غارزيتو يهدد بالرحيل والسبب (الطحنية) !!

قزاز ورذاذ
محمد الطيب الأمين
غارزيتو يهدد بالرحيل والسبب (الطحنية) !!

* زمان ونحن صغار لما يكون عندنا مباراة (دافوري) في الحلة بنأكل (طحنية) في نفس يوم المباراة.
* المباراة بتكون الساعة أربعة ونحن بنأكل الطحنية الساعة أربعة إلا ربع.
* بعد نلبس (المرايل) بتاعت المباراة بعد داك بنأكل الطحنية.
* ظناً منا أن الطحنية في ربع ساعة بتدينا طاقة ولياقة عالية.
* والغريبة كنا بنكون الطرف الأفضل في اللقاء.
* والطحنية طبعاً بجيبها لينا واحد معانا في الفريق عن طريق (الشيرنق).
* تدفع (الشيرنق) حقك وبديك (حجر طحنية).
* بقينا زي (حنان جوطة) في مسلسل الدعيتر.
* يوم من الأيام الولد ده جاب الطحنية ولقانا ما عندنا قروش.
* قلنا ليهو أدينا نأكل عشان المباراة دي صعبة وبكرة من حق فطور المدرسة بنديك الشيرنق.
* رفض رسمي وشعبي.
* قدر ما حنسناهو رفض.
* دخلنا المباراة بدون طحنية واخدنا (٢/صفر) في الشوط الأول.
* بين الشوطين قعدنا نتكلم عن الطحنية.
* مش المفروض كان بين الشوطين نتكلم عن الأمور الفنية والسلبيات والأهداف الدخلت مرمانا؟
* لا أبداً .. اتكلمنا عن الطحنية.
* وتاني رجعنا نحنس في الولد وهو رافض.
* المهم .. في النهاية اخدنا سبعة وبقينا مارقين.
* وبما أن ذلك كذلك فأن مدرب المريخ غارزيتو هو الآن رفض يسلم لاعبي المريخ (المُكملات الغذائية) عشان سوداكال ما سلمو القروش.
* هكذا تناقلت الأخبار والمواقع الإلكترونية ومواقع التواصل.
* قال ليك : غارزيتو يهاجم سوداكال بسبب رفضه دفع مستحقات المُكملات الغذائية التي احضرها الفرنسي.
* وزاد الخبر : غارزيتو يعلم أن اللاعب السوداني يعاني في الجوانب الغذائية ولذلك أحضر معه (مُكملات).
* مُكملات ب(الخاء)؟
* قال مُكملات قال.
* الكلام ده تقولو لزول ما أكل طحنية قبل كده.
* يعني هسه خسارتكم أمام الوادي نيالا سببها (المُكملات).
* قالوا بين الشوطين غارزيتو تحدث مع اللاعبين مؤكداً ضرورة المُكملات.
* حنسوهو يديهم (شوية مُكملات) لكن رفض.
* في النهاية انضربوا اتنين.
* شكلو مهاجم الوادي نيالا مبارك أكل ليهو نص كيلو طحنية قبل المباراة.
* ده لو أكل كيلو كان اداكم سبعة.
* حالتو ده نص كيلو بس.
* المريخ في الشكوى فات عليه أن يشكو مبارك في الطحنية.
* سبحان الله المريخ ما بحقق الإنتصارات إلا عن طريق سبعة حالات ، خمسة هي : (المُكملات ، الشكاوى والبخور).
* وتعال اناقشك.
* (٢٠١٨) شلتوا الكأس من المكتب (شكوى وفساد).
* الموسم الفات شلتوا الكأس عن طريق (البخور).
* وهكذا .
* يا بخور ويا شكوى ولقيمات ويا كمان مُكملات.
* لكن السنة دي إن شاء الله لو بلعتوا (مُكملات) صباح ومساء غير الوصافة ما عندكم شي.
* غارزيتو ماسك (مُكملاتو) عندو ورافض تماماً.
* مع إنو عندي إحساس إنو غارزيتو وبطريقة خاصة كده منح بكري المدينة (مُكمل صغير كده).
* لأنو بكوري الذي اقترب عمره من ال٤٠ الأيام دي (نشيط).
* هكذا أحس.
* وأي زول طبعاً حر في محاسيسو.
* غارزيتو زول صعب وقاسي.
* منجد النيل أحق بالمُكملات من بكري.
* وصلاح نمر كذلك.
* أنا بقترح لغارزيتو اقتراح ظريف.
* طالما أنت اصلا جبت المُكملات دي وخاتيها في التلاجة وسوداكال رفض يدفع حقها.
* أنا بقترح تبيعها للاعبين (سوق أسود).
* أي لاعب حسب قروشو.
* يجيك أمير كمال تبيع ليهو مُكمل بتاع مباراتين تلاتة.
* يجيك صلاح نمر برضو تناولو حاجة صغيرة كده.
* اشتغل كده لحدي ما تخلص المُكملات العندك.
* غارزيتو مسكين جاب مُكملات للاعبين وما عارف إنو النجيلة محتاجة أكتر من اللاعبين ذاتهم.
* وغايتو الله يكفينا شر (المصدي) اللمعتو الأيام.
* تنويه .. (أطلب من أصدقاء هذه الزاوية دعم قناتي على اليوتيوب بالإشتراك وتفعيل الجرس).
* تدخل اليوتيوب تكتب (قناة دقايق) أعمل إشتراك واتشرف بيك.
* بإذن الله سنبدأ في القناة تقديم مادة مختلفة جداً اعتباراً من الأسبوع القادم.
* و…و..
* وشكلك ده بادي الريد جديد تلعب معاي ……… (بدون مُكملات).