برقو كلامو صاح لكن حديثو غلط !!

قزاز ورذاذ
محمد الطيب الأمين
برقو كلامو صاح لكن حديثو غلط !!
* والله يا جماعة ما عارف اجيبها ليكم كيف؟
* أصلو الموضوع صعب شوية.
* ونحن في مهمة وطنية .
* وسودانا نادانا.
* وبلدنا نعلي شأنا.
* وبين ضلوعي الوطن العزيز.
* ونحن جند الله وجند الوطن.
* ونشتري (اللحمة) بأغلى ثمن.
* ما عارف اجيبها ليكم كيف لكن حسن برقو (كلامو صاح وحديثو غلط).
* لو صحي قال لحازم (عيبك إنك مريخابي) يبقى قال (الصاح) في المحل (الغلط).
* نحن لا نستطيع أن نجزم بأن برقو قد قال ذلك.
* الرجل نفى هذا الحديث الدائر .
*ولكن كده نفرض إنو قال.
* عادي الكلام ده بتقال في إطار المناكفات والمشاغلات.
* أنا في ناس بتقابلني بتقول لي : (والله يا أستاذ عيبك إنك هلالابي).
* أنا بضحك لاني عارف (الهلال شرف).
* عارف الهلال عز.
* عارف الهلال وطن.
* لما يقولوا لي كده ما بزعل ولا بتعقد.
* بقول ليهم (الهلال ما لينا غيرو أهل وهو الأهل لينا).
* وفي النهاية أنا (عارف عزي) .
* وزي ما قال (الكوز المدلل) العارف عزو مستريح.
* ح تقول لي برقو رئيس لجنة المنتخبات وهو في مهمة وطنية وما كان يقول كده.
* بتفق معاك.
* المهمة الفيها برقو ما بتحتمل الهظار ده.
* لكن لو صحي قال كده (والله أعلم يكون قال).
* أنا أشك في ذلك.
* رغم إني والله ما بعرف برقو.
* ولا حصل قابلتو.
* لكن بما ظهر لنا الرجل مهموم بقضايا المنتخبات الوطنية وله جهد مقدر في ذلك.
* بل الطفرة التي شهدها المنتخب في الفترة الأخيرة هو (سيدا).
* ولو قال لحازم كده يبقى برقو عندو حاجات كتيرة بتشفع ليهو.
* وما ح نقيف عند حديثه هذا (لو صحي قالو).
* سننظر للنصف المليان.
* أمام المنتخب مباراة في غاية الأهمية والخطورة.
* وتحتاج لأجواء هادئة وتركيز عالي .
* بعدين تعالوا هنا.
* مش يكمن حازم ده ذاتو انبسط من كلام برقو؟
* نحن ذاتو نضمن كيف إنو حازم ده مريخابي؟
* في ناس عندها قروش لما ما تلقى فرقة في الهلال بعملوا فيها مريخاب.
* والله صحي.
* هو يكون هلالابي ليهو ضل.
* لكن بيشوف (الصف طويل في الهلال بيقوم بعمل فيها مريخابي).
* وتعال اناقشك.
* أنت لو فاكر جمال الوالي مريخابي تكون ما فاهم حاجة يا اللخو.
* لو فاكر رئيسك أبو العائلة مريخابي تكون ما عارف حاجة يا شيخنا.
* ديل هلالاب ما لقوا محل في الهلال.
* قوم على حيلك.
* حازم كترو خيرو دعم اللاعبين.
* وبعد كده لو (عيبو مريخابي ولا ما مريخابي) خلونا نركز.
* المنتخب بعناصر المريخ وبدونها ما بتجيهو عوجة.
* ده منتخب بلد.
* طلع بكري المدينة وغاب عجب ومحمد الرشيد وسيف تيري والمسيرة ماشة.
* أي لاعب من المريخ داير ينسحب ويعمل لينا فيها حركات شداد قاعد.
* والله تاني شعار المنتخب ده تشمو قدحة.
* ألعب كورتك يا أمير كمال ونحن ما ناقصين صداع.
* ما في زول بيلوي يد البلد.
* الليلة المساء بطيارة خاصة بنسفر (روفا ونزار حامد وبشة الصغير وسليم برشاوي ومؤيد عابدين وعبد اللطيف بوي وعثمان ميسي وعصمت).
* بتعرفوا عصمت ولا ما بتعرفوا؟
* أنا شايف تلموا الموضوع ده وتخلونا نركز.
* بلاش برقو قال وأمير رفض.
* حاجة تكسف.
* ملحوظة : (بجدد الدعوة لكل أصدقاء هذه الزاوية للإشتراك في قناتي على اليوتيوب).
* سنقدم عمل مختلف خلال الأيام القادمة عبر القناة واتمنى أنا يجد القبول).
* للإشتراك في القناة تدخل اليوتيوب تكتب (قناة دقايق) بتظهر ليك الحلقات القديمة أعمل إشتراك وأكون شاكر ومقدر ليك.
* ونركب صافنات ونجيبة (سودانية) واصلو الزول بيموت والذكرى تفضل حية.
* و..و..
* هو غلطان لكن ما غلطان شديد .