العدس والصبر

صابنها
العدس والصبر
محمد عبدالماجد
• في السودان في ثنائية شهيرة.
• الهلال والمريخ.
• الامة والاتحادي.
• الموردة والعباسية.
• النيل الازرق والنيل الابيض.
• الكسرة والملاح.
• الفول والرغيف.
• وردي وعثمان حسين.
• الخميس والجمعة.
• حمد والديبة.
• الموية والكهربة.
• الشطة والبصل.
• الدكوة والطماطم.
• الجلابية والعمة.
• الصحافة والأيام.
• البيت والمدرسة.
• العرس والسفر.
• العمة والخالة.
• الجريف واللوبيا.
• هسع انا عاوز اضيف لهذه الثنائيات (الصبر والعدس).
• ما تقعدوا تطيروا عيونكم من بداية العمود – اصبروا بوريكم أنا ليه قلت كدا؟
• بس احب اقول ليكم هذه الثنائيات الطابع بينها قد يكون تشابه وقد يكون تنافس وقد يكون (اضداد)…ممكن (عداوة) وممكن (صداقة).
• عشان الامور تبقى ليكم واضحة من البداية.
• والأولو شرط اخرو (نور).
• لكن ما نور في اخر النفق زي ما قال رئيس الوزارء عبدالله حمدوك الذي قال في احدى خطاباته هناك ضوء في اخر النفق.
• عارفين في اخر النفق في شنو؟
• في كلب سعران.
• يعني الله واعلم نخاطر ونصل لأخر النفق.
• ما عندنا (صبر) لهذا الحد.
• هسع ناس الهلال عملوا لينا نفس الشيء.
• بالنسبة لي موضوع (الاضاءة) – على ما اعتقد كدا ان هناك ضوء في اخر النفق!!
• ح نقعد ننتظر اخر النفق دا – زي الحلقة الاخيرة في المسلسل.
• زمان وقت الكيزان ..كانوا من (الغتة) حقتكم ..بنتظروا (الحلقة الاخيرة) بفارق الصبر عشان يقطعوا الكهرباء.
• انا تابعت لي مائيات المسلسلات العربية ..لكن اصلو ما بتذكر اني شاهدت (الحلقة الاخيرة).
• ارجع ليكم لعنوان العمود (العدس والصبر).
• ح اقول ليكم أي شيء.
• امري لله.
• قالوا ليك زمان كان في زول اسمو (التريب ود حمد)…التريب ود حمد دا كان عندو (9) اطفال.
• 5 ولاد و4 بنات.
• ما شاءالله.
• (التريب ود حمد) دا كان دخلو على قدرو.
• بيباصر في الحياة من جاي لي جاي.
• مرة يبيع ليه (جركانة).
• ومرة يشيل ليه (سلفية).
• عايش يلتق فيها.
• الوجبة الاساسية في بيت (التريب ود حمد) كانت هي (العدس).
• (اولاد) التريب ود حمد من (العدس) الكتير بقوا متل (الدوهات).
• واحدة من بنات (التريب ود حمد) الاربعة بقت زي (التريس).
• وكل ذلك كان بسبب (العدس).
• ديل الواحد فيهم لو عطس كان بعطس ليك (شوربة عدس).
• الفطور (عدس).
• الغداء (عدس).
• العشاء اذا وجد (عدس).
• موش في حاجة اسمها (تسقط بس).
• اها ديل عايشين (عدس بس).
• الموضوع يا ريت لو وقف على (التلاجة)…ناس (التريب ود حمد) ديل لو فتحت الدولاب تلقى ليك (عدس).
• كديستهم ما بتشرب لبن ..بتشرب عدس.
• ديل مرة عندهم (بنت) تعبت ..مشوا فحصوا ليها الدم لقوا عندها (تعدّس) حاد في الدم.
• الناس ديل عشان تبقوا عارفين شاي الصباح بيحلوه بالعدس.
• العدس عندهم هو (المصير) المشترك.
• اطفال (التريب ود حمد) التسعة كان وقت يجيبوا ليهم الغداء ..بعاينوا لي ابوهم وبقولوا ليه : عدس يا ابوي.
• ابوهم بعاين ليهم كدا وبقول ليهم (الصبر)….الصبر يا اولاد.
• 18 سنة شغالين بالطريقة دي.
• العدس والصبر.
• لمن يغيروا بيعملوا الصبر والعدس.
• العدس استمر معاهم 18 سنة.
• الصبر اشتغل 18 سنة.
• عارفين هسع الاطفال ديل بقوا شنو؟
• ما شاءالله عليهم.
• واحد منهم بقى دكتور عظام في لندن..والتاني اكبر اختصاصي اعصاب في الولايات المتحدة الامريكية.
• الثالث عمل ليه شركة مقاولات في كندا ..بعد ان تخرج مهندس بدرجة الامتياز.
• الرابع دخل البيت الابيض وأصبح مستشار قانوني هناك.
• الخامس محاضر جامعي في بريطانيا.
• البنات ..البقت مهندسة والبقت طبيبة والبقت في الخارجية والبقت دكتورة في الاقتصاد.
• الاربعة اتزوجن …تلاتة برة البلد وواحدة في السودان.
• التريب ود حمد بقى اقل اجازة ليه بقضياها في ماليزيا.
• راحة جد.
• العربات.
• البيوت.
• المشاريع الزراعية.
• التريب ود حمد بقى زول تاني.
• وهسع مشرح يدخل مجلس السيادة.
• مجلس السيادة بالعدس.
• عارفين النجاح دا اتحقق كيف؟
• اتحقق بت (الصبر).
• 18 سنة اشغال شاقة في (العدس والصبر).
• والنهايات كانت على هذا الشكل.
• الزول البيصبر حقو ما بروح ساكت.
• علّموا اولادكم.
• ما تقصروا معاهم ..بترتاحوا قدام.
• وقبل ما يتعلموهم (العلم) علّموهم (الادب) و (الاخلاق).
• التربية قبل التعليم.
• ازرعوا فيه قيم (الدين) – الموضوع ما يبقى شعارات ساكت زي زمان.
• جسّدوا ليهم القدوة الحسنة.
• نحن 30 سنة ..اتراجعت عندنا حاجات كتيرة.
• قيم ومثل ومبادئ.
• الاخلاقيات ..والمروة والشهامة.
• الفساد انتشر ..الناس بقت تكذب وتخدع ..وتربي في عيالها بالحرام.
• عشان كدا فقدنا كتير.
• المشكلة ما كانت في (الثروات) التى نهبت.
• ولا في الاموال التى سرقت.
• المشكلة كانت في (الاخلاق) التى حدث فيها اعتلال كبير في السنوات الماضية.
• عاوزين نبني من جديد.
• نبني انفسنا ..قبل ما نبني وطنا.
• الشعب هو الثروة الحقيقية.
• عاوزين نرجع لأصلنا.
• عشان نصل.
• محتاجين نغير حاجات كتيرة.
• سلوكيات.
• ونظرات.
• حتى علاقتنا الاجتماعية فيها جزء كبير مبني على النفاق والمجاملات الفارغة.
• عاوزين نقدم جيل جديد يختلف عننا.
• جيل مسؤول وامين وملتزم.
• عاوزين نطلّع (اطفال) للمستقبل يملأوا الدنيا ضياء.
• في حاجات كتيرة ممكن نغيرها بسلوكياتنا.
• الانضباط.
• الالتزام.
• المسؤولية.
• حتى قطوعات الكهرباء ممكن نغيرها بالسلوكيات الحميدة.
• عشان ما تقولوا عاوز انظر ليكم… ح اقول ليكم حكاية ما عندها أي علاقة بالموضوع دا.
• ما تقعدوا تشرعوا ساكت.
• زمان نحن وقت كنا بنلعب كورة (والكلام د ابرة المقرر) – جابوا لينا مدرب فرنسي.
• انا ما عارف.
• جابوا لينا مدرب لا اقول ليكم من عطبرة لا اقول ليكم من المحمية.
• المهم قالوا لينا المدرب دا مدرب اجنبي.
• ونحن صدقنا.
• اها وقت تكون عندنا مباراة …كان (المترجم) بعد كل هجمة نتعرض ليها بكورك لينا ..بنمشي ليه في (الخط)… بقول لينا المدرب قال ليكم اطلعوا مع الهجمة.
• كنا بنطلع مع الهجمة ..لكن بعد ما نقول ليه هسع الكلام دا عاوز ليه (ترجمة)؟
• شوية كدا ..المترجم تاني يكورك لينا ..والمباراة شغالة.
• نمشي ليه في الخط ..المترجم يعاين للمدرب ويقول لينا المدرب قال ليكم (ألعبوا شديد).
• نحن نقعد نعاين لي بعض ..ونقول للمترجم ..هسع الكلام دا عاوز ليه (مترجم)؟
• ونرجع نلعب كورتنا.
• تسمع لبع وكبع مبالغ فيه.
• الفاول بتدخل بعدو (7) نقالات.
• تلاتة بمشوا على العظام ..واربعة على المقابر عدل.
• نحن كنا صعبين.
• في الكورة المستركة عادي تشوف ليك (ركبة) طائرة.
• ما كان عندنا حاجة اسمها (رباط صليبي).
• دي بنعتبرها اصابة (دلع) ساكت.
• المباراة شغالة باقى (5) دقائق من نهاية المباراة…ونحن مغلوبين سبعة ..تقول لاعبين ضد (الوحدات).
• في هذه الاثناء (المترجم) كورك لينا …مشينا ليه كلنا في الخط ..قال لينا المدرب قال ليكم (اكتلو اللعب).
• قلنا ليه الموضوع دا لا عاوز ليه (مترجم) ولا عاوز ليه (مدرب اجنبي)..نكتل اللعب في شنو ونحن مغلوبين سبعة؟
• المترجم قال لينا – المدرب خايف من (الدستة)…عشان كدا قال ليكم ما تجاروا الفريق المنافس.
• قلنا ليه امشي قول ليه والله نحن ما في شيء عملها فينا غير اننا (جارينا) المدرب ..لو لعبنا كورتنا ..كان هذا الفريق الذي نلعب ضده دا بفتش عن (التعادل).
• المباراة انتهت 11 / صفر.
• الادارة بعد المباراة شالت (المترجم)..وقالوا الكلام المفروض كان يقولو لي (رأس الحربة) كان بقولو لي (حارس المرمى)..كان في غلط في (الترجمة) عشان كدا اتغلبنا 0 / 11.
• ……….
متاريس
• الجاكومي (لايفاتو) في استاد المريخ بقت اكتر من (لايفاتو) في ميدان الاعتصام!!
• انت يا محمد سيد احمد (الرئيس المناوب) ام (ناشط سياسي)؟
• عملتها لينا كلها (لايفات).
• سوداكال يدفع في قروش الطائرات الخاصة من يوغندا الى الابيض ..والجاكومي شغال (لايفات).
• هسع لو الجاكومي قالوا ليه ادفع ..لايفاتو بتختفي.
• قنصل حديقة الموردة لو طلع (لايف) تتفكروا يتحدث عن (سوداكال) ام يتحدث عن (لجنة ازالة التمكين)؟
• وقت تقعد في مباراة لبرشلونة الايامات دي زي القاعد ليك في عزاء.
• قالوا ليك الايامات دي الابيض مطر شديد.
• كلموا ناس الاكسبريس يشيلوا معاهم (احذية المطر).
• اقصد كلموا ناس المريخ ينتبهوا للحتة دي.
• انا قلت ليكم.
• كلمتكم.
• ………….
• ترس اخير : هسع ناس قنصل حديقة الموردة والجاكومي ومزمل في المباراة القادمة ح يشجعوا المريخ ام ح يشجعوا الاكسبريس؟