قد طلب مشاهدة اللاعبين المعارين حتى يحكم عليهم.
* يعني لحدي الآن منن وشيخو ما رجعو.
* يتمرنوا مع الفريق ليحكم عليهم المدرب لاحقاً.
* وبرضو حاجة كويسة.
* والخبرة ليها أثر.
* اتمنى ان يسجل الهلال اللاعب الفنان حسن متوكل.
* حسن متوكل نجم اهلي شندي المحترف بالدوري السعودي لاعب يساري متمكن وكورتو طاعمة.
* كذلك أرى أن كابتن بشير أفيد من جمعة قلق.
* كما نتمنى ضم مهاجم فريق فاسل الإثيوبي .
* مهاجم فاسل (نيجيري الجنسية) سيشكل إضافة كبيرة للفرقة.
* سيشارك في المجموعات رغم أنه لعب افريقي مع الإثيوبي.
* حتى الآن نحن مطمئنين على حاضر الهلال ومستقبله إن شاء الله.
* والكاش ليهو أثر.
* بمناسبة الكاش.
* جماعتك لما قلنا ليهم حازم ما أفضل من سوداكال قالوا نحن حاقدين.
* وتعال أناقشك.
* قلنا ليك حازم (كوز) وجوكي كبير.
* قلت لا.
* قلنا ليك الزول ده ممنوع يدخل السودان وح يدير المريخ بالتلفون.
* قلنا ليك الزول ده لو (بطارية تلفونو قفلت أنت ح تتعب).
* قلنا ليك الجاكومي موية صحة ما بقدر يجيبها ليك.
* قلت لا سوداكال يمشي.
* اها جاك حازم في أول تصريح قال ليكم خلوا التنظير.
* قوم على حيلك.
* طلعكم منتظراتية ساكت.
* وبكرة ممكن يطلعكم ما مريخاب ذاتو.
* سوداكال بحركاتو دي ح تندموا عليهو.
* حازم ده يشبكم تسجيل صوتي ومكالمات ايمو ولايف لحدي ما تلقوا التش غادر المريخ.
* وأنت في ونحن في.
* و.. و..
* والخبرة ليها أثر.