اشتكوا (كنو) .. لو اشتكوا (مبارك) كان عذرناهم!!

صابنها
اشتكوا (كنو) .. لو اشتكوا (مبارك) كان عذرناهم!!
محمد عبدالماجد
• ما يحدث في المريخ الآن امر (مضحك) – لا اريد ان اقول (سخيف) – هذه امور تعود اليكم.
• بترجع ليكم.
• نحن بنستمتع بهذه (الولوله) الحاصلة.
• المرحوم مالو؟
• المرحوم كان عندو شنو؟
• عاوزين تعملوها كلها (شكاوي).
• حياتهم كلها كدا.
• بطولاتهم كلها تحققت عن هذا الطريق.
• شكوى شكوى الليل نعدو.
• نجمة نجمة.
• مرة مشوا (كادوقلي) يفتشوا ليهم في (رقم وطني).
• مشوا في (ضلمة) اصبعك ما بتشوفو.
• ومرة مشوا (القضارف) قالوا لاعب الامل عطبرة عمر عثمان ضرب ليه حكم في الموسم الماضي (بونية) عندما كان يلعب في دوري الدرجة الاولى في القضارف.
• في مطرة حدها النخرة.
• ومرة مشوا (كاس).
• اصلوا ما بخجلوا.
• ولا بتلفتوا.
• مرة مشوا (اليمن) ..عشان يطلعوا شهادة ميلاد اكرم الصلوي.
• ومرة مشوا (قطر) عشان يلاحقوا والي الدين محمد عبدالله.
• ديل وصلوا (موزمبيق) عديل كدا.
• فاتوا (كبسور).
• نادي المريخ للتربية الرياضية.
• شيلوا الشعار دا.
• وقت حولتوا نشاطكم الى (المكاتب) بدل من (الملاعب).
• شيلوا اللافتة بتاعة (نادي المريخ للتربية الرياضية) واكتبوا (نادي المريخ للشكاوى المسربة).
• عشان الامور تبقى واضحة.
• الناس ديل جنهم (شكاوي).
• حياتهم كدا.
• عندنا جدنا اسمو (للح ود سعد).
• (للح ود سعد) دا السنة كلها كان بيشكي.
• مرة يشكو من الضهر.
• ومرة يشكو من السمع.
• ومرة يشكو من العيون.
• ومرة يشكو من الضغط.
• ومرة من السكرى.
• ومرة يشكو المصران.
• ومرة يشكو من عدم النوم.
• ومرة يشكو من الاكل ..يقول ليك الملاح دا ملحو كتير.
• والشاي بارد.
• او الشاي خفيف.
• وعاوز لي (طحنية).
• الطحنية دخلها شنو؟
• بدون مناسبة كدا.
• مرة يشكي من اولاده ..بقول ما برسلوا ليه مصاريف.
• ومرة يشكي من الاسعار.
• ومرة يشكي من الكهرباء.
• ومرة يشكي من حمدوك.
• كسرتها ليكم من (واو) الى (يا).
• عشان الشكاوي كترت.
• (للح ود سعد) كان زي الحصان.
• ما عندو أي حاجة.
• جدنا (للح ود سعد) وقت ما يلقى ليه حاجة يشكو منها بيشكي من (الجو).
• بقول ليك الليلة مالها الواطة دي سخنة كدا؟
• او يقول ليك (اللحمة) دي مالها قوية كدا؟
• اصلو ما بعرف يقعد ساي.
• ناس المريخ عايشين في نفس الدور.
• ديل رئيسهم ذاتو قدموا فيه شكوى.
• وجابوا ليه الشرطة.
• وعاوزنهم ما يشتكو كنو.
• تتخيلوا سوداكال ناس المريخ اشتكوه في الاتحاد العام وفي النيابة وفي الشرطة وفي الفيفا.
• ما خلوا ليه جنبه يرقد عليها.
• وكلها (شكاوى) فالصو.
• ما عملت أي شيء.
• سوداكال وقت فاز بالتزكية ناس المريخ قدموا فيه (9) طعون ..رغم ان سوداكال هو الوحيد الذي ترشح لرئاسة نادي المريخ.
• هو المرشح الوحيد للرئاسة قدموا فيه (9) طعون ..طيب لو اترشح معاه اخرين ..كان عملوا شنو؟
• ديل من حبهم للشكاوي. ..اشتكوا (غارزيتو) مدرب الفريق وقالوا ينتظروه بالشرطة في مطار الخرطوم.
• انتوا بتتخيلوا (شكاوي) للدرجة دي.
• وعاوزنهم ما يشتكوا (حي الوادي) بعد العملو فيهم.
• خلوه رئيس النادي..سوداكال.
• خلوه مدرب الفريق ..غارزيتو الذي تجاوز السبعين.
• ديل ملعبهم نفسه (اشتكوا) منو.
• قالوا دا ما ملعب.
• ودي ما نجيلة.
• اشتكوا (النجيلة)!!
• ويا ريت لو كانت النجيلة دي نجيلة غريبة ..دي نجليتهم.
• لاقاكم فريق بيشتكي من ملعبه.
• بيشتكي (نجليته).
• النجيلة ذنبها شنو؟
• اشتكوا الاتحاد.
• اشتكوا من التحكيم.
• وعاوزنهم ما يشتكوا عمار كنو.
• انتوا بتتكلموا كيف؟
• الغريبة والمضحك ان عمار كنو عندو كرت اصفر واحد…كان تعملوها حلوة شوية وتشتكوا لاعب عندو كرتين.
• الظاهر عجبهم الاسم ..قالوا يشتكوا في (كنو) عشان اسمو ظاهر.
• والله لو اشتكيتوا (مبارك عبدالله) كان عذرناكم.
• كنا لقينا ليكم عذر.
• وقلنا حالة نفسية وكدا.
• فعلا كان تشتكوا مبارك عبدالله …الزول دا العملو في دفاع المريخ …الحرب العالمية التانية ما عملتو في البشر.
• كان تقدموا مستنداتكم للاتحاد العام حول مبارك عبدالله – الاتحاد العام كان لقى ليكم طريقة.
• قدموا صورة اشعة مقطعية لحمزة داؤود ..الزول دا مشى غادي …مرق بوشيه ..ما عارف مشى وين؟
• تاني ما شفناه في الكادر.
• طلع برة كادر الصورة.
• تقول سائق ليه قلاب تراب.
• لو عملتوا صورة مقطعية لحمزة داؤود بعد هدف مبارك الاول أنا متأكد تلقوا في مشاكل في (ركب) حمزة داؤود.
• وفي زغللة في العيون.
• حمزة داؤود دا اهبشوه.
• الزول دا ما بكون طبيعي.
• اشتكوا في الحتة دي.
• اعملوا موجات صويتة لأمير كمال..الزول دا ما اعتيادي.
• يمكن يكون بلع لسانو.
• بلع الشنكار.
• في حاجة ما طبيعية.
• شوفوا طبنجة وضياء الدين اعملوا ليهم (جلسة استماع) للهدف الثاني لمبارك عبدالله.
• خلوهم يستمعوا موسيقي.
• طلعوهم من الحالة النفسية دي.
• منجد النيل من الدار للنار.
• شيلوا الكلام دا وامشوا بيه على الاتحاد العام.
• ولو الاتحاد العام ما عمل ليكم حاجة.
• امشوا المحكمة الرياضية (كاس).
• ولو (كاس) ما عملت حاجة ..امشوا الامم المتحدة.
• المحكمة الجنائية.
• اتصرفوا بس.
• ما تقعدوا لينا كدا.
• دقوا ليكم (صيوان) عشان تشكوا على راحتكم.
• ابكي واصيح وانوح.
• يعملها مبارك يشتكوا عمار كنو.
• مبارك يمر.
• مبارك يفوت.
• ويشتكوا كنو.
• مبارك يسجل.
• المرة الاولى.
• والمرة الثانية.
• ويشتكوا كنو.
• في مدافع (اتملخ) منكم.
• وفي مدافع جاتو (فلايت).
• وفي مدافع وقع في الطريق.
• وفي مدافع مرق.
• وفي واحد بقى يشوف عشرة عشرة.
• وفي واحد خرج ولم يعد.
• وواحد اصبح في عداد المفقودين.
• وبعد دا يخلوا مبارك ..ويمشوا يشتكوا كنو.
• كنو عمل ليكم شنو؟
• كنو ملخ ليكم كتف مدافع؟
• جاب ليكم (قطيعة)؟
• خلاكم تشوفوا طشاش طشاش؟
• نفسي اعرف اين اتصاب مصعب كردمان والتش والصيني وسيف تيري وعمار طيفور؟
• الجماعة ديل اتصابوا في (محكمة)؟
• في جلسة تحري؟
• بتتمرنوا وين انتوا؟ في النيابة العامة؟ …في نيابة الجرائم الموجهة ضد الدولة؟
• نيابة الاراضي؟
• عاوزين نعرف بس؟
• اقول ليكم شيء.
• اقول ليكم (حكمة).
• ألبسوها حلق في اضانكم.
• في 2018 – خسر المريخ بطولة الدوري الممتاز بعد ان تم خصم (6) نقاط من رصيد الهلال بواسطة الفيفا.
• المريخ اشتكى فريق مريخ الفاشر في اللاعب (هشام جنيه) في عملية كانت مكشوفة.
• تواطؤ ظاهر.
• ولا كلمة.
• وصلوا بالشكوى الى (كاس). بعد ان خسروا في (الميدان).
• دفعوا ليهم 40 الف جنيه استرليني في نفرة (هشام جنيه).
• السنين لفت وجاءت.
• عشان مريخ الفاشر يلعب اليوم مباراة مصيرية امام الهلال في الدوري الممتاز.
• سبحان الله.
• نحن حقنا ما بنخليه.
• بطنا غريقة.
• خسارة مريخ الفاشر اليوم ان شاءالله تعني هبوط مريخ الفاشر رسميا.
• مريخ الفاشر ان شاءالله اليوم الى الدرجة الاولى.
• خلاص تمت.
• انتهت الحكاية.
• ودا مصير كل من يتلاعب ويلف ويدور.
• على يد الهلال ان شاءالله سوف يهبط اليوم مريخ الفاشر من الدوري الممتاز.
• الايام لفت وجاءت.
• جاءت مدردقة.
• عشان الهلال يسترد ما اخذ منه في (المكتب) من (الميدان).
• ما اخذ ليلا نسترده نهارا.
• بعرق الجبين.
• عرق اللاعبين.
• وليس عن طريق المحكمة الرياضية واللف والدوران.
• بنشيل حقنا عنوة.
• دا الهلال.
• هلال الحركة الوطنية.
• هلال الملايين.
• هلال نادي الخريجين الاوائل.
• ان شاءالله الليلة تثبت رؤية الهلال شرعيا بطلا للممتاز.
• الليلة يوم 10 محرم.
• يوم عاشوراء.
• يوم عظيم.
• في مثل هذه الايام المباركة دائما يتجلى الهلال.
• عشان كدا الليلة اتوقعوا نتيجة كبيرة من الهلال ان شاءالله امام مريخ الفاشر..وتوقعوا كذلك ان يفعلها هلال الفاشر امام المريخ.
• الليلة يوم الهلال.
• في استاد الهلال.
• وفي استاد الخرطوم.
• كلموا ناس المريخ يجهزوا شكوتهم من بدري.
• من قبل المباراة.
• هشام جنيه الذي كان يلعب في مريخ الفاشر في عام 2018 والذي تقدم المريخ ضده بشكوى (ملعوبة) يلعب اليوم مع هلال الفاشر ضد المريخ.
• ممكن تشتكوا (هشام جنيه) تاني.
• او اشتكوا محمد عبدالله زرقة …الزول البجيب القون.
• اصلو انتوا ما عندكم مشكلة في الشكاوي.
• ولا بتخجلوا منها.
• طبعكم كدا.
• هشام جنيه الليلة يمكن يجيب ليه قون ان شاءالله في المريخ – خليكم جاهزين.
• وزرقة.
• ما اخذ بالمكتب يسترد في الهلال بالملعب.
• في الميدان.
• ناس الغربال.
• وياسر مزمل.
• وبوجبا.
• بجيبوا حق الهلال عن طريق (الميدان).
• بنشيل حقنا من عيونكم.
• ……..
متاريس
• الليلة مباراة غارزيتو الاخيرة ان شاءالله مع المريخ.
• الزول دا ما بقعد كتير.
• والله يا ابراهومة الله شافك.
• الكوارث دي كلها كانت ح تقع في رأسك.
• غارزيتو طالب بشطب نصف لاعبي المريخ.
• ما في زول طلع من القائمة غير بكري المدينة.
• بكري وبس.
• الغربال الليلة ح يمشي بعيد شديد.
• وهلال الفاشر ما ساهل.
• بس اوعكم من الفاضل ابوشنب.
• الفاضل ابوشنب عند المريخاب زي وردي.
• بحددوه بالاسم.
• الليلة احسن تقدموا شكوتكم قبل المباراة.
• الله يحفظ الجميع من الاصابات.
• كل اللاعبين.
• في كل الاندية.
• ويغطي عليهم.
• ناس الهلال شغالين صاح.
• اخبار مفرحة.
• احسن نسكت.
• وما نقول حاجة.
• خشمي وعندي.
• ……
• ترس اخير : الله معاكم.