موش حا نخسر النقطة

في السلك

بابكر سلك
موش حا نخسر النقطة

*نلتقي اليوم بأهلي
القاهرة
*المباراة تعني لنا الكثير
*نحتاج عبرها أن نرد عملياً على ذلك الفرعون الأحمق الذي وصفنا بأندية الدرجة الثالثة
*نحتاج عبرها لمسح الصورة المهزوزة التي ظهرنا بها في المجموعات
*نحتاج عبرها لاستعادة الثقة في أنفسنا
* ونحتاج عبرها لإثبات الذات
*نؤديها هجومية
*فالهزيمة لن تسلبنا نقطتنا الوحيدة
*ولأن المباراة تعني للأهلي الكثير
*لن يأتي بتسعة لاعبين من الصف التاني كما فعل صن داونز أمس
*هذا اليوم يجب أن يكون يوم المريخ على وجه العموم
*ويوم تيري وبكري والجزولي على وجه الخصوص
*نهاجم وبس
*نقطتنا يا زدناها يا جينا حازمنها
*ما بنخسرها
*وحازمنها دي ما تودوها بعيد
*المهم
*الفينا مشهودة
*والفيفا مشغولة
*الجوابات الوصلتها أيام كانت في عز شبابها ما وصلتها
*والعشاق كتاااار
*وسعيد الحظ واحد
*في ناس حب الفيفا ليهم
*زي حب الأميرة السمراء للهلال
*حب من طرف واحد
*وفي الآخر
*جميعنا على رصيف الانتظار
*كان لزومو شنو؟
*٢٠١٩ جمعية مزورة
*نصاب لم يكتمل
*نظام مفصل على سوداكال
*ومعاكسات مهدت لسوداكال الجلوس على التلة لليوم
*ولمتين ما معروف
*إقحام للاتحاد
*استقطاب لبعض منسوبيه
*تكوين لجان
*استلام قوائم
*ووصل الأمر للفيفا
*جابت خارطة طريق
*برانا حشرنا الفيفا في شأننا الخاص
*بقى شأننا مرهون بموافقة الفيفا
*يبقى لو الفيفا في خارطة طريقها قالت على أن يتم الأمر برعاية سوداكال
*تبقى رعاية كريمة
*والراعي واعي
*ولو ما قالت كده تبقى جمعية يوم المسرح العالمي يجب الاعتراف بها
*المهم خرج الموضوع من يدنا ودخل في أيدٍ أمينة
*وننتظر لنرى نتاج حماقاتنا السالبة السابقة
*أيها الناس
*ما الذي يحدث في دولة كرة السلة السودانية والولائية؟؟؟؟
*ما الذي يحدث يا سعادة رئيس المجلس الأعلى؟؟؟
*هي ملفات يجب فتحها في زمن منفتح جداً ويسع الجميع ويشتاق للحقائق
*ابقوا معنا
*المهم
*أبو الهل جمع النقطة الرابعة
*أربع نقاط من أربعة درونات
*نقطة الدرونات ثابتة زي نقطة القونات
*وأصبح لصن داونز تلطاشر نقطة
*لو انفصل داونز عن صن
*كلو واحد بطلع ليهو بست نقاط ونص
*ست نقاط ونص دي في المجموعة إياها عشة الجبل ما جمعتها
*يبقى حا يصعد من هذه المجموعة صن، وداونز
*أيها الناس
*ابقوا عشرة على المبادئ
*الدولاب لو دخل بالباب ما بطلع بالشباك
*والإصرار على إخراجه بالشباك يطيل عمر الدولاب بالغرفة
*يبقى افتحوا الباب وشيلوا الدولاب مع بعضكم
*بس ما تتفتح ضلفة
*تقوموا تختوا الدولاب وتتخاتفوا الجواهو
*أيها الناس
*إن تنصروا الله ينصركم
*أها
*نجي لي شمارات والي الخرتوم
*كان شفت يا والينا
*شعب كسلان بقولوا علينا
*سمعت بناس أب تلة يا والينا
*قالوا زماااان
*للملك جاء ماري لقى الوزير والجنود سايقين ناس أب تلة
*الملك قال ديل مالهم
*الوزير قال ليهو
*ديل ناس أب تلة قاعدين في مملكتك دي ما بنتجوا أصلو سايقنهم نكتلهم
*الملك قال ليهم ما تكتلوهم دخلوهم السجن وادوهم قرقوش وصفيحة موية يبلوا وياكلوا
*ناس أب تلة قالوا للملك ده منو الببل ليك القرقوش؟ارح اقتل ياخ
*الملك خلاس بلوا ليهم القرقوش وختوا ليهم في قداديمهم الشينات ديل
*ناس أب تلة قالوا للملك وده منو البمدغ ليك؟ ارح اكتل ياخ ارح
*نحن بانتظارنا للحكومة أن تعمل وتنتج وتحصد وتبل وتمدغ وتلوك وتبلع لينا
*ما ناس أب تلة بقينا؟؟؟؟

سلك كهربا

ننساك كيف والكلب قال كان راجين الحكومة براها تعمل الترابة في خشومكم يا ناس أب تلة
وإلى لقاء