فورموزينهو ام فوز موز تمر هندي

صابنها

محمد عبد الماجد
فورموزينهو ام فوز موز تمر هندي

• قبل كدا قلت ليكم الكلام – لكن انتوا مشكلتكم ما بتسمعوا الكلام.
• ولا بتحفظوا الحاجات البقولها ليكم.
• رأسكم قوي زي الحجر.
• شغالين على كيفكم.
• مرة عملوا لينا شارع زلط في الحلة – ناس الحلة عملوه (حوض سباحة).
• انتوا قايلين قوة الرأس دي طالعة من فراغ.
• مرة جابوا لينا مدرب اجنبي (مشلخ) شلوخ عراض كدا.
• مدرب (برتغالي) – (بصلي) كدا.
• نحن اتهامسنا فيما بيننا – وقلنا اول مرة نشوف لينا مدرب (اجنبي) مشلخ كدا.
• والله دا لو جايبنو من (البطانة) ما بكون بهذه (الشلوخ) العراض.
• دي ما شلوخ زول (اجنبي) – دي شلوخ زول قاعد في البلد دي من زمن حفروا البحر.
• عندنا جدنا شارك في حفر البحر – وقت يجيبوا ليه (سمكة) بيأكلها بي شوكها.
• المهم المدرب دا قاعد يتكلم لينا في المحاضرة ساعة ونص ، ونحن ما فاهمين أي شيء في المحاضرة.
• ما فهمنا كلمة في المحاضرة.
• بقول في شنو ما عارفين؟
• الحاجة الوحيدة التي فهمناها في المحاضرة ، هي عندما قال لمدير الكورة املأوا لي (الصبارة) دي عصير.
• دي الحاجة الوحيدة الكان بقولها في العربي.
• باقى الكلام حقو كلو (برتغالي).
• بصلة واحدة ما فيه.
• المهم حضرنا المحاضرة ، وطلعنا من غرفة الملابس – على أساس ندخل الملعب.
• زمن ذاتو ما كان في حاجة اسمها غرفة الملابس.
• الاعبون كانوا بيلبسوا وراء (المزيرة).
• عاوزني اغشكم أنا.
• عاوزني أقول ليكم كلام ما حصل!!
• المهم طلعنا من غرفة الملابس …ودخلنا على الملعب – ونحن ما فاهمين أي شيء من المحاضرة.
• بنلعب الكورة الفي رأسنا.
• الكورة البنعرفها.
• القمنا بيها من تبينا.
• شيء قلع.
• وشيء خبط.
• وشيء دم للركب.
• لا في كرت اصفر بثبتنا ، ولا كرت احمر.
• البونية من الدقيقة السابعة بتدور.
• خبط صاح.
• العجاجة رابطة للسماء.
• كع.
• لبع.
• تح.
• خبط صاح.
• عندما محلل فني كان بحضر في المباراة – قال لناس الإذاعة عليكم الله هسع (العجاجة الرابطة) دي بتستحق ليها (دولار) واحد.
• دي عاوزة ليها مدرب اجنبي.
• الدولارات البصرفوها في (الجهاز الفني) لو صرفوها في (الردمية) الوراء… (العجاجة الرابطة) دي ما كان قامت.
• طبعا نحن كورتنا كلها (عجاجة).
• الكورة انتهت – واتغلبنا (تسعة).
• رجعنا من المباراة ، قلنا ما عاوزين تصريحات …ما عاوزين نتكلم للجرايد.
• ناس الجرائد ديل بتعاين مشاكل.
• بتاعين (شتل).
• اتغلبنا تسعة – عاد نقول شنو تاني؟
• يا زول المحاضرة قلت ليكم ما فهمنا فيها أي حاجة – كيف ما نتغلب تسعة.
• الإدارة قعدت مع اللاعبين بعد هذه الخسارة – وتوصلنا الى حل يتمثل في التعاقد مع (مترجم) نجيض – يترجم كلام المدرب للاعبين بصورة مبسطة وخفيفة.
• جابوا لينا (المترجم) شلخوه اكبر من شلوخ رئيس النادي.
• الزول دا شلوخه من كبرها في (شلخ) في (وش) الزول الجنبو.
• أنا بقول ليكم ما حصل.
• عاوزني اكذب عليكم.
• دخلنا غرفة الملابس …وحضرنا المحاضرة.
• المدرب ساعة ونص يحاضر فيني.
• ونحن نتلفت متل (القمري) وقت يسمع ليه صوت (متفرقعات).
• المدرب كمل كلامه – قبلنا على (المترجم) قلنا ليه الزول دا قال شنو؟
• المترجم قعد يشرع لينا.
• قال لينا المدرب دا قال ليكم ألعبوا (لبعي) ساكت.
• ما تنطنقعوا.
• نحن كمان (الطنقعة) بوصونا عليها.
• والله نطنقع لمن المباراة تخلص.
• بصراحة ما فهمنا كلام المترجم بعد (الطنقعة) دي – لكن قلنا ما نقيف في الحتة دي – قلنا ليه وبعد (اللبعي) قال شنو؟
• المترجم قال لينا : المدرب قال ليكم تطلعوا من الهجمة وتكتلوا ضلكم وقت الهجمة تكون عليكم – عشان المهاجم يقع في (التسلل).
• نحن بينا وبين نفسنا قلنا هسع الكلام دا عاوز ليه مدرب اجنبي.
• قول عاوز ليه مدرب اجنبي – عليكم الله الكلام دا محتاج ليه (مترجم).
• والله خسارة قروش ساكت.
• قلنا للمترجم الزول دا يردح ساعة ونص – قال شنو تاني؟
• المترجم قال لينا قال ليكم (ما تنصنقعوا ساكت).
• قلنا للمترجم – قادر الله هم الأجانب ديل بعرفوا (الصنقعة).
• المترجم واصل في كلامه وقال لينا : واعملوا (الشلعي).
• قلنا ليه يا زول (شلعي) شنو؟ انتوا مالكم عاوزين تجيبوا لينا الكلام.
• والله المدرب دا لا اجنبي ولا حاجة الزول دا لو بالغ يكون من (المنشية).
• ما اكتر من كدا.
• المترجم قبل على (الاستوبر) وقال ليه : الكوتش بقول ليك (اردم بس)
• يا زول دا مدرب شنو؟
• كمان (الردم) عاوز ليه مدرب اجنبي.
• قادر الله.
• انتوا جايبين لينا مدرب ساقط اعدادي (لغات).
• يا المدرب.
• يا المترجم.
• في حاجة غلط.
• والله نحن المرة الفاتت اتغلبنا تسعة وقت ما فهمنا من المحاضرة – هسع ح نتغلب (13) بعد الترجمة الملكلكة دي.
• كان تخلونا على الفطرة.
• تخلونا نلعب كورة (سليقة) ساكت.
• والله نحن من يجيبوا لينا سيرة (الخطة) بنطلع من الشبكة.
• يمين دي (ترجمة) زي ملاح البامية المفروكة بالرغيف.
• تدخل قطعة الرغيفة في صحن البامية ….الرغيفة تطلع في حتة والبامية تطلع في حتة تانية.
• كل حتة في حتة.
• هسع ناس الهلال جابوا ليهم طاقم (برتغالي).
• بتكون من (6) اشخاص.
• انتوا يا جماعة عاوزين تلعبوا الدوري السوداني بالبرتغاليين ديل.
• الموضوع ما بستاهل.
• ولا صعب كدا.
• ريكاردو فورموزينهو مدربا للهلال.
• والله أنا خايف وقت نحفظ الاسم تشيلوه.
• ريكاردو فورموينهو ساهل.
• ما مشكلة.
• بنحفظو ليكم.
• لكن باقية الطاقم والله لا بنحفظو ليكم ولا حاجة.
• نحفظ لينا اسم 6 برتغاليين ليه؟
• نحن عاوزين نقرأ لغات.
• عاوزين نحضر في اللغة البرتغالية.
• خلونا مع ناس محسن سيد.
• وكفاح.
• ومحمد الطيب.
• ما تصعبوا لينا الشغلة.
• فورموزينهو.
• مدرب اسمه فيه (موز).
• لو كان بدرب المريخ كنا قلنا يمكن.
• كنا لقينا لينا تفسير لنتائج المريخ.
• المريخ في المجموعات عندو نقطة واحدة.
• الموز أبو نقطة.
• والمريخ ابونقطة.
• انتوا عارفين المريخ دا ما بزيد في (النقطة) دي.
• 4 مباريات وعندهم (نقطة) واحدة.
• 4 مباريات والمريخ استقبل (10) اهداف.
• 4 مباريات والمريخ سجل هدف واحد.
• مدرب الهلال البرتغالي عشان تمشي معاه سموه فوز موزينهو.
• او فوز موز تمر هندي.
• الله يعدل الأمور.
• الله يصلحها.
• ويجيب العواقب سليمة.
• عندما مباراة مع صن دوانز.
• في ام درمان.
• ومباراة مع مازيمبي في ملعبه.
• وعاوزين 6 نقاط.
• او 4 نقاط ، على ان تكون النتائج الأخرى في صالحنا.
• ان شاءالله تظبط.
• والهلال يتأهل.
• ونمشي لي قدام.
• أقول ليكم الخلاصة.
• نحن كلنا ثقة.
• وكلنا تفاؤل.
• الهلال ح يتأهل ان شاءالله.
• ونتمنىة كمان المنتخب يتأهل.
• المريخ طبعا فرصتو معدومة.
• ناس المريخ هسع مركزين على الجمعية العمومية للمريخ.
• قنعوا من المجموعات.
• وقنعوا من الدوري.
• ودخل اللاعبين في اضراب.
• والجمهور عامل وقفات احتجاجية.
• يا زول الأوضاع صعبة.
• اصعب من أوضاع (الكهربة).
• غايتو يا ناس الكهربة ما بتخافوا فينا الله.
• والله مفروض الشعب ما يصبر.
• ولا يسكت على القطوعات دي.
• معقولة نحن في هذا الزمن الذي وصل فيه الناس للقمر …ونحن التيار الكهربائي ما وصلنا.
• الحالة صعبة.
• تقول الكهربة ماسكها سوداكال.
• الحاصل شنو؟
• سخنا شديد.
متاريس
• الهلال غالب الشموخ 6 / صفر.
• لكن بي صراحة كدا.
• بي امانة.
• الشموخ دا ما عاوز ليه مدرب اجنبي.
• دي محمد الطيب ممكن يعملها.
• وكمان 6 برتغاليين.
• ما معقول امام مازيمبي نحرس لينا هدف.
• وامام شباب بلوزداد نحرس لينا هدف.
• وامام الشموخ نجيب 6 اهداف.
• نعمل بيها شنو؟
• الكهربة.
• الكهربة.
• نشفتوا ريقنا.
• اطلعوا الشارع.
• الكهربة قاطعة.
• ………..
• ترس أخير : لو استمرت القطوعات بهذه الصورة في رمضان …حمدوك دا إلّا يشوف ليه بلد.