(64) تمريرة ومعاها (كيكة) كمان!!

صابنها

محمد عبد الماجد

(64) تمريرة ومعاها (كيكة) كمان!!

لو في زول حكى لي الكلام دا ..ما كنت بصدقو.

· ولو قريتو في حتة بقول دي زيادات ساكت.

· نحن بنتابع الدوري الانجليزي …والايطالي ..وما بنخلي حاجة لي برشلونة وريال مدريد.

· بنسك فيهم …ونراقب ليهم زي (صواني الخبيز) وقت تكون في الفرن.

· بنتابع يورو 2020 وبنساهر لكوبا اميركا لغاية الساعة اتنين صباحا وثلاثة.

· لكن زي دا ما شفنوه.

· الواحد من السهر لمتابعة مباريات كوبا امريكا ..تقول شغال ليه في شركة أمن.

· احدى صفحات الهلال في الفيس بوك عرضت مقطع فيديو لمباراة للهلال اظنها كانت امام الاهلي مدني ..المباراة كانت منقولة حسب الفيديو المعروض في قناة (art).

· شوفوا نحن كنا وين؟

· ووصلنا وين؟

· مبارياتنا في بداية الالفية الثانية كانت تنقل في قنوات (art)…هسع مبارياتنا يجيبوها ليك في قناة الملاعب متل (الملاح البايت).

· يمين لو ما عارف المباراة تفتكر النقل حملة لرش البرك والمياه الراكدة.

· يا ناس قناة الملاعب عليكم الله المباراة وقت ما قادرين تنقلوها لينا زي الناس على الهواء ..جيبوها لينا في الاعادة ظابطة.

· دي صعبة دي؟

· ما معقول نفس الجلطات والغلطات التى تحدث في النقل المباشر تحدث في الاعادة.

· والإعادة ذاتها يجيبوها ليك بعد (45) يوم – تقول عاوزين يدخلوا بالمباراة صندوق.

· يا ناس قناة الملاعب ..انتوا لو ما قادرين على النقل المباشر وما عندكم امكانيات ..انسحبوا من الموضوع دا.

· ممكن نسمع هذه المباريات في الاذاعة ..احسن لينا من (التلتلة) دي ..بالله الواحد وقت يقعد يتابع ليه مباراة للهلال في قناة الملاعب تقول راجي ليه نتيجة فحص.

· مرة الصورة تقطع.

· ومرة ترجع الصورة ويقطع الصوت.

· ومرة يجروا الزمن.

· ومرة يغيروا النتيجة.

· ومرة ما ينقلوها من الاساس.

· وما يعتذروا.

· ولا يقولوا شيء.

· وفوق دا يجيبوا لينا معلق على المباراة يخلي كل هذه العيوب ويقعد يتكلم عن عيوب الاتحاد.

· او عن لوحة التغيير.

· لوحة الزمن البدل الضائع.

· انتوا زمنكم فوق للشاشة …ما ظابط.

· عليكم الله ما تتكملوا ساي.

· ارجع لمقطع الفيديو الذي عرض على احدى صفحات الهلال في مواقع التواصل الاجتماعي.

· ما شاهدته في هذا المقطع …والله ما شاهدته في الدوري الاسباني.

· ولا شفتوا حتى في مسلسل (كباتن ماجد).

· في هذا الفيديو نقل لاعبي الهلال الكرة بينهم (64) بعد ان حسبت عدد التمريرات قبل ان يسجل اللاعب الذي كان يرتدى الفانلة بالرقم (13) الهدف الخامس للهلال.

· نتيجة المباراة قبل التمريرات كانت 4 / 1 في الشاشة …وكان لاعب الهلال السابق صالح عبدالله بالرقم (25) واقف في الخط عاوز يشارك.

· مدرب الهلال كان البرازيلي ريكاردو ..ولاعبو الهلال من خلال ذلك المقطع الذي عرضته احدى صفحات الهلال في مواقع التواصل الاجتماعي كان منهم هيثم مصطفى ومهند الطاهر وداريو كان وحمودة بشير ويوسف محمد وريتشارد جاستين وكلتشي.

· وهذا يعني ان هذه المباراة التى كانت تقام في استاد الهلال كانت في موسم 2007 – 2008 او موسم 2008 – 2009م.

· تتخيلوا عدد التمريرات وصل الى (64) مرة قبل ان يسجل الهلال الهدف الخامس.

· ممكن الموضوع دا يحصل؟…عشان كدا نحن بنقول (ما جانا حبك من فراغ).

· حصل شفتوا حاجة بالشكل دا قبل كدا؟

· 64 تمريرة…انتهت بهدف للهلال.

· عن التمريرات وعن العدد القياسي فيها قرأت هذا الخبر : (بحسب صحيفة “آس” الإسبانية، فإن عدد تمريرات لاعبي برشلونة ضد غرناطة تجاوز 1000 تمريرة (1005) منها 921 تمريرة صحيحة، ونسبة استحواذ وصلت إلى 82%، وهو ما يوضح فلسفة سيتين التي سبق وطبقها في بيتيس وتعتمد على التمرير والاستحواذ، وهي أيضا نفس فكر بيب جوارديولا مدرب البارسا السابق من 2008 إلى 2012، والمدير الفني الحالي لمانشستر سيتي الإنجليزي. وهذه المرة الأولى التي يصل فيها عدد تمريرات لاعبي البارسا في مباراة واحدة لهذا الرقم منذ عام 2012، حينما واجه الفريق ليفانتي بتاريخ 25 نوفمبر 2012، بـ1035 تمريرة منها 950 صحيحة، وذلك في عهد المدرب الراحل تيتو فيلانوفا. وبخصوص الرقم القياسي لعدد التمريرات في تاريخ النادي خلال لقاء واحد، فإنه كان في عهد جوارديولا بمواجهة ليفانتي بتاريخ 11 مايو 2011 ضد ليفانتي برصيد 1046 تمريرة منها 988 تمريرة صحيحة).

· ما اريد ان اقوله هنا اني اتحدث عن تمريرات حدثت مرة واحدة دون ان يحدث قطع فيها …فقد انتهت تمريرات الهلال التى وصلت في خلال دقيقتين و40 ثانية الى (64) تمريرة بهدف سجله الهلال في شباك منافسه.

· 64 تمريرة ومعاها (كيكة) كمان!!

· هذه التمريرات تؤكد عظمة هلال 2007 الذي كان يلعب له المعز محجوب وعلاءالدين جبريل ويوسف محمد وريتشارد ودايروكان وحمودة بشير ومهند الطاهر وهيثم مصطفى ومساوي وعمر بخيت وكلتشي وقودوين ومعتز كبير.

· هذا جيل عظيم للهلال ..قدم (كرة قدم) حقيقية ..وكانت التمريرات فيه توزع (موسيقيا) وكانت الاهداف عبارة عن (سينما).

· اعود لذاك الجيل واذكر تلك التمريرات وانا اتمنى ان يحقق هذا الجيل نفس الارقام التى كان يحققها هلال 2007 بل ننتظر منهم المزيد خاصة في جانب البطولات الخارجية.

· هلال 2007 حقق بطولة الممتاز خمس مرات على التوالي…وادهش العرب والأفارقة وجعل القارة كلها تتحدث عنه.

· امامنا الآن فرصة لأن نتجاوز الارقام التى حققها الهلال في فترة 2007 وحتى 2010 حيث كان يمكن للهلال ان يحقق بطولة خارجية لولا الاخطاء الادارية القاتلة.

· الهلال في تلك الفترة هزم الاهلي المصري 3 / صفر ..وقد كان هذا الانتصار على جيل في الاهلي يعتبر هو الجيل الافضل في تاريخ الاهلي المصري.

· الهلال حينها اخرج الترجي من مرحلة المجموعات …وكان يمكن ان يفوز بالبطولة الافريقية مع ترصد الحكام لولا الصراعات والخلافات الادارية التى ابعدتنا من ذلك.

· هذا الجيل اذا وجد اضافات قوية في التسجيلات القادمة خاصة في جانب المحترفين الاجانب يمكن ان يفعل العجب.

· نملك عناصر ممتازة …تحتاج الى ان تلعب مع بعض فترة وقد تحقق لهم شيء من ذلك في الهلال وفي الفريق القومي ايضا.

· اوصي لاعبي الهلال في مباريات الهلال القادمة وبعد التأمين على نتيجة المباراة ان يحرصوا على تحقيق ارقام قياسية جديدة.

· حققوا ارقام خاصة بكم.

· نريد من الغربال ان يكسر الرقم القياسي المسجل باسم الوطنيين في سجلات لقب هداف الدوري..حتى لو كان الرقم المكسور رقمه هو.

· وعاوزين نشوف من ناس فارس وسمؤال وبوجبا وارنق وعبدالرؤوف عدد التمريرات يتجاوز (64) تمريرة قبل التسجيل.

· عاوزين ارقام جديدة.

· في عدد التمريرات.

· وفي الاهداف.

· وفي الشباك النظيفة.

· اعملوا ليكم (ارقام).

· لكن قبل هذا عليكم بالحرص على ان لا تفقدوا نقطة …وان تعيدوا بطولة الدوري الممتاز للهلال بعد ان فقدها الهلال في المواسم الثلاثة الماضية بسبب التخبطات الادارية.

· الآن يتصدر الهلال للدوري الممتاز بفارق نقطة واحدة من المريخ نتمنى ان يتوسع هذا الفارق في مباريات هذا الاسبوع باذن الله وتوفيقه والهلال يلعب غدا امام الشرطة القضارف ويلعب المريخ اليوم امام الخرطوم الوطني.

· لا يهمنا ما يحدث في مباريات المريخ …علينا ان لا نقف في نتائج مباريات المريخ كثيرا.

· ركزوا في مبارياتكم …الكورة الآن في ملعبكم ..مصيركم ..بطولتكم المحببة في ايدكم.

· ما تفرطوا.

· في الموسم الماضي تقدم الهلال على المريخ بفارق (5) نقاط …وجاء الهلال وخسر هذا الفارق.

· فارق (النقطة) ما حاجة.

· والدوري لسه طويل.

· تبقت للهلال في الدوري (11) مباراة …وهو نفس عدد المباريات المتبقية للمريخ.

· المريخ بي طريقتو.

· نحن من 11 مباراة عاوزين (33) نقطة باذن الله وتوفيقه.

· وعاوزين الغربال يكسر رقم الهداف.

· وعاوزين الشعلة يدخل في التنافس.

· وعاوزين شباك نظيفة للهلال.

· وعدد جديد في التمريرات.

· عاوزين حاجات كتيرة.

· عاوزين نشوف الهلال غير.

· اوعكم من الاستهتار.

· اوعكم من الغرور.

· المشوار لسه طويل.

· وما في حاجة مضمونة في الكورة.

· ……….

متاريس

· ي

· بكرة يلعب ان شاءالله الهلال امام الشرطة.

· والشرطة بتاعة (كماين).

· كونوا حاضرين.

· وعارفين.

· الشرطة تمتلك حارس صغير وممتاز اسمه ابوعشرين على ابوعشرين حارس الهلال.

· حارس عمره 18 سنة ..لكن عرف يحافظ على شباكه امام الهلال والمريخ وعدد من الاندية الكبيرة.

· احسموا من بدري.

· وما تفرطوا تاني في الصدارة.

· ما عاوزين نركز مع المريخ.

· خلونا في روحنا.

· انتصروا بس.

· ..

· ترس اخير : ماشي عليكم.