ابوشنب مشروبه المفضل يحسب (ضربة جزاء) للمريخ!!

صابنها

محمد عبد الماجد
ابوشنب مشروبه المفضل يحسب (ضربة جزاء) للمريخ!!
• نحن ما عارفين نلقاها من الفاتح باني ولّا نلقاها من الفاضل ابوشنب؟
• واحد شغال تأجيل.
• والتاني شغال تحويل رصيد.
• شوالات …جركانات ..ضربات جزاء.
• الفاضل ابوشنب هو الحكم الذي يطبق عمليا (ضربة جزاء عند اللزوم).
• متى ما كان المريخ في ورطة صرف ليهم (ضربة جزاء).
• التموين (ضربة جزاء).
• الفاضل ابوشنب على ما اعتقد ان مشروبه المفضل هو احتساب ضربة جزاء المريخ.
• قهوة ابوشنب بشربها باحتساب ضربة جزاء للمريخ.
• ابوشنب بجيبوه للمباريات الصعبة بالاسم.
• النجدة.
• عربية الاسعاف.
• اصلو ما بتأخر عليهم.
• عندك واحد ضربة جزاء للمريخ.
• ومرات وقت ضربة جزاء واحدة ما تعمل حاجة …بلحقهم بالتانية.
• احسبوا ضربات الجزاء التى احتسبها الفاضل ابوشنب للمريخ.
• ممكن على الميت كدا تعمل بطولة كاس العالم.
• ضربة الجزاء عند الفاضل ابوشنب على الريحة.
• بالنية بس.
• المدافع لو فكر في المخالفة ساكت ..ابوشنب بحسب عليه ضربة جزاء.
• والله دي ترزي ما بحسبها.
• الحقني يا ابوشنب ..الحقني.
• امير كمال حسم موضوع ضربة الجزاء قبل ما تبدأ المباراة.
• ابوشنب شغال يضحك مع لاعبي المريخ تقول (فضيل).
• الفاضل ابوشنب او فضيل ابوشنب.
• اصلو الحكاية بقى ما فيها شيء فاضل.
• الفاضل شنو اكتر من كدا؟
• معقولة ضربة جزاء كلما كان المريخ في ورطة.
• ضربة جزاء وبدون لاعبي السنية كمان.
• تواطؤ على عينك يا تاجر.
• الاتحاد العام ساعد على انتشار التواطؤ والتلاعب في نتائج المباريات.
• الدوري دا كله ما فيه فريق ملتزم بهذه اللوائح غير الهلال.
• وما في فريق بدفع في التمن غير الهلال.
• شفتوا ليكم فريقين متنافسين بتفقوا على انهم ما يشركوا لاعبي السنية في المباراة.
• هي مباراة وإلّا دعوة؟
• دي ما بتحصل إلّا في السودان.
• وما بتحصل إلّا عند المريخ.
• عادي.
• بتموها (شكاوي).
• وتأجيل.
• وضربات جزاء.
• الحاجات البلقاها المريخ دي لو لقاها فريق في الدرجة الثانية بفوز بالممتاز.
• ولا يتعب.
• ناس الفاضل ابوشنب بتمو الناقصة.
• في واحد قال لي ناس الاهلي الخرطوم لو اشتكوا في عدم مشاركة عناصر السنية في المباراة ح يطلع الفاضل ابوشنب مسجل في المريخ تحت السن.
• الجماعة متفقين.
• خلصانة على هذا الشكل.
• باني وابوشنب العملوه للمريخ جمال الوالي في ايام مجده …ايام كان بنظم ليه كل خميس (بطولة سيكافا) للمريخ ما عملها.
• غايتو وقت شفت المريخ امس – عذرت الفاتح باني في قرار التأجيل مباراة القمة.
• السترة والفضيحة متباريات.
• المريخ بي حالت ودي (5) دقائق امام الهلال ما بصمد.
• ياسر مزمل الايامات دي …شيء تشوف وشيء ما تشوف.
• فو ..بجي فايت فيك.
• والله المريخ بي حالتو دي مباراة القمة لو اتلعبت في 2025 تكون قريبة.
• مع ناس باني ديل ما اظن تكون هناك مباراة قمة في السنة دي.
• الفاتح باني اجل مباراة القمة عشان مباراة المنتخب السوداني امام المنتخب المغربي في تصفيات كاس العالم في سبتمبر القادم – وعلى حسب المستوى الظهر بيه المريخ امس فان مباراة القمة سوف تكون بعد نهائيات كاس العالم في قطر.
• الله اعلم.
• ما بعد التصفيات.
• المباراة سوف تكون بعد النهائيات.
• لو قريبة.
• تقول قاعدين نلعب في نهائيات كاس العالم.
• الفاتح باني مساك جدول مباريات الدوري الممتاز زي الماسك (كشف) البكاء.
• زي الزول البمسك كراسة الكشف.
• شغال قبول اعذار وتقدير ظروف.
• قدر ظروفك.
• ونحن ظروفنا صعبة.
• ونحن ما بنقدر.
• أي زولي يشكو ليه من حاجة يقوم يأجل ليه الدوري.
• تتخيلوا الدوري المصري سوف يعود من جديد في 4 اغسطس وسوف ينتهي يوم 27 اغسطس.
• الاهلي سوف يلعب في هذه الفترة (8) مباريات..وبعد ذلك ينضم اللاعبون لمعسكر المنتخب المصري في 28 اغسطس.
• تتخيلوا الكلام دا.
• في خلال 23 يوم الاهلي المصري سوف يلعب (8) مباريات.
• والمنتخب المصري سوف يلعب في نفس التاريخ الذي سوف يلعب فيه المنتخب السوداني.
• نحن هنا الفاتح باني شغال على كيفو.
• كل اسبوع يأجل الدوري.
• مفروض هسع ما تقولوا الاسبوع رقم 25…مفروض تقولوا دا الاسبوع رقم 25 لتأجيل مباريات الدوري الممتاز.
• لكن يا الفاتح باني حالة المريخ فعلا تستحق التأجيل.
• التش يا دوب في مرحلة التأهيل.
• وسيف تيري والصيني في القاهرة.
• وعمار طيفور لسه مصاب.
• وغارزيتو ما استلم.
• وسوداكال والكندو شكلتهم عجاجتها للسماء.
• وصلاح نمر في بورتسودان عنده ظروف اسرية قاهرة.
• يعني لازم الفاتح باني يقدر الظروف ويأجل الدوري الممتاز.
• والله انا كل ما اشوف الفاتح باني اقول لسه ما سقطت.
• ما في أي حاجة اتغيرت.
• لسه ناس الفاتح باني وحميدتي وجلال والشاعر وحلفا في الاتحاد العام.
• لسه ما في أي تغيير حصل في الرياضة.
• ضربات جزاء.
• واتفاقات تحت التربيزة.
• المريخ امس اخرج الجزولي نوح واخرج محمد عباس وادخل اعمامكم بكري المدنية وتوني.
• عادي.
• الموضوع (مظبط) قبل المباراة.
• متفق عليه.
• يا شداد انت ذاتك عامل ليك لوائح ما في ليها أي داعي.
• لوائح تساعد على التواطؤ والفساد ..والتلاعب خارج الملعب.
• بتفقوا على الحاجات دي برة الملعب.
• الشيء الغريب في اجتماع لجنة المسابقات امس ان اللجنة رفضت كل الشكاوي التى قدمت لها.
• رفض الشكاوي كان لأغرب اسباب.
• تعالوا شوفوا الاسباب التى رفضت بها لجنة الفاتح باني الشكاوي.
• واحكموا براكم بعد كدا.
• نظرت اللجنة الشكوى المقدمة من نادي المريخ بورتسودان حول عدم قانونية مشاركة لاعب نادي سيدو الضعين بلال أحمد في مباراة الفريقين بمنافسة الوسيط بتاريخ 6 يوليو 2021، وبعد استعراض الشكوى والمستندات المرفقة قررت اللجنة رفض الشكوى لعدم تحديد الوقائع.
• رفضت الشكوى لعدم تحديد الوقائع.
• قولوا واحد.
• نظرت اللجنة الشكوى المقدمة من نادي المريخ نيالا حول عدم قانونية مشاركة لاعب الفلاح عطبرة اتير توماس في مباراة الفريقين بمنافسة الوسيط بتاريخ 13 يوليو 2021، وبعد استعراض الشكوى والمستندات المرفقة قررت اللجنة رفض الشكوى لعدم تحديد الوقائع.
• هذه الشكوى رفضت ليه؟
• رفضت لعدم تحديد الوقائع.
• قولوا اتنين.
• نظرت اللجنة الشكوى المقدمة من نادي الاهلي عطبرة حول عدم قانونية مشاركة لاعب الفلاح عطبرة أحمد بلال في مباراة الفريقين بمنافسة الوسيط بتاريخ 27 يوليو 2021، وبعد استعراض الشكوى والمستندات المرفقة قررت اللجنة رفض الشكوى لعدم تحديد الوقائع.
• السبب شنو؟
• عدم تحديد الوقائع.
• قولوا تلاتة.
• انا بقول ليكم الكلام دا من محضر الاجتماع…من التقرير الصادر من الفاتح باني.
• الفاتح باني الذي رفض هذه الشكاوى لعدم تحديد الوقائع …هو نفسه الذي حاسب فريق الخرطوم الوطني وشال منه نقطة تعادله مع هلال الساحل بسبب كسر مهاجم الخرطوم الوطني عوض طلبة للإيقاف بعد ان قام نادي الخرطوم الوطني من تلقاء نفسه بمخاطبة الاتحاد لتصحيح مسار اللاعب.
• يعني هلال الساحل ما اشتكي.
• ولا في زول حدد الوقائع.
• والخرطوم الوطني هو الذي قام بتصحيح الوضع براهو – مع ذلك حرم من نقاط مباراته امام هلال الساحل.
• لماذا لم يحاسب الفاتح باني تلك الاندية التى ارتكبت المخالفات حتى ولو لم يحدد الفريق الذي اشتكى ووقائع المخالفات؟
• سيبكم من هذا الكلام.
• المريخ مشى بشكواه الى (كاس) عندما اشرك مريخ الفاشر لاعبه هشام جنية الموقوف ورفض الاتحاد العام قبول الشكوى بسبب الطريقة التى قدمت بها الشكوى ونتيجة لعدم تحديد الوقائع …مع ذلك المحكمة الرياضية قبلت الشكوى ومنحته نقاط المباراة كاملة…والاتحاد السوداني قبل بقرار المحكمة الرياضة ونفذ قراراها.
• وين كانت (الوقائع) في شكوى المريخ في هشام جنية؟
• المريخ شكوته قدمه في ورقة صندوق علب سجائر.
• لماذا لا يسير الاتحاد العام ولجنة المسابقات على سابقة شكوى المريخ في المحكمة الرياضية؟
• هذه الشكاوي اذا تم الاستئناف فيها كلها سوف يتم قبولها – ما في حاجة اسمها تحديد الوقائع.
• انتوا يا الفاتح باني ما بتتعلموا؟
• ما بتستفيدوا من التجارب؟
• قاعدين ساي – مجرد صور وكائنات لتأجيل مباريات الدوري.
• نرجع الى اتفاق المريخ والاهلي الخرطوم في عدم اشراك عناصر السنية في مباراة الامس ونقول ان المريخ ظل يكسر لوائح الاتحاد ولا يعاقبه احد على ذلك.
• المريخ امام هلال الساحل اشرك 4 محترفين اجانب ولوائح الاتحاد بتلزم الاندية بمشاركة 3 لاعبين فقط.
• لا هلال الساحل ولا الاتحاد علموا شيء.
• هل هناك كان اتفاق اخر بين المريخ وهلال الساحل ام ان الاتفاق كان بين المريخ والاتحاد العام نفسه في هذه القضية.
• المريخ كسر لوائح الاتحاد قبل ذلك بتسجيله حارس مرمى (اجنبي).
• المريخ ظل يشرك باسكال كلاعب (وطني) موسم كامل رغم ان المريخ هو نفسه الذي سحب الجنسية من باسكال.
• منتهى الفوضى.
• والفاتح باني ما عندو حاجة ولا قدرة اكثر من (التأجيل).
• بلد ماشه ساكت.
• واتحاد قاعد في الهوا.
• وفساد – وتواطؤ على عينك يا تاجر.
• ويقولوا ليك المريخ يبحث عن الفوز بالممتاز للمرة الرابعة تواليا.
• بضحكوا على الناس.
• وبعد هذا التواطؤ.
• بعد ضربات الجزاء دي.
• برضو ما عندكم طريقة للفوز بالدوري.
• الدوري والكاس هلالي ان شاءالله.
• اللهم دوري وكاس.
متاريس
• ناس المريخ ممكن يتفقو ا مع منافسهم.
• لكن يتفقوا مع رئيسهم لا.
• امام الاهلي الخرطوم تم طرد لاعب من الهلال منذ الشوط الاول ليلعب الهلال الشوط الثاني كله وهو ناقص مع ذلك حقق الهلال انتصاره على الاهلي بمشاركة لاعبي السنية وبدون ضربات جزاء.
• المريخ امام الاهلي ومن غير مشاركة لاعبي السنية فاز على الاهلي بعد ان احتسب الفاضل ابوشنب ضربة جزاء للمريخ.
• فرق.
• اللهم الدوري والكاس.
• مباراة الهلال اليوم امام هلال الساحل مباراة ما ساهلة.
• احسموا بدري.
• ومن غير ضربات جزاء.
• وبمشاركة عناصر السنية.
• …………….
• ترس اخير : حقنا اصلو ما بروح.