العصمة عند (جنوب افريقيا) ..المنتخب والنادي!!
صابنها
محمد عبد الماجد
العصمة عند (جنوب افريقيا) ..المنتخب والنادي!!
• مرات بسمع زول يقول لي الدنيا دي ضيقة شديد!!
• بقول ليه كيف يعني؟
• بقوم الزول دا يضرب لي امثلة – عشان يثبت لي ان هذه الدنيا ضيقة شديد.
• أنا قاعد أقول ليه والله ناس (السليخة بنت عيسي) عندهم حوش – تلعب فيه كورة!!
• ضيقة كيف يعني؟
• وعندهم مزرعة.
• وعمارة.
• ضيقة دي علينا نحن!!
• الزول بحاول ويجتهد عشان يشرح لي ويثبت لي ان الدنيا ضيقة.
• وأنا ما شغال بيه كتير.
• ما بحب الكلام الكتير في (الضيق).
• بقول لي : مرة عندنا قريبنا غرق في نهر عطبرة.
• تعرف لقوا (الجثة) وين؟
• بقول ليه وين؟ في ابوحمد؟
• بقول لي ابدا لقوا الجثة في (روما).
• قلت ليه كيف دي؟
• الزول دا غرق ولّا حرق.
• قال لي : ما قلت ليك الدنيا بقت ضيقة.
• ما فهمت حاجة.
• عندي (نضارة) مكسورة – عشان كدا الكلام مرات اسمعو ومرات ما اسمعو.
• ما عارف علاقة (النضارة) بالسمع شنو؟
• المهم – ما تقيفوا لي في أي حاجة.
• زولكم عشان يشرح لي اكتر – قال لي تعرف السندوتش البتأكل فيه دا من وين؟
• نظرت ليه وهو في ايدي …قلت ليه من وين يعني؟
• قال لي من كافتريا في واشنطن.
• قلت ليه عليك الله انت من واشنطن جايب لي سندوتش فول!!
• عينك في (الكنتاكي) وتطعن في (الفول).
• ما ترحومنا شوية من الفول.
• قال لي بس عشان تعرف الدنيا دي ضيقة شديد.
• الحادث يكون في شارع الستين…الاسعاف يصلك من لندن قبل ما يجيك من الخرطوم.
• أقول ليكم حاجة.
• الواحد لو اشترى (طبق البيض) من أسيوط في صعيد مصر ارخص ليه من ان يشتريه من بقالة في الحلة.
• زول تاني ممكن يقول ليك الدنيا ضيقة.
• تقول ليه كيف؟
• يقول ليك في واحد صاحبنا شال مني (شاحن موبايل) ، وما رجعوا – لاقوه اخوى بالرضاعة في مومباي بعد 7 سنوات قال ليه انت شاحن الموبايل وديتو وين؟
• ما في حاجة بتروح ساكت.
• الدنيا ضيقة.
• تأكيدا على الكلام دا – السودان سوف يواجه الأيام القادمة منتخب جنوب افريقيا في التصفيات المؤهلة لامم افريقيا في الكاميرون.
• وبعد 72 ساعة من تلك المباراة سوف يواجه الهلال فريق صن دوانز من جنوب افريقيا في مرحلة المجموعات.
• شوف ضيّق الدنيا دي كيف؟
• مصيرنا بقى في يد جنوب افريقيا.
• منتخب.
• وفريق.
• الواحد خايف يمشي الفرن يلقى (جنوب افريقيا) واقفة في الصف.
• محل ما نقبل.
• نلقى (جنوب افريقيا).
• السودان وجنوب افريقيا.
• الهلال وصن دوانز.
• وكل هذه المصائر سوف تحدد في خلال 72 ساعة.
• لاقكم ضيق اكتر من كدا.
• المنتخب السوداني فيه 12 لاعب من الهلال – اكثر من 7 عناصر منهم يلعب بصورة أساسية مع المنتخب الوطني.
• منتخب جنوب افريقيا على ما اعتقد فيه 4 لاعبين من فريق صن دوانز.
• مطلوب من المنتخب الانتصار على جنوب افريقيا حتى يتأهل الى نهائيات الأمم الافريقية.
• ومطلوب من الهلال الانتصار على صن دوانز حتى يتأهل الهلال من مرحلة المجموعات.
• العصمة في يد (جنوب افريقيا).
• الانتصار على منتخب جنوب افريقيا في تصفيات الأمم الافريقية يعني انتصار الهلال على صن دوانز.
• انتوا قاعدين تسمعوا بالمثل البقول صاد عصفورين بحجر واحد.
• اها الموضوع دا بي حجر واحد ممكن تصيد به (12) عصفور.
• دستة عصافير.
• الدينا ضيقة شديد.
• زمان أهلنا الكبار كانوا بقولوا هذا الكلام قبل الفضائيات والانترنت والعالم المفتوح.
• نحن وقت كنا صغار ويقولوا لينا الكلام دا كنا بنجيب ليه اطلس العالم.
• المحيط الهندي.
• والمحيط الهادي.
• والمتجمد الشمالي.
• عالم.
• ضيقة كيف يعني؟
• نحن كنا شايفين الكلام دا بعيد شديد.
• هسع الموضوع بقى حقيقي.
• العالم بقى قرية.
• العالم بقى غرفة.
• العالم بقى جهاز تلفون.
• عليكم الله في (ضيق) اكتر من كدا.
• يعني لازم تقوّموا للزول نفسو.
• الواحد نفسو بقى زي (الكورنر) الفي الكشافات.
• نرجع لمباراة المنتخب امس امام ساوتومي.
• لابد من الوقوف عند الجهاز الفني للمنتخب ..بقيادو فيلود وخالد بخيت.
• اعتقد ان دور الجهاز الفني للمنتخب في الوصول لهذه المرحلة كان كبيرا.
• المدير الفني للمنتخب الوطني بيلعب بتكتيك واضح والبصمة الفنية ما في زول بقدر ينكرها.
• كذلك عناية الاتحاد واهتمامه بالمنتخب بقيادة شداد وحسن برقو – واضح في أداء اللاعبين.
• في شغل.
• في اهتمام.
• الناس ما تخم الجماعة ساكت.
• وقت تحصل حاجة كويسة – يجب ان نقف عندها…ونتحدث فيها.
• مفروض ما نبقى متلقيين حجج ساكت.
• وبنكوس للمشاكل.
• تفصيلا – نقف عند الحارس ابوعشرين – وهو حارس فعلا كبيرا – كما قال معلق المباراة سوار الذهب هو من افضل الحرّاس في افريقيا.
• ما في كلمة.
• بس على ابوعشرين ان يقف في حكاية خروجه في بعض الأحيان من مرماه بشكل عشوائي.
• اوعك من (الاستهتار) – والتعامل مع (الكرة) بالقدم ومحاولة المرور من المهاجم.
• هذه الأشياء يمكن ان تكلف مرمامك كثيرا.
• بس في كل الأحوال في كل يوم بيثت ابوعشرين انه لاعب كبير وانه هيبة …وانه الأفضل على المستوى القاري.
• ابوعشرين – مية المية.
• في دفاع الهلال امس لعب كرشوم وامير كمال – وأنا شايف وجود ارنق كان مهم – على الأقل عشان يستعد لمباراة جنوب افريقيا ويدخل فورمة المنتخبات.
• هجوم منتخب جنوب افريقيا عاوز (ارنق) – مع ان كرشوم وامير كمال ظهرا في افضل حالة.
• لكن مباراة جنوب افريقيا غير.
• الأطراف سمؤال وفارس …قدما مستوى جيد – لكن ضعف المنتخب المنافس يجعلنا لا نعتبر المباراة مقياسا او معيارا.
• خط ووسط المنتخب اجاد فيه شيبوب بشكل واضح …وكذلك اطهر الطاهر وابوعاقلة وبوغبا.
• بوغبا يمكن ان يكون شكل اخر في الكرة السودانية … بس على بوغبا ان يتقن دقة التمريرات لأن أي كورة مقطوعة منه ممكن ان تشكل خطورة على مرماه.
• ابوعاقلة في كورة اتقطعت منه – شكلت خطر على مرمى المنتخب ..دي امام جنوب افريقيا قون.
• التركيز مهم.
• وضروري.
• على العموم وسط المنتخب كان ممتاز – مع التأكيد ان مباراة جنوب افريقيا عاوزة الشغيل.
• كدا بالاسم عديل.
• سيف تيري مع محمد عبدالرحمن قوة هجومية كاسحة – قادرة على ان تفعل أي شيء وان تدك دفاعات كل الأندية والمنتخبات.
• قلت الأندية – عشان الظروف ما معروفة.
• يمكن سيف تيري ومحمد عبدالرحمن يكونوا في فريق واحد.
• سيف تيري كان نجم المباراة الأول.
• طبعا الكلام دا ما بعجب المريخاب!!
• محمد عبدالرحمن هو المهاجم الأفضل الآن – مستواه يؤهله لأن يكون الأفضل في افريقيا.
• سجل محمد عبدالرحمن هدف – لو عادوه ليك مية مرة ما بتعرف جاء كيف؟
• وسيف تيري أيضا سجل هدف جميل – وتيري عنده مثل هذه الأهداف (عادة) – هو برع فيها واتقن مثل هذه الكور بصورة ممتازة.
• على العموم امل المنتخب السوداني اصبح كبيرا في التأهل – السودان قادر على الانتصار على جنوب افريقيا ان شاءالله.
• نتيجة مباراة اليوم التي سوف تجمع بين جنوب افريقيا وغانا سوف تكون في صالح المنتخب السوداني ان شاءالله.
• لن ينتصر منتخب جنوب افريقيا على غانا اليوم.
• علينا ان نركز على مباراة الاحد.
• وعلى الانتصار على جنوب افريقيا.
• والتأهل للنهائيات ان شاءالله.
• سوف نتأهل.
• ونتأهل.
• للنهائيات.
• وسوف يتأهل الهلال ان شاءالله من مرحلة المجموعات.
• ………..
متاريس
• عيد مقدم مع محمد عبدالرحمن وسيف تيري ممكن يكون مفاجأة لنتخب جنوب افريقيا.
• سيف تيري بهذا المستوى ما بقعد (كنبة).
• لكن ظهور عيد مقدم مهم امام غانا.
• ابوعاقلة رجع.
• وعاد.
• وعافية الوسط في عودته.
• ما بحب ولا بفضل اجتماع مجالس الإدارات مع الاعلام.
• أي زول يشوف شغلو.
• الإدارة تشتغل.
• والاعلام يشتغل.
• بدون ما يكون في تنسيق وترتيب.
• كدا الصورة بتكون واضحة.
• وحتى النادي يمكن الاستفادة كدا اكتر.
• احسن من (التنسيق).
• الهلال مفروض في التسجيلات القادمة على يسجل ليه 5 عناصر – على الأقل.
• في حاجة لاضافات جديدة.
• طرف الأهلي الخرطوم المصري …لاعب ممتاز.
• وهو لاعب (دولي).
• فليود ما بختار ساكت.
• كرشوم لا اظن ان الهلال في حاجة ليه.
• كذلك يجب ان يركز الهلال في العناصر التي تلعب تحت السن.
• ……….
• ترس أخير : موضوع المريخ وسيمبا وصل وين؟