الهلال بشكله دا لو لعب كل يوم ما كعبة معانا
صابنها
محمد عبد الماجد
الهلال بشكله دا لو لعب كل يوم ما كعبة معانا
· اول حاجة عاوز اتكلم ليكم عن لجنة المسابقات في الاتحاد العام – لجنة الفاتح باني.
· زمان جبنا لينا (مقاول) – وقلنا ليه عاوزنك تبني لينا قطعة الارض دا – سقناه ومشينا بيه على قطعة ارض ناصية. فاتحة على تمانية شوارع – قطعة ارض مكعبة.
· قطعة ارض زي (صينية الحركة) فاتحة على كل الاتجاهات.
· المقاول ضرب تلفونات.
· ومشى قعد ليه تحت شجرة.
· وشرب ليه سيجارة.
· وقال لينا جيبوا لي موية باردة.
· جبنا ليه الموية الباردة.
· تاني ضرب تلفون.
· قال لينا جيبوا الي القهوة.
· جبنا ليه القهوة.
· في سماسرة وقت تكون عاوز منهم شغل بدخلوا ليك في دور (الفلافسة).
· المقاول مشى مننا بعيد.
· وقف براهو.
· استبدل الشريحة.
· ضرب بيها تلفون.
· طلع الشريحة – ورجع الشريحة الاولى.
· وحن واقفين نعاين.
· جانا راجع.
· قلنا ليه يا زول انت عاوز تعمل شنو؟
· الموضوع دا ما صعب كدا.
· قطعة الارض دي ما في الاراضي العربية المحتلة.
· ما تقعد تشرع لينا كتير.
· قال لينا : لا ما في حاجة…بس عاوز اضرّب ليكم حساباتكم – عشان خلال 6 شهور اسلمكم البيت جاهز.
· قلنا ليه جميل.
· وهو المطلوب.
· ونحن جاهزين.
· مشى مننا اقرب دكان.
· نزل ليه رصيد.
· ضرب تلفون تاني.
· بالشريحة الاساسية.
· نحن واقفين نعاين فوقو.
· جانا راجع (منبول) زي الهجمة المرتدة.
· قلنا ليه في شنو؟
· قال لينا : عاوز لي (18) مروحة سقف.
· قلنا ليه (18) مروحة لي شنو؟ نحن الاساس ما حفرناه.
· قال لينا : اصلا انا ببدأ من السقف.
· ببدأ من فوق.
· قلنا يمكن دا فهم جديد.
· يمكن دي (العولمة) البقولها.
· حرية ..سلام …وعدالة.
· عاد نقول شنو؟
· برضو فهم!!
· قلنا ليه لكن انت مقاول غريب ..لا طلبت اسمنت لا طوب لا خرسانة …طوالي دخلت لينا في (المراوح)…الله يطمن قلبك.
· قلنا انا اصلا شغلي كدا.
· دي طريقتي في الشغل.
· نحن (الفار) لعب في عبئنا – مشينا على تقنية الفيديو.
· تتخيلوا لقينا شنو؟
· لقينا المقاول دا عندو خالو عندو (17) مروحة عاوز يفكها – عاوز يبيعها.
· والمقاول دا قال لينا عاوز (18) مروحة عشان يبيع لينا مراوح خالو دي.
· اكيد ح تقولوا طيب وقت خالو عندو (17) مروحة – ليه المقاول قال لينا (18) مروحة؟
· بسيطة.
· عشان يعمل (تمويه).
· نحن شفوت عارفين أي حاجة.
· عشان صاحبكم ما يتكشف.
· لذلك قال لينا (18) مروحة.
· لكن نحن عرفناه.
· كشفناه.
· نقشنا ليك الفيلم.
· جبنا (المراوح) عمكم دخل لينا في (المكيفات).
· مشينا اطقسنا عن الموضوع – لقينا المقاول دا عندو اخوه عندو (4) مكيفات عاوز يفكها.
· مرت الست شهور التى حددها لنا المقاول لتسيلم البيت – لقينا نحن ما عملنا أي حاجة غير اننا اشترينا المراوح والمكيفات.
· تاني (طوبة) ما وضعناها.
· ولا حجر.
· هسع لجنة المسابقات بتاعة الفاتح باني شغالة بنفس الطريقة بتاعة (المقاول) دا.
· ببرمجوا المباريات على حسب مصلحتهم.
· على حسب الطلب.
· زي الفول.
· فول سادة.
· عليه جبنة.
· معاه رغيفة زيادة.
· شغالين كدا.
· مباراة القمة في الاسبوع الرابع يطفشوها ليك نهاية الموسم.
· ومباراة الهلال وهلال الابيض فجأة يجيبوها ليك قدامك.
· البرمجة بتظهر (فجأة).
· مرات بتكون ماشي في الشارع – في الزحمة ، تقوم تلاقي ليك زول ليك سبع سنوات ما لاقيتو.
· الشكل ما غريب عليك.
· لكن الاسم طار منك.
· الموضوع دا زي جدول مباريات الدوري الممتاز.
· فجأة كدا يقولوا ليك تلعب مع هلال الابيض.
· وفجأة يقولوا ليك تم تأجيل مباراة القمة.
· رغم ان البرمجة طالعة من الفاتح باني ذاتو.
· الغريب في لجنة المسابقات – ان اللجنة بتضع جدول المباريات وتقوم من تلقاء نفسها كدا بتأجيل المباريات.
· الاسبوع الـ 11 يجيبوا ليك في الاسبوع الخامس.
· والاسبوع السادس تلقاه في الاسبوع رغم 18.
· مرات في زول وقت الظروف تكون صعبة بقوم يحول السماية.
· يعني السماية بدل بعد اسبوع يعملها بعد اسبوعين.
· الناس ظروفه ظروف.
· وفي ناس بعملوا السماية بعد 3 اسابيع.
· وفي ناس لمن الشافع يطلع يلعب في الشارع ويقيف في الباب (حتين) يعلموا ليه سمايتو.
· والله انت يا الفاتح باني لو كنت مساك (الموية) – البلد دي يا غرقت ..يا ماتت بالعطش.
· الفاتح باني دا لو كان رجل مرور ..كان وصل المخالفة بعد ما يحررو ليك بقوم بتأجيله.
· الفاتح باني دا لو كان (طبيب) كان بدخل العميلة وبعد عملية التخدير …بفتح البطن ..وبعد ما يدخل على المرارة بقوم بتأجيل العميلة للأسبوع القادم.
· مرة كان عندنا (قريبنا) كل ما يحدد تاريخ لعرسه بقوم بتأجيل العرس وقت التأريخ يقرب.
· الظروف صعبة.
· قربنا دا اصلو ما بعرس.
· قريبنا دا اظنو شغال في لجنة المسابقات.
· لكن مع ذلك ومع رفضنا لهذه (الخرمجة) التى لا تحدث في الخريف – نحن الهلال بشكله دا لو لعب لينا في كل يوم ما كعبة معانا.
· والله الهلال بهذا الحال لو قلتوا يلعب في اليوم مباراتين ما عندنا مانع.
· نحن لاقين الهلال وين؟
· انتوا ما شفتوا ناس ابوحمد؟
· انتوا ما شفتوا ناس النهود؟
· انتظروا ناس سنار.
· نحن مباريات الهلال بقينا ننتظرها بفارق الصبر.
· مع ذلك وعشان نكون امنين …مباراة الهلال الماضية مع هلال الساحل ..الشوط الاول دخلنا في حالة صعبة.
· ما عرفنا نمشي وين؟
· نحن ما عندنا صبر للشوط التاني.
· عليكم الله احسموا لينا من الشوط الاول.
· نحن بقينا ناس (لقب) ساكت.
· ناس بطولة.
· عشان كدا احسموا لينا من الشوط الاول.
· فريق البطولة بحسم من اول شوط.
· بعدين الاندية دي في الشوط التاني بتتلايق شديد.
· والتحكيم ما مضمون.
· ويمكن تصب مطرة تلخبط المباراة.
· احسموا لينا عليكم الله من الشوط الاول.
· نحن لو لقينا الفاضل ابوشنب الدوري الممتاز نشيلو من الاسبوع الرابع.
· في مريخابي قال سيف تيري مصاب.
· والتش كان عندو رباط صليبي.
· وعمار طيفور مصاب.
· والصيني مصاب.
· ربنا يشفى الجميع.
· قلت ليه انتوا الاصابة الكعبة عليكم اصابة الفاضل ابوشنب.
· الفاضل ابوشنب لو جاءه رباط صليبي ..المريخ بنزل التانية.
· امسكوا في الفاضل ابوشنب قوي.
· بحسب ضربة الجزاء برة 18.
· ومرات برة الملعب ذاتو بحسب ضربة الجزاء.
· ولا بخجل.
· ولا بتعقد.
· ………..
متاريس
· الموضوع دخل فيه محمد سيد احمد.
· خلاص جاطت.
· الاتحاد مفروض يقوم بتحويل مباراة المريخ امام الاهلي مروي الى استاد الخرطوم مبكرا.
· عشان بكرة ما تحصل مشكلة.
· بما ان استاد المريخ اصبح في يد الشرطة ..مباريات المريخ يجب ان تلعب في استاد الخرطوم.
· حتى لا تحدث كارثة.
· وحتى لا يتم تأجيل مباريات المريخ وتمديد الموسم.
· الهلال حتى يوم 18 اغسطس سوف يلعب ان شاءالله 5 مباريات.
· سوف يلعب الهلال امام هلال الابيض اليوم 5 / اغسطس ويلعب يوم 9 اغسطس امام حي الوادي ويوم 12 اغسطس امام توتي ويوم 15 اغسطس امام هلال الفاشر ويوم 18 اغسطس امام المريخ الفاشر.
· مباريات الهلال المتبقية امام الامل وهلال كادوقلي والمريخ…هذه المباريات لا ندري متى سوف تلعب؟
· المنتخب سوف يسافر يوم 20 اغسطس الى الامارات وسوف يلعب في بداية شهر سبتمبر امام المغرب ثم يأتي ويلعب في يوم 7 سبتمبر امام غيينيا والبطولة الافريقية مرحلة التمهيدي لو بدأ الهلال من دور الـ 64 سوف تنطلق يوم 10 سبتمبر.
· متى سوف تلعب هذه المباريات.
· غايتو يا باني …لخبطت الحكاية كلها.
· انت والفاضل ابوشنب ومحمد سيد احمد.
· نتمنى ان لا يتسبب الاطراء الشديد في الهلال في خروج الهلال من الخدمة في مباراة اليوم.
· اوعكم من المفاجآت.
· مباراة اليوم امام هلال الابيض ..مباراة صعبة.
· التعازي لمهند الطاهر في وفاة شقيقته ..نسأل الله لها الرحمة والمغفرة.
· …..
· ترس اخير : سوداكال قااااعد.
كنت اتمني ان تقام القمة كما اراد انصار الهليل ونبلهم كالعادة (عملو لينا وجع راس)
هههههه هاااا. بالامس كنت تكبر وتهلل للتأجيل. ماذا جد اليوم . ؟؟. دي نفخة كاذبة ومن داخلكم قلوبكم مقطوعة. ليتكم رضيتم باللعب في موعد البرمجة عشان يتكرر مسلسل زيكو. وبدل نكون عاوزين كورة واحدة حتبقي كورتين.
أديلهم يا ود عبد الماجد يا كايدهم، وكتر لينا من الكلام عن الولد ميدو وفنياته، لأنو تذكير المرخرخين بموضوع ميدو بيجلطهم ويعمل ليهم موية في الضهر، وكل ما يجيب ليه قوون سكريهم بيزيد صليب 😆😆😆
بالله الصبي العجوز أبو المستعار المندلاوي لافي ذي الدربكين في أعمدة كتاب الهلال، ومحل ماتمشي تلقي مخرجاته والعياذ بالله 😝😝😝