السبعة دي عارفين كانت ح تكون وين؟

صابنها

محمد عبد الماجد

السبعة دي عارفين كانت ح تكون وين؟
• الهلال الليلة مفروض كان يلعب مع المريخ.
• البرمجة بتقول كدا.
• الجدول.
• المريخ عرفها.
• الفاتح باني مرقهم.
• مرقنبو قرنبو.
• عملوا شتات.
• قدوا السلك.
• هروب رسمي.
• اتخارجوا من بدري.
• يعني انتوا فاكرين الهروب دا إلّا يكون من الملعب.
• إلّا تشيلوا الكورة.
• ممكن تهربوا قبل المباراة.
• هروب مكاتب.
• هروب ظريف كدا.
• عرفتوها والله.
• الفاتح باني – عارف الهلال الايامات دي سمو فاير.
• قام عمل شنو؟
• طلّع الجماعة منها.
• ضحى بي هلال الابيض.
• ونحن مفروض نلعب مع منو؟
• مع المريخ.
• يقولوا ليكم الكلام مية مرة.
• الهلال الايامات دي لا بتقابل ولا حاجة.
• إلا تكونوا قناعين من روحكم؟
• معانا مريخابي بعد الهلال جاب الهدف الرابع نفسو كتم.
• وقت قام – قال النتيجة كم؟
• قالوا ليه سبعة.
• رجع كاتم تاني.
• لغاية الآن ما قام.
• الهلال فيه اتنين (ميسي).
• ميسي يصنع.
• وميسي يسجل.
• دي في برشلونة ما بتحصل.
• ميسي (تربيع).
• ميسي ذاتو طلع من برشلونة.
• ونزل وين؟
• نزل في الهلال.
• زمان الكاردينال قال لينا بجيب ليكم (ميسي).
• غايتو السوباط جاب لينا اتنين (ميسي).
• يمين ديل لا بتصاقعوا ولا حاجة.
• ناس تمبش ديل (ميسي) واحد بجردهم من السلسة الفقرية…اتنين ميسي يعملوا ليهم شنو؟
• هسع لو لعبنا مع المريخ.
• وقام تمبش لقى نفسو واقف بين ميسي وميسي.
• ح يتصرف كيف؟
• ح يعمل شنو؟
• موقف صعب شديد.
• يونس الطيب خرج من ملعبه عشان يتصدى لي ميسي – ظهر ليه ميسي اخر.
• والغربال.
• وعيد مقدم.
• وياسر مزمل.
• في حارس مرمى عاقل بقيق قدام الجماعة ديل.
• ياسر مزمل مسك ليه كورة وانطلق بيها نحو المرمى …عينك ما تشوف إلّا النور.
• فجأة كدا لقيت ليك مدافع هلال الابيض (طاير) قدام ياسر مزمل.
• الحاصل شنو؟
• ويونس الطيب واقع في الواطة.
• حالتهم كانت صعبة.
• اتخيلوا المباراة دي كانت ح تكون مع المريخ.
• منجد النيل كان ح يعمل شنو؟
• محمد المصطفى؟
• يا ابوي !!
• جنينة وخفيرها نائم.
• ناس المريخ الشرطة كانوا بجيبوها للغربال.
• بدل سوداكال.
• البعمل فيه الغربال دا ما عمل نصاح.
• وعبدالرؤوف.
• عبدالرؤوف مالو؟
• والله انا ذاتي ما عارف.
• شيء اشوف.
• وشيء ما اشوف.
• هو الحاصل شنو؟
• عبدالرؤوف بشوف فيها بجي فايت فو.
• بمشي وين ما عارف.
• مرة يغرفها.
• ومرة يبرمها.
• وفارس عبدالله – شغال تحويل رصيد.
• ومؤيد عبادين عمل ليه شوارع في الصائد الشمال لهلال الابيض.
• سبعة.
• سبعة يا مفترين.
• قالوا ليك ام درمان فيها (مطرة).
• عارفين المطرة طلعت وين؟
• المطرة طلعت في مرمى هلال الابيض.
• والله يا ناس هلال الابيض ما رضيناها ليكم.
• الاندية التى تلعب امام الهلال الايامات دي مكتملة بتعاني.
• الهلال لعب امام اهلي الخرطوم والازرق كان ناقص لاعب…والاهلي الخرطوم طلع مغلوب 0 / 2.
• انتوا يا هلال الابيض عاوزين تلعبوا مع الهلال ناقصين؟
• عملها فيكم حقار.
• حقار طلع فعلا حقار.
• غايتو السبعة دي لو شافوها ناس المريخ.
• لا سوداكال.
• لا حازم.
• لا محمد سيد احمد.
• لا مجذوب المجذوب بقعدوا ليكم.
• الجاكومي ذاتو بعد السبعة دي احتمال كبير يسحب تشريحه.
• يا عالم.
• يا ناس الجماعة ديل بقوا ما بتصاقعوا.
• انا قاعد بتفرج ساكت …جاتني فلايت.
• اسمع ليك (طق) في السلسة الفقرية منها ليها كدا.
• هو الحاصل شنو؟؟
• هو الزول دا مالو؟؟؟؟؟
• الغربال فاكر نفسو بيلعب في الدوري الاسباني.
• يا الغربال نحن (عيون) للحاجات دي ما عندنا.
• ما عندنا قدرة للكلام البتعملوا فيه دا.
• يا صلاح عادل – يا زول انت عاوز تعمل شنو؟
• قوة.
• وحماس.
• وحرة قلب.
• وكمان فنان.
• نحن ذاتو اتحيرنا.
• يونس الطيب استقبل سبعة اهداف …وطلّع تمانية.
• يعني نتيجة المباراة كان مفروض تكون 15 / صفر.
• قالوا ما شاءالله.
• قولوا تبارك الله.
• فريق غالب سبعة.
• فريق حقق الانتصار في تمانية مباريات على التوالي.
• ما شاءالله.
• وتبارك الله.
• فريق حافظ على شباكه نظيفة في تمانية مباريات.
• دي بتحصل في حتة؟
• دي ممكن تبقى؟
• ما شاءالله.
• اللهم احفظها نعمة من الزوال.
• يفوت ارنق يجي الطيب عبدالرازاق.
• عادي ما بنشع ربي أي شيء.
• يتصاب اوتارا يدخل عبداللطيف بويا.
• عادي.
• ولا في أي فرق.
• وبرضو الشباك نظيفة.
• يقيف ابوعشرين.
• يقيف ابوجا.
• برضو شباك الهلال نظيفة.
• ما بنشع ربي أي تغيير.
• نلعب بي 11 يطردوا لاعب من الهلال.
• برضو الشباك نظيفة.
• يحسبوا ضربة جزاء على الهلال في مباراة الهلال والخرطوم الوطني ينفذ ضربة الجزاء قلق .
• ابوعشرين يصد ضربة الجزاء.
• وشباك الهلال تظل نيظفة.
• كلين شيت.
• 8 مباريات.
• اها بعد 3 اسابيع.
• بعد شهر.
• شهر ونص.
• يا ناس المريخ ح تلعبوا مع الهلال ولّا ح تصرفوا كيف؟
• الفاتح باني بكون بفتش ليه في مخرج؟
• بكون بفتش ليه في طريقة.
• يا زول سوداكال الموضوع دا صعب عليه.
• غايتو يا سوداكال فلاحتك تاني إلّا تعمل في تأجيل مباراة القمة.
• امسك في الفاتح باني قوي.
• لو فقدتوا الفاتح باني ..السبعة دي ح تبقى عليكم.
• ……….
متاريس
• عبدالرؤوف ممكن يكون نجم المباراة الاول.
• لا صلاح عادل.
• لا اباذر ميسي.
• لا ابوعاقلة.
• لا فارس.
• لا مؤيد.
• والله انا ذاتي ما عارف.
• عليكم الله ما تسألوني من الحاجات دي.
• عبدالرؤوف سجل ليه هدف – في الاعادة ما بنزل.
• في النت ما بتحمل.
• ياسر مزمل في (10) دقائق …ِشفنا منو العجب.
• والله ياسر مزمل دا كمان حكاية.
• مع الغربال والشعلة وعيد ومحمد موسى ما عارف ممكن يحصل شنو؟
• عثمان ميسي نفس المستوى.
• عثمان ميسي ماشي لي قدام.
• اوتارا وارنق لعبوا مباراة كبيرة.
• وابوجا كان اسد.
• واطراف الهلال دافعت وهاجمت.
• اصلو ما في زول قصر.
• الليلة المريخ يلعب امام الاهلي مروي.
• اوعكم من المطر.
• غايتو لو الفاضل ابوشنب ظهر …المريخ ما عندو مشكلة.
• الليلة الله يستر من صفوت ميرغني.
• وشانتير.
• لو ديل طلعوا منها …المريخ ما بمرق منها.
• عاوزين نحسم الدوري من بدري.
• عشان نتفرغ للحاجات التانية.
• سفيان مشجع الهلال …سجل اجمل اهداف الهلال.
• هذه الروح ..هي سر ابداع الهلال.
• واصلوا في هذا التميز.
• ما تقيفوا.
• الجهاز الفني للهلال …شغال شغل كبير.
• اتخيلوا المباراة دي في وجود جمهور.
• كان بحصل شنو مع (الميسيات) دي.
• على الاندية ان تحمد الله انها تلعب امام الهلال بدون حضور الجماهير.
• الشغل دا شغل جماهير.
• فريق هلال الابيض لم نتمن له هذه الخسارة الكبيرة.
• نتمنى ان لا تأثر هذه الخسارة في هلال الابيض.
• هذا المصير سوف ينتظر كل اندية الممتاز.
• تبقى للهلال 7 مباريات.
• ومباراة مع المريخ.
• مباراة المريخ الفاتح باني يضاير فيها من اسبوع لي اسبوع.
• مع السبعات دي ما اظن نلعب مع المريخ.
• صلاح عادل.
• عبدالرؤوف.
• ياسر مزمل.
• مفروض يتم ضمهم للمنتخب.
• المنتخب يحتاج لهذا الثلاثي.
• منتخب ما فيه صلاح عادل وعبدالرؤوف وياسر مزمل …دا منتخب شنو؟
• المنتخب في الوقت الحالي في حاجة لهذا الثلاثي.
• مصلحة المنتخب تستوجب ذلك.
• ونتوقع على الاقل ان يضم الجهاز الفني للمنتخب على الاقل لاعبين من هذا الثلاثي.
• السبعة دي ذكرتنا الوحدات.
• …….
• ترس اخير : قولوا ما شاءالله.