صحيفة كورة سودانية الإلكترونية

دبابيس ود الشريف

1٬763

دبابيس
+++++++++
ودالشريف
***************

** د كمال شداد رئيس الاتحاد العام بعث بخطاب للسيد النائب العام اكد فيه ان اتحاده لا يملك اي سلطة قانونية للتدخل في الشأن المريخي حسب نظامه الاساسي ولا يستطيع ان يوجه بتسليم النادي. والاستاد لاي جهة في حالة انتزاعهما من جماعة سوداكال

** خطاب د شداد للنائب العام يعني ضمنيا عدم اعترافه بمجلس موسي الكندو لانه ومن الطبيعي ان يتسلم الاستاد والنادي بعد تحريره من قبضة جماعة سوداكال هو َمجلس الكندو.

** اذا تحرر النادي والاستاد من قبضة سوداكال.. هل نسلمه الشيطان يا صديقي شداد ونتسأل من المسئول عن مجلس الكندو ومن كلفه بادارة المريخ….. اليس هو الاتحاد العام.. فكيف لا يكون الاتحاد مسئولا عن استلام الاستاد وتسليمه للمجلس المكلف

** واضح جدا ان د شداد غير مقتنع بقرارات لجنة اللواء عامر الثلاثية بشأن المريخ وغير مقتنع بمجلس الكندو ولا نستبعد ان يعلن في اي لحظة ان سوداكال المسئول الاول والاخير عن جمعية الانتخابات… رغم ايقاف سوداكال ووقوفه امام لجنة الانضباط والتي لم تصدر قرارها بعد…وفي نهاية الامر لا نستبعد اي يصدر شداد قرارا بتكوين لجنة تطبيع يقودها سوداكال.. كل شيئ وارد

** د شداد قال في خطابه.. لن نتدخل في الشان المريخي… طيب كونتو لجنة ثلاثية ليه ووافقتو علي مجلس الكندو ليه …. وليه ليه ليه نسيت ايامنا ليه

** شعب المريخ يريد ان يعرف هل اعتمد الاتحاد العام جمعية سوداكال العبثية التي عقدت في الاسبوع الماضي… وهل اعتمد تعديلات النظام الاساسي. المجازة من الجمعية العبثية .. وهل اعتمد عضوية سوداكال.. والاتحاد العام هل هو موافق علي استخراج عضوية المريخ من مكانين.. نادي المريخ وحديقة الموردة…. جمهور المريخ مغيب وكل هذه الاسئلة في حاجة الي اجابة وقد شبعنا من تصريحات موسي الكندو وعلي اسد واللواء عامر ومحمد جلال ونصرالدين حميدتي والفاتح باني وغيرهم من العباقرة

** استاد المريخ وناديه ما زال تحت الاحتلال الاسرائيلي اقصد السوداكالي و مجموعة الكندو وصلت حتي الفريق البرهان رئيس المجلس السيادي ووصلت لدكتور حمدوك رئيس الوزراء وللفريق الكباشي والفريق ياسر العطا والنائب العام ومدير الشرطة وبرضو ما فيش فايدة… دولة باكملها فشلت في تحرير الاستاد والنادي..

** محمد سيد احمد الذي لا يتمتع باي صفة تخول له استلام استاد ونادي المريخ قاد عملية ( العاصفة) لتحرير الاستاد والنادي ولم تفلح محاولاته .. وسيد احمد اطلع علي خطاب الشرطة وقد وردت فيه عبارة محمد سيد احمد ممثل الاتحاد العام ولم يترجي الشرطة بتعديله وتسبب في اكبر مشكلة ومن الطرائف ان الصادق مادبو الساعد الايمن لسوداكال والذي يعمل في الظل اكد ان علي اسد لا علاقة له بمجلس المريخ ولن يسلمه الاستاد وتم فصله من المجلس وخمسة اخرين في جمعية سوداكال العبثية

** محمد سيد احمد ادلي بحديث ساخن امس واكد ان قضية المريخ قضية امن قومي وعلي الدولة ان تعلم ذلك ودعا الي ثورة جماهيرية عاتية تقتلع الاخضر واليابس و تعيد المريخ المختطف الي اهله….. نؤيدكم ونقف من خلفكم

** سوداكال اصدر بيانا هزيلا ردا علي قرار النائب العام باستلام الاستاد والنادي وهدد بالذهاب الي الاتحاد الدولي وسوداكال ما زال يسيطر ويصدر القرارات وفي يمينه مدثر خيري وامس قام بارسال خطابات الفصل من المجلس ومن عضوية المريخ الي موسي الكندو وعلي اسد وهيثم الرشيد ومحمد سيد احمد

** زول يتحدي النائب العام اعلي سلطة قانونية….. دي ما سمعنا بيها .

** دولة بحالها تفشل في تحرير استاد المريخ وناديه.. ده نسميهو شنو

** سوداكال قال لمجموعة من الصحفيين لن اترشح في الانتحابات القادمة….. .. نقسم انك ستترشح يا الضيعت ابوعشرين ومحمد عبدالرحمن وانتهيت من استاد المريخ وبعت مبادئ وقيم المريخ وجايب لينا كل يوم مدرب وخليت المريخ مضحكة في فيفا

** الواحد يقول ليك.. صفوة وافتخر…….. تفتخر علي ايه وناديك واستادك محتل

** كثير من الوقفات المريخية الاحتجاجية شهدناها امام مكاتب الاتحاد العام وكانت ضعيفة وهزيلة ولم تغير من الوضع شيئا والمسيرة المعلنة اليوم نرجو ان تتوجه للاستاد وتحاول تحريره. بدلا من الوقوف ببلاهة امام مكاتب الاتحاد العام

** لجنة الانتخابات تبع الاتحاد العام اعلنت امس الاول عدم اشرافها علي انتخابات المريخ بحجة ان النطام الاساسي للاتحاد العام والنظام الاساسي لنادي المريخ يمنعها من ذلك… وطبعا ده ضحك. علي الدقون والعقول لان اللجنة المحترمة كانت علي علم بالنظام الاساسي للاتحاد والمريخ وقبلت التكليف فمن هي الجهة التي اجبرتها علي تغيير رايها في هذا التوقيت.

** اربعة سنوات كاملة ونحن نتحدث عن النطام الاساسي لنادي المريخ.. ننام ونصحو علي النطام الاساسي والان لا نعرف والجمهور لا يعرف هل تقام انتخابات المريخ بنطام الكندو وعلي اسد المجاز في جمعية ٢٧ مارس ام بنظام سوداكال المجاز في الاسبوع الماضي عبر جمعية فوضوية

** بالطريقة دي اتوقع ان يحكم سوداكال المريخ لسنوات اخري

** غايتو الحاصل في المريخ ده غريب وعجيب ودي شيتا اصلو ما شفنا.لا في الناس ولا في الريل .. والاتحاد العام يتحمل المسئولية كاملة

** فيما يبدو ان الاتحاد العام يرفض عودة الجمهور للمباريات.. خوفا علي سوداكال.. وبدليل ان الاتحاد لم يسأل اتحاد حلفا ولا اتحاد النهود ولا اتحاد نيالا وابوحمد كيف دخل الجمهور مباريات مريخ هلال في كاس السودان
وحجته ان ذلك مختصة به السلطات الصحية

** اللواء عامر رئيس اللجنة الثلاثية الشهيرة جاء وبعد قفل باب الترشيح لمجلس المريخ واصدر ثلاث قرارات منها الغاء رسوم الترشيح وتحدث عن لجان انتخابية وقانونية. وووو

** ننتظر نشر كشوفات العضوية من هنا ومن هناك ونشر كشوفات المرشحين وطبعا نتوقع طعون في العضوية َوفي المرشحين تبع مجلس الكندو.. وكان من المفترض نشر كشف العضوية قبل فتح باب الترشيح لعضوية المجلس

** تم قفل باب الترشيح لعضوية مجلس المريخ َولم يترشح سوداكال ولكن سوداكال ممكن يفتح باب ترشيح لوحده ويعقد جمعية انتخابات لوحده ويفوز لوحده… القصة هايصة

** بقدرة قادر وبالبلطجة اصبح سوداكال اشهر من فيصل العجب

** لعن الله العنصرية ومن يتحدث عن العنصرية… نحن قضيتنا المريخ واستقرار المريخ والمريخ مريخ كل السودانيين من حلفا الي نمولي حتي بعد فصل الجنوب ومن بورتسودان للجنينة.

** كلنا يعلم من اسس للعنصرية في المريخ.

** الفنان محمد عيسي انسحب من سباق الرئاسة المريخية حفاظا علي الوفاق والوحدة والتحية له َونرجو كذلك ان يتنازل الاخ مجذوب المجذوب عن ترشيحه ويقف مع القنصل حازم اذا كانت هنالك انتخابات حقيقة

** مجموعة القنصل حازم قوية جدا وتضم شخصيات تتمتع بالخبرة والتجربة ونهنئ كابتن عادل ابوجريشة الفوز بعضوية المجلس بالتذكية والامنيات بالتوفيق لطارق تفاحة وحسن ادريس وبقية المجموعة… ونكرر اذا اقيمت انتخابات

** جماهير المريخ تعشم في قرار من لجنة الانضباط بايقاف سوداكال عام عامين ثلاثة..

** كنا نعشم في وزير شباب ورياضة اتحادي قوي يتخذ قرارا ثوريا بحل مجلس المريخ وتحرير استاد المريخ وناديه دون الالتفات للانحاد الدولي…. ولكن يا حسرة

** بالمناسبة بطلنا محمد عبدالرسول قال بعد وصوله مطار الخرطوم.من طوكيو . انسحبت من امام اللاعب الاسرائيلي استجابة لرغبة الشعب السوداني… وكان السيد الوزير قد خدع كل العالم وادعي ان بطلنا انسحب بسبب المرض

** ساضطر لترك الكتابة عن المريخ وسوداكال والكندو في الايام القادمة لان الكتابة عنهم اصبحت مملة وساركز علي المتخب الوطني الذي يستعد لخوض معارك شرسة في ثلاث منافسات هامة

** في مثل هذا اليوم من العام ١٩٩٢ رحل عن دنيانا رجل المريخ القوي حسن ابوالعائلة الوحيد الذي كان لاعبا وتقلد منصب رئيس النادي… نسأله تعالي ان يتغمده بواسع رحمته

** الخرمجة في برمجة مباريات الدوري الممتاز مسألة عادية ونحن في السودان ولسنا في انجلترا او اسبانيا او مصر او السعودية

** المريخ كبير البلد واصل مشوار الانتصارات في الدوري الممتاز وتفوق علي الاهلي مروي مساء امس بهدفين والجديد في المباراة ان بكري المدينة لعب المباراة كاملة وعاد لاحراز الاهداف بعد صيام طويل باحرازه الهدف الثاني من خطفة رائعة والجديد ايضا عودة ضياء الدين والتكت للتشكيلة وادي الاحمر بتميز في الشوط الثاني وكسر عناد الاهلي الذي لعب مدافعا واعتمد علي الهجمات المرتدة واضاع رماته فرصتين سهلتين خلال الشوط الاول

** شهدنا ربكة كبيرة في دفاع المريخ خلال نصف ساعة من الشوط الاول وحارس المرمي محمد المصطفي استحق التقدير والاشادة بابعاده اكثر من كرة خطرة

** اشراف غارزيتو علي مباراة امس لم يكن مقبولا لانه وصل الخرطوم قبل يومين من موعد المباراة والحمد لله جات سليمة

** جرت مباراة المريخ واهلي مروي في حواشة المريخ التي نطلق عليها مجازا ملعب المريخ وتعبنا والله من الحديث عن ملعب المريخ الذي لا يصلح لممارسة كرة القدم

** الهلال انتصر علي هلال الابيض اضعف فرق الدوري الممتاز بسباعية نظيفة.وكالعادة هيص اعلامه للانتصار الكبير وكتب الاغنيات في محمد عبدالرحمن ولم ينس التريقة علي المريخ بحكاية الوحدات الاردني ولم يكتب اي قلم ان هلال الابيض ضعيف ومنتهي ومستسلم

** اين كان محمد عبد الرحمن في مجموعات دوري ابطال افريقيا ومعلَوم لدينا ان الهلال لديه هدف وحيد في دوري المجموعات وفشل في احراز اي انتصار بارضه

** حتي الان عشرة اهداف من اهداف محمد عبدالرحمن في الدوري الممتاز من ضربات جزاء واغلبها مشكوك في صحتها

** كتاب الهلال ما بختشو يسخرون من المريخ ويتحدثون عن الوحدات الاردني ويتانسون المقاولون العرب والترجي وكمال ترباس وقال احدهم بدون خجل ان السبعة دي كان مفترض تكون في شباك المريخ لو لا الفاتح باني وهو يعلم ان فريقه خسر امام المريخ اربعة مرات علي التوالي….. مشكلة الهلال في كتابه

** ماذا يفعل المريخ بجمال سالم الذي خان الاحمر وذهب للازرق… اعادة جمال سالم الحارس المخرف الراكوبة جريمة في حق المريخ… حراس المرمي المميزين صغار السن موجودين في الدرجة الممتازة والدرجات الاخري

** نهنئ الجنرال محمد الحسن مضوي بمقعد رئيس اتحاد الخرطوم وهو اهل له والامنيات بالتوفيق في قيادة اكبر اتحاد محلي والتحية للجنة الاستئنافات وهي تبطل قرارات لجنة الانتخابات الغير مسئولة وتعيد الحق لاهله وهاردلك لمن صرف المليارات ليتقلد المنصب الكبير ولم يحسبها صاح وهاردلك للاندية التي باعت مبادئ وقيم الرياضة وارتضت بالرشوة ومسحت تاريخها

** شكوي الاهلي ضد المريخ تم رفضها لان الاتحاد العام لا يستطيع ان يقف في وجه المريخ

** كيف يتم تقديم شكوي قبل المباراة… دي حاجة غريبة ونرجو من الاتحاد العام شطب هذه الفقرة من لائحة المنافسة

** انتقدت حكمنا الدولي الفاضل ابوشنب بادب في تعليقي علي احداث مباراة المريخ والاهلي وبعضا من كتاب الهلال انتقدوه بقلة ادب واساءوا اليه منهم كاتب جديد يدعي القوس يعتقد وهما انه نجيب المستكاوي..

**. ظهرت كاتبة هلالية جديدة تدعي صفاء الاصم وربنا يزيد ويبارك

** فورة الهلال دي دواها عن سيف تيري وبكري المدينة وتوني وبقية العقد الفريد

** فليذهب ميسي وبرشلونة قادر علي صناعة النجوم والمحافظة علي مكانته…. هذا ما قاله رئيس برشلونة…. ونحن في المريخ نفكر في اعادة جمال سالم

** كاتب سياسي مغمور حاول ان يضع دسيس مان في مقارنة مع الزعيم محمد وردي…. واعترض علي الاحتفال بوردي… والله تمام نحن في اخر الزمن

** الف مبروك للتلميذ النابغة محمد ابن شقيقي عبدالعظيم محمد شريف بالنجاح الباهر في امتحان مرحلة الاساس وعقبال الجامعة والتهنئة موصولة للتلميذ عبدالرحمن الرشيد عبدالرحمن وعبدالرحمن محمد عبدالرحمن ومزيدا من التفوق وايضا التلميذ الشاطر مؤتمن جمال الدين عبدالرحيم عبدالله تفوق في امتحان الاساس واحرز ٢٦٠ درجه واسعد والديه واسرته الكبيرة… تهانينا وكل هؤلاء المتفوقين من الكلاكلة القبة

انت لو حكمت قلبك ما اظن ترضي بنهايتو

** اخر دبوس

** بالهباب الحاصل ده تبقي انتخابات المريخ في مهب الريح .

قد يعجبك أيضا
4 تعليقات
  1. احمد التجاني يقول

    حلفتك بالله يا ابو الدبابيس: لو كان المريخ هو اللي فاز على هلال الابيض بسبعة اهداف نظيفة وكان يلعب معه محمد عبدالرحمن هل كنت قلت ما قلت؟ الاستاذ محمد كامل الكاتب المريخي العظيم قال ان الهلال احرز سبعة اهداف كل واحد منها اجمل من الثاني. هؤلاء هم الاخيار الذين يقولون الحقيقة حتى على انفسهم.

    اما انت يا ابو الدبابيس فليس لي مزيد من التعليق لك غير:

    وعين الرضا عن كل عيب كليلة وعين السخط تبدو المساويا.

  2. صلاح يقول

    هههههه عفيت من سدوكل أبزرد القنعك من الكتابة عن المرخرخ وخلاك تتجه للكتابة عن المنتخب الوطني، وكتر خير سدوكل والله، وأغلب الظن إنكم كلكم ستعودوا صاغرين لدعم سدوكل وتمجيد، وبكرة نقيف جنب الحيطة ونسمع الزيطة على قول الأستاذ محمد كامل سعيد 😆😆
    كل فريق يلعب مع الهلال سيد البلد أبزرد بتطلعوهوا ضعيف حسدا وحقدا من عندكم بس، وبكرة لمن الوصيف الواهن الضعيف بإذن الله تعالى ياخد الأربعة حبات، ياريت برضو تكتبوا لينا عن وهنه وضعفه !!
    كلام عجيب ومتناقض يكشف حقد وغل وغيظ المرخرخين، وزعلتهم الطائرة تشق بطنهم علي تسجيل الولد ميدو ولون الدم في جامعة الهلال للتربية الوطنية، ومرة تنتقد سدوكل علي تفريطه في الثنائي ومرة تقلل من مستوي ميدو كواي القلوب وتقلل من قيمة أهدافه !!
    في زعلة وورم فشفاش أكتر من كدة 😆😆😆

  3. احمد التجاني يقول

    ثم عاد ابو الدبابيس وقال “مدبسا”: نصف ضربات الجزاء التي احرزها الغربال مشكوك فيها .. يا راااااااجل , وحاول ان يقارن بين الهلال الآن والهلال ايام مباريات البطولة الافريقية رغم اختلاف المدرب واللاعبين. انه الخلط واللت والعجن و”التدبيس” كيفما اتفق.

    وعين الرضا عن كل عيب كليلة وعين السخط تبدي المساويا

  4. خالي شغل يقول

    الله لا كسبك يا ود الشريف قلت لي ترباس مالو؟ هههههههه بس نسيت علي قاقرين لمن قال للتوانسه بين الشوطين كفاااايه هو هلال سايب كفاااية ههههه

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد