مبارك عبدالله ام مبارك (الدوري)؟

صابنها
مبارك عبدالله ام مبارك (الدوري)؟
محمد عبدالماجد
• الليلة ناس (ريمونتادا) يشهدوا عليّ – كتبت عمودي تلات مرات.
• زي حبوب الملاريا.
• تلات مرات في اليوم.
• اول عمود كتبتو عن تصريحات المدير الفني للمنتخب فيلود الغريبة في حق الهلال.
• ورسلت العمود.
• وقفلت التلفون على كدا.
• قلت استمتع بمباراة الهلال من غير رهق الكتابة.
• شفت مباراة الهلال وهدف الغربال – زي التقول (وديت ليهو زول مرسال والمرسال مشي وما جاء).
• شغلت محمد وردي.
• وعثمان حسين.
• والنعام آدم.
• النعام ادم ذنبو شنو؟
• ما عارف.
• بحب النعام ادم – (ولا شفتن تبل الشوق ولا رد يطمئن).
• والزول الوسيم.
• وما دام طار جنى الوزين يا دوب قل نوم العين.
• الحاجات دي كلها شفتها في هدف الغربال التاني.
• قلت الموضوع دا عاوز ليه عمود.
• تصريحات فيلود ملحوقة.
• يعني فيلود ح يمشي مننا وين؟
• نحن قاعدين.
• وفيلود قاعد.
• بدأت اكتب عمود عن فوز الهلال 3 / صفر وهدف الغربال وارنق واوتارا.
• اوتارا ذاتو جاب ليه هدف زي (لصقة الجروح).
• عليكم الله ما تسألوني (لصقة الجروح) علاقاتها شنو بي هدف اوتارا؟
• اسألوا كافي حارس هلال الفاشر.
• ما عارف.
• زمان في المدرسة كان عندنا طالب …لقبو (لصقة جروح).
• الزول دا كان بيبقى ليك في رقبتك.
• في نفسك.
• زي اللصقة.
• رأسو مرات بتلقاه مع ركبتو.
• وركبتو في اضانو.
• المهم شغال وقاعد اكتب عن هدف الغربال – قلت في نفسي والكلام دا ما كتبتو ليكم ولا ح اقوله ليكم في العمود والله الغربال دا احتمال مرات تكون قاعد بتحضر في المباراة يجيب ليك مع الهدف (باسطة).
• ما عارف ليه بشعر بالموضوع دا؟
• يمكن عشان نفسي في (باسطة).
• عندي احساس مع اهداف الغربال يجيني كيلو باسطة طائر.
• حسن محجوب زمان كان جنو (بسبوسة)…والله يا حسن محجوب هسع لو شفت اهداف الغربال دي تشبع (باسطة).
• الهدف بتاع الغربال بي باسطتو.
• ومعاه كباية لبن كبيرة.
• بكتب في العمود ..عرفت ليك المريخ مغلوب 0 / 2 من حي الوادي.
• يا جماعة معقولة.
• 2 / 0 لصالح حي الوادي – عديل كدا.
• ايدي اكلتني.
• معقولة موضوع زي دا اخليه يمر ساكت كدا.
• قلت في نفسي نحن مالنا ومالهم.
• مفروض نركز في كورتنا.
• مباراة توتي قدمت لينا دروس قاسية.
• احسن ما نسخر من زول.
• واحسن نعمل فيها رايحين.
• وما نجيب سيرة أي زول.
• لكن الكلام دا ما وقع لي.
• ايدي نملت.
• قلت اخش النت ..واشوف الاهداف في اليوتيوب.
• اتجسست على الاهداف.
• وبعدين اقرر.
• هي الدنيا يعني طارت؟
• كتبت اهداف مباراة المريخ وحي الوادي في غوغل ..جاني ليك واحد اسمو مبارك عبدالله.
• دا شنو كمان دا؟
• الهدف معاه صينية خبيز عديل كدا.
• الزول دا بمسك مدافعين المريخ تلاتة ..تلاتة ..وبمر منهم.
• زي الحلاق يوم الوقفة.
• ما خلي ليه زول.
• اول حاجة مسك ليك حمزة داؤود.
• ما خلى فيه حاجة.
• جوارب حمزة دواؤد في قدمو قعدت تشكي.
• خج شديد.
• شمال ويمين.
• حمزة داؤود بقى زي باقى السمك في الصينية.
• ديل ح تقابلوا بيهم الغربال كيف؟
• حمزة ندم على اليوم الجابو من الخرطوم الوطني.
• يا زول هو كان مالو ومال التلتلة دي؟
• مبارك عبدالله طلع من حمزة داؤود ..ظهر شقى الحال امير كمال.
• امير كمال ظهر معاه مدافع تالت.
• لكن والله ما عارف اسمو.
• المدافع دا اسمو يجيني ويطير مني.
• الزول دا فات سريع.
• امير كمال ما عرفت مشى وين؟
• شفت بس رقم الفانلة.
• غايتو بعد هذا الهدف مفروض فيلود يشيل امير كمال من القائمة الكلية للمنتخب.
• امير فات.
• وحمزة فات.
• وفي مدافع ثالث فات.
• ظهر منجد النيل.
• انت منجد على شنو يا اخوى؟
• الله شاف محمد المصطفى.
• قلت في نفسي هذا الهدف والله يستحق ان اكتب عنه اكتر من هدف الغربال.
• هدف الغربال لاحق.
• اتاريني انا ما شفت الهدف الثاني لمبارك عبدالله.
• الهدف التاني مبارك عبدالله مسك تلاتة مدافعين اخرين من المريخ من قبل الوسط.
• وخلطهم ليك.
• لا اقول ليكم بالليمون.
• لا اقول ليكم بالنعناع.
• الطعم يجيني ويروح.
• في (الخلطة) دي شفت ليكم (طبنجة) رايح …صورتو تمشي وتجي.
• زي الارسال زمان.
• تذكروا ايام كانت الصورة بتنزل وتطلع في الشاشة.
• وما تعرف تثبت الصورة.
• الكلام دا حصل لي (طبنجة).
• طبنجة فات.
• طبنجة راح.
• طبنجة من هسع هو وامير كمال وحمزة داؤود ومدافع ثالث ما عارف اسمو مرشحين للشطب.
• قلت خلاص الغي العمود الذي كتبته عن هدف الغربال ..وادخل في اهداف مبارك عبدالله.
• حكمة الله اسمو مبارك عبدالله.
• مبارك الدوري.
• مبارك يا هلالاب.
• مبارك يا السوباط.
• مبارك يا ريكاردو.
• مبارك يا الفاضل.
• مبارك يا الطاهر.
• مبارك يا العليقي.
• الزول دا ما اعتيادي.
• انا اول مرة اشوف لي مهاجم بجمعهم تلاتة تلاتة ويمر منهم.
• بمر منهم بالجملة.
• ضربت لبابكر مختار.
• قلت ليه الغي العمود الاول.
• والغي العمود التاني.
• عندي عمود تالت.
• قلت ليه عندك وقت
• عندي عمود ثالث.
• عاوز لي بس نص ساعة.
• شيء اكتبو وشيء ما اكتبو.
• المطبعة مستعجلة.
• والمطر ما معروفة.
• والكهربة.
• لكن عمود زي دا والله ما بخليه يمر ساكت.
• اهداف مبارك دي لازم اكتب عنها.
• ان شاءالله بي شمعة.
• ارجع واقول من خلال اهداف مبارك انه واضح عليه ولد صغير في السن ومهاجم قوي بفج المدافعين فج وبمر منهم.
• سجل بصورة عجيبة.
• لم اشهد هذه الطريقة في الدوري السوداني.
• حدث ذلك امام فريق كبير في حجم المريخ.
• وامام دفاع يقوده امير كمال.
• اكيد المهاجم دا ما ساهل.
• جيبوه لينا.
• والله نحن طبعنا كعب.
• أي موهبة نشوفه ..نتمناه في الهلال.
• حي الوادي فريق محترم ..امام الهلال قدم مباراة كبيرة وكان يمكن ان يتعادل مع الهلال.
• وامير ابوالجاز مدرب كبير ..وضح ان كل نتائج وانجازات الخرطوم الوطني تحققت بسببه.
• شبكتونا كواسي ابياه.
• ومنو كدا ما عارف.
• والسر في امير ابوالجار الذي صنع فريق خطير.
• فريق اسمه حي الوادي.
• ايضا نهنئ اسامة عطا المنان على هذا الفريق الذي يضم عدد كبير من المواهب.
• اسامة عطا المنان عنده عين فاحصة زي صلاح ادريس.
• اسامة عطا المنان صنع فريق مثل صلاح ادريس عندما صنع فريق الاهلي شندي.
• مبارك لحي الوادي.
• ومبارك للهلال.
• وهاردلك للمريخ.
• ……………….
متاريس
• يا جماعة والله ما بقدر اقول ليكم اكتر من كدا.
• عاوز الحق المطبعة.
• فريق هلال الفاشر ايضا قدم مباراة كبيرة امام الهلال.
• لكن خبرات الهلال حسمت المباراة.
• ياسر مزمل …مهاجم قادم بقوة.
• موعدنا مع مزمل قريب.
• اتمنى ان يجد فرصة اكبر من كدا.
• لاعبو الهلال تعرضوا لكروت ملونة ما في أي داعي ليها.
• يا صلاح.
• يا عبدالرؤوف .
• ممكن تتعرضوا للطرد.
• يا زول خلاص.
• رسّل العمود على كدا.
• اللهم الدوري والكاس.
• ……..
• ترس اخير : نحمد الله ونشكر فضله.