لو عاوزين تحلوا مشاكل بورتسودان رسلوا ليهم (الهلال)

صابنها

محمد عبدالماجد

لو عاوزين تحلوا مشاكل بورتسودان رسلوا ليهم (الهلال)

• الهلال اينما حل نفع.
• ادهش.
• انتصر.
• احاطوه اهله بالحب والمودة في كل مكان.
• هلال السودان ليس هو هلال ام درمان ..هو هلال ابوحمد وهلال النهود وهلال عطبرة وهلال الجنينة وهلال كسلا.
• هلال الملايين.
• هلال الحركة الوطنية.
• هلال الشعب.
• هلال نادي الخريجين الاوائل.
• لم ننفك بعد من دهشة استقبال اهالي ابوحمد للهلال – حتى تفاجآنا بما فعلوه اهالي النهود عند زيارة الهلال لمدينتهم.
• بقينا نتلفت من (الفرحة) – متل كراسي الحفلة.
• نتمغى بثقتنا فيه.
• بحبنا له.
• اذا كانت سنار هى عاصمة السلطنة الزرقاء ..ملوك سنار اقاموا رواق السنارية – الحضارة والتاريخ …النهود يمكن ان تكون عاصمة السلطنة البيضاء.
• مدينة العلم والعلماء والهلال.
• ببشرتهم السمراء الجميلة – وسودانيتهم الفخيمة – خرجوا يستقبلون الهلال وهو يطلع عليهم (بدرا).
• ما شاهدناه من حضور جماهيري لتمرين الهلال في النهود لا نشاهده حتى في ام درمان عاصمة الهلال الوطنية في المباريات الرسمية.
• الناس ديل شككونا في حبنا للهلال …تجاوزنا….عدونا بي غادي.
• قالوا لينا انتوا ما بتعرفوا شنو؟
• ولا عارفين قيمة الهلال الحقيقية.
• فاجآنا النهار – فاجآنا الهلال في النهود.
• الزول بدون هلال شِن عِزة؟
• ديل اهلي – بكل هذا الحب والطيبة والبشاشة والكرم يستقبلون الهلال.
• ناس زي الله ما خلقهم – بتلقائية مطلقة يقابلون الهلال.
• الهلال ليس غريبا عليهم – الهلال (القومي) يتشكل من هذه المدن نزار حامد – حسين االنور (كسلا) ..سليم برشاوي – مؤيد عابدين (عطبرة) – السمؤال ميرغني (النهود) – عبدالرؤوف (بورتسودان) – ابوعاقلة (الدلنج) – ياسر مزمل (شندي) – الطيب عبدالرازق (كوستي).
• هو فعلا هلال السودان – انظروا لتشكيلة المنتخب السوداني.
• الآن احصحص هذا (الحب) – نشيل وندسدس فيه زي حجارة البطارية – تعضيها – وتختها تحت الزير – عشان تسمع (عالم الرياضة) – الساعة اتنين ونص.
• الآن اكتشفنا سر هذا العشق – والهلال يغادر الى (ابوحمد) – ابو حمد تقيف على رجل واحدة – تطلع كلها شيبا وشبابا …نساء ورجال – وأطفال في استقبال الهلال.
• شفنا العيد في ابوحمد قبل ما هلال ذو الحجة يطلع.
• في ابو حمد شافع يرابط امام الفندق الذي نزلت فيه بعثة الهلال – اليوم كله – عشان يشوف عبداللطيف بويا …ويتصور مع محمد عبدالرحمن.
• الهلال يغادر الى النهود – كردفان كلها تطلع في الشارع – حتى الحلال والقرى التى يمر بها (بص الهلال) تطلع في استقبال الهلال.
• بس عشان يشوفوا بص الهلال.
• يرفعوا ليهم ايديهم ..ويردوا ليهم لاعبو الهلال التحية من وراء القزاز.
• الزول بدون هلال شِن عِزة؟
• هذا الشعار الذي هتفت به جماهير كردفان …لا نقول جماهير النهود ..لأن الجماهير جاءت من كل الانحاء لمشاهدة الهلال…هذا الشعار يجب ان يكتب في استاد الهلال.
• اولتراس الهلال ننتظر منهم بطريقتهم البديعة ان يحملوا هذا الشعار ويكتبوه في اول مباريات الهلال الافريقية في الموسم الجديد.
• الزول بدون هلال شِن عِزة؟
• الناس ديل ببساطتهم بذكاءهم الفطري لخصوا أي شيء.
• شوفوا الحكمة في هذا الكلام..
• نحن طلعنا قاعدين ساكت.
• هل يمكن ان يكون هناك شعار اجمل من هذا القول الذي خرج من الجماهير؟
• الزول بدون هلال شِن عِزة؟
• الله عليكم.
• كأني بهذا الشعار اسمع بينكم محمد وردي يغني (وكانت ساعة النصر في اكتمال الهلال).
• لاعبو الهلال عند مواجهة فريق حيدوب في النهود لا بد ان يحملوا الحلوة والزهور ويوزعوها على هذه الجماهير في المدرجات.
• امنحوهم قمصان الهلال واهدوا لهم بعض الكرات.
• ردوا لهم هذا الحب بمثله.
• لن نقول او بأحسن منه …لأنه لا يوجد احسن من هذا الذي شاهدناه من اهالي النهود وهم يستقبلون الهلال.
• عرفنا السر … (ما جانا عشقك من فراغ لا نحنا غنيناك عبط جرح الوطن ختالنا خط ختالنا قول ما منو نط و الليله يا موت يا حياه).
• نحن فاكرين الموضوع دا حقنا برانا.
• قايلين الحكاية دي مزودنها نحن شوية.
• لقينا الناس في ولايات السودان بقولوا لينا بتعرفوا انتوا شنو في حب الهلال؟
• نحن زمان كنا (طلبة) – كنا بندك (المذاكرة) عشان نحضر مباراة الهلال.
• تاني يوم يجلدونا في طابور الصباح.
• هسع لقينا في ناس كبيرة ومسؤولة ..بتدك أي شيء …ويخلوا العيد ذاتو عشان يستقبلوا الهلال.
• لا بعرفوا كورونا.
• لا مطر.
• لا ظروف اقتصادية صعبة.
• كلهم بطلعوا عشان يستقبلوا الهلال ويرحبوا به.
• عشق زي دا نحن ما شفناه.
• ولا لاقنا قبل كدا.
• خلوني انا.
• اسألوا الجهاز الفني البرتغالي للهلال.
• اسألوا ريكاردو قولوا ليه جنس دا انت شفتوا في البرتغال او في انجلترا؟
• الخواجات مشوا ابوحمد من الدهشة لبسوا الجلابية والعمة وركبوا في (المركب).
• مشوا النهود لقيناهم وسط الناس – برقصوا في الرقصات الشعبية بتاعة اهلنا في كردفان.
• شوفوا البلد دي ممكن تحصل فيها نزاعات.
• وخلافات.
• وحروبات.
• وضرب.
• ونهب.
• وقتل.
• ممكن نختلف في أي شيء – في حمدوك – في الميرغني – في الصادق المهدي.
• اصلو ما نتفق..إلّا في الهلال.
• يا هو دا الهلال.
• الزول بدون هلال شِن عِزة؟
• القال عليك هلال (الملايين) ما كذب.
• ناس الاتحاد العام شغالين ترضيات…اي منطقة عاوزين يكسبوها بودوا ليها الهلال.
• الولايات بتطلب الهلال بالاسم.
• مرة نمشي ابوحمد.
• ومرة النهود.
• والناس في ابوحمد وفي النهود وفي الخوى ذاتها – فرحانين بالهلال.
• نسوا همومهم ..نسوا أي شيء ..وطلعوا يستقبلوا الهلال.
• الزول بدون هلال شِن عِزة؟
• في استقبال الهلال شفنا عربات…(تقول ما في ازمة بنزين).
• وشفنا خيول.
• وشفنا جمال.
• حتى الجهاز الفني للهلال ركبوا الخيول والجمال.
• حاجة ما بتقدر توصفها إلّا الصور.
• الهلال شال (العيد) ومرق بيه.
• خلى لينا الخرطوم مسيخة – زي الما ضابحين.
• انتوا يا ناس الحكومة في حاجات كتيرة غلبتكم.
• الحاجات الما بتقدروا عليها ودوا ليها الهلال.
• رسلوا الهلال الى بورتسودان.
• الهلال بحل ليكم مشاكل بورتسودان – الموية والكهرباء والكورونا.
• حتى النزاعات القبيلية الهلال قادر على ان يتغلب عليها.
• الزول بدون هلال شِن عِزة؟
• الهلال بيوحد البلد دي كلها.
• بلمها.
• وبجمعها.
• الهلال غير.
• الهلال حاجة تانية.
• شفت استقبال المريخ في نيالا ..افتكرت المريخ انحسب من كاس السودان.
• افتكرت المريخ ما سافر من الخرطوم.
• تقول المريخ مشى نيالا في (تلغراف).
• فرق كبير بين الهلال والمريخ.
• حدث ذلك للمريخ في حلفا الجديدة …عندما غادر المريخ الى هناك في حين خرجت ولاية نهر النيل وولاية الشمالية في استقبال الهلال.
• ويحدث الآن نفس الشيء.
• رغم ان نيالا مدينة كبيرة …ولا تقارن من حيث السكان والوضع الاقتصادي بمدينة النهود.
• نيالا يمكن ان تكون المدينة الثالثة او الرابعة من حيث القوة الاقتصادية في السودان ومن حيث السكان ايضا.
• مع ذلك النهود استقبلت الهلال بجماهيرية لم نشهد لها مثيل – في الوقت الذي استقبل المريخ في نيالا عدد محدود من الناس ..لا يمكن حتى ان نطلق عليهم اسم الجماهير.
• الزول بدون هلال شِن عِزة؟
• فرق.
• هلال الملايين.
• صاحب المقام الرفيع.
• هلال الحركة الوطنية.
• نادي الخريجين الاوائل.
• هلال كرومة.
• هلال وردي وعثمان حسين.
• هلال يوسف مصطفى التني (في الفؤاد تراعاه العناية بين ضلوعي الوطن العزيز) احد الذين اسسوا الهلال في عام 1930.
• الزول بدون هلال شِن عِزة؟
• والله الهلال دا عز.
• الواحد (استقبال) ساكت بيشبع.
• في كرة القدم ما في اعظم من (الجماهير)..والجماهير الهلالية ها هي تفعل ما لم يفعله غيرها في مشارق الارض ومغاربها.
• شكرا جمهور ابوحمد.
• شكرا جمهور النهود.
• نحن منكم بنتعلم.
• ومنكم بنعرف عظمة الهلال.
• اللهم ادمها نعمة.
• اللهم دوري وكاس.
• وبطولة افريقيا ان شاءالله.
• طالما نملك هذه الجماهير سوف نصل.
• سوف نحقق الاماني …والاحلام.
• نحن نملك اعظم ما في كرة القدم.
• نملك الجماهير.
• والجماهير لا تأتي من فراغ.
• الزول بدون هلال شِن عِزة؟
• ………
متاريس
• الهلال وهو يلعب امام حيدوب …يجب ان يحترم هذا الفريق الذي خرج من هذه المدينة العظيمة.
• ويجب ان يرد الهلال الدين لجماهيره بعرض يمتعهم ويسعدهم.
• اعملوا ليهم أي شيء في كرة القدم.
• وما تقصروا مع هذه الجماهير.
• النهود مدينة في قلب الهلال.
• مدينة جابت السمؤال ميرغني ما غريب عليها ذلك.
• الزول بدون هلال شِن عِزة؟
• البشوف استقبال جماهير نيالا للمريخ …يقول الجماعة ديل طبقوا ارشادات وزارة الصحة بحذافيرها.
• طبقوا (العزلة).
• خلوا الهلال يمشي نيالا … شوفوا البلد دي بحصل فيها شنو؟
• ……………………
• ترس اخير : ناس رمضان عجب ومحمد الرشيد لو شافوا استقبال الهلال في النهود …ما بقعدوا يوم في المريخ.