قنصل حديقة الموردة!!

صابنها

محمد عبد الماجد

قنصل حديقة الموردة!!

• فاز آدم سوداكال برئاسة نادي المريخ بالتزكية وهو في (السجن).
• وهو في (السجن) فاز ادم سوداكال برئاسة نادي المريخ في العهد البائد عندما كانت السلطة تتدخل في العمل الرياضي.
• وكان العمل الرياضي عند السلطة متل (الصقيعة) يدخلوا فيها زي ما عاوزين!!
• فاز سوداكال بالتزكية!!
• بالتزكية!!
• انتوا وقتها كنتوا قاعدين وين؟
• (كان ذلك في 10 أكتوبر /تشرين أول 2017، حينما انتخب مجلس إدارة جديد برئاسة آدم سوداكال، وفاز الأخير كما اشرنا برئاسة النادي بالتزكية، نكرر بالتزكية وتكون المجلس من 14 عضوًا، وظل يعمل دون رئيسه، الذي كان في حبس احترازي لمشاكل قضائية).
• دا كلام المسودة الرئيسية لبداية عمل سوداكال في المريخ.
• سوداكال بدأ من هنا.
• جبنا ليكم التاريخ بي اكتوبر وبي تشرين اول.
• بعدين عشان الموضوع يبقى ليكم واضح تشرين اول دا ما عدس!!
• قبل ذلك طبعا كان اعلام المريخ قد قدم سوداكال الذي ساهم في تسجيلات المريخ وفي تسجيل بكري المدينة ..وكان قبل ذلك قد بشّر به جمال الوالي عندما كان رئيسا لنادي المريخ ليجعله راعيّا لمؤتمرات المريخ الصحفية التى يعلن فيها عن التعاقدات الجديدة مع المحترفين ومع المدربين الاجانب.
• اين كنتم في ذلك الوقت؟
• سوداكال الذي فاز برئاسة نادي المريخ في اول انتخابات يترشح فيها وهو في الحبس ..فاز الآن في 4 سبتمبر / أيلول ..وبرضو بالتزكية رغم ترشح القنصل حازم مصطفى في جمعية حديقة الموردة.
• ايلول دا وقع ليكم؟
• يا جماعة الموردة نزلت من الممتاز..انتوا البخليكم تمشوا على حديقتها شنو؟
• الموردة في عضمها ما عرفت تثبت في الممتاز ..عاوزين انتوا تجيبوا ليكم مجلس انتخب في حديقة الموردة.
• في الهايد بارك.
• معقولة بس.
• منتهى الرومانسية!!
• شغل الرومانسية دا حدو حديقة الموردة.
• تقول عندهم (عقد)…عاملين الجمعية في الهايد بارك.
• سوداكال فاز بالتزكية مرتين ..مرة في السجن ومرة مع ترشح القنصل حازم.
• طبعا النظام الاساسي بتاع استاد المريخ …بشترط الاقامة في السودان لمرشح الرئاسة.
• النظام الاساسي بتاع حديقة الموردة ..الحتة دي وعشان خاطر القنصل حازم ما عندو فيها مشكلة.
• عدت عادي.
• يعني المريخ زي ما عندو جمعيتين ومجلسين ..ورئيسين ..عندو برضو نظامين اساسيين.
• دي لاقتكم في حتة يا صفوة.
• والله ما في (صفوة) بعملوا كدا؟
• انتوا (صفويتكم) دي في شنو؟
• لا جمال الوالي في المريخ ولا صلاح ادريس في الهلال فازوا بالتزكية مرتين على التوالي كما حدث مع سوداكال.
• ما يحدث مع سوداكال الآن امر غريب.
• ما في رئيس نادي حدث له هذا الذي حدث لسوداكال.
• يفوز مرتين بالتزكية ..مرة وهو في السجن ..ومرة مع ترشح حازم مصطفى.
• الحتة دي انا بكررها ليكم كتير.
• الكلام دا مفروض ما يحصل عند الصفوة.
• جمعيتين في يوم واحد يا صفوة!!
• غير الحتة التانية التى سوف ادخل فيها بالتفصيل وهو تغلّب سوداكال على ثلاثة رؤساء في المريخ.
• تغلب سوداكال على محمد الشيخ مدني الذي عينته السلطة الحاكمة.
• وتغلب على الكندو الذي عينته جمعية عمومية للمريخ واعتمدته اللجنة الثلاثية للاتحاد العام.
• وواضح الآن ان سوداكال سوف يتغلب على حازم مصطفى بتاع جمعية حديقة الموردة.
• جمعية حديقة الموردة ممكن تجيب ليها (عريس).
• لكن تجيب ليها (رئيس)..دي ما في زول سبقكم عليها.
• نبدأ من ابوالقوانين.
• هو زول اتغلب على محمد الشيخ مدني (ابوالقوانين) ذاتو …ح يغلبوا يعني يتغلب على زول قاعد برة البلد ..وما بقدر يرجع.
• مستغربين مالكم؟
• موش دي الحقيقة.
• موش دي الحديقة.
• حازم لغاية الآن فاكر علي جعفر بيلعب في المريخ.
• الزول دا ما جايب أي خبر.
• نخش على التفاصيل …ونشوف حكاية تغلب سوداكال على ثلاثة رؤساء..والله دي الامين البرير ما قدر عليها.
• ولا صلاح ادريس ذاتو.
• (في 12 يونيو/حزيران 2018، عين اليسع الصديق وزير الرياضة بولاية الخرطوم، مجلس إدارة جديد برئاسة محمد الشيخ مدني، واستنجد المريخ بالفيفا من تدخل الوزارة، وطالب الاتحاد الدولي نظيره السوداني بالتدخل لحماية المريخ).
• الكلام دا انا بجيبوا ليكم من تقرير رسمي نشر في موقع كووورة عربية.
• يعني ما عندي أي علاقة معاه.
• بجيب ليكم في وقائع حدثت.
• تتخيلوا بعد دا ..ومع تدخل السلطة ….(حكومة الكيزان) ومع الاسم الكبير لمحمد الشيخ مدني الذي اعتمده الاتحاد العام وأجازه ..استطاع ادم سوداكال ان يبعد ابوالقوانين.
• اين ابوالقوانين الآن؟
• ابتعد نهائي عن مسرح الاحداث.
• بعد محمد الشيخ مدني ظهر محمد موسى الكندو كرئيس معتمد من الاتحاد للمريخ.
• التفاصيل جاءت على هذا النحو :
• (في 14 يونيو/حزيران الماضي، عقد مجلس اتحاد الكرة السوداني، اجتماعًا كلف بموجبه، اللجنة الثلاثية لإحداث توافق بين المجموعتين المتنازعتين، وعقد جمعيتين عموميتين للنظام الأساسي وانتخابية، في فترة لا تتجاوز 3 أشهر).
• نقول ليكم الكلام دي بي يونيو وبي حزيران …عشان الموضوع يبقى ليكم واضح.
• (بعد ذلك انقسم مجلس المريخ إلى اثنين، مجموعة يقودها سوداكال، ومجموعة يقودها علي أسد والكندو، ونجحت الأخيرة في رفع الأمر للفيفا، بحجة أنها عقدت جمعية عمومية لإجازة النظام الأساسي في 27 يوليو/تموز).
• بي يوليو وبي تموز.
• اها قصرنا معاكم.
• (عقد سوداكال، جمعيته في 31 يوليو/تموز، وأرسل مخرجاتها للفيفا، وقرر عقد جمعية انتخابية في 4 سبتمبر/أيلول الجاري).
• بي سبتمبر وبي ايلول…عشان ما تقعدوا تتغالطوا لينا.
• (اللجنة الثلاثية بدأت عملها بعقد اجتماعات مع طرفي النزاع، لكن آدم سوداكال تقدم بمطالب حتى يحضر الاجتماعات رسميًا، الأمر الذي لم يحدث. وكانت اللجنة الثلاثية، قد قررت في 24 يونيو/حزيران الماضي، معاقبة آدم سوداكال، بعدم الاعتراف برئاسته وحولته إلى لجنة الانضباط).
• الاتحاد واللجنة الثلاثية التى تتحدث عن جمعية حديقة الموردة الآن هي نفسها التى رفضت الاعتراف بادم سوداكاال رئيسا للمريخ …لجنة الانضباط في الاتحاد العام لغت هذا القرار ولم تعتمده.
• لهذا كلام حميدتي واللجنة الثلاثية الآن غير معتمد.
• ما عندو أي قيمة.
• الاتحاد العام واللجنة الثلاثية طرف ثالث.
• يعني ما حدث للكندو سوف يحدث للقنصل حازم.
• نفس المصير.
• سوداكال شغال صاح ..وما اعطي الاتحاد أي فرصة.
• والفيفا سوف تثبت ذلك.
• لا ابوالقوانين.
• ولا الكندو.
• ولا القنصل.
• قنصل في حديقة الموردة.
• حدو قبلو.
• كلهم ما فهموا حاجة في المريخ.
• سوداكال هو المسيطر.
• تعملوا جمعية.
• تجيبوها في الملاعب.
• تهللوا بيها.
• تنزلوا بيها في المواقع.
• كل هذا الكلام ما عندو قيمة.
• وزي ما كان الكندو قاعد ساكت ..يطلع نضارة ويلبس نضارة سوف يكون القنصل حازم برضو قاعد ساكت.
• عندما كان الكندو معتمد من الاتحاد العام ومن جماهير المريخ رئيسا للمريخ ..من الذي كان يدير المريخ ويصرف عليه؟
• سوداكال كان بصرف على المعسكر.
• وبصرف على اللاعبين.
• وبطلّع المرتبات.
• سوداكال كان بعالج لاعبي المريخ المصابين في القاهرة.
• والكندو كان بظهر فقط في قناة الملاعب.
• وعلي اسد بظهر في سودانية 24.
• تاني ما عندهم أي وجود.
• الآن بحصل نفس الشيء.
• سوداكال بجيب الطائرة الخاصة.
• وسوداكال بقود احد اعضاء مجلسه المنتخب فريق المريخ الى يوغندا.
• وسوداكال جاب غارزيتو.
• وسوداكال بفك سيف تيري.
• وسوداكال بفاوض الآن على التسجيلات.
• انتوا قاعدين بتعملوا في شنو؟
• القنصل حازم ما فاضي لي من الصور.
• وكتابة البوستات.
• انتوا قالوا ليك رئاسة المريخ كدا.
• الكلام دا ما كدا.
• القصة ما (بوست).
• ولا اعلام.
• ولا هايد بارك.
• المريخ سافر الى يوغندا عبر طائرة خاصة.
• دي القنصل حازم في (بوست) ما بقدر يعملها.
• ولا جمال الوالي
• بالمناسبة من الليلة حازم اسمو قنصل حديقة الموردة.
• عشان الكلام يبقى ليكم واضح.
• يعني لمن نقول ليكم قنصل حديقة الموردة ..بنكون قاصدين منو؟
• بنكون قاصدين حازم مصطفى.
• بعدين زولكم دا حديقة الموردة ما بقدر يدخلها ..ناهيك عن ادارة نادي المريخ.
• …….
متاريس
• الكلام دا كلام القانون.
• كلام الفيفا.
• استفيدوا من وقتكم.
• سوداكال قدر عليكم.
• وقدر يفوز بفترة تانية في المريخ.
• بالمناسبة لو سوداكال ما عمل كدا ما كان بفوز.
• يعني لو في جمعية واحدة ..سوداكال ما بفوز.
• وكان للجنة الثلاثية لاتحاد الكورة ..الجماعة ديل باقى ليهم في الاتحاد شهر.
• ويتخارجوا.
• سوداكال لعبها صاح.
• وانتو تاني اتغشيتوا يا صفوة.
• بعد كدا لو عاوزين تشيلوا سوداكال من رئاسة المريخ إلّا تسحبوا منه الثقة عن طريق الجمعية العمومية.
• بس ما تكون في حديقة الموردة!!
• …..
• ترس اخير : رئيسكم مين؟