أولمبياد مدينة النهود !!

صابنها

أولمبياد مدينة النهود !!

محمد عبدالماجد

· لمن القي زول قاعد يحضر في تمرين الهلال في قناة الهلال ومباراة ريال مدريد وبرشلونة شغالة في الشاشة التانية ..بشعر بي سعادة وفرحة.

· بحس انا الدنيا لسه بخير.

· في ناس ممكن تحضر في الاذاعة مباراة للهلال فائز فيها الهلال بسبعة اهداف وما تحضر نهائي ابطال اوروبا بين شيلسي ومانشيستر سيتي في بي ان سبورت.

· في زول في شندي لمن يقعد يحكي ليك عن الهلال – بتحس بي اننا مقصرين شديد في حق الهلال.

· في ناس بحبوا الهلال بشكل خرافي…جمهور الهلال كله كدا.

· الزول دا قال لي لغاية الآن انا ما بقدر احضر لي مباراة للهلال في الاذاعة إلّا اذا قعدت للمباراة في الواطة.

· صادقين في حبهم للهلال.

· لمن زار الهلال مدينة ابوحمد شعرنا بالعافية – مرقنا على الناس في الحوش.

· لي زمن ما طلعت لى (سرير) في الحوش.

· في زول لمن الجو يعجبو يقول ليك الجو دا جو مشاهدة مباراة للهلال.

· بدخلوا الهلال في أي فرحة عندهم.

· أي حاجة سمحة عندهم بخصوا بيها الهلال.

· عندما زار الهلال مدينة ابوحمد وحصل هذا التدفق الجماهيري العريض والعشق الخرافي مرقت في الحوش.

· عندي شاحن موبايل رايح …لقيتو.

· ما عارف العلاقة شنو بين شاحن الموبايل؟ …والكلام البقول ليكم فيه دا.

· لكن حقيقة لقيت شاحن الموبايل.

· وقت شفت صور الجماهير والشعب السوداني في النهود في استقبال الهلال وفي تمرينه وفي المباراة – قلت والله البلد دي الحبة ما بتجيها.

· الناس ديل لسه بهذه العفوية.

· بهذا الانطلاق …والحياة والنشاط.

· سمحة العافية.

· ما شاءالله …وتبارك الله.

· الناس ديل لغاية الآن بهذا العشق.

· استاذنا ود الشريف – زعلان عشان كتبنا عن الاستقبال الاسطوري الذي وجده الهلال في النهود.

· والله يا ود الشريف لو شفت (الصور) تخلي محمد وردي ذاتو وتقعد تكتب عن عظمة هذا الاستقبال.

· ود الشريف زعلان عشان عملنا مقارنة بين استقبال الهلال في النهود واستقبال المريخ في نيالا.

· ودي حاجة ما بتزعل.

· دي حاجة واقع.

· ولا بتغالطوا فيها اتنين.

· كمان عاوزين تغالطونا في شعبية الهلال –انتوا يا ناس المريخ صدقتوا؟

· شن جاب لي جاب؟

· مرة بحضر في حلقة بثتها قناة ام درمان وهي تقوم بإعادتها كثيرا جمعت بين الدكتور السفير الفذ علي قاقرين ولاعب المريخ العظيم جادالله…ح تلاقيكم يوم ، عليكم الله احضروها.

· جادالله بتلقائية وصدق كبير كان بحكي عن الهلال والمريخ – والحلقة موجودة بصوت جادالله وصورته في قناة ام درمان.

· جاد الله رحمة الله عليه بحكي عن الكورة في ايامهم …وبرجع للذكريات قال : طبعا زمان اللعب في المريخ كان صعب شديد …اما اللعب في الهلال فقد كان مستحيل عديل كدا.

· الكلام دا كلام كابتن جادالله الذي استطاع ان يهزم الهلال (8) مرات تواليا – مع ذلك لم ينكر كابتن جادالله فضل الهلال وتميزه على المريخ.

· الهلال دا عالم براهو.

· الهلال فرق.

· وانتوا عارفين كدا.

· اسألوا علاءالدين يوسف الذي لعب للمريخ ولعب للهلال ورجع تاني لعب للمريخ.

· فييرا كان بقول لجمال الوالي انتوا الهلال دا ما بتلحقوه.

· والوالي شاهد على الكلام دا.

· وفييرا موجود.

· في هذا العيد كنت اشاهد في برنامج في التلفزيون القومي عن مئوية الاغنية السودانية. البرنامج قدمه نادر احمد الطيب واستضاف فيه باحثين في اغنية الحقيبة.

· الباحث والعارف وليد مصطفي حينما كان بتحدث عن (كرومة) – الفنان المعروف الذي لعب في نادي الهلال – قال وليد ان كرومة مرة وصلته رسالة وهو في تمرين الهلال ..هذه الرسالة كان فيها (قصيدة) مرسلة لكي يتغني بها كرومة بعد ان يلحنها.

· كرومة (لحن) هذه الاغنية في تمرين الهلال.

· انا وقت وليد مصطفى قال كدا – قلت بس – انا عرفت من وين طلع كل هذا الابداع؟

· اغنية الحقيبة دي طلعت من نادي الهلال او كان صاحب اكثر من 90 % من الحانها بيلعب في الهلال …وهذا ظاهر في اغنية الحقيبة (ما رينا هلال) و (اهلا بيه الهلال هلا) و غيرها من الاغنيات التى كتبت في نادي الهلال او تحدثت عن الهلال والقمر الفوق.

· من ثم امتد هذا الابداع وظهر هذا الاثر في المستطيل الاخضر – في صديق منزول وجكسا والطاهر حسيب ومحمد حسين كسلا وفائز نصرالدين ومنصور بشير تنقا ومهند الطاهر وعبدالرؤوف وفي الطريق الشيخ (شيخو) وعبدالصمد المنن.

· قالوا ليك كمان عبدالصمد المنن دا – الجلابية بفصلها في لحظة.

· بلفها ليك تشيلها معاك.

· ترجع بيها.

· عبدالصمد المنن لاعب فريق الميرغني كسلا والذي وقع معه الهلال في التسجيلات الماضية ننتظر قدومه للهلال في التسجيلات القادمة عشان كرومة يرجع تاني يلحن اغنياته في تمارين الهلال.

· انا ما عاوز ارجع للتاريخ – عشان المقارنات معدومة يا ود الشريف.

· انتوا يا ود الشريف بتفتخروا بـي انكم (الصفوة) – وهذا امر لوحده يعني محدودية المريخ – والله انا ما في شيء بتبسطني غير حكاية (الصفوة) دي.

· الصفوة تعني القلة – – الهلال هلال الشعب ..هلال الامة ..كل الناس ..زعلانين مالكم؟

· التخصيص دائما بحدد الحكاية.

· يا ود الشريف انتوا جبتوا كاس مانديلا وبتقولوا نحن ابطال الكاسات المحمولة جوا ..عملتوا كاس مانديلا ( كاسات).

· في زول سألكم؟

· نحن بنفتخر بجمهور الهلال.

· سعداء بهذه الجماهير.

· هلال الملايين.

· عليك الله يا ود الشريف هسع الحصل في ابوحمد وفي النهود في أولمبياد طوكيو حصل؟

· نوع دا قابلكم في حتة؟

· ود الشريف كتب في عموده في (اخر دبوس) : نعتذر لجمهور النهود .هذا الجمهور العرض الجنائزي لهلال (الملايين).

· يا ود الشريف ديل ما بعتذروا ليهم – ديل الهلال حقهم …ما في زول بتفضل عليهم بشيء.

· هذا هلالهم …سعداء به كدا.

· انت قايل الموضوع (كورة)؟

· الموضوع ما كورة.

· شوف الدعوات والمناسبات التى شارك فيها الهلال في ابوحمد ..وفي النهود.

· ورينا مشاركة (اجتماعية) واحدة او مناسبة شارك فيها المريخ عندما زار حلفا الجديدة ونيالا.

· انا عارفكم في الرحلات القادمة سوف تقلدوا الهلال – لكن الحاجات دي ما بتتقلد.

· الحاجات دي (طبيعة) في الهلال.

· ما في زول رتب ليها.

· في زول قال للجهاز الفني للهلال البسوا ليكم (جلاليب) في ابوحمد.

· في زول قال ليهم شيلوا (النقارة) واركبوا الجمال.

· في عطبرة لبى الهلال دعوة مؤيد عابدين.

· وفي النهود لبوا دعوة السمؤال.

· دي رسالة الهلال.

· وفي ذلك هي عظمة الهلال.

· انا كل ما افتح حاجة – بلقى في الهلال دا في حاجات اكبر مما نتخيلها.

· في الهلال لعب الفنان كرومة.

· في الهلال لعب الناقد الرياضي الكبير هاشم ضيف الله.

· الهلال بشجعه وردي والصادق المهدي وعثمان حسين وكمال شداد …عندك رأي تاني يا ود الشريف؟

· وبتكلموا عن الصفوة.

· طبعا ود الشريف لو عاوز تكتل قلبو جيب ليه سيرة محمد وردي.

· ما بقدر يقول أي شيء.

· في ناس نظروا الى مباراة الهلال وحيدوب من خلال المستطيل الاخضر.

· وقفوا في هدف عيد مقدم.

· اهداف الهلال التى سجلها خارج المستطيل الاخضر …اضعاف الاهداف التى يبحث عنها الهلال في الملعب.

· في اهداف لا ترى بالعين المجردة.

· الموضوع اكبر من عيد مقدم والغربال وياسر مزمل.

· نحن ما نحسبها كدا.

· ما شفناه في النهود ..ما شفناه في طوكيو.

· في النهود كانت هناك اولمبياد اخرى.

· دخل المباراة في الظروف دي – ومع الكورونا 15 مليار جنيه.

· انتوا القروش دي يا ود الشريف ممكن تدفعوها لي رمضان عجب ..محمد الرشيد.

· ممكن يدفعها جمال الوالي براهو.

· ممكن يدفعها سوداكال.

· نحن القروش دا بدفعها (جمهورنا) يا صفوة.

· عليكم الله اسكتوا.

· عليكم الله ما تجيبوا لي تاني سيرة (استقبال) في العمود دا.

· الموضوع دا كبير.

· يا ود الشريف انتوا ليكم 6 شهور بتتحدثوا عن التوالي الرابع للممتاز.

· انتوا مصدقين انكم فزتوا بالممتاز 3 مرات على التوالي.

· مقتنعين بالكلام دا.

· طيب وقت مقتنعين بالكلام دا ما تصرفوا حوافز هذه البطولات للاعبين المريخ.

· بس عليكم الله ما تنسوا هشام جنية معاكم.

· لو عاوزين تغالطوا ارجعوا للبيان الذي اصدره رئيس المريخ وقتها محمد الشيخ مدني بعد (فضيحة) مباراة مريخ الفاشر والمريخ والشكوى في هشام جنية.

· الكورة الآن في الملعب.

· دوري وكاس.

· تعالوا شيلوا ليكم بطولة.

· شفتوا الجمهور.

· في ابوحمد ..وفي ام درمان.

· في النهود وفي الخرطوم.

· شفتوا الهلال.

· وعرفتوا الفرق.

· والقى الفرق شاسع.

· كدا هسع يا ود الشريف حلو مشكالكم.

· عندكم جمعيتين.

· وعندكم رئيسين.

· وعندكم مجلسين.

· وعندكم مدربين …(ابراهومة وغارزيتو).

· وعندكم ملعبين.

· شوفوا الكلام دا يا (صفوة)…بعدين تعالوا اتكلموا عن استقبال الهلال.

· نحن ذاتو ما عارفين يوم 6 اغسطس الهلال ح يلعب مع ياتو مريخ؟

· مريخ سوداكال ام مريخ الكندو؟

· غايتو لو جيتوا لينا بي مريخ الكندو بتاخدو سبعة.

· …………..

متاريس

· التعازي للكابتن الخلوق صلاح نمر في وفاة والدته ..ربنا يرحمها ويغفر ليها ان شاءالله.

· الجهاز الفني للمنتخب اختار الشيخ في القائمة الجديدة للمنتخب …والشيخ يستاهل.

· ابراهومة مدربه السابق لعب دور كبير في هذا الامر ..وقد كان ابراهومة يراهن على اختيار الشيخ للمنتخب.

· المدرب معتصم خالد ايضا واصل في تقديم الشيخ بصورة متوهجة.

· الهلال لغاية الآن عنده مشكلة في اللاعب الذي ينفذ الضربات الثابتة.

· في السودان الآن ما في افضل من الشيخ في تنفيذ الضربات الثابتة.

· كورنر الشيخ قون إلّا ربع.

· عبدالصمد المنن لاعب الميرغني كسلا الذي وقع مع الهلال عقدا في التسجيلات الماضية – يقدم الابداع كله مع الميرغني كسلا في دوري النخبة التأهيلي.

· المنن مع شيخو …اضافة الى عبدالرؤوف وصلاح عادل …وبوجبا وابوعاقلة …ح يعملوا عمائل.

· محمد الحاج كومي لاعب الاهلي شندي ايضا لاعب (فلتة) – تم اختياره للمنتخب الوطني وهو يستحق ذلك.

· كومي يا ناس الهلال.

· فتحوا عينكم قدر الريال.

· اتمنى من الاهلي شندي اسحاق آدم وكومي.

· واتمنى من الخرطوم الوطني عودة الشيخ وتسجيل زرياب يوسف والحارس الشاب محمد عبدالله جرو.

· واتمنى تسجيل عبدالصمد المنن.

· يمكن بهذه الاسماء ان نكتفي محليا.

· في الدوري التاهيلي دائما توجد مواهب وعناصر ممتازة.

· ارنق جاء من التأهيلي.

· والمنن يقدم السهل الممتنع مع الميرغني في التأهيلي.

· مهمة جدا العناصر التى تلعب تحت السن.

· ……

· ترس اخير : هلال الملايين دخل مباراته امام حيدوب عمل (15) مليار …هسع دا يقولوا عليه شنو هلال الملاير!!!